رواية نقطة عمياء الفصل الثاني عشر12بقلم منة احمد
فضلت نسمة حاضنة معتز بقوة، ودموعها بتنزل من غير ما تحس، وعينيها بتتنقل بين وشه وبين ندي اللي كانت واقعة قدامها ومش بتتحرك. النا..ر كانت محاوطة المكان من كل ناحية، والدخان بيزيد لدرجة إنها بقت بتاخد نفسها بالعافية ونسمة رفعت وشها وبصت لمعتز، وحطت إيدها على خده وهي بتحاول تخليه يبصلها وقالت بدموع وصوت بيترعش: مـ... معتز، قوم يا معتز... أرجوك قوم. أنا خايفة، والله خايفة أوي. متسبنيش لوحدي هنا، أنا مش هقدر أستحمل لو جرالك حاجة.
معتز كان سامعها، وعينيه متعلقة بوشها، لكن جسمه كان تقيل عليه ونفسه بيطلع بصعوبة. كان نفسه يقوم، يشيلها من المكان ده، ويخرجها من النار حتى لو ده هيكون آخر شيء يعمله في حياته، لكنه مش قادر يحرك جسمه زي ما هو عايز.
بصلها وهو شايف دموعها، وحس بعجز عمره ما حسه قبل كده. معتز اللي طول عمره بيواجه أي مشكلة من غير ما يهتز، واللي كان شايف إن مفيش حاجة تقدر تكسره، لقى نفسه عاجز حتى عن إنه يطمن البنت اللي بين إيديه قال بصوت ضعيف ومتـ...قطع: نـ... نسمة، اهدي... متعيطيش.
نسمة وهي بتهز راسها وبتعيط: أهدى إزاي؟! بص حواليك يا معتز، إحنا هنمو..ت هنا! ندي قدامنا ومش عارفة أعملها حاجة، وإنت تعبان ومش قادر تقوم... أعمل إيه؟ قولي أعمل إيه!
حاول معتز يرفع إيده يمسح دموعها، لكنه بالكاد قدر يحرك صوابعه. نسمة مسكت إيده وحطتها على خدها، وفضلت تبصله كأنها بتحاول تحفظ ملامحه وقالت بصوت مبحوح: أنا مش عايزة حاجة من الدنيا دي... أنا بس عايزاك تقوم وتبقى كويس. حتى لو أنا اللي حصل لي حاجة، المهم إنت تعيش يا معتز.
معتز ضيق عينيه وهو بيحاول يفهم كلامها، وهز راسه بصعوبة: متقوليش الكلام ده... فاهمة؟ مش عايز أسمعه منك.
نسمة قربت راسه لصد...رها، وفضلت تمرر إيدها على شعره وهي بتعيط وقالت بصوت واطي ومرتعش: بلاش تمو..ت يا معتز... أنا مستعدة أضحي بروحي عشانك، بس متسبنيش. أنا عشت عمري كله بحاول أستحمل كل حاجة لوحدي، ومش عايزة أخسرك إنت كمان.
معتز ابتسم ابتسامة صغيرة رغم تعبه، وهو في حضنها، وعينيه بتبصلها باستغراب وحزن في نفس الوقت.
افتكر أول يوم شافها فيه في الجامعة، لما كان بيبصلها بقسوة، وبيحكم عليها من غير ما يعرف عنها حاجة. افتكر إزاي كان بيقارنها بكل البنات اللي عرفهم، وإزاي كان شايف إن الطيبة ضعف، وإن كل واحدة بتقرب منه وراها مصلحة.
كان كل ما يشوف خوفها منه يزود قسوته، وكل ما يلاقيها بتسكت قدامه كان يفتكر إنها ضعيفة ومش قادرة تدافع عن نفسها ماكنش يعرف إنها كانت بتشيل فوق طاقتها، وإنها رغم كل اللي شافته منه، كانت بتخاف عليه أكتر ما بتخاف على نفسها وقال بصوت مخنوق: نـ... نسمة.
نسمة بعدت راسه عن صد...رها وبصتله بسرعة، وهي ماسكة وشه بين إيديها وقالت بلهفة: قول يا معتز، أنا سامعاك... أنا جنبك، أهو. قول أي حاجة، بس متسكتش.
معتز ابتسم ابتسامة باهتة، وفتح عينيه وقفلهما بصعوبة : معقولة بعد كل اللي عملته فيكي... قررتي تحبيني؟
نسمة حركت إيدها على خده، وابتسمت وسط دموعها :إنت أذيتني كتير يا معتز، ووجعتني بكلامك وتصرفاتك... بس إنت كمان ضحيت بنفسك عشاني أكتر من مرة. وأنا شوفت منك حاجات يمكن إنت نفسك مش واخد بالك منها. أنا مش بقول إن اللي عملته كان صح، بس... أنا مش قادرة أكرهك
كان لسه هيكلمها وفجاه، الكحة شدت معتز بعنـ..ف، ونفسه بقى أتقل، ونسمة نفسها بدأت تكح جامد. الدخان كان بيتجمع حواليهم، والهواء بقى قليل، وكل نفس كان أصعب من اللي قبله.
معتز لاحظ إنها مش قادرة تاخد نفسها، فحاول يقوم رغم الألم والتعب اللي في جسمه وقال وهو بيحاول يرفع جسمه: نسمة... ارفعي راسك شوية خليني اقوم.
نسمة وهي بتكح: مش... مش قادرة يا معتز.
حاول يسند نفسه على إيده، وبمجهود كبير قدر يرفع جسمه من على الأرض نص قومه وقعد جنبها. فضل ياخد نفسه بصعوبة، وبعد لحظات مد إيده ناحيتها وشدها لحضنه وقال وهو بينهج: خدي نفس يا نسمة... واحدة واحدة. أنا هطلعك من هنا، سامعة؟ مش هسيبك.
نسمة هزت راسها، لكنها كانت بتكح ومش قادرة ترد.
معتز بص حواليه بسرعة، وبعدها مد إيده ناحية الأرض يدور على تليفونه. لما لقاه، فتحه بإيد بتترعش واتصل بالطوارئ، وبلغهم بعنوان المكان وبعدها اتصل بالمطافي.
قفل التليفون وبص لنسمة اللي كانت ساندة راسها على كتفه، وعينيها بتقفل وتفتح من التعب وقال بقلق: نسمة؟! متناميش. بصيلي كده.
نسمه بصوت ضعيف : أنا تعبانة أوي يا معتز...
معتز حط إيده على خدها، وحاول يخلي صوته ثابت رغم الخوف اللي بدأ يسيطر عليه : عارف، بس استحملي عشان خاطري
وبعدها قام بالعافية، وسابها في مكان بعيد نسبيًا عن اللهب، وقرب من الباب. فضل يخبط عليه بكل قوته، ويحاول يفتحه، لكن الباب كان مقفول ومش بيتحرك وقال وهو بيخبط بعنـ..ف: افتحوا الباب! في حد سامعني؟! افتحوا الباب يا جدعان!
فضل يضر..ب الباب بكتفه ويحاول يزقه، لحد ما رجع لورا وهو بينهج، وبص للسقف اللي النا..ر بدأت تاكل فيه.
معتز بصوت عالي: يا جدعااان حد يلحقناااا!
لكن مفيش رد ومعتز خبط الباب مرة أخيرة بكل قوته، وبعدها سند راسه عليه للحظة، وهو بيحاول يمنع نفسه من الانهيار لف بجسمه ناحية نسمة، واتجمد مكانه لما شافها نايمة على الأرض، ودموعها بتنزل، وعينيها بتقفل وتفتح بصعوبة جري ناحيتها على قد ما قدر، ونزل على ركبته وشالها في حضنه وفضل يربت على خدها بخفة وقال بفزع: نسمة! نسمة، افتحي عينيكي!
نسمة فتحت عينيها بالعافية، وبصتله بدموع، ورفعت إيدها ناحية وشه وقالت بصوت ضعيف: معتز...
معتز بلهفة : ايوه يا نسمه قولي، متخافيش.
نسمة: أنا... بحبك .
معتز اتجمد مكانه، وعينيه اتملت بالدموع: متقوليش كده، إنتي هتقومي وتقوليهالي وإنتي كويسة، فاهمة؟ مش هنا، ومش بالشكل ده.
نسمة ابتسمت ابتسامة صغيرة رغم تعبها: كنت... عايزة تعرف.
معتز هز راسه بعنف، والدموع بدأت تنزل من عينيه: عرفت يا نسمة، والله عرفت... وأنا كمان بحبك. سامعة؟ بحبك، بس أرجوكي متغمضيش عينيكي.
نسمة فضلت باصة له للحظات، وبعدها همست: اتمنى... متزعلش مني.
معتز بصرخة: متقوليش كده! إنتي مش هتسيبيني، فاهمة؟ مش هسمحلك!
وفي اللحظة دي، صوت تكسير قوي سمع فوق راسهم. جزء من السقف وقع قريب منهم، وقطعة مشتعلة خبطت في رجل نسمة و صرخت بألم: آآآه!
معتز اتخض وبص لرجلها، وبعدها أبعد عنها القطعة المشتعلة بسرعة، وسندها بحذر. كان جزء من جلد رجلها اتصاب بحرق شديد، ونسمة كانت بتعيط من الألم.
معتز بقلق: معلش معلش والله حقك عليا
قطع جزء من قماش الفستان من غير ما يجرحها، وغطى بيه الإصابة بشكل مؤقت، من غير ما يضغط عليها، وبعدها رجع سند راسها على إيده.
معتز وهو بيهزها بخفة: نسمة؟ بصيلي... إنتي سامعاني؟
لكن نسمة ما ردتش. كانت مغمضة عينيها، ودموعها بتنزل على وشها.
معتز بصوت مبحوح: نسمة، افتحي عينيكي... يلا، متعمليش فيا كده!
فضل ينادي عليها، وصوته بيعلى مع كل لحظة بتعدي من غير ما ترد وقال بصرخة هزت المكان: نــــسمة!
ضم راسها لصد..ره، ودموعه بتنزل غصب عنه، وهو بيحاول يصحيها قال: أنا لسه قايلك إني بحبك... لسه قايلك! هتسيبيني دلوقتي؟ بعد كل اللي عملته عشان أوصلك للكلمة دي؟! لا يا نسمة، لا... أرجوكي!
لأول مرة، معتز ماحاولش يخبي ضعفه ولا دموعه. كان بيعيط زي الطفل، وبيضمها لصد..ره، وكل اللي في دماغه إنه لو خسرها، مش هيقدر يسامح نفسه طول عمره.
وفجأة، سمع صوت تكسير ناحية الباب، وبعدها أصوات رجالة بتصرخ.
أحد رجال الإنقاذ: فيه حد هنا؟! حد سامعنا؟!
معتز رفع راسه بسرعة وقاا بصوت عالي: أيوه! تعالو الحقونا!
بعد لحظات، رجال المطافي قدروا يفتحوا طريق للدخول، وبدأوا يسيطروا على النا..ر. فريق الإنقاذ دخل بسرعة، وواحد منهم قرب من معتز وقال : بعد اذنك، ابعد شوية عشان نقدر نساعدها.
معتز وهو بيضم نسمة: مش هسيبها!
رجل الإنقاذ بحزم: محدش هيبعدها عنك، بس لازم نطلعها بسرعة. وسّع لنا الطريق.
معتز بعد عنها بالعافية، وفضل ماشي جنب النقالة وهما بيحطوها عليها. وقبل ما يخرجوا، لمح ندي على الأرض، فصرخ فيهم : فيه بنت تانية جوه! شوفوها بسرعة!
رجال الإنقاذ اتجهوا ناحية ندي، وبدأوا ينقلوها هي كمان.
خرج معتز من المكان وهو بينهج، ووشه متبهدل من الدخان، وعينيه مش بتسيب نسمة لحظة. أول ما وصلوا للإسعاف، طلع معاها، وقعد جنبها ماسك إيدها وقال بصوت واطي: استحملي يا نسمة... خلاص، إحنا خرجنا. أهو أنا معاكي.
فضل يضغط على إيدها برفق، مستني منها أي حركة، لكن نسمة كانت فاقدة الوعي.
في المستشفى
الطاقم الطبي استلم نسمة ودخلها الطوارئ، ومعتز فضل واقف قدام الباب، رافض يتحرك من مكانه.
بعد شوية، دكتور تاني كان معدّي في الممر لاحظ حالته، ووقف لما شاف وشه المتبهدل من الدخان وهدومه المقطعة وقال باستغراب: دكتور معتز؟! إنت حصل لك إيه؟
معتز بصله بعينين مرهقتين : مفيش حاجة... المهم البنت اللي دخلت من شوية، اسمها نسمة. عايز أطمن عليها.
الدكتور: طب وإنت شكلك تعبان جدًا! تعالى نقعدك ونطمن عليك الأول.
معتز: لما أطمن عليها.
حاول يمشي ناحية باب الطوارئ، لكن الدنيا لفت بيه، وقبل ما يلحق يسند نفسه اختل توازنه ووقع كان واعي جزئيًا، لكنه مش قادر يفتح عينيه. آخر حاجة حاول يعملها إنه يرفع راسه ناحية باب الطوارئ، وكأنه لسه مستني يشوف نسمة خارجة منه والدكتور لحقه بسرعة ونادى الممرضين.
.الدكتور بصوت عالي: يا جماعة، بسرعة! هاتوا كرسي !
وبعدها معتز غاب عن الوعي.
بعد ساعات ومعتز بدأ يحرك راسه ببطء، ويحاول يفتح عينيه. الرؤية كانت مشوشة، وراسُه تقيلة، ونفسه لسه مش مريح. حاول يرفع إيده، لكنه حس بوخز في دراعه من المحلول وقال بصوت ضعيف: أنا... فين؟
سمع صوت أبوه من جنبه عزام بقلق: حمد الله على سلامتك يا ابني.
معتز لف راسه ناحيته، وشاف أبوه واقف جنب السرير، ومعاه خديجة مرات أبوه، وإسماعيل عمه، وكام شخص من العيلة.
خديجة قربت منه، ودموعها في عينيها: قلقت عليك يا حبيبي! إنت خوفتنا عليك أوي.
معتز هز راسه ببطء، لكنه ما ردش. كان لسه بيحاول يستوعب اللي حصل، وفجأة عينيه وقعت على راندا، طليقته، اللي كانت واقفة بعيد شوية، وبطنها باينة إنها حامل وملامحه اتغيرت في لحظة وقال ببرود: إيه اللي جابها دي؟
إسماعيل اتكسف، وبص لبنته قبل ما يرد: جينا نطمن عليك يا ابني، هي عرفت اللي حصلك وجت معانا.
راندا قربت منه بخطوات بطيئة، وعينيها مليانة دموع: معتز... حمد الله على سلامتك يا معتز وحشتني اوي.
مدت إيدها ناحيته كأنها هتحضنه، لكنه رفع كفه قدامها يمنعها، وبصلها بنظرة باردة: إياكي تقربي مني.
راندا وقفت مكانها، واتكسرت ملامحها وقالت بدموع: معتز، أرجوك اسمعني. أنا عارفة إني غلطت، بس إنت وحشتني... وابنك اللي في بطني وحشك.
معتز شد فكه، وبص لبطنها للحظة، وبعدها رجع بص في عينيها وقال بغضب مكبوت: متقوليش ابني.
راندا بصدمة: معتز!
معتز: إنتي سمعتي اللي قولته. متجيبيش سيرته على لسانك وكأنك ضامنة إنه ابني.
راندا حطت إيدها على بطنها، ودموعها نزلت أكتر: والله ده ابنك! أنا عمري ما كذبت عليك في حاجة زي دي!
معتز ضحك ضحكة قصيرة خالية من أي فرحة، وبعدها حاول يعتدل في السرير رغم تعبه: كفاية تمثيل يا راندا. أنا مش ناقص أسمع صوتك، ولا عندي استعداد أرجع أفتح باب قفلته بإيدي.
راندا: بس أنا لسه بحبك يا معتز... وإنت كنت بتحبني!
معتز بحدة: كنت. خلي بالك من الكلمة دي كويس، كنت بحبك. إنما دلوقتي إنتي بالنسبالي صفحة واتقفلت
راندا وهي بتعيط: طب اديني فرصة واحدة أصلح اللي عملته!
معتز هز رأسه بملل: مفيش فرصه.. يا جماعه حد يطلعها مش ناقصها والله.
حاولت تقرب منه تاني، لكنه مد إيده ناحية الترابيزة الصغيرة اللي جنب السرير، وخد الصينية اللي عليها الأدوات الطبية، ورماها على الأرض بعصبية والصوت خلّى الكل ينتفض من مكانه وقال بصرخة: قولت اطلعي بره! مش عايز أشوف وشك قدامي!
خديجة قربت منه بسرعة: اهدا يا معتز، أرجوك. إنت لسه تعبان، ومينفعش تعمل في نفسك كده.
معتز وهو بيبصلها بحدة: أنا ههدى لما البنت دي تخرج من الأوضة.
إسماعيل بص لراندا بضيق، وبعدها اتكلم بنبرة حاسمة: يلا يا راندا، قومي. إحنا غلطانين إننا جينا بالشكل ده.
راندا بدموع: بابا، أنا جاية أطمن عليه!
إسماعيل: وأنا قولتلك يلا. الراجل مش عايز يشوفك، يبقى تحترمي رغبته وتمشي.
عزام حاول يهدي الموضوع وإسماعيل وقفه وخرج مع راندا اللي كانت بتعيط وبتبص لمعتز، مستنية منه حتى نظرة أخيرة، لكنه ما بصش ناحيتها وأول ما الباب اتقفل، معتز رجع راسه للمخدة، وغمض عينيه للحظة. دموع نزلت من عينه، لكنه مسحها بسرعة قبل ما حد يلاحظ.
خديجة قربت منه، وحطت إيدها على كتفه: اهدا يا حبيبي، متضغطش على نفسك.
معتز فتح عينيه وبصلها وقال بصوت مرهق: فين آدم؟
خديجة استغربت السؤال: مش عارفة يا ابني. هو جه اطمن عليك من شوية، وبعدها قال عنده زيارة لمريض تاني ومشي.
معتز فهم فورًا. آدم أكيد عند نسمة وقبض إيده تحت الغطا، وملامحه اتشدت: طيب.
حاول يقوم من السرير وخديجة قالت بخوف: رايح فين يا معتز؟ إنت لسه مش قادر تقف على رجلك!
معتز وهو بيسحب المحلول من إيده بحذر: أنا كويس.
خديجة: إنت لسه واقع من شوية يا ابني!
معتز ببرود: قولتلك كويس يا مرات ابويا. أنا مش عيل صغير
مد إيده وخد الجاكيت بتاعه، ولبسه بالعافية، وبعدها خرج من الأوضة وفي الممر، لمح راندا واقفة جنب أبوها، وبتعيط وهي حاطة إيدها على بطنها. وقف لحظة وبص لها، لكن ملامحه ما لانتش. لف وشه وكمل طريقه كأنها مش موجودة وسأل ممرضة عن أوضة نسمة، ولما عرف مكانها، راح لها على طول ولما وصل قدام الأوضة، وقف لحظة ياخد نفسه. حط إيده على مقبض الباب وفتحه بهدوء و في أوضة نسمة وكانت نسمة نايمة على السرير، ورجلها متغطية بضمادة كبيرة، ووشها لسه شاحب من أثر الدخان والتعب. آدم كان قاعد جنبها، بيكلمها بابتسامة هادية، ولما شاف معتز داخل، قام من مكانه بسرعة.
نسمة رفعت عينيها ناحية الباب، وأول ما شافت معتز، افتكرت كل اللي حصل في الحر..يق. افتكرت حضنه، وصوته وهو بيقول إنه بيحبها، والكلام اللي خرج منها من غير ما تفكر.وشها احمر من الكسوف، ونزلت عينيها بسرعة.
آدم قرب من معتز وبصله بقلق: يا ابني، إنت لسه تعبان! إيه اللي جابك من سريرك؟ كان لازم تستنى لما تفوق كويس.
معتز بصله ببرود، وبعدها عينيه راحت لنسمة: أنا كويس.
آدم: كويس إيه بس؟ إنت كنت مغمى عليك من شوية!
معتز بغيظ: ياأخي سيبني في حالي.
آدم بلع ريقه، وبصله باستغراب من حدته: طب ماشي، براحتك. بس قولي، ليه مقولتليش إن نسمة كلمتك وإنها كانت في ورطة؟.
معتز رفع حاجبه بسخرية : يعني واحد سكران أقوم أقوله تعالي معايا عندي مشكلة لازم أروح أحلها؟!
آدم اتكسف من طريقته، ومرر إيده على وشه بضيق.
آدم: يا أخي أنا مش قصدي كده، أنا بس كنت قلقان عليها.
نسمة لاحظت إن معتز متضايق من وجود آدم، فحاولت تغيّر الموضوع : آدم، ممكن تشوفلي ندي؟ أنا لسه مش عارفة حالتها عاملة إيه، ومش قادرة أبطل أفكر فيها.
آدم بص لها باهتمام.
آدم: حاضر يا نسمة، هسأل عليها وأرجع أطمنك. بس إنتي كمان ليه مقولتيليش إنك اشتغلتي؟ أنا برن عليكي ومش بتردي، وبعدين أعرف كل ده بالطريقة دي!
معتز دخل في الكلام قبل ما نسمة ترد وقال ببرود: هو لازم تعرفك هي بتعمل إيه طول الوقت؟ هي مش من بقية أهلك؟!! روح شوف اللي قالتلك عليها بدل ما تحقق معاها
آدم بصله بحدة: وأنت مالك يا معتز أنا بكلمها هي.
معتز بابتسامة ساخرة: وأنا رديت عليك، عندك اعتراض؟
آدم هز رأسه بضيق وأخد نفس طويل، وبص لنسمة: أنا هخرج دلوقتي عشان أشوف صحبتك واطمنك
نسمة هزت راسها بابتسامة بسيطة: حاضر، شكرًا يا آدم.
آدم خرج وقفل الباب وراه، وساب الأوضة في هدوء مفاجئ ومعتز فضل واقف مكانه لحظة، وبعدها قرب من السرير وسحب الكرسي وقعد جنبها وقال بهدوء: عاملة إيه؟
نسمة بصتله بكسوف: الحمد لله... شكرًا يا دكتور معتز. لولاك، كنت...
معتز مقا..طعًا: متشكرنيش. وبلاش دكتور معتز دي، اسمي معتز عادي.
نسمة سكتت، ومعتز فضل باصلها للحظات. كان نفسه يقولها كلام كتير، لكنه مش عارف يبدأ منين. أخيرًا اتكلم وهو باصص لرجلها: رجلك عاملة إيه؟
نسمة: الحمد لله، أحسن. الدكتور قال إن الحر..ق محتاج متابعة وعلاج، بس إن شاء الله هخف.
معتز هز راسه، وبعدها رفع عينيه لوشها وبصوت أهدى: أنا كنت قلقان عليكي... وخوفت ليكون حصلك حاجة.
نسمة ابتسمت بخجل، ونزلت عينيها لإيديها اللي كانت بتفرك في بعض: أنا كمان كنت خايفة عليك أوي.
معتز بص لإيديها، ومد إيده ومسكها برفق، وبعدها باسها.
نسمة اتخضت من تصرفه، وسحبت إيدها بسرعة وقالت بتوتر: مينفعش اللي بتعمله ده يا دكتور....
معتز ضحك ضحكة خفيفة، وكانت أول مرة نسمة تشوف ضحكته بالشكل ده. فضلت باصة له بذهول، كأنها بتشوف شخص مختلف عن الدكتور القاسي اللي عرفته.
معتز بابتسامة: إيه؟ أول مرة تشوفيني بضحك؟
نسمة بكسوف: تقريبًا.
معتز: طب حلو إن الحر..يق كان له فايدة واحدة على الأقل.
نسمة ضحكت غصب عنها، لكنه رجع بص لها بجدية: على فكرة، أنا مش ناسي اللي حصل والكلام اللي قولتيه.
ابتسامتها اختفت، ووشها احمر أكتر: اللي حصل في المطعم كان بسبب الخوف... إحنا كنا بين الحياة والمو..ت.
معتز بص في عيونها: آه، وأنا كنت بين الحياة والمو..ت، ومع ذلك كنت واعي كويس اللي بتقوليه.
نسمة بلعت ريقها، وحاولت تتجنب عينيه: أنا... أنا مكنتش عارفة بقول إيه.
معتز رافعًا حاجبه: بجد؟ يعني لما قولتي إنك بتحبيني، كنتي مش عارفة بتقولي إيه؟
نسمة بسرعة: أيوه! كنت متوترة وخايفة، ومش عارفة أنا بقول إيه أصلًا.
معتز مال براسه شوية، وبصلها باستغراب مصطنع: غريبة. عشان أنا كنت فاكر إن الواحد لما يكون خايف على حياته، بيقول الحقيقة من غير ما يفكر.
نسمة اتلخبطت أكتر، ومقدرتش ترد ومعتز سكت لحظة، وبعدها قام من الكرسي: عمومًا، أنا مش هضغط عليكي عشان تقولي إنك بتحبيني بالعافية. لما تبقي عايزة تقولي حاجة، قوليها وإنتي مرتاحة.
نسمة رفعت عينيها له، وكان نفسها توقفه وتقول له إنها فعلًا بتحبه، لكن الكلام وقف في زورها.
معتز: عن إذنك.
خرج من الأوضة وقفل الباب وراه بهدوء.
نسمة فضلت باصة للباب، وبعدها غطت وشها بإيديها وقالت بصوت واطي: يا غبية... هو إنتي ليه مش قادرة تقوليها؟!
بعد يومين ونسمة كانت جاهزة للخروج من المستشفى، بعد ما حالتها استقرت والدكاترة اطمنوا على تنفسها. ورغم إنها لسه بتتعب من الحركة، كانت مصممة ترجع بيتها وترتاح واطمنت علي ندي وعرفت أن حالتها استقرت وبقت كويسه بس محتاجه متابعه وعند معتز فتح الباب ودخل، ولما شافها لابسة ومستعدة للخروج، وقف مكانه: إنتي بتعملي إيه؟
نسمة بصتله باستغراب: بستعد عشان أخرج. الدكتور قال إني أقدر أروح، بس أتابع على رجلي وأرتاح.
معتز عقد حواجبه: وإنتي متأكدة إنك قادرة تتحركي لوحدك؟
نسمة: أيوه، متقلقش. أنا أحسن بكتير.
معتز اتنهد، وبعدها قال بصوت ثابت: طب تعالي أوصلك.
قبل ما نسمة ترد، الباب اتفتح ودخل آدم بابتسامة: ها يا نسمة، خلصتي؟ يلا أوصلك.
معتز ضيق عينيه، وقبض إيده بضيق، لكن حاول يخفي ده.
نسمة بصت لآدم، وبعدها لمعتز وقالت: لا خلاص يا آدم، دكتور معتز قالي إنه هيوصلني.
آدم ابتسامته اختفت شوية: بس أنا كنت مستنيكي، وكنت قايلك إني هاجي آخدك.
معتز ببرود: خلاص، هي قالتلك إنها هتمشي معايا. روح شوف شغلك بقى.
آدم بصله بغيظ: أنا بكلم نسمة، مش بكلمك.
معتز: وأنا بقولك إنها هتمشي معايا. محتاج أشرحها بلغة تانية؟
نسمة اتوترت، وحاولت تهدي الموقف: يا جماعة، خلاص... مفيش داعي للخناق. آدم، أنا هبقى أكلمك لما أوصل.
آدم بص لها، وبعدها رجع بص لمعتز : تمام يا نسمة. ألف سلامة عليكي.
فتح الباب وخرج، وقفل الباب وراه بشدة لدرجة إن نسمة اتخضت ومعتز هز راسه ببرود: عيل غبي هاااا جاهزة؟
نسمة هزت راسها، وخدت حاجتها، ومعتز ساعدها تمشي لحد العربية وفي العربية معتز كان بيسوق في هدوء، ونسمة قاعدة جنبه، بتحاول تتجنب النظر ليه. بعد شوية، كسر الصمت من غير ما يبص ناحيتها : يعني إنتي حبيتيني من أول يوم شوفتيني فيه في الجامعة؟
نسمة بلعت ريقها، وبدأت تفرك في صوابعها بتوتر: أنا... أنا مكنتش عارفة ساعتها كنت بقول إيه.
معتز: بس إنتي قولتي الكلام ده وإنتي واعية، مش مرة واحدة بس. حتى لما كنتي بتكلمي في الحريق، كنتي عارفة بتقولي إيه.
نسمة سكتت، ومعتز كمل بنفس الهدوء وبص ناحيتها: نسمة، بصيلي.
بصتله بتردد، فكمّل وهو بيبص لطريق شويه وبعدها ليها: إنتي بتحبيني ولا لأ؟ عايز إجابة واضحة، كلمة واحدة. مش عايز تبريرات ولا كلام كتير.
نسمة فضلت ساكتة، ومش عارفة تنطق. قلبها كان بيدق بسرعة، وكانت نفسها تقول له إنها بتحبه من زمان، وإن كل قسو..ته ماقدرتش تمحي مشاعرها ناحيته ولكن الخوف من إنها تتجرح تاني كان أقوى من قدرتها على الكلام.
معتز استنى شوية، ولما ملقاش رد، رجع بص للطريق وقال ببرود: تمام. براحتك.
كمل السواقة من غير ما يتكلم، لكن إيده كانت قابضة على عجلة القيادة بقوة وبعد دقائق، وقف قدام بيتها.
معتز: هو ده بيتك؟
نسمة هزت راسها: أيوه.
معتز ما سألهاش عن الشقة جابتها منين ولا بتعيش فيها إزاي. اكتفى إنه يبصلها لحظة، وبعدها قال: تمم لو احتجتي أي حاجة، كلميني.
نسمة ابتسمت ابتسامة صغيرة: شكرًا يا دكتور.
فتحت الباب ونزلت، وقفلت العربية وراها، وبعدها اتحرك بالعربية ومشي وهو مخنوق ونسمة فضلت واقفة في الشارع بعد ما اختفى، وغمضت عينيها وهي بتاخد نفس طويل وقالت بصوت واطي: أيوه يا معتز... بحبك. بحبك أوي كمان.
حطت إيدها على قلبها، والدموع لمعت في عينيها: بس أنا خايفة... خايفة أحبك أكتر، واتخذل
فتحت عينيها وبصت للطريق اللي مشي منه، وبعدها دخلت بيتها ... بعد مرور أيام كتيره...كانت نسمة قاعدة في أوضتها، ماسكة موبايلها وبتقلب فيه من غير تركيز، لحد ما رنة تليفونها قطعت هدوء المكان. بصت للشاشة، ولما لقت اسم آدم ابتسمت وردت: ألو يا آدم، إزيك؟
آدم: أنا تمام، إنتي عاملة إيه؟ ورجلك أخبارها إيه دلوقتي؟
نسمة: الحمد لله بقيت أحسن بكتير، متقلقش.
آدم: كويس، عشان أنا كنت عايز أقولك على حاجة، بس عايزك تسمعيني للآخر من غير ما ترفضي.
نسمة: إيه يا سيدي؟ خوفتني، في إيه؟
آدم: أهلي متجمعين النهارده في مطعم، وكنت عايزك تيجي معايا.
نسمة: أنا؟! أروح معاك فين يا آدم؟
آدم: المطعم اللي هنتجمع فيه. عايز أعرّفك عليهم، وبصراحة مش حابب تفضلي حاسة إنك لوحدك، خصوصًا إنك متعرفيش حد من عيلتي غير معتز.
أول ما سمعت اسم معتز، قلبها دق بسرعة. تخيلت نفسها قاعدة وسط أهله، وهو موجود معاهم، ويمكن يفرح لما يشوفها. ابتسمت من غير ما تحس لكنها رجعت لواقعها بسرعة، وقالت بتردد: بس يا آدم، مش عارفة... يعني إنت متأكد إن وجودي مش هيضايق حد؟ أنا معرفش أهلك، وممكن يستغربوا إني جاية معاك كده من غير مناسبة، أو يحسوا إني فرضت نفسي عليهم.
آدم: يا بنتي إنتي بتفكري في إيه؟ هو أنا هاخدك معايا مكان أهلي مش عايزينك فيه؟ أنا اللي عايزك تيجي، وبعدين إنتي مش غريبة عني.
نسمة: بس برضه يا آدم، أنا مش عايزة أحرجك قدامهم.
آدم: وإنتي هتحرجيني ليه؟ بالعكس، أنا هبقى مبسوط إنك معانا. وبعدين أمي طيبة، وأبويا ممكن كلامه يبقى مباشر شوية، بس متخافيش منه. محدش هيضايقك طول ما أنا موجود.
نسمة: طيب... بس أنا مش عارفة أقولك إيه.
آدم: قولي إنك موافقة وخلاص.
سكتت نسمة لحظات، وبعدها ابتسمت لوحدها وهي بتبص في الأرض.
نسمة: ماشي يا آدم، هاجي.
آدم بفرحة: أهو ده الكلام! طب اسمعي بقى، أنا هعدي عليكي، وهستناكي قدام البيت. عايزك تكوني جاهزة لما أوصل، اتفقنا؟
نسمة: اتفقنا.
آدم: سلام يا ستي، وأوعي ترجعي في كلامك.
نسمة بضحكة خفيفة: حاضر، سلام.
قفلت المكالمة، وفضلت ماسكة الموبايل وهي مبتسمة. كانت فرحانة إنها هتشوف معتز، لكنها كانت بتحاول تقنع نفسها إن الموضوع مجرد زيارة عادية، وإنها مش مستنية منه أي حاجة..وبعد وقت، وقفت قدام المراية وهي لابسة فستان أنيق بلون هادي، محدد وسطها بشكل رقيق، ونازل بانسيابية لحد رجليها. و سابت شعرها الطويل، وحطت لمسة بسيطة من المكياج، وبعدين بصت لنفسها طويلًا وقالت في نفسها: هو أنا بعمل كل ده عشانه؟... لأ، أنا رايحة عشان آدم عزمني. بس لو شافني وابتسم، مش هزعل يعني.
هزت رأسها كأنها بتلوم نفسها، وخدت شنطتها الصغيرة، وخرجت تستنى آدم.
قدام بيت نسمة...كان آدم واقف جنب عربيته، بيبص في موبايله كل شوية، لحد ما لمحها جاية من بعيد.
رفع عينه ناحيتها، وفجأة سكت ونسمة قربت منه وهي بتظبط شنطتها على كتفها، ولما لقت عينه ثابتة عليها، اتوترت: إيه يا آدم؟ في حاجة غلط؟
آدم فضل باصصلها ثواني، وبعدها ابتسم بإعجاب واضح: غلط إيه بس؟ إنتي ناوية تخليني أندم إني جايبك معايا ولا إيه؟
نسمة باستغراب: ليه؟
آدم: عشان بالشكل ده، أنا هقضي السهرة كلها أحاول أمنع الناس من إنها تبصلك!
احمر وش نسمة، وبصت بعيد وهي بتضحك بإحراج: بتهزر إنت بتقول إيه؟ ده أنا كنت هغير الفستان أصلًا.
آدم: تغيريه ليه؟ إنتي جميلة جدًا، والفستان لايق عليكي أوي. بجد، لو كنت أعرف إنك هتطلعي بالشكل ده، كنت جيت من بدري.
نسمة: ميرسي... بس خلاص بقى، كفاية إحراج.
آدم ابتسم، لكنه فضل باصصلها لحظة أطول من اللازم، وكأنه لسه مستوعب شكلها المختلف عن كل مرة شافها فيها ونسمة لاحظت سرحانه، فحركت إيدها قدام وشه: أستاذ آدم؟ إحنا هنفضل واقفين هنا ولا ايه؟
آدم وهو بيفوق: لا طبعا! اتفضلي العربية أهي.
فتح لها باب العربية، فركبت، ولف هو وركب مكانه، وبعدها اتحرك ناحية المطعم وطول الطريق، آدم كان بيتكلم معاها عن أهله، وهي بترد عليه وتضحك أوقات، لكن جواها كان فيه سؤال واحد مش عارفة تبطّل تفكر فيه: معتز هيكون موجود؟ ولو شافني، هيبقى رد فعله إيه؟
في المطعم...
كان عزام قاعد على رأس الترابيزة، وبجانبه خديجة، بينما معتز قاعد قصادهم، ماسك موبايله بملامح جامدة، وكل شوية يبص في الساعة بضيق.
عزام: هو آدم اتأخر ليه لحد دلوقتي؟ ده قال إنه في الطريق من بدري.
معتز ببرود: ما هو لو بطل لف ودوران في الشوارع، كان زمانه وصل.
خديجة: يا معتز، هو لسه متأخرش للدرجة دي. وبعدين آدم مش صغير عشان كل شوية تحاسبه.
معتز: وأنا حاسبته في إيه؟ أنا بقول الحقيقة.
عزام ضحك بخفة وهو بيبص لابنه: أخوك ده لو اتبسط في يوم من الأيام، ممكن الدنيا تقوم من مكانها.
معتز ببرود: سيبه يا بابا، هو حر في نفسه.
عزام: أهو إنت كمان، بدل ما تقعد مكشر كده، حاول تتعامل مع الناس بشكل طبيعي.
معتز رفع عينه ليه بنظرة ضيقة، لكنه ما ردش. وفي اللحظة دي، باب المطعم اتفتح، ودخل آدم لكن آدم ما كانش لوحده وكانت نسمة ماشية جنبه، بخطوات هادية، وابتسامة خفيفة على وشها. أول ما دخلت، كذا شخص في المكان بص ناحيتها، وبعضهم فضل متابعها وهي بتعدي.
آدم كان بيتكلم معاها، ولما حس بنظرات الناس، قرب منها أكتر، وحط إيده بخفة عند وسطها عشان يوجهها ناحية الترابيزة والحركة دي ما فاتتش على معتز ورفع عينه من موبايله، وفي اللحظة اللي شاف فيها نسمة، اتجمد مكانه.
اتسعت عينه للحظة، وبعدين رجع ضيقها ببطء. فضل باصصلها من غير ما يتحرك، مش مستوعب إنها واقفة قدامه بالشكل ده، ولا مستوعب إن كل العيون تقريبًا بتتبعها وكانت جميلة بشكل استفزه قبل ما يقدر حتى يفهم سبب استفزازه. والأكثر استفزازًا بالنسبة له، إيد آدم اللي عند وسطها، وقربه منها وكأنه متعود على وجودها جنبه.
معتز في نفسه: إيه اللي جابها هنا؟ وآدم ماله لازق فيها كده ليه؟
نسمة رفعت عينيها ناحية الترابيزة، وأول ما شافت معتز، ابتسامتها اتلخبطت. قلبها دق بسرعة، وحاولت تثبت ملامحها، لكن عينيها فضحت فرحتها برؤيته وأما معتز، فكان باصصلها بملامح مقفولة، وفكه مشدود، وعينه بتنقل بينها وبين إيد أخوه اللي لسه قريبة من وسطها.
عزام باستغراب وهو بيبص لآدم: مين دي يا آدم؟ مش هتعرّفنا إنك جايب حد معاك؟
آدم ابتعد خطوة عن نسمة، وابتسم بثقة: حقك عليا يا بابا، أنا دخلت على طول. دي نسمة، ودي واحدة من أقرب الناس ليا، وحبيت أعرّفكم عليها بدل ما أفضل أحكيلكم عنها من بعيد.
عزام: أقرب الناس ليك؟ دي جديدة دي! من إمتى وإنت بتخبّي علينا الحكايات دي؟
آدم بضحكة: ما أنا لو حكيتلك كل حاجة يا بابا، مش هتسيبني في حالي.
عزام: طب ما تقول يا سيدي، إحنا سامعينك أهو.
خديجة كانت من أول ما شافت نسمة، عينيها معلقة بيها بإعجاب. ابتسمت ابتسامة دافية، وأشارت للكرسي اللي جنبها: ما شاء الله، جميلة أوي يا حبيبتي. تعالي اقعدي جنبي، عايزة أتعرف عليكي.
نسمة ابتسمت بخجل، وقربت منهم: متشكرة لحضرتك.
مدت إيدها تسلم على عزام، فبادلها السلام بابتسامة هادية، وبعده خديجة اللي رحبت بيها بكلمتين وثم وصلت لمعتز.
وقفت قدامه، ومدت إيدها بتردد: إزيك ؟
رفع معتز عينه ليها، وبدل ما يرد بابتسامة أو حتى بكلمة عادية، مد إيده وقبض على إيدها بقوة واتغيرت ملامح نسمة فورًا، وحست بالألم في صوابعها، لكنها حاولت ما تبينش حاجة قدام الموجودين.
معتز ببرود شديد: أهلًا.
فضل ضاغط على إيدها لحظة زيادة، وعينه مثبتة في عينيها، وكأنه بيعاقبها على حاجة هي نفسها مش فاهماها. بعدها ساب إيدها فجأة ونسمة سحبت إيدها بهدوء، وضمّتها لصدرها من غير ما حد ياخد باله لكن آدم أخد باله.
عينه راحت لإيد أخوه، وبعدها لوش نسمة اللي حاولت تخبي وجعها، فاختفت ابتسامته للحظة.
آدم: تعالي يا نسمة، اقعدي جنب ماما خديجة.
شد الكرسي ليها، فنسمة قعدت جنب خديجة، اللي بدأت تسألها عن نفسها ودراستها، ونسمة ردت عليها بأدب وهدوء.
خديجة: بتدرسي إيه يا نسمة؟
نسمة: طب يا طنط، لسه في سنين قدامي.
خديجة: ربنا يوفقك يا حبيبتي، وتبقي دكتورة شاطرة.
نسمة بابتسامة: يا رب، متشكرة لحضرتك.
كانت خديجة بتتكلم معاها بحنان خلّى نسمة ترتاح شوية، بينما معتز قاعد ساكت، بيحرك المعلقة بين صوابعه بعصبية، وكل ما يلمح آدم بيقرب من نسمة أو يوجه لها الكلام، ملامحه بتزداد ضيقًا وفجأة، آدم عدّل قعدته، وبص للجميع بجدية مختلفة: بصوا، أنا عارف إنكم مستغربين إني جايب نسمة معايا النهارده، بس أنا مش حابب أفضل مخبي عليكم حاجة مهمة بالنسبالي.
عزام بصله باهتمام: خير يا آدم، في إيه؟
آدم أخد نفسًا، وبص لنسمة للحظة. كانت بتبصله باستغراب، لأنها ما كانتش تعرف هو ناوي يقول إيه بالضبط وقال: أنا اتعرفت على نسمة من فترة، وكل ما عرفتها أكتر، لقيت إنها بنت محترمة، وطيبة، وعندها أصل. ومش هبالغ لو قلتلكم إن وجودها بقى فارق معايا.
معتز رفع عينه ببطء بغضب شديد.
آدم مكملًا: وأنا مش جاي النهارده أعرّفكم عليها وخلاص. أنا جاي عشان أقولكم إني عايز أخد خطوة جد معاها، ولو هي موافقة، أنا ناوي أتقدم لها رسمي.
ساد الصمت للحظات ونسمة اتسمرت مكانها، وبصت لآدم بصدمة. ما كانتش متوقعة إنه يقول الكلام ده قدام أهله كلهم، ولا كانت عارفة تتصرف إزاي. قلبها بيدق بعنـ..ف، وعينها راحت تلقائيًا ناحية معتز اللي اتصدم بشده .
أما خديجة، فابتسمت بدهشة وفرحة، وبصت لنسمة بحنان: يا حبيبي، ما كنت تقول من الأول! ألف مبروك يا آدم، وربنا يقدم اللي فيه الخير.
عزام: خطوة جد، يبقى أهم حاجة تكونوا متفاهمين، وإنت متأكد من قرارك يا آدم؟
آدم: متأكد يا بابا، وأنا مش هضغط على نسمة في أي حاجة. المهم تكون موافقة ومرتاحه.
عزام بص لنسمة باهتمام: طب وإنتي يا بنتي، إيه رأيك في كلام آدم؟
نسمة اتوترت أكتر، وفتحت بقها عشان تتكلم، لكن قبل ما تنطق، صوت خبطة قوية على الترابيزة خلّى الكل ينتفض.
معتز: كفاية!
خبط بكفه على الترابيزة، فاهتزت الكوبايات، واتجهت كل العيون ناحيته وكان وشه متغير تمامًا، وعينه مشتعلة بغضب حاول يخفيه، لكنه فشل. بص لآدم بنظرة حادة، وبعدها رمى نظرة سريعة على نسمة