رواية عيلة الجيار الفصل الثاني عشر12بقلم سلسبيل احمد


رواية عيلة الجيار الفصل الثاني عشر12بقلم سلسبيل احمد

- انت بتعمل ايه؟
" رمى السجارة وبص لها "
= ابعدي عشان الدخان
- انت بتشرب سجاير ؟
= لاء
- طب امال ده ايه
= بجرب..
بصيت له بضيق و ربعت ايدي: وعجبتك؟

اتنفس بتعب: لاء

" ارتحت شوية ولكن مازالت مضايقه عشانه سندت على العربية جمبه "

- على فكره انا فهماك وفاهمه الى انت حاسس بيه وانك متلخبط و كل ده.. و شعور ان كل حاجه عليك بيسبب لك ضغط.. بس كل ده بسبب انك مش بتتكلم وتخرج الى جواك يا ادهم!

= عشان محدش هيفهم

- انت مجربتش.. جربني انا..
انا فهماك!

- انتي متعرفنيش قعدتي معايا قد ايه عشان تعرفيني اصلا او تعرفي اي حد فينا؟

= عمرها ما بتتحسب كده انا اقدر افهم مشاكلك وافهمك

رد بدون تفكير: تفهمي ايه بظبط يا فريده ؟؟ انا مثلا نص مشاكلي مع بابا ! عمرك هتفهمي ده ؟؟؟ هتفهميه ازاي؟؟؟

" فريده بصت له بعدم استيعاب من جملتة الى قالها ومكانتش متخيله انه يقولها حاجه زي دي.. معرفتش ترد ولا عرفت تعمل اي حاجه "

ادهم ادرك الى قاله بسرعه وقرب لها: فريده انا اكيد مش قصدي...

" بعدت عنه و سابته رجعت الحفلة وهي مش قادرة تستوعب انه قالها كده.. "

" فضلت قاعده على الترابيزة بصمت ومكانتش مركزه حواليها دماغها بتفكر في ابوها وبس! طول حياتها بتحاول تتقبل فكرة ان ملهاش اب ولا لحقت تشوفه بتحاول تتصالح مع فكرة انه مات في مصر.. و هي عايشه طول حياتها بره ! ملحقتش تعرفه او يتكلموا ولو لمره.. كانت بتحاول انها تتخطي كل ده وفي لحظه ادهم هد كل حاجه و وجعها "

زين بص لها: فريده انتي كويسه؟

ناديه: مالك يا حبيبتي سرحانه في ايه؟

ردت وعيونها بتلمع بالدموع: تعبانه ومرهقه اوي ممكن توصلني البيت يا زين

- أكيد! تعالي.

" اخد حاجتها و خرجوا وادهم شافهم ومكنش عارف يعمل ايه وعبدالعزيز بيعرفه على ناس و واقف معاهم.. فضل حاسس بالذنب ومضايق.. 

>>>>>>>>>>>>>>>>>>>>>>>>>>>>>>>>>>>>

|| الفيلا | عند البوابة ||

" زين وقف العربية وبص لها "

- انتي حد زعلك طيب ؟ حصل ايه؟

" مكانتش قادره تمسك نفسها اكتر من كده ودموعها نزلت وهي مش بتحب تعيط قدام حد فا نزلت من العربية و دخلت الفيلا علطول و زين ساب العربية للحارس و دخل وراها "

- فريده.. يا فريده استنى

" لحقها قبل ما تطلع ومسكها براحه وهي خبت وشها بإيديها عشان دموعها متبانش "

- اهدي بس فهميني حصل ايه

= سبني لوحدي

" قربها ناحيته وطبطب عليها "

- مش هسيبك وانتي عارفه اهدي وقوليلي حصل ايه؟
اقعدي وكفاية دموع بس.

" قعدوا وهو فضل ينكشها ويشيل ايدها اللي 
مستخبيا وراها "

- مش هسيبك في حالك غير لما تتكلمي.

" بطلت عياط وفضلت تمسح وشها براحه "

= مش عايزه اتكلم

- عايزة تعيطي بس يعني

= اه انا لما بعيط بهدى

بص لها: ماشي يا فيرو خلصتي عياط

زقته بعيد عنها: ملكش دعوة

ضحك: قوليلي طيب حصل ايه زعلك

بصت بعيد: افتكرت بابا.. وحشني وكنت.. كنت نفسي يبقى معايا اللحق اشوفه ونعرف بعض.. ويعرف اني موجوده حتى.. كان نفسي اجرب يعني ايه يبقى عندي حد عارفه انه هيعمل اي حاجه عشاني.. علطول هيدافع عني وهبقى مهمه بالنسباله.. وعمري ما اخاف عشان عارفه انه معايا وجمبي..

بصت له بسخريه: عشان كده علطول كنت عنيـ.ـفة و بصْرب وبتعلم اصْرب عشان عمري ما حسيت بالأمان في كل لحظه في حياتي.. بس متقلقش انا دلوقتي حاسه بالأمان عشان انتم معايا وبقا عندي عيلة

بص لها بحيرة: طب وليه العياط طالما انتي عارفة اننا معاكي؟

- عادي بقا يا زين.. هرمونات نكد وجت فجأة

ابتسم: اجيب لك حاجه حلوة؟

= لا ممكن بس تروح الحفله وتسبني وتعرف جدو اني كنت تعبانه شوية و روحت انا هطلع انام كدا كدا

- أكيد؟

= أيوه..

>>>>>>>>>>>>>>>>>>>>>>>>>>>>>>>>>>>>
' اللهم صلِ وسلم وبارك على سيدنا محمد '

" فضلت ماسكه صورة بابا و صورة تانيه لماما.. قربتهم لبعض وابتسمت.. يمكن مكنش لينا نصيب نتجمع في الدنيا.. بس هدعي كل ليلة اننا نتجمع في الجنة.. ونكون سوا مع باقي العيلة.. واثقة في ربنا انه في النهايه هيراضيني.. ويهون عليا.. "

|| في الحفلة ||

" زين وصل وادهم اول لما شافه سأله على فريده "

- وصلتها البيت كانت تعبانه شوية..

= تعبانه ازاي يعني مقالتش حاجه؟

- كانت مضايقه افتكرت عمي جلال.. حاولت اتكلم معاها بس قالت لي ارجع وانها هتطلع تنام..

= ينفع تغطي عليا؟

بص له بستغراب: هتمشي!

- اه.. انا وهي اتكلمنا قبل ما تضايق وحاسس اني عكيت الدنيا معاها غصب عني

زين اتنهد بقلة حيلة: طب ليه يا ادهم

" ادهم معرفش يرد وكان مستني موافقة زين "

رد بنفاذ صبر: روح وهغطي عليك يخويا يكش يطمر فيك

" ادهم اتحرك بسرعه وكان شايف 
مصطفى قصاده و وقفة "

- مش عايز تتكلم معايا؟

= مضطر امشي دلوقتي.. بعد اذنك

" مشي و سابه ركب عربيته وهو ماشي على الطريق نزل ياخد حاجه معينة.. "

|| الحفله ||

وليد: اخوك راح فين

زين بجديه: عنده ظروف

وليد: نعم يخويا؟

زين: ايه يا وليد بيه! ظروف قدره يأخي

وليد: اخوك فين يالا؟؟

- اصل هقولك.. المواضيع دي بناخدها بهدوء لكن هنزعق بقا ونتعصب الحفله تبوظ وهنتفضح.. شكل جدو بينادي عليا بعد اذنك الا رضا الجد بعد اذنك

" زين سابه ومشي علطول وخبط في يوسف "

- ايه يابني فيه ايه

زين: بغطي على ادهم عشان مشي ينفع تغطي عليا؟

يوسف ابتسم ببلاهه: حلو ده

زين: ركز معايا بابا لو قفشني هيعجني.

- عيب عليك انت في أمان.

>>>>>>>>>>>>>>>>>>>>>>>>>>>>>>>>>>>>
' لا إله إلا انت سبحانك اني كنت من الظالمين ' 

|| فيلا الجيار ||

" ادهم وصل و بص عليها ملقهاش فا قال يطلع اوضتها.. ولما طلع الباب كان مفتوح شافها وهي ماسكه الدفتر بتاع العيلة وعماله تقلب فيه.. فضل واقف لثواني وهو بيستوعب قد ايه وجعها.. اخد نفس عميق وبعدين خبط على الباب "

" فريده قامت ولما لفت لاقيته استغربت "

- بتعمل ايه هنا!؟ انت سيبت الحفلة؟

= لأنك مشيتي

- انا مقدرتش اقعد وكنت هنام دلوقتي

" بص على الدفتر و رجع بصلها فا قلبت وشها "

- وانت مالك ! واصلا مين سمح لك تدخل اوضتي كده وتراقبني وانا قاعده؟ ياريت بقا تطلع بره وترجع الحفله عشان محدش يتكلم معاك اساسا مكنش ينفع تسيبها وتيجي! وكدا كدا مفيش حاجه اتفضل بقا امشي!

" قرب بهدوء ومسك ايدها "

= فريده..

" فريده سكتت وفضلت باصه له "

" ادهم طلع وردة من جيبة لونها بينك "

= انا آسف

" بصت له بدهشه وهو بيحط الورده في ايدها "

- آسف؟؟

= ايوه

- انت بتعتذر؟

رد بحنية:  انا بعتذرلك.. عشان انتي بالذات مكنش ينفع اضايقك بالشكل ده

- انا بالذات؟

= قولتلك قبل كده.. انتي كنتي سبب اني اتغير للأحسن وكنتي سبب في حاجات كتير حلوة.. وعلطول جمبي.. حتي لو مش بنتكلم فى كل حاجه و مش بحكي بس وجودك كفايه.. أنا.. 

" كانت باصه له وتايهه في عيونه وكلامه.. وهو اتنهد وهو بيحاول يكمل كلام "

= انا مبسوط ان عندي بنت عم زيك يافريده..

" عيونها لمعت بالدموع "

= وحقيقي مكنش قصدي ابدا ابدا اقولك الجملة دي..

ابتسمت له: انا مش زعلانه..

بص لها: ده عشان الورده؟

ضحكت: وعشان اعتذرت لي.. وانا سمعت اشاعه انك مش بتعتذر ابدا ابدا

ابتسم بهدوء: قولتلك بقا.. انتي غيرتي حاجات كتير..

" فريده شمت الوردة وبصت له "

- و عرفت منين ان البينك لوني المفضل

= زي ما عرفت ان السلسلة هتعجبك.

- شكرا يا أدهم..

= يعني مش زعلانه أكيد ولا حابه تتكلمي في اي حاجه.. او تحكي عن اي حاجه ؟

فريده فكرت وبصت له: اصلي لو حكيت محدش هيفهمني

" ادهم ضحك عشان قالتها وهي بتقلده لأنه علطول يقول كده ومش بيحب يحكي "

ادهم: خلينا نكمل كلام  تحت في الجنينه احسن ماشي

= أوكيه.

>>>>>>>>>>>>>>>>>>>>>>>>>>>>>>>>>>>>>
' سبحان الله وبحمده سبحان الله العظيم '

|| الحفلة ||

عبدالعزيز: فين ادهم ؟؟؟

يزن: حضرتك بتكلمني يا جدو

عبدالعزيز: ايوه راح فين شوفوا خليه يجي

- حاضر

" يزن شاف زين واقف كأنه بيستخبى فا راح عنده "

- اخوك فين امال

= اشمعنا؟

- جدو بيسأل عليه!

زين كان هيلطم: هرن عليه يجي

يزن بستغراب: ايه ده هو مشي؟

زين: شششش وطي صوتك ما تروح تقول لجدك احسن

قاطعهم دخول مصطفى: فين ادهم يا زين ؟

" وهنا زين قرر يلطم على وشه "

- هو بقى مطلب جماهيري

مصطفى بضيق: اخلص راح فين

= الفيلا راح الفيلا بيجيب حاجه و جاي!

يزن: طب انا هروح اهندل جدك

زين: شاطر روح

" يزن مشي ومصطفى بص لزين "

- زين ما تغطي عليا ثواني..

بص له بدهشه: انت مجنـ.ـون هي ناقصه!

= هاروح الفيلا واجيب ادهم

- هتسوق ازاي بدراعك ده؟

شريف كان جمبهم فا رد: غطي عليا انا كمان اوصلة ونرجع

زين: نهاركم مش فايت انتوا مجانين!! انا مليش دعوة ولا بفهم في شغلكم وحفلاتكم دي !! 

شريف: الموضوع بسيط.. وهنيجي بسرعه 
يلا خليك جدع

" زين مكنش عارف يعمل معاهم ايه وسابهم يمشوا وخلاص عشان ادهم يرجع معاهم.. بقلمي سلسبيل احمد "

>>>>>>>>>>>>>>>>>>>>>>>>>>>>>>>>>>>>>
' الله اكبر الحمدلله لا إله الا الله استغفر الله '

|| الفيلا | في الجنينه ||

- متأكد ان محدش هيضايق او يحصل حاجه عشان مشيت فجأه 

= عيب عليكي كله تحت السيطرة.. المهم 
خلينا فيكي دلوقتي

- لاء خلينا فيك انت.. هتعمل ايه مع صاحبك

= مصطفى مبقاش صحبي

- انا قولت مصطفى؟

ضحك: مين بقا علمك الصياعه دي؟

ضحكت هي كمان: انت..
برم شفايفه بغيظ: امممم طب بصي مصطفى بالنسبالي خلاص بح.. 

= لو خلاص بح.. مكنتش هتبقى قلقان اوي عليه و تروح معاه المستشفى وكل ده.. زين حكالي

- مش عارف يا فريده.. مش قادر اعدي اللي حصل..

= بس انت قلبك أبيض هتقدر

بصلها بجمب: ليه شايفه كده و ازاي اصلا مفروض انتي تحديدا تبقى واخده عني فكره تانيه

- لأني قولتلك اني فهماك بس انت مش مصدقني

اتنهد بقلة حيلة: انا عارف... مصدقك

فريده بتعجب: عارف!!؟؟

- اه يافريده عارف وعشان كده مكنتش عايز اتكلم.. انا مش متقبل الى جوايا عشان احكيه بصوت عالي!

= ليه مش متقبله

- لأني بغير.. وبتعصب وبفكر غلط وبعمل تصرفات غلط كلها حاجات وحشه حاجات انا مش عاوزها تكون موجود فا بحاول ابعد تفكيري عنها ومعترفش بيها

= بس انت كده بتبوظ الموضوع أكتر..

" سكت فا فريده مسكت ايده "

- ممكن تثق فيا.. وتخرج لي اللي جواك.. انا بس!

" ادهم بص لايدها و رجع بصلها مسح على شعره بتفكير وبعدين بص قدامه "

= انا كنت بغير من كل حاجه حواليا وعايز افضل الكبير اللي واخد كل الأهتمام.. لأني من وقت لما اتولدت بابا بيزرع ده جوايا اني اكبر ولد في العيلة انا اللي هعمل كل حاجة الأول كلهم بيثقوا فيا وعينهم عليا وانا كنت مبسوط بده بعد كده بدء يتحول لضغط رهيب كنت عاوز اتخلي عن كل حاجه! و في نفس الوقت عاوز افضل واخد اهتمام وبعمل كل حاجه صح.. كنت كأني مقسوم نصين ادهم الجيار اللي ماسك الشركه الشاب المثالي و ادهم العادي اللي بس عاوز يعمل حاجات مجنونه يدخل سباق عربيات او يعمل حاجات ممنوع عليه يعملها اصلا! مبقتش فاهم حاجه وقتها وبخبط وخلاص وكل حاجه بتبوظ مني.. و وسط كل ده انتي ظهرتي

لف راسه وبص لها: و الحاجه الى كانت بتمنعني احكي معاكي تحديدا يا فريده... ان من اول يوم شوفتك.. كنت عارف انك بنت عمنا بس كنت عاوز ابعدك بأي شكل الشخصية المثالية الى جوايا متأكده انك مش كدابة.. ومتأكده إنك مختلفة عن اي حد قابلته في حياتي.. بس بدأت افكر بشكل تاني غصب عني.. وشوفت انك بتهددي حياتي و لازم تبعدي..

" فريده فضلت ساكته وباصه له "

ادهم كمل بسخريه: انا كل الى جوايا وحش.. يا فريده عشان كده عمري ما كنت حابب اتكلم.. انا مهزوز.. ومعنديش ثقة كافيه.. وعمري ما بينت ده لحد.. بس من جوايا عندي شعور ان محدش بيحبني.

فريده بصت له بحب: انا بحبك.. وكلنا بنحبك..! زين بيحبك و جدو بيحبك.. وحتى يزن و يونس بيحبوك اوي و يوسف علطول حابب يبقى معاك.. عمي وليد بيشد عليك بس عشان بيحبك.. واكيد طنط هدى بتحبك.. كلنا يا أدهم! فاهم.. خليك واثق في ده

" فريده قالت كلام كتير... لكن في اللحظه دي ادهم فضل مركز مع اول كلمتين قالتهم.. ومكانش قادر يحدد هيرد يقول ايه.. لحد ما الاتنين سمعوا صوت زمارة مزعج جدا مش بيسكت "

فريده بحْضه: فيه ايه !!! 

" ادهم قام وقف يبص "

- دي عربية شريف !؟

= طب روح

" خرج علطول يشوفهم شريف نزل من العربية "

ادهم بتعجب: فيه ايه !!!!

شريف: فيه ايه ؟؟؟ يا برودك !!! انت مش بترد على موبايلك ليه ؟؟؟

أدهم: سايلنت تقريبا!

شريف: حضرتك سايب الحفله والكل بيسأل عنك

ادهم بإدراك: ينهار ابيض طب روح روح وانا هاجي وراك

شريف: انجز يا ادهم

" شريف ركب العربية ومصطفى نزل "

- اطلع انت انا هاجي معاه هركب معاه..

شريف: تمام بس اوعوا تعجنوا بعض

" ادهم شاور لفريده "

- انا همشي

" راحت لعنده "

= حصل حاجه؟

- لا بس غالبا فيه عقود هتتمضى او حاجه بيسألو عليا

= طب روح يلا يلا

" خرجت معاه عند عربيته والاتنين اتفاجئوا بمصطفى "

مصطفى ببرود: افتحلي بابا العربية عشان نلحق 

ادهم برفعة حاجب: وانت مرجعتش مع اللي 
جيت معاه ليه؟

مصطفى: اصلي نزلت امشي رجلي وهو كان مستعجل

ادهم: وحيات ابوك؟

مصطفى: عيب احنا مش لوحدنا

" ادهم بص لفريده اللي كانت واقفة تتابع الحوار وهتموت وتضحك اصلا "

" فتح باب عربيته ومصطفى ركب وقبل ما ادهم يركب فريده ندهت عليه و راح لها "

- نعم

= على فكره.. مصطفى من ضمن اللي بيحبوك..
تصبح على خير.

" قالت جملتها و دخلت و ادهم قلب 
عينه بملل وركب العربية "

- هتفضل مخاصمني زي العيال؟

رد ببرود: عيال؟ بلاش انت تتكلم عن العيال

مصطفى اتنهد: غلطت يا أدهم.. بس مكنش قصدي وانت عارف

- لا معرفش

= انت فاكرني بجد عايز اضرك؟ انت عارفني اكتر من كده! عارفني وفاهمني!

- انا كنت فاكر اني عارفك يا مصطفى.

= ادهم.. انت صاحبي.. واخويا.. و انا عمري ما هخسرك عشان اي حاجه وهفضل علطول مستنى انك تعدي اللي حصل ونرجع صحاب مش هقبل غير كده

- براحتك.. انا معنديش حاجه اقولها

بص له وابتسم: عندك كتير بس انا عارفك ياصاحبي مش بتحب تخرج الى جواك.. فا هستني لحد ما تحب تتكلم لوحدك.

" وصلوا و ادهم نزل ولقى مصطفى فتح ونزل وادهم كان هيفتح له الباب "

مصطفى ضحك فا ادهم اتكلم بغيظ: مكنتش هفتحلك اصلا

مصطفى: مانا واخد بالي ايوا.. ادخل بقا عشان متتأخرش.

- ملكش دعوة ياض.

= ماشي يانجم.

>>>>>>>>>>>>>>>>>>>>>>>>>>>>>>>>>>>>

" واخيرا فات اليوم بهدوء والحفلة انتهت بدون مشاكل.. و ادهم اتروق شوية من عبدالعزيز و وليد و من زين كمان عشان اتأخر عليه.. و لكن تاني يوم كانت العيلة كلها متجمعه تودع زين عشان هيسافر خلاص... " 

|| على الفطار | اوضة السفرة ||

يزن: احمم.. عندي خبر.. انا و يونس يا جدو قررنا نقعد هنا علطول

ناديه بلعت ريقها وبصتلهم بعقدة حاجب: نعم؟ انتوا بتقرروا من دماغكم؟ 

عبدالعزيز: لحظه يا بنتي.. وحياتكم الى كلها بره و الاجازه خلاص قربت تخلص

يونس: اكيد يا جدو هتقدر تحولنا ورقنا بسرعه ونرجع نعيش في مصر معاك مش حضرتك قولت الفيلا و الشركه تحت امرنا! وانتوا احفادي حبايبي

عبدالعزيز ضحك على تفكيرهم: أكيد ده مكانكم.. 

ناديه: انت بتوافقهم يا بابا!؟ انتوا ازاي تقرروا حاجه زي دي من نفسكم

يونس: احنا مش صغيرين

ناديه: لما نشوف رأي ابوكم ايه في الموضوع ده

يزن: يا جدو عاوزين نفضل هنا!

يوسف: وانا كمان يا ماما هفضل هنا

هبه: ده شكلها موضه و دايره بقا؟ وكل واحد اتهف في دماغه تفضل فين يا يوسف انت كمان؟ 

ادهم كان متابع بصمت وبعدين بص لزين واتكلم: طيب بالمره و زين لما يسافر وهيقعد عشر شهور ايه الدنيا

وليد: عشره؟

هدي: عشره ازاي يعني؟؟ الترم التاني عشر شهور؟ 

" و حرفيا كله مسك في بعضه لحد ما عبدالعزيز علي صوته بحده " 

- خلاص ايه احنا مش كنا قايلين بلاش كلام على الاكل

ناديه: يا بابا دول اجننوا خالص!! الاساتذة الاتنين عندهم ثانوية عامة!!! تنقلوا وتضيعوا عليكم السنه؟

هبه: وانت ؟؟ عاوز تسيب الجيزة وتقعد في القاهره!! 
مره واحده؟ مش كنت ماسك في نغمه صحابي وبيتي وكل ده

عبدالعزيز بغلب: ممكن تهدوا!! انا الى هقرر محدش يتكلم بقا 

" الكل بص ناحية عبدالعزيز " 

- يزن انت واخوك لازم تكملوا السنه دي بره مينفعش تضيعوها.. وبعدها انزلوا مصر وهقدم ورقكم في الكلية هنا 

ناديه بأعتراض: يا بابا ازاي بس نـ

عبدالعزيز قاطعها: خلاص بقا.. ده بيتهم برضو! وانا عايزهم جمبي 

كمل وبص ليوسف: انت نفس القصة لما تخلص السنه بتاعتك تعالي اقعد زي ما تحب

وليد لزين: وانت ايه حكاية العشر شهور دول؟
زين: جالي فترة تدريب هناك في الإجازة.. ومش هعرف اني مأخدهاش

فريده: يعني كده مش هتنزل الاجازه بعد لما تخلص دراستك هناك!؟

زين: مش عارف وغالبا ليه

بصت له بقمصه: ليه مقلتش! جاي تقول دلوقتي وطيارتك بليل؟

زين: عاجبك يا فتان

ادهم ضحك: كنت عايز تقولنا وانت على باب الطيارة

هدى: انا بقا مش موافقة مشوفش ابني كل ده ليه؟ لا بلاها اقعد جمبنا هنا
زين: عرفت مقلتش ليه؟ اقعد فين يا ماما بس هو لعب عيال مينفعش

وليد: انت كده بتحطنا قدام الأمر الواقع مرتين..

زين: جدو اللحقني ودافع عني

عبدالعزيز: والله مانا عارف انتوا كلكوا دماغكم فيها ايه اليومين دول.. خلوه يتكل على الله ولما يجي وقتها نشوف هيقدر ينزل ولا لاء..

زين بص لأدهم: ده انت لو قولت لي اداري عليك تاني هفضحك فضيحه بجلاجل ياض.

ادهم بتمثيل الصدمه: بتقولي ياض؟

فريده: اعجنوا بعض بعد الأكل ونادوني اتفرج
أدهم بصلها: هتشجعي مين

فريده ضحكت وردت بنكش: هشجع زين.

ادهم رفع حاجبه: بقا كده؟

فريده ابتسمت: ممكن اشجع الكسبان

ادهم بثقة: يبقى هتشجعيني.

>>>>>>>>>>>>>>>>>>>>>>>>>>>>>>>>>>>>>
بقلمي Slsbell Ahmed 

|| غرفة المكتب ||

" بعد الخناقة ما اتفضت طبعا هبه كلمت جوزها تشتكي له و ناديه كذالك و هدي و وليد كانو بيتكلموا مع زين.. في موضوع السفر اما عبدالعزيز بقا 
فا كان قاعد مع محامي في مكتبة "

- كده كل حاجه مع حضرتك اهو و الورق كله مظبوط
= وعملت ايه في موضوع العربية وشركة التأمين صح؟

- شركة التأمين هتوصل بليل و العربية جاهزه برضو.

= اهم حاجه في كل ده طقم الحرس.. انت متعرفش الفترة الجاية هتبقي عامله ازاي يا خالد 

- ولا تشيل هم سيادتك! انا منسق كل حاجه مع مش عايزك تكون قلقان.

= لا قلقان خصوصا بعد ما حصلت طفره غريبة واحفادي كلهم هيبقوا حواليا.. يبقي لازم اقلق واحط عيني في وسط راسي.. انت اكتر واحد عارف يعني ايه يبقي في شركة زي شركتنا وسط سوق عملاق وتبقي شركتنا اكبر شركه منافسة للكل! وغير كل ده العيلة كلها شباب والشباب يعني مشاكل.. واديك شوفت اخر مشكلة في كلية فريده و زين

- انا فاهم الى حضرتك خايف منه من ناحية السوق.. محدش بيحب يكون فيه كبير للسوق وكل حاجه رايحه لحسابة بس احنا مفتحين عينا كويس اوي. وبالنسبة للكلية حاليا حراسة حفيدتك فريدة هتكون اكترهم تركيز فا متقلقش.

= ماشي المهم ان محدش يحس بحاجه انا مش هعيش عيالي و احفادي في قلق

- اكيد مفهوم.. بعد اذنك

" خالد خرج و وليد شافه سلم عليه وبعدين دخل لعبدالعزيز " 

- خير يا بابا؟ حصل حاجه

= مفيش يحبيبي ده انا كنت بجهز حاجات تخص وصية سهير عشان فريده.

|| في اوضة ادهم ||

" كانت فريده بتدور على جاكيت معين ولاقيته "

- قفشتك! انتي والجاكيت بتاعي و في اوضتي

                   الفصل الثالث عشر من هنا


تعليقات



<>