رواية نقطة عمياء الفصل الثالث عشر13بقلم منة احمد
خبط بكفه على الترابيزة، فاهتزت الكوبايات، واتجهت كل العيون ناحيته.
كان وشه متغير تمامًا، وعينه مشتعلة بغضب حاول يخفيه، لكنه فشل. بص لآدم بنظرة حادة، وبعدها رمى نظرة سريعة على نسمة
آدم: مالك يا معتز؟
معتز ببرود: إنت اللي مالك؟ يعني انت كنت خاطب، وفرحك فاضله شهر، ودلوقتي بتتكلم عن الجواز تاني؟
آدم بضيق: الموضوع انتهى من زمان يا معتز، ومش معنى إنك لسه شايفه قريب إن من حقك تحاسبني عليه وانت متعرفش حاجه..
معتز: من زمان؟ ده كان فاضل شهر على جوازك!
آدم بحدة مكتومة: وكان فيه أسباب خلت الجواز ده ما يتمش. أنا مش عايز أفتح حاجات قديمة المفروض إنها اتقفلت، ولا عايز أفضل أبررلك قرار أخدته من فترة. اللي حصل انتهى، وكل واحد فينا كمل حياته.
معتز: يعني إنت شايف إنك بمجرد ما الخطوبة انتهت، ينفع تدخل في خطوة جديدة بالسرعة دي؟
آدم: أنا مش داخل أتجوز بكرة يا معتز. أنا جاي أعرّف أهلي على بنت شايف إني ممكن أكمل معاها حياتي، ولسه حتى ماخدتش موافقتها. فين المشكلة؟
معتز ببرود: كويس إنها لسه ما وافقتش أنا شايف تعيد حساباتك وتفكر كويس قبل ما تظلم البنت المعاك.
بص معتز عليها بغيظ ونسمه بصت في عيونه بخوف ونزلت عينيها تاني
آدم: أنا مش بظلمها وعارف أنا بعمل ايه ومش طفل عشان حد يقررلي أنا بفكر كويس ولا لأ.
عزام: خلاص يا معتز، آدم كبير وعارف هو بيعمل إيه.
معتز ما ردش، وحوّل نظره ناحية نسمة اللي كانت قاعدة ساكتة، مش عارفة تتصرف إزاي وسط الخلاف ده.
معتز: وإنتي كمان فكري كويس قبل ما توافقي. مش أي حد يقول عايز يتجوزك يبقى مناسب ليكي.خصوصًا لما يكون خارج من تجربة ارتباط انتهت بعد ما كان فاضل على جوازه شهر.
آدم بضيق: أنا قولتلك إن الموضوع انتهى من زمان
معتز من غير ما يبص له: وأنا بقول رأيي. لو هي هتدخل علاقة جدية، فمن حقها تعرف إنها محتاجة تفكر كويس، مش تنبهر بالكلام أو بالخطوة اللي اتعملت النهارده.
نسمة بصوت هادي ومجروح: أنا مش من النوع اللي بياخد قراراته لمجرد إن حد قاله كلمتين حلوين يا دكتور معتز.
اتثبتت عيون معتز عليها لحظة. كلمة دكتور منها، بالطريقة الرسمية اللي قالتها بيها، وجعته أكتر مما كان متوقع، لكنه خبّى ده ورا ملامحه الجامدة: يبقى ما تستعجليش.
آدم بضيق: معتز، كفاية بقى.
معتز تجاهله، وبص لنسمة مباشرة وبجمود: كويس. يبقى أكيد مش هتزعلي لما أقولك إن قعدة النهارده مش معناها إنك بقيتي واحدة من العيلة، ولا إن الموضوع اتحسم. دي مجرد عزومة، وكل حاجة لسه في بدايتها.
نسمة سكتت، وحست إن الكلام نزل عليها تقيل. هي ما كانتش فاكرة إن العزومة معناها إنها بقت من العيلة، لكنها ما كانتش متوقعة إن معتز بالذات هو اللي هيحسسها إنها غريبة عنه بالشكل ده.
هو نفسه اللي اعترف لها بحبه وقت الحر..يق، واللي خلاها تصدق إن فيه مشاعر حقيقية بينهم، ودلوقتي بيتكلم معاها كأنها مجرد واحدة قابلها بالصدفة.
خديجة باستنكار: معتز! عيب الكلام ده، البنت ضيفتنا.
عزام بصرامة: اعتذارك ليها واجب يا معتز. إنت كده بتجرحها من غير أي داعي.
معتز بجمود: أنا ما غلطتش في حد. أنا بقول الحقيقة، واللي عنده مشكلة مع الحقيقة دي مش ذنبي
آدم حط إيده على الترابيزة، وبص لأخوه بغضب: إنت بتتعمد تحرجها من أول ما جبت سيرتها! هي عملتلك إيه عشان تكلمها بالطريقة دي؟
معتز: أنا مجبتش سيرتها بالسوء أنا قولت رأيي بس.
آدم: أمال إيه اللي إنت بتعمله من أول ما قولت إني عايز أتقدم لها؟ كل كلمة منك مقصود بيها تقلل منها أو تخليني أندم إني جبتها هنا!
معتز ضيّق عينيه، لكنه ما ردش فورًا. كان جواه كلام كتير، كلام لو خرج منه هيفضح كل اللي بيحاول يخبيه.
معتز ببرود: إنت حر . أنا قولت اللي عندي.
نسمة قامت من مكانها، بتحاول تحافظ على هدوئها رغم إن دموعها كانت بتتجمع في عينيها وقالت: أنا آسفة يا طنط خديجة، بس لازم أمشي.
قامت خديجة بسرعة ومسكت إيدها بحنان: استني يا حبيبتي، ما تمشيش زعلانة. إنتي ما عملتيش أي حاجة غلط. اقعدي شوية، وماتخليش كلامه يضايقك.
نسمة بابتسامة باهتة: والله مش زعلانة منكوا، وأنا مبسوطة إني اتعرفت عليكوا. بس محتاجة أروح دلوقتي.
آدم وهو بيقوم: هاجي أوصلك.
نسمة: لا يا آدم، هروح لوحدي.
آدم: مش هسيبك تمشي وإنتي بالحالة دي.
نسمه برجاء:أرجوك يا آدم، خليني أمشي لوحدي. مش عايزة أكون سبب في مشكلة بينك وبين أخوك أكتر من كده.
بصت لخديجة وودعتها، وبعدها عينيها راحت لمعتز من غير ما تقصد وكان قاعد مكانه، ملامحه ثابتة، لكنه أول ما عينيه قابلت عينيها، حوّل نظره بعيد كأنه مش قادر يستحمل يشوف الوجع اللي هو نفسه كان السبب فيه.
نسمة بلعت غصتها، وخرجت من المطعم وهي بتحاول تمنع دموعها من النزول.
آدم بغضب وهو بيبص لمعتز: ارتحت كده؟!
معتز: هي اللي قررت تمشي.
آدم: بعد ما جرحتها قدامنا كلنا! إنت مش شايف نفسك بقيت عامل إزاي من ساعة ما جبت سيرتها؟
معتز بحدة: وطّي صوتك يا آدم.
آدم: لأ، مش هوطّي صوتي. أنا مش هسمحلك تجرحها بالشكل ده وتتصرف كأنك ما عملتش حاجة!
اتغيرت ملامح معتز، وبص لأخوه بنظرة صارمة: كلم أخوك الكبير عدل.
آدم سكت لحظة، وبعدها ابتسم ابتسامة باردة وهو بيهز راسه: أخويا الكبير؟ أيوه، إنت أخويا الكبير. بس ده مش معناه إنك دايمًا صح، ولا إن من حقك تجرح أي حد لمجرد إنك شايف نفسك صاحب الكلمة الأخيرة.
معتز بحدة: خلصت؟
آدم: لأ، لسه. بس مش هضيّع وقتي في الكلام مع واحد مش عايز يسمع غير نفسه.
خرج آدم من المطعم من غير ما يستنى رد، وساب معتز واقف مكانه، ملامحه جامدة لكن عينيه متابعاه لحد ما اختفى من قدامه.
عزام بضيق: إنت زودتها يا معتز اوي انت مالك بقيت عامل كدا ليه؟!!.
معتز: عامل ازاي أنا معملتش حاجه غير اني قولت رأيي.
عزام: وأنا قولتلك إن فيه فرق بين الرأي والإهانة. البنت جاية تقعد معاها باحترام، وإنت خليتها تمشي وهي بتعيط.
خديجة بحزن: أنا مش فاهمة إنت بتعمل كده ليه. من أول ما آدم قال إنه عايز يجيب نسمة، وإنت متغير ومش طايق تسمع اسمها.
معتز بص لخديجة، وبعدها رجع نظره لأبوه: مفيش حاجة يا مرات ابويا.
خديجة: أمال ليه كل العصبية دي؟ وليه مصمم تكسر فرحة أخوك من غير سبب واضح؟
معتز بجمود: أنا مش بكسر فرحة حد.
عزام: يبقى راجع نفسك. إنت مش صغير، ومش كل مرة ينفع تتصرف بعصبية وبعدين تقول إنك ما غلطتش.
معتز تنفس بضيق، وبص لساعته كأنه بيدور على أي حجة تنهي الكلام.
خديجة: حتى لو عندك اعتراض على آدم، ما كانش ينفع تعامل نسمة بالشكل ده.
معتز بزهق: خلاص بقى، أنا مش ناقص الكلام ده.
قام من مكانه وأخد مفاتيحه.
عزام: إنت رايح فين؟
معتز: ماشي. عندي شغل.
خديجة: معتز، إحنا لسه بنتكلم.
معتز ببرود: وأنا خلصت كلامي.
خرج من المطعم بخطوات سريعة، وهو متضايق من عتاب أهله ومن نفسه أكتر ما كان مستعد يعترف.
قدام المطعم
كانت نسمة واقفة بعيد عن المدخل، بتحاول تمسح دموعها قبل ما آدم يخرج. لكنها كل ما تفتكر كلام معتز، دموعها تنزل من جديد وهي مش مصدقه أنه اتصرف معاها كأنها غريبه و نسي اعترافهم بالحب لبعض
سمعت خطوات آدم، فمسحت وشها بسرعة وحاولت تبعد عنه.
آدم بحزن: نسمة، استني.
وقفت مكانها من غير ما تبص له.
آدم: أنا آسف. والله ما كنت أعرف إن معتز هيتصرف بالشكل ده، ومش هبررلك كلامه. إنتي ما عملتيش أي حاجة غلط.
نسمة وهي بتحاول تثبت صوتها: مش ذنبك يا آدم. إنت جبتني باحترام، وأنا مقدرة ده.
آدم: بس أنا اللي خليتك تدخلي موقف زي ده. كان المفروض أوقفه عند حده من أول كلمة متزعليش.
نسمة هزت راسها، لكن دموعها خانتها تاني: أنا مش زعلانة منك. أنا بس مش فاهمة ليه بيكره وجودي بالشكل ده.
آدم سكت لحظة، وبعدها قرب منها وضمها بحنان، محاولًا يهديها.
آدم: اهدي يا نسمة. إنتي ما عملتيش حاجة غلط، ومش من حق حد يخليكي تحسي إنك أقل من أي حد.
نسمة عيطت أكتر، وفضلت واقفة في حضنه وهي بتحاول تستوعب اللي حصل وفي اللحظة دي، خرج معتز من باب المطعم ناحية عربيته وكان ماشي بسرعة، لكنه وقف فجأة لما لمح آدم من بعيد وهو حا..ضن نسمة واتشد فكه، وثبت عينيه عليهم وقال لنفسه: إيه اللي بيعمله ده؟
فضل باصص لهم ثواني، وبعدها اتحرك ناحيتهم بخطوات غاضبة، محاولًا يقنع نفسه إن الموضوع ما يخصوش وأنه مش هيفرض نفسه عليها بس عينيه ما قدرتش تبعد عنهم.
شاف نسمة وهي بتعيط، وشاف إيد آدم وهي بتربت على ضهرها عشان تهديها. منظر بسيط، لكنه استفزه بطريقة ما قدرش يفهمها، أو يمكن ما حبش يعترف لنفسه بيها.
لكن قبل ما يوصل، جرسون خارج من المطعم بصينية عليها كوبايات عصير، خبط فيه من غير ما ياخد باله، فاتكبت كوباية على قميص معتز.
الجرسون بخضة: أنا آسف يا فندم، والله ماخدتش بالي!
معتز بص لقميصه المبلول، وبعدها رفع عينيه للجرسون.
معتز بصريخ: إنت أعمى؟! مش بتبص قدامك وإنت ماشي؟!
الجرسون اتراجع خطوة، والصينية اتهزت في إيده وقال بتوتر: حقك عليّا يا فندم، غصب عني.
معتز: غصب عنك إيه؟! إنتوا مش بتتعلموا تشتغلوا إزاي؟! أنا أدفع فلوس عشان ألاقي واحد مش عارف يمشي بصينية من غير ما يغرقني؟!
الجرسون: أنا آسف، هجيبلك مناديل حالًا.
معتز بعنف: مش عايز منك حاجة!
دفعه من كتفه بعنـ..ف، فاختل توازن الجرسون ووقع علي الارض .
وفي نفس اللحظة، وصل صوت صريخ معتز لنسمة وآدم.
نسمة انتفضت من مكانها، وبعدت عن آدم وهي بتبص ناحية الصوت بخوف. أول ما شافت معتز واقف قدام الجرسون وملامحه بالشكل ده، اتجمدت للحظة.
نسمة: يا نهار أبيض! ده معتز!
آدم لف بسرعة ناحية الصوت، وشاف أخوه وهو بيزعق للجرسون وبيهدده.
نسمة وهي بتشد آدم من دراعه: الحق أخوك يا آدم! ده ممكن يأذيه، بص بيعمل فيه إيه!
آدم اتحرك بسرعة ناحيتهم، ووقف بين معتز والجرسون.
آدم وهو بيمسك ذراع معتز: خلاص يا معتز! كفاية، الراجل اعتذرلك!
معتز لف له بعصبية: ابعد عني انت كمان.
آدم بصرامة: مش هبعد وإنت بتزعق لواحد على غلطة ممكن تحصل لأي حد. العصير اتكب على قميصك، مش نهاية الدنيا!
معتز: إنت شايف اللي حصل؟! ده مش عارف حتى يمشي!
آدم: وهو اعتذرلك! خلاص، إيه لازمة الإهانة ؟!.
الجرسون كان قاعد بيلم اللي علي الارض، مش عارف يتكلم ولا يتحرك. آدم سابه لحظة، وراح ناحيته وساعده يرجع يقف كويس وقال للجرسون: إنت كويس؟ اتعورت؟
الجرسون: لا يا فندم، الحمد لله.
آدم: أنا بعتذر لك على اللي حصل. هو بس أعصابه متوتره
الجرسون شكره ورجع ناحية المطعم، بينما آدم رجع لمعتز، اللي كان لسه متعصب.
آدم باستغراب: إنت مالك النهارده؟ أنا مش فاهم إيه اللي جرالك. من أول القعدة وإنت بتزعق وبتهاجم أي حد قدامك!
معتز بحدة: ما تحاولش تحلل تصرفاتي يا آدم.
آدم: أنا مش بحللك حاجة، أنا بس شايفك بتتصرف بطريقة مش طبيعية. هو كل ده عشان أنا جبت نسمة معايا؟
معتز بص له بسرعة، وبعدها ضحك ضحكة قصيرة خالية من أي مرح: إنت بتقول إيه؟ إنت فاكر نفسك محور الكون لدرجة إن أي حاجة تحصل تبقى بسببك؟ أنا مش مضايق من نسمة، ولا وجودها فارق معايا أصلًا
آدم: معتز قول الصراحه فيه حاجة بينك وبين نسمة؟
معتز ثبت عينيه عليه، وملامحه ما اتحركتش: لأ.
آدم: أمال ليه كل ده؟ ليه من ساعة ما جبت سيرتها وإنت بتهاجم قراري، هو انت مش شايف طريقتك كانت عامله ازاي
معتز ببرود: عشان إنت بتستعجل، وأنا مش عايزك تكرر غلطتك.
آدم: انت مالك ؟!! وبعدين خطوبتي انتهت من زمان، وأنا مش هفضل عايش في الماضي. أنا عارف أنا بعمل إيه، ومش محتاجك تقررلي أعيش حياتي إزاي.
معتز: براحتك.
آدم: لأ، مش براحتى لما ألاقيك بتعامل البنت بالشكل ده. إنت بتتكلم عنها كأنك مش طايقها، وفي نفس الوقت مش سايبها في حالها.
معتز: دي أوهام في دماغك.
آدم: بصلي وقولي إن وجودها مش فارق معاك.
معتز بجمود: مش فارق معايا.
آدم فضل باصص له، مش مقتنع بإجابته.
آدم: طب ليه مش قادر تسيبها في حالها؟
معتز قبض على مفتاح عربيته، وبدأ صبره ينفد: أنا قولتلك مفيش حاجة هو انتوا مكبرين الموضوع ليه فكك مني.
آدم: وأنا مش مصدقك.
قرب معتز منه خطوة، ونظرته بقت حادة: مش مطلوب منك تصدقني ريح نفسك.
آدم: أنا أخوك، وبحاول أفهمك. لو فيه حاجة، قولها بدل ما تفضل تأذيها من غير سبب.
معتز حس إن آدم بيقرب من منطقة هو رافض حتى يفكر فيها، فاختار يقفل الكلام بالطريقة اللي متعود عليها.
معتز بعصبية: بقولك إيه، انزل من دماغي يا آدم! أنا مش هفضل أبررلك تصرفاتي. خليك في حياتك وسيبني في حالي!
لف ومشي ناحية عربيته من غير ما يستنى رد أخوه.
آدم: معتز! أنا لسه ما خلصتش كلامي!
معتز فتح باب العربية وركب، وقفل الباب بعنف. وبعد لحظات، شغّل العربية وتحرك من غير ما يبص وراه.
آدم فضل واقف مكانه، بيتابع العربية وهي بتبعد.
آدم لف يدور على نسمة عشان يطمن عليها، لكنه ما لقاهاش في مكانها.
بص ناحية الشارع، فشاف تاكسي بيتحرك من بعيد، وافتكر إنه شافها قاعدة جوه.
آدم في نفسه بضيق: هي مشيت؟! حتى ما استنتش إني أوصلها...
طلع موبايله عشان يكلمها، لكنه وقف قبل ما يتصل. كان عارف إنها اتجرحت بسببه، وإنها غالبًا مش عايزة تتكلم مع حد دلوقتي.
داخل عربية معتز
كان معتز سايق بسرعة، وإيده قابضة على الدركسيون بعصبية. صورة نسمة وهي واقفة قدام أهله وبتحاول تمنع دموعها كانت لسه قدام عينيه.
خبط بكفه على الدركسيون وقال بضيق: غبي... أنا اللي جرحتها قدامهم.
افتكر اعترافه ليها وقت الحر..يق، وإزاي بعدها رجع يعاملها ببرود كأن مفيش حاجة حصلت.
معتز لنفسه: كان لازم أفضل ساكت... أنا اللي فتحت الباب وبعدين قفلته في وشها.
لكن لما افتكر آدم وهو حاضنها، ملامحه اتبدلت، والغيرة رجعت تسيطر عليه.
معتز بحدة: بس اعمل ايه مش قادر أشوفها معاه... بس إنت مالك؟ إنت اللي سيبتها تبعد.
وبعدها وقف بالعربيه علي جنب وطلع موبايله واتصل بنسمة.
في نفس الوقت، داخل التاكسي
كانت نسمة قاعدة جنب الشباك، حاضنة شنطتها لصدرها، ووشها متجه ناحية الشارع. عينيها كلها عياط، وكل ما تحاول تهدى، تفتكر نظرة معتز ليها قدام أهله، فتحس إن قلبها بيتقبض من جديد.
نسمة في نفسها بوجع: ليه عملت فيا كده يا معتز؟ أنا أذيتك في إيه عشان تعاملني كأني ولا حاجة عندك؟
رن موبايلها وبصت للشاشة، وأول ما شافت اسم معتز، اتجمدت مكانها وقلبها دق بسرعة، وإيديها بردت فجأة.
فضلت باصة للاسم، مش مصدقة إنه بيتصل بيها بعد كل اللي حصل. جزء منها كان نفسه ترد، تسمع صوته، حتى لو هيزعق لها. وجزء تاني كان خايف من إنها تسمع منه كلمة تجرحها أكتر.
نسمة بتوتر: إنت عايز مني إيه تاني؟!
سابته يرن لحظات، وبعدها قفلت الموبايل وحطته في شنطتها.
داخل عربية معتز
معتز كان متابع الاتصال، ولما المكالمة انتهت من غير رد، ضيّق عينيه وقال: مش بتردي؟
استنى شوية، وبعدها اتصل مرة تانية والمرة دي الاتصال ما كملش وبص للشاشة باستغراب، وحاول يتصل للمرة التالتة، لكن موبايلها كان مقفول ومعتز سكت للحظة، وبعدها رمى الموبايل على الكرسي اللي جنبه وقال بغضب: بتقفلي تليفونك في وشي يا نسمة؟!
رجع شغّل العربية، لكن بدل ما يكمل طريقه، لف الدركسيون في الاتجاه التاني، وضغط على البنزين وقال بحدة: ماشي يا نسمة... أنا هجيلك بنفسي.
قدام بيت نسمة
وصل التاكسي للشارع اللي فيه بيت نسمة، وكان معتز وصل قبله بدقايق قليلة. نزل من عربيته وقفل الباب بعنـ..ف، وبعدها بدأ يمشي قدامها ويرجع تاني، مش قادر يثبت في مكانه وكان بيلف حوالين نفسه، بيمرر إيده في شعره بعصبية، وملامحه كلها غضب. كل شوية يبص في اتجاه الشارع، وبعدها يطلع موبايله، كأنه لسه مستني إنها ترد عليه وقال لنفسه بضيق: ردي بقا
لكن قبل ما يكمل تفكيره، لمح التاكسي داخل الشارع، فوقف مكانه وثبت عينيه عليه والتاكسي وقف على الناحية التانية من الشارع.
نسمة رفعت عينيها، وأول ما شافته واقف جنب عربيته، اتخضت وقالت لنفسها: ايه اللي جابه ده عايز ايه؟!
نزلت من التاكسي وهي بتبص له بحذر. معتز لمحها، فوقف عن الحركة، وثبت عينيه عليها وفضل ساكت، مستنيها تقرب ونسمة بلعت ريقها بتوتر، وبعدها مشيت ناحيته بخطوات مترددة، لحد ما وقفت قدامه.
نسمة بضيق: إنت إيه اللي جابك هنا؟!
معتز بص لها من فوق لتحت وقال بسخرية باردة: مش كفاية اللي عملتيه في المطعم؟ كمان قفلتي تليفونك في وشي؟
نسمة بحدة: أنا اللي عملت إيه؟! إنت اللي أحرجتني قدام أهلك، ودلوقتي جاي تحاسبني؟!
معتز: اها احاسبك ده غير اني شوفتك وانتي في حضنه وده خلاني اتغاظ اكتر!
نسمة اتصدمت من طريقته، وملامحها اتشدت وقاات بحدة: وإنت مالك جاي تحاسبني على إيه بالظبط؟!
معتز قرب خطوة، وعينيه ثابتة عليها: على اللي شوفته بعيني.
نسمة: إنت شوفت اللي إنت عايز تشوفه! آدم كان بيواسيني بعد ما إنت أحرجتني قدام أهلك، وجرحتني من غير أي سبب!
معتز بسخرية: اها طبعا، وأنا المفروض أصدق إن الحضن ده كان مجرد مواساة؟
نسمة رفعت صوتها، وقد بدأ الغضب يتغلب على خوفها.
نسمة: أيوه! ده أخوك يا معتز، وهو ما عملش حاجة غير إنه حاول يهديني. كان محترم معايا، وعزمني أقابل أهله، وأنا ما كنتش أعرف إنك هتتصرف بالطريقة دي. هو إيه الغلط في إني أتعامل مع حد باحترام؟!
معتز لف وشه الناحية التانية، وضحك بسخرية وهو بيهز راسه، كأنه مش قادر يستوعب ردها: احترام؟! هو ده بقى الاحترام عندك؟ إنك تقفي في حضن راجل، حتى لو كان أخويا، وتعيطي له بالشكل ده؟!
نسمة بصت له بذهول: إنت بتتكلم بجد؟! ده أخوك يا معتز! وبعدين أنا ما طلبتش منه يحضني، هو شافني بعيط وحاول يهديني، بعد ما أخوه اللي المفروض يكون راجل كبير وعاقل، وقف يهينني قدام الناس!
اتغيرت ملامح معتز، وعينيه بقت أضيق وقال ببرود قاسٍ: خلي بالك من كلامك وإنتي بتتكلمي عني.
نسمة بوجع وغضب: وليه؟ عشان إنت الدكتور معتز اللي محدش يقدر يقوله إنه غلطان؟! أنا مش عشان طالبه عندك تتحكم فيا بمزاجك، أو اخاف منك لدرجة إني أقبل إهانتك وأسكت!
معتز قرب منها، وصوته نزل لدرجة أخطر: خلصتي؟
نسمة: لأ، لسه! أنا من أول ما دخلت المطعم وأنا بحاول أفهم إنت بتعمل معايا كده ليه. لو إنت مش طايق وجودي، كان ممكن تسيبني في حالي. لكن إنت فضلت تجرحني كلمة ورا كلمة، ولما مشيت، جيت ورايا لحد البيت عشان تكمل؟!
معتز: أنا جيت عشان أفهمك حاجة واضح إنك مش فاهمها.
نسمة: وأنا مش عايزة أفهم منك حاجة!
معتز بص لها بغضب شديد: إنتي عايزاني أعمل إيه بعد ما شوفتك جاية معاه، وهو بيكلمك عن الجواز، وبعدها شوفتكم حاضنك قدامي؟! مين فينا اللي غلطان يا نسمة؟!
نسمة بصوت عالي: أنا ما كنتش أعرف إنه هيتكلم في الجواز أصلًا! آدم عزمَني على العزومة، وأنا وافقت عشان ما كنتش عايزة أحرجه. ولما اتكلم عن الموضوع، وضحت له إني لسه ما وافقتش على أي حاجة! إنت كنت قاعد وسمعت كل ده، ولا كنت مشغول بس إنك تجرحني؟!
معتز سكت لحظة، وملامحه اتصلبت أكتر: وكان لازم توافقي على العزومة من الأساس ليه؟
نسمة ضحكت بمرارة: بجد؟! هو أنا لازم أستأذنك قبل ما أروح عزومة؟! إنت مين بالنسبة لي يا معتز عشان تحاسبني على كل خطوة؟!
السؤال نزل عليه كأنه صفعة واتحركت عضلة في فكه، لكنه حاول يحافظ على بروده: واضح إنك نسيتي حدودك.
نسمة بوجع: لأ، أنا عارفة حدودي كويس مش كل ما تشوفني مع ادم اخوك تهاجمني طب هو اعترف بمشاعره قدام أهله إنما أنت سكتت
معتز: ما تحاوليش تحولي الموضوع عليّا. أنا بتكلم عن اللي شوفته.
نسمة: وإنت شوفت إيه غير إن أخوك كان بيواسيني؟! ولا إنت مضايق عشان شوفت حد بيعاملني بحنية، من غير ما يجرحني أو يخليني أحس إني قليلة؟!
ثبت معتز عينيه عليها، وملامحه اتبدلت للحظة.
معتز صرخ فيها فجأة: اخرسي خالص ابعدي عنه مش عايز اشوفك معاه انتي فاهمه
نسمة انتفضت من صوته، لكنها رفعت عينيها له بتحدٍ ممزوج بالدموع: مفيش حاجة بيني وبين آدم عموما عشان أبعد عنه! هو أخوك، وأنا عمري ما فكرت فيه بالطريقة اللي إنت متخيلها!
معتز: يبقى ترفضي جوازه!
نسمة بصت له بصدمة: وإنت مالك أوافق أو أرفض؟! أنا لسه ما وافقتش أصلًا، لكن حتى لو فكرت أوافق، ده قراري أنا، مش قرارك!
معتز بحدة: مش هتتجوزيه.
نسمة ضحكت وسط دموعها، ضحكة موجوعة من كتر ما هي مش مصدقة اللي بتسمعه: إنت فاكر نفسك مين؟! إنت بنفسك اللي وقفت قدام أهلك وقلت إن القعدة دي مجرد عزومة، وإن أنا لسه غريبة عن العيلة. وإنت بنفسك اللي عاملتني كأنك ما تعرفنيش، ودلوقتي جاي تقولي ما أتجوزش أخوك؟!
قربت منه خطوة، وبصت في عينيه مباشرة: ولا إنت فاكر إن اعترافك ليا وقت الحريق كان تصريح إنك تتحكم في حياتي؟!
اتجمد معتز مكانه وقال بصوت منخفض: ما تدخليش اللي حصل وقت الحريق في الموضوع.
نسمة: ليه؟! عشان مش عاجبك إني أفكرك إنك إنت اللي اعترفتلي بحبك؟! ولا عشان دلوقتي عايز تتصرف كأنك ما قلتش حاجة؟!
معتز قبض إيده بقوة.
نسمة بدموع: أنا صدقتك يا معتز. صدقت إنك بتحبني، وإن كل القسوة اللي بتظهرها قدام الناس مش هي كل اللي جواك. لكن واضح إني كنت غلطانة.
معتز بحدة: ما تكمليش.
نسمة: لأ، هكمل! إنت قولتلي إنك بتحبني، وبعدها سبتني لوحدي مع كلامك، من غير ما تفهمني إنت عايز إيه. ولما شوفتني النهارده، بدل ما تواجهني بالحقيقة، فضلت تجرحني قدام أهلك، كأنك بتعاقبني على حاجة أنا ما عملتهاش!
معتز صرخ فيها: عشان أنا مش قادر أشوفك معاه!
سكت المكان بينهما وحتى نسمة نفسها اتجمدت، وبصت له بذهول ومعتز كان بيتنفس بعنف، وعينيه مشتعلة. واضح إنه ما كانش ناوي يقولها، لكن الكلام خرج منه قبل ما يقدر يوقفه.
نسمة بصوت مرتجف: إنت... إنت قولت إيه؟
معتز ضحك بسخرية، كأنه بيحاول يسترد سيطرته على نفسه: سمعتي كويس.
نسمة: لأ، أنا عايزة أسمعها منك بوضوح. إنت مش قادر تشوفني مع آدم اخوك ليه؟!
معتز قرب منها خطوة، وصوته بقى غليظًا: عشان أنا بحبك يا نسمة! عشان فكرة إنك تبقي لحد غيري بتجنني! عشان كل مرة بتبصي فيها لحد غيري، بحس إني بخسرك، حتى لو إنتي أصلًا مش ليا!
نزلت دموع نسمة أكتر، وقلبها بيدق بعنف ولكن معتز ما سابش لنفسه فرصة يهدى، وكمل بغضب: وده مش معناه إني هقف أتفرج عليكي وإنتي بتقربي من أخويا، وأنا عارف إن فيه مشاعر بيني وبينك!
نسمة هزت راسها وهي بتعيط: لأ، يا معتز. إنت ما ينفعش تستخدم حبك عشان تجرحني أو تتحكم فيا. إنت لو بتحبني فعلًا، كان المفروض تحترمني، مش تحسسني إني قليلة قدام الناس.
معتز: أنا ما قولتش إنك قليلة.
نسمة: بس ده اللي حسستني بيه! وأنا مش هفضل كل مرة أستنى منك كلمة حلوة، وبعدها أتحمل منك عشر كلمات يوجعوني!
سكتت لحظة، ومسحت دموعها بإيدها وبصوت مكسور: وبعدين، مفيش حاجة بيني وبينك أصلًا. إنت اعترفتلي بحبك وقت الحريق، وأنا ما أنكرتش مشاعري وقتها، لكن ده ما يدّيكش الحق تفضل تقربني منك لما تخاف أخسرك، وتبعدني عنك لما تحس إنك بقيت ضعيف قدامي.
معتز اتنفس بعنف، وعينيه فضلت معلقة بوشها.
نسمة كملت، وهي بتحاول تثبت صوتها: أنا مش عايزة أتجوزك يا دكتور معتز.
الكلمة نزلت عليه تقيلة، لكنه حاول يخبي تأثيرها وقال ببرود مصطنع: كويس. وأنا ما طلبتش منك تتجوزيني.
نسمة هزت راسها بألم: بالضبط. إنت ما طلبتش، لكن مش عايزني أكون لحد غيرك. عايزني أفضل واقفة مكاني، مستنية قرارك، لحد ما حضرتك تقرر إنك جاهز تحبني قدام الناس.
لفت وشها ناحية البيت، ولسه تمشي لكن معتز مد إيده، ومسك دراعها بقوة ونسمة اتفاجئت، ولفت له بسرعة: سيب دراعي!
معتز ما سابهاش، وشدها ناحيته، لحد ما بقت واقفة قدامه مباشرة، وضهرها قريب من العربية.
معتز بغضب مكتوم: سيبك من ده كله انتي بتحبيني ولا لا
نسمة بصت في عينيه بدموع، وصوتها خرج مرتجفًا:سيبني يا معتز.
معتز جز على أسنانه: نسمة... اعترفي. بتحبيني ولا لأ؟
نسمة حاولت تسحب دراعها، لكنه كان لسه ماسكه و بدموع: لأ.
ملامح معتز اتجمدت: إيه؟
نسمة رفعت صوتها وهي بتعيط: قولتلك لأ! أنا مش بحبك، ومش عايزة أحبك! إنت سامع اللي إنت عايز تسمعه، ومش فارق معاك أنا بقول إيه!
معتز بص لها للحظات، وبعدها ضر..ب بإيده على جسم العربية جنبها ضر..بة قوية، ثم كررها مرة تانية، وصوته ارتفع من الغضب ونسمة اتفزعت، ورجعت بجسمها لورا وهي بتحاول تبعد عنه وقال بحدة: بصيلي وأنا بكلمك!
نسمة كانت بتترعش، لكن صوتها طلع رغم خوفها: إنت بتخوفني! إنت مش شايف نفسك؟! أنا مش عايزة أكون معاك بالطريقة دي!
معتز وقف فجأة، وبص لها بنظرة جامدة، كأنه بيحاول يسيطر على جنونه وقال بصوت منخفض وخطير: قولي الحقيقة يا نسمة.
نسمة صرخت فيه: دي الحقيقة! أنا مش عايزة أتجوزك، ولا عايزة أفضل عايشة كل يوم خايفه منك! إنت فاكر إنك لما تعلي صوتك وتخوفني هصدق إنك بتحبني؟! لأ يا معتز، إنت كده بتخليني أخاف منك أكتر!
الكلام وجعه، لكن بدل ما يبعد، قبض على دراعها من جديد: أنا مش مصدق اللي بتقوليه.
نسمة بذهول: وده مش مشكلتي! إنت حر تصدق أو ما تصدقش، لكن سيبني في حالي!
معتز لف ناحية باب العربية وفتحه، وهو لسه ماسك دراعها ونسمة اتسعت عينيها: إنت بتعمل إيه؟!
معتز ببرود قاسي: اركبي.
نسمة حاولت تبعد إيده عنها: مش هركب معاك!
معتز: مش هكرر كلامي.
نسمة: وأنا مش هسمع كلامك! ابعد عني يا معتز!
حاولت تسحب دراعها بكل قوتها، لكنه جرّها ناحية العربية وأجبرها على الجلوس في المقعد الأمامي رغم مقاومتها.
نسمة وهي بتحاول تقوم: سيبني! إنت اتجـ..ننت؟! أنا مش عايزة أركب معاك!
معتز مال ناحيتها وربط حزام الأمان بسرعة، قبل ما يقفل الباب بعنـ..ف.
نسمة فضلت تخبط على الازاز وهي مصدومة من اللي بيحصل: افتح الباب يا معتز! إنت بتعمل إيه؟! افتح!
معتز ما ردش. لف حول العربية، وركب مكانه، وبعدها شغّل العربيه.
نسمة بصت له بخوف، وحاولت تفتح الباب، لكنه كان مقفول: إنت واخدني على فين؟!
معتز اتحرك بالعربية من غير ما يبصلها.
نسمة بصوت أعلى: أنا بكلمك! رايح بيا فين؟! نزلني!
معتز بحدة: اسكتي .
نسمة: مش هسكت! نزلني حالًا!
العربية زادت سرعتها، ونسمة بدأت تتوتر أكتر. بصت للطريق، وبعدها رجعت بصت له، وهي مش مصدقة إنه ممكن يعمل فيها كده وقالت بخوف: معتز، أرجوك... وقف العربية بلاش تخليني اكرهك بجد
معتز لف لها بنظرة حادة، وبعدها رجع عينيه للطريق: دلوقتي بقيتي ترجيني؟! من شوية كنتي بتقولي مش بتحبيني ومش عايزاني!
نسمة بدموع: وأنا فعلًا مش عايزة أتجوزك بالطريقة دي! إنت مش هتقدر تجبرني أحبك، ولا تجبرني أعيش معاك!
معتز: هنتجوز دلوقتي.
نسمة اتجمدت مكانها بصدمة: إنت بتقول إيه؟!
معتز بجمود: سمعتي.
نسمة: إنت اتجننت رسمي! إنت فاكر الجواز لعبة؟! إنت مش من حقك تقرر حاجة زي دي لوحدك!
معتز: وأنا مش هفضل أستنى لحد ما ألاقيكي مرات أخويا.
نسمة: مفيش حاجة بيني وبين آدم! إنت اللي حطيت الفكرة دي في دماغك، وإنت اللي بتعاقبني على حاجة ما حصلتش!
معتز بحدة: كفاية كلام.
نسمة: لأ، مش هسكت! إنت مش هتجبرني على جواز أنا مش عايزاه! وقف العربية!
مدت إيدها ناحية دراعه، وبدأت تضر..به عليه وهي بتحاول تخليه يبص لها: وقف! بقولك وقف العربية!
معتز مسك إيديها الاتنين بإيد واحدة، وأبعدهم عن دراعه، وهو بيحاول يسيطر على عجلة القيادة بإيده التانية.
معتز بصوت صارم: بس! اسكتي خالص!
نسمة حاولت تفلت إيديها، ودموعها نازلة بغزارة: سيب إيدي! إنت بتوجعني!
معتز: مش إنتي اللي عصبتيني؟! مش إنتي اللي مصممة تخليني أوصل للحالة دي؟! استحملي بقى عصبيتي!
نسمة بصت له بصدمة، وكأنها مش قادرة تصدق إنه بيحمّلها مسؤولية اللي بيعمله: أنا اللي عصبتك؟! أنا اللي عملت كل ده؟! إنت اللي جيت لحد بيتي، وإنت اللي مسكتني بالعافية، وإنت اللي واخدني في عربية وبتقولي هنتجوز؟!
معتز ما ردش، وشد على إيديها لحظة قبل ما يسيبها ويرجع يركز في الطريق ونسمة ضمت إيديها لصدرها، وهي بتعيط.
نسمه بصوت مكسور:أنا مش عايزة أتجوزك يا معتز. كنت فاكرة إنك مهما كنت قاسي، مستحيل توصل إنك تخوفني بالشكل ده. أنا كنت بحبك، لكن مش هقبل إنك تتجوزني عافيه.
إيد معتز شدت على الدركسيون، لكنه فضل ساكت.
نسمة مسحت دموعها بعنف، وبصت له بغضب موجوع: عارف إيه أكتر حاجة بتوجعني؟ إني كنت فاكرة إن اعترافك ليا وقت الحريق كان حقيقي، وإنك مستحيل تأذيني بالشكل ده. لكن إنت دلوقتي بتثبتلي إني كنت غلطانة.
معتز جز على أسنانه، وملامحه اتصلبت، لكنه ما قدرش يرد.
نسمة: أنا مش عايزة أشوفك تاني! سامع؟ مش عايزة أشوفك ولا أسمع صوتك!
معتز بص لها لثانية، وبعدها رجع عينيه للطريق وقال ببرود قاسي: خلصتي؟
نسمة ضحكت وسط دموعها، وهي بتهز راسها بعدم تصديق: إنت حتى مش سامعني... إنت مش عايز تفهمني، إنت عايز تنفذ اللي في دماغك وخلاص!
حاولت تفتح الباب مرة تانية، لكن ما قدرتش. فضلت تشد المقبض بعصبية، وبعدها بدأت تضرب على الازاز بكفها وقالت بصريخ: افتح الباب! نزلني!
معتز: ابعدي عن الباب يا نسمة!
نسمة: وقف العربية الأول!
معتز: قولتلك اقعدي مكانك!
نسمة بصت للطريق، ولقته لسه سايق بسرعة، وملامحه جامدة كأنه مش سامع توسلاتها. قلبها كان بيدق بعنف، والخوف بدأ يتحول ليأس وغضب وقالت بصوت مبحوح: إنت مش هتخليني أتجوزك بالعافية... حتى لو وصلت بيا إني أعمل أي حاجة عشان أبعد عنك!
معتز شد فكه، ورد من غير ما يبصلها: جربي، وشوفي هتوصلي لإيه.
نسمة اتجمدت للحظة من بروده، وبعدها بصت قدامها، ودموعها بتنزل على خدودها وكانت عارفة إنها لازم تخرج من العربية بأي طريقة، قبل ما يوصل بيها للمكان اللي في دماغه ومدت إيدها ناحية حزام الأمان وفكته بسرعة.
معتز لمح الحركة بطرف عينه، فالتفت لها بحدة: إنتي بتعملي إيه؟!
نسمة ما ردتش. مدت إيدها ناحية مقبض الباب، وبدأت تحاول تفتحه ومعتز بص لها بصدمة وغضب، وصوته ارتفع فجأة: نسمة! إوعي تلمسي الباب!
لكن نسمة كانت خلاص وصلت لآخرها. صرخت فيه بكل الوجع والخوف اللي جواها: أنا مش هعيش بالطريقة دي! أنا مش ملكك يا معتز!
وفي اللحظة اللي حاول فيها يمد إيده ناحيتها، ضغطت على مقبض الباب والباب اتفتح فجأة، والهوا اندفع جوه العربية بعـ..نف ومعتز لف ناحيتها بصدمة، وعينيه اتسعت وهو بيشوفها بتتحرك ناحية الباب المفتوح، ونص جسمها بقى برّه العربية، والعربية لسه بتجري على الطريق.
معتز بصريخ مرعوب، لأول مرة صوته يفقد بروده تمامًا: نسمه!!! إنتي بتعملي إيه؟