رواية نقطة عمياء الفصل الرابع عشر14بقلم منة احمد
معتز بصريخ مرعوب، لأول مرة صوته يفقد بروده تمامًا:
معتز: نسمه!!! إنتي بتعملي إيه؟!
مد معتز إيده بسرعة ومسك دراعها، وعينيه بتتنقل بين الطريق وبينها، وهي مصممة تبعد عنه مهما حصل. الباب كان مفتوح والهوا بيضرب في وشها، والعربية لسه بتتحرك بسرعة.
معتز بغضب وصوت عالي: ادخلي جوه يا نسمة! إنتي عايزة تعملي حادثة؟! اقفلي الباب بدل ما نروح إحنا الاتنين في داهية!
نسمة كانت بتقاومه وبتحاول تفلت إيدها من قبضته، ودموعها نازلة بغزارة وقالت بصريخ: سيب إيدي! وقف العربية!
معتز وهو بيحاول يشدها لجوه من غير ما يفقد السيطرة على الدركسيون: اقفلي الباب الأول، وبعدها ابقي اطلبي اللي إنتي عايزاه! إنما الحركة المجنونة دي مش هسمحلك تعمليها!
نسمة بانهيار: لو ما وقفتش العربية وسبتني أمشي، أنا همو..ت نفسي! سامعني؟! أنا مش قادرة أستحمل وجودك أكتر من كده!
معتز بلع ريقه، وقبضته ارتخت للحظة، لكنه رجع شد إيديها لما لقاها بتحاول تبعد أكتر. كان بيحاول يفضل مركز في الطريق، لكن خوفه من إنها تفلت منه كان بيزيد مع كل ثانية وقال بحدة متوترة: اخرسي يا نسمة، وبطلي الكلام ده! إنتي مش مدركة إن غلطة واحدة ممكن تضيعي نفسك فيها!
نسمة وهي بتعيط: وإنت مش مدرك إنك إنت اللي وصلتني للحالة دي؟! إنت مش عايز تسيبني في حالي، وعايز تتجوزني بالعافية! أنا مش ملكك يا معتز!
لف معتز الدركسيون بسرعة ووقف على جنب، وبعدها قفل الباب وشدها لجوه، لحد ما رجعت مكانها.
معتز بغضب مكتوم: إنتي اتجننتي؟! لو كنتي وقعتي، كان زمانك ضيعتي نفسك في ثانية! كل ده عشان قولتك هتجوزك؟!
نسمة بصوت عالي وعياط: اه ،عشان إنت مش عايز تفهم إني مش عايزاك! إنت عايز تتجوزني بالعافية وتفرض نفسك عليّا!
اتجمدت ملامحه، وبعد لحظة قال ببرود: خلاص. مش هتجوزك، ارتحتي؟
نسمة سكتت، وهي بتحاول تاخد نفسها وسط دموعها وقالت بوجع: كويس. ومن النهارده ملكش دعوة بيا، لا من قريب ولا من بعيد.
معتز بصلها بنظره جامده: اعتبري نفسك ما تعرفينيش انتي هتقرفيني ليه.
نسمة بصت له بصدمة من قسوته، وبعدها فتحت الباب.
معتز أشار للباب ببرود: براحتك انزلي، طالما وجودي بقى تقيل عليكي.
نزلت نسمة وقفلت الباب، ومعتز اتحرك بعربيته من غير ما يبصلها وفضلت واقفة في الشارع الفاضي، بتبص حواليها في قلق، ومستنية أي تاكسي يعدي. وبعد دقايق، اتفاجئت بعربية معتز بترجع وتقف جنبها ، نزل الإزاز، وبصلها بملامح باردة، ورفع حاجبه: آخر مرة هسألك... هتيجي أوصلك ولا هتفضلي واقفة هنا؟
نسمة تجاهلته وقالت بضيق: مش إنت قولت إني بقرفك؟ يبقى سيبني في حالي.
ابتسم معتز بسخرية خفيفة، وسند دراعه على الإزاز: ما أنا سايبك في حالك فعلًا. بس قبل ما تصممي على العند، بصي حواليكي كويس... الشارع فاضي، والوقت متأخر. ولو حد ضايقك، مش هتلاقي حد تلحقي تستنجي بيه. إنما طبعًا انتي أدرى بمصلحتك.
بلعت نسمة ريقها، وبصت للشارع بخوف حاولت تخبيه. فضلت مترددة ثواني، وبعدها فتحت باب العربية وركبت بسرعة، وهي بتقفل الباب بعصبية ومعتز ابتسم بسخرية، ورجع بظهره للمقعد: أهو كده. كان من الأول بدل الدوشة دي كلها.
نسمة بصت له بضيق، وصوتها كان لسه مخنوق من العياط: بعد إذنك، وصلني من غير كلام كتير.
اختفت ابتسامته تدريجيًا، وبصلها للحظة قبل ما يهز راسه ويتحرك بالعربية وقال ببرود: زي ما تحبي.
طول الطريق، فضل ساكت، ونسمة باصة من الشباك، بتحاول تمنع دموعها من النزول تاني. ولما وصلوا قدام بيتها، ما استنتش معتز حتى يقول إنها وصلت؛ فتحت الباب ونزلت بسرعة، وقفلت الباب وراها ومشيت ناحية البيت من غير ما تبص له ومعتز فضل باصص لها من مكانه، وإيده بتضغط على الدركسيون. كان هو اللي رجع عشان يوصلها، لكنه ما قدرش ينكر إن آخر نظرة شافها في عينيها ما كانش فيها حب ولا حتى عتاب...
كان فيها خوف منه وتاني يوم...
كانت نسمة قاعدة لوحدها في أوضتها، فاتحة كتابها بتحاول تذاكر، لكن عقلها كان في مكان تاني. كل ما تفتكر اللي حصل امبارح واللي عمله معتز معاها، ملامحها تتغير بضيق، فتحاول تطرد الأفكار من دماغها وترجع تركز وقطع شرودها رنين موبايلها، ولما شافت اسم آدم، ردت بهدوء: ألو يا آدم، عامل إيه؟
آدم: الحمد لله، إنتي عاملة إيه؟ كنت عايز أشوفك النهارده لو ينفع.
نسمة بتردد: معلش يا آدم، مش هقدر. امتحاناتي قربت ومحتاجة أركز في المذاكرة.
آدم: امتحاناتك ولا لسه زعلانة من اللي حصل امبارح؟ من اللي معتز عمله؟
اتغيرت ملامح نسمة، وسكتت لحظة وهي بتفتكر كلام معتز ونظرته ليها قدام أهله واللي عمله معاها قدام بيتها، وإزاي قدر يجر..حها بالشكل ده، رغم إنها لسه بتحبه.
نسمة بتصنع الهدوء: محصلش حاجة يا آدم، الموضوع انتهى.
آدم: نسمة، أنا مش عايز أضغط عليكي، بس اللي حصل مكانش سهل، وأنا عارف إنك اتضايقتي. لو حابة تتكلمي، أنا سامعك.
نسمة بصوت هادي: متشكرة يا آدم، بس أنا كويسة فعلًا. كل اللي محتاجاه دلوقتي إني أركز في امتحاناتي، وبعدها لكل حادث حديث.
آدم: تمام، مش هضغط عليكي. ربنا يوفقك، ولو احتجتي أي حاجة أنا موجود.
نسمة: شكرًا يا آدم، ربنا يخليك. سلام دلوقتي.
آدم: سلام يا نسمة.
قفلت المكالمة، وفضلت باصة للموبايل شوية. كانت عارفة إن آدم ملوش ذنب في اللي حصل، وإنه كان يستحق منها فرصة، لكن قلبها لسه متعلق بمعتز، وجرحه ليها كان أكبر من إنها تتخطاه بسهولة.
مسحت دمعة نزلت من غير ما تحس، وسحبت كتابها ناحيتها من جديد، وهي بتحاول تقنع نفسها إن المرة دي لازم تختار راحتها، حتى لو قلبها لسه مش قادر ينسى.
بعد ما قفلت نسمة مع آدم، حطت الموبايل جنبها ورجعت تحاول تذاكر، لكن صوت رنينه رجع تاني. بصت للشاشة، وأول ما شافت اسم ندي، ابتسمت وردت بسرعة.
نسمة بفرحة: ندييي! حبيبتي، عاملة إيه؟ وحشتيني أوي!
ندي بعتاب: آه، دلوقتي بقيت وحشتك؟! إنتي نسيتي إن ليكي صاحبة ولا إيه يا نسمة؟ لا بتسألي ولا بتطمني عليّا، ولا حتى بتفتكري تتصلي بيا!
نسمة بإحراج: حقك عليّا يا ندي، والله ما نسيتك، بس الفترة اللي فاتت كنت مضغوطة شوية، والدنيا كانت ملخبطة معايا. سامحيني بقى، متزعليش مني.
ندي: حتي مش هتسالي علي صحتي؟ حتى دي ما فكرتيش تسألي عنها!
نسمة بقلق: يا حبيبتي حقك عليّا، والله كنت هسألك. طمنيني بس، جر..حك عامل إيه دلوقتي؟ لسه بيوجعك؟
ندي: الحمد لله، أحسن من الأول. بيوجعني شوية ساعات، بس أنا كويسة.
نسمة براحة: الحمد لله يا روحي، ألف سلامة عليكي. والله ما تتخيلي أنا اتبسطت قد إيه إني سمعت صوتك، كنت محتاجة أتكلم معاكي.
ندي بنبرة أهدى: طب خلاص، أنا هجيلك أقعد معاكي شوية. إيه رأيك؟
نسمة بفرحة: بجد يا ندي؟! يا بنتي تعالي طبعًا! ده أنا هفضل مستنياكي لحد ما تيجي، بقالي كتير نفسي أشوفك وأقعد معاكي.
ندي ضحكت: طب ابعتيلي العنوان يا ستي، وأنا جاية.
نسمة: حاضر يا حبيبتي، هبعتهولك حالًا. وخلي بالك من نفسك وإنتي جاية، ولما تقربي كلميني عشان أنزلك لو احتجتي حاجة.
ندي: ماشي يا ستي، يلا سلام لحد ما أوصل.
نسمة: سلام يا قلبي، مستنياكي.
قفلت نسمة المكالمة وهي مبتسمة، وبعتت لندي عنوان البيت، وبعدها قامت رتبت أوضتها بسرعة، وحطت الكتب على جنب وهي مبسوطة إن ندي جاية تقعد معاها.
بعد حوالي نص ساعة، سمعت نسمة جرس الباب، فقامت بسرعة وفتحت، وأول ما شافت ندي ابتسمت بفرحة وحضنتها بقوة: يا أخيرًا! إنتي وحشتيني أوي يا بنتي.
ندي وهي بتحضنها: وإنتي كمان يا ستي، طب سيبيني أدخل بدل ما نفضل واقفين على الباب.
نسمة ضحكت وهي بتبعد عنها: ادخلي يا رخمـة، البيت بيتك.
دخلت ندي، ونسمة قفلت الباب وراها، وبعدها قعدوا جنب بعض على الكنبة: طمنيني بقى، عاملة إيه دلوقتي كنتي وحشاني والله..
ندي: الحمد لله، انتي كمان وحشتيني بس قوليلي إنتي عاملة إيه؟ وشك بيقول إنك شايلة هم الدنيا كلها.
نسمة تنهدت: الحمد لله على كل حال. المهم، عرفتي مين اللي ضر..بك وقت الحر..يق؟
ملامح ندي اتغيرت، وبصت لها بتفكير: لسه. بس أنا شاكّة في محمود، خصوصًا إنه اختفى بعدها، ومن وقت ما ضر..بته على راسه وهو مش ظاهر. مش عارفة، حاسة إن فيه حاجة مش مظبوطة، ومش مصدقة إنه ما..ت فعلًا.
نسمة: طب وإنتي ناوية تعملي إيه؟
ندي: هحاول أعرف الحقيقة، بس لما أكون أحسن شوية.
سكتت لحظة، وبعدها بصت لنسمة بندم: على فكرة، أنا عايزة أعتذرلك عن كل اللي حصل. أنا عارفة إنك مش عايزة تكلّميني بسبب إني كنت السبب في المشكلة اللي حصلت بينك وبين حبيبك، وإنكم كنتوا هتموتوا بسببي.
نسمة اتوترت، وبصت لها بسرعة: حبيبي مين؟! معتز مش حبيبي، ده الدكتور بتاعي، وبعدين اللي حصل قدر ومكتوب، وإنتي مالكيش ذنب في أي حاجة. متحمليش نفسك فوق طاقتها.
ندي رفعت حاجبها: دكتورك؟! ماشي يا ستي، زي ما تقولي.
نسمة بضيق مصطنع: خلاص فكك بقى من الحوار ده
ندي ابتسمت بمكر: مش هسكت ما تحكيلي عن الدكتور بتاعك ده. أصل شكله كان خايف عليكي أوي، لدرجة إني افتكرت إنه حبيبك!
أول ما ندي جابت سيرة معتز، نسمة سرحت من غير ما تحس. افتكرت لحظة وجودهم في المطعم، وصوته وهو بيعترف لها بحبه، واعترافها له هي كمان، قبل ما كل حاجة تتقلب بينهم وندي زقتها بخفة: نسمة! إنتي روحتي فين؟!
نسمة انتفضت ورجعت تبصلها: ها؟ لا، معاكي أهو.
ندي: معايا إيه؟! ده أنا بكلم نفسي! يلا احكي، أنا سامعاكي.
نسمة سكتت شوية، وبعدها أخدت نفس وبدأت تحكيلها عن حياتها من أول يوم قابلت فيه معتز في الجامعة بسبب البحث بتاعها وأنه رفض شغلها، وإزاي كان قاسي معاها من البداية وكملت حكايتها لما راحت بيت معتز كضيفة، وإزاي عاملها بأسلوب وحش، وعن اللي حصل بعدها ودخولها المستشفى وفقدان حملها من خالد ده غير المشاكل التانيه اللي عملها معتز مع نسمه، وحكتلها عن خالد طليقها، وعن اكتشافها إن أهلها مش أهلها الحقيقيين، وإزاي آدم أنقذها ووقف جنبها وساعدها تتخلص من خالد وتبدأ حياة جديدة في الشقة اللي جابهالها وبعدها حكتلها عن أهل معتز وأنه ادم اخوه، اللي اتقدم لها، لكن معتز اتضايق وبوّظ الموضوع قدام آدم وأهله في الكافيه، وأحرجها بتصرفاته وكلامه وكمان لما معتز طلب منها الجواز غصب عنها قدام بيتها، رغم إنها كانت لسه بتحبه.
فضلت ندي ساكتة، وكل ما نسمة تحكيلها تفصيلة جديدة، عينيها تتوسع من الصدمة و بعدم تصديق: معقولة كل ده حصلك يا نسمة؟! إنتي شيلتي كل ده لوحدك وساكتة؟!
مسكت إيديها بحنان، وضغطت عليها: بصيلي يا حبيبتي، إنتي دلوقتي مش لوحدك، فاهمة؟ أنا أختك قبل ما أكون صاحبتك، وبيتك بيتي، وفي أي وقت تحتاجيني هتلاقيني جنبك. بس أوعي تفضلي شايلة كل حاجة جواكي كده.
نسمة ابتسمت بامتنان، ودموعها لمعت في عينيها: ربنا يخليكي ليا يا ندي، والله وجودك جنبي بيفرق معايا أوي.
ندي مسحت دمعة من على خدها، وبعدها قالت بتفكير: طب وآدم؟ من كلامك وتصرفاته، واضح إنه حبك بجد، وخصوصًا إنه اتقدم لك. ومعتز ده بقى... أنا مش عارفة أقولك إيه، بس تصرفاته دي محتاجة حد يفهمه إن الدنيا مش ماشية على مزاجه بجد انسان مريض!
نسمة ابتسمت ابتسامة صغيرة: ما هو فعلًا آدم كدا حبني، وخصوصا بعد ما قولتلك أنه طلب مني الجواز.
ندي فرحت ومسكت إيديها بحماس: طب وإيه بقا مش ناويه توافقي ؟!
نسمة نزلت عينيها للأرض، وصوتها هدي : لا.
ندي رفعت حواجبها باستغراب: ليه يا بنتي؟! بعد كل اللي عمله عشانك، مش عايزة توافقي؟ لو أنا مكانك كنت وافقت على طول!
نسمة بحزن: للأسف، معرفتش أحبه.
ندي سحبت إيديها ببطء وبصتلها باستغراب: أومال حبيتي مين؟!
نسمة حطت إيدها على قلبها، وقفلت عينيها لحظة، وبعدها قالت بصوت هادي: بحب معتز.
ندي فتحت بقها من الصدمة: نعم؟! إنتي بتقولي إيه يا بنتي؟! لا، إنتي شكلك اتهبلتي رسمي!
نسمة بصتلها بضيق، لكن ندي كملت وهي مش مصدقة: يا نسمة، الراجل ده أهانك قدام أهله، وكسرك، وسقطك، ودخلك المستشفى، وعمل معاكي مشاكل تكفي بلد! ودلوقتي جاية تقوليلي بتحبيه؟!
نسمة بحزن: ما هو قالي إنه بيحبني وإحنا الاتنين كنا بنمو..ت وقت الحريق، وأنا كمان اعترفتله بحبي... اللحظة دي مش قادرة أنساها يا ندي، مهما حاولت.
ندي بعدم تصديق : وهو عشان قالك بحبك وإنتوا في وقت الحر..يق، فقرر قلبك يمسح كل اللي عمله فيكي؟!
نسمة حاولت تتكلم، لكن ندي رفعت إيدها تكمل: يا حبيبتي، مش إنه يساعدك كام مرة مش معناه إنك تنسي الأذى اللي سببهولك. وإنتي مش مطالبة تحبيه عشان ضحّى بنفسه أو وقف جنبك. وبعدين إنتي رفضتي آدم عشان بتحبي معتز اللي طلب منك جواز غصب؟! لا، معلش، إنتي محتاجة تتعالجي، وهو كمان محتاج يتعالج! إنتي عشان بتتعلقي بواحد بيتعبك ومريض نفسي، وهو عشان فاكر إن القسوة والتحكم دول حب!
نسمة فضلت باصة لها شوية، وبعدها قامت من مكانها بهدوء: أهو حبيت المريض النفسي، أعمل إيه بقى؟!
ندي بصتلها بذهول، ونسمة كملت وهي رايحة ناحية المطبخ: هروح أجيبلك حاجة تشربيها، وأعملنا شوية أكل. أكيد جعانة.
دخلت نسمة المطبخ وسابتها، بينما ندي فضلت مكانها، باصة قدامها بصدمة، ولسه مش مستوعبة إن صاحبتها بعد كل اللي شافته من معتز، لسه قلبها متعلق بيه للدرجة دي.
وبعد أسبوعين...
كانت نسمة بقت بتروح الجامعة بانتظام، لكن وجود معتز في حياتها كان عاملها صراع مش قادرة تخلص منه.
كانت قاعدة في المدرج، عينيها متعلقة بمعتز وهو بيشرح، سارحة في صوته وطريقته، وللحظة نسيت كل حاجة حواليها... لحد ما افتكرت معاملته ليها، فاتغيرت ملامحها واتضايقت، وحوّلت نظرها بعيد عنه ومعتز كان واخد باله منها، وكل شوية عينيه تيجي عليها وهو بيشرح، لكنها كانت بتتجاهله كأنه مش موجود ومعتز كان لسه بيشرح، لحد ما اتحرك من مكانه ووقف جنب البنش اللي نسمة قاعدة عليه، من غير ما يوقف كلامه وقال بجدية: وبكده نكون خلصنا المراجعة النهائية. وامتحاني بعد يومين، فعايزكم تركزوا كويس، وتهتموا بباقي امتحاناتكم برضه.
لفّ وشه ناحية الطلاب، لكن عينيه استقرت على نسمة اللي كانت قاعدة جنبه، بتحاول تركز في أي حاجة غير وجوده و بنبرة مقصودة، وهو باصص لها: ولو فيه أي نقطة واقفة معاكم، اسألوا براحتكم. أنا موجود قدامكم أهو... واللي عايز يمشي، يتفضل. أنا كده انتهيت.
نسمة بلعت ريقها بتوتر، وحست بنظراته موجهة ليها تحديدًا، فبصت قدامها بضيق وحاولت تتماسك، لكنها ماقدرتش تمنع نفسها من التوتر.
معتز لاحظ ارتباكها، فابتسم ابتسامة خفيفة بالكاد ظهرت على شفايفه، وبعدها رجع لمكانه وكمل جمع حاجته، كأنه ماعملش أي حاجة وبدأ الطلبة يلمّوا حاجتهم، لكن مجموعة من البنات اتجمعوا حوالين معتز، وكل واحدة فيهم عايزاه يشرح لها نقطة مش فاهماها ونسمة وقفت وهي بتلم حاجتها، ولما شافتهم حواليه، ملامحها اتبدلت. غيرتها اشتعلت جواها، خصوصًا لما واحدة من البنات قربت منه وهي بتسأله بابتسامة.
نسمة بغيظ مكتوم: هو مفيش غيره في الجامعة دي؟!
معتز لمح تعبير وشها، وفهم غيرتها من غير ما تحتاج تتكلم، فارتسمت على شفايفه ابتسامة ساخرة.
نسمة خبطت برجليها في الأرض بخفة وهي خارجة من المدرج، فابتسامته اتسعت أكتر، وهو بيتابع حركاتها بطرف عينه وإحدى الطالبات باستغراب: دكتور، حضرتك بتضحك على إيه؟
معتز ببرود، وهو بيرجع يبص في ورقها: كمّلي سؤالك يا آنسة.
اختفت نسمة من قدام عينيه، فرجع يشرح للبنات وكأن مفيش حاجة حصلت، لكن ابتسامته فضلت معلقة على شفايفه.
بعد شوية...
كانت نسمة قاعدة مع مالك، صاحبها، تحت شجرة بعيدة عن زحمة الطلبة و قدامهم أكل، وهي بتضحك على كلامه بكل أريحية، وكأنها أخيرًا لقت فرصة تفصل فيها عن كل اللي شاغل بالها وفي اللحظة دي، معتز خرج من المبنى، ولمحهم من بعيد.
وقف مكانه، وعينيه ثبتت على نسمة وهي بتضحك مع مالك، وملامحه اتشدت تدريجيًا. الغيرة اشتعلت جواه، وإيده اتقبضت بعنف وهو شايفها مرتاحة مع غيره بالشكل ده وقال في نفسه بحدة: بتضحكي معاه كده يا نسمة؟! ومعايا عاملة نفسك مش شايفاني؟!
كان نفسه يروح لهم، ويوقف الضحك ده، ويخليها تعرف إن تجاهلها ليه مش هيمر بالساهل. لكنه افتكر إنها كل ما كان يضغط عليها ويزعقلها، كانت بتبعد عنه أكتر.
شد على أعصابه، وأخد نفس عميق، محاولًا يسيطر على غضبه، قبل ما يبتسم ابتسامة باردة و بصوت منخفض: بتتحديني يا نسمة؟ ماشي... بس المرة دي، مش هتصرف زي كل مرة.
رمقها بنظرة أخيرة، وبعدها لف ومشي، وهو بيفكر في طريقة يخليها تواجهه بدل ما تفضل تهرب منه.
أما نسمة، ففضلت تضحك مع مالك، من غير ما تعرف إن معتز شافها... وإن غيرته المرة دي كانت أكبر من قدرته على إخفائها.
بعد أيام...ونسمة كانت خلصت امتحاناتها، وبقت مستنية النتيجة على أعصابها. وبعد كام يوم، نسمه قعدت جنب ندي، وماسكة تليفونها بتفتح النتيجة.
ندي بقلق: اهدي يا نسمة، إن شاء الله خير. إنتي تعبتي وذاكرتي، وربنا مش هيضيع تعبك.
نسمة بتوتر: قلبي هيقف يا ندي... افتحيها إنتي، أنا مش قادرة.
ندي: لا، افتحيها إنتي. يلا بسم الله.
نسمة فتحت النتيجة، وبدأت تقرأ المواد واحدة واحدة، ولما لقت نفسها ناجحة فيهم كلهم ما عدا مادة معتز، عينيها وسعت بصدمة، والتليفون وقع من إيديها، وانفجرت في العياط.
ندي بخضة: مالك يا نسمة؟! حصل إيه؟!
بصت ندي على التليفون، ولما شافت النتيجة، ملامحها اتقلبت لغضب شديد وقالت بصدمة: إيه ده؟! ده سقطك في مادته؟! المادة اللي كنتي بتسهري طول الليل عشانها؟! ، ده طلع حيوا..ن بجد وأكيد بيعمل كده عن قصد!
قربت منها وحضنتها وهي بتحاول تهديها بغيظ: مش إنتي اللي كنتي بتقولي إنك بتحبيه؟ أهو ده اللي عمله فيكي! هو الحب عنده بقى إنه يكسرك ويعاقبك في مستقبلك؟! يا نسمة، إنتي مش شايفة إنه بيستغل مشاعرك عشان يفضل متحكم فيكي؟
نسمة بعدت عنها شوية، وبصتلها بعينين مليانين دموع بانهيار: أنا معملتش حاجة يا ندي! هو ليه بيعمل معايا كده؟! والله دي أكتر مادة ذاكرتها، كنت بخاف أقصر فيها... وفي الآخر يسقطني!
ندي حضنتها تاني، ومسحت على ضهرها بحنان وبهدوء: عارفة إنك تعبتي، وعارفة إنك مظلومة في إحساسك ده... بس مش هسيبك تفضلي مكسورة عشانه. إنتي أكبر من إنه يحدد قيمتك بدرجة، ومهما عمل، مش من حقه يخليكي تشكي في نفسك.
فضلت ندي تحاول تخرجها من الحالة اللي هي فيها، لحد ما فجأة سمعوا خبط على الباب ونسمة قامت تفتح، لكن ندي وقفتها بشك: استني، أنا هفتح. ده أكيد جاي يكمل استفزازه ليكي!
فتحت الباب بضيق، ولقت آدم واقف قدامها، فبصتله باستغراب و ببرود: أيوه؟ عايز مين؟
آدم عقد حاجبيه باستغراب: إنتي مين؟ ونسمة فين؟
ندي ببرود: نسمة نايمة. إنتَ شكلك معتز، صح؟
آدم باستغراب: معتز؟! ماله معتز؟
ندي بقرف: ايوه يعني إنتَ معتز ولا لأ؟!
آدم فهم إنها غالبًا فاكرة إنه أخوه، فقرر يعرف منها معتز عمل إيه تاني، ورد بهدوء متعمد: أيوه، أنا معتز. فيه إيه؟
ندي بصتله من فوق لتحت، وبعدين زقته في صد..ره وهي بتتكلم بعصبية و بغضب: إنتَ إيه يا أخي؟! معندكش ضمير؟! مش كفاية اللي عملته فيها، كمان تسقطها في مادتك؟! إنتَ إزاي تقدر تنام وإنتَ عارف إنك ظلمت بني آدمة كل ذنبها إنها حبتك؟!
آدم اتصدم من كلامها وقال في نفسه: حبيته ؟؟!؟
وقبل ما يستوعب، لقاها لسه بتزقه وقال بغضب: هو أنا عملت إيه بالظبط؟! ممكن تفهميني بدل ما إنتي بتزعقي في وشي؟!
ندي قربت منه، وعينيها مليانة غضب: هو انت مبتفهمش بجد؟! بقولك إنتَ سقطت نسمة في مادتك؟! إنتَ إيه، مبتفهمش و معندكش د..م كمان؟!
آدم اتجمد مكانه من الصدمة، لكن ندي زقته ناحية الباب: يلا، غور من هنا! مش ناقصين نشوف وشك!
في اللحظة دي، نسمة ظهرت في الصالة، ولما شافت ندي بتتعامل مع آدم بالطريقة دي، اتفاجئت وقالت باستغراب: فيه إيه يا ندي؟! بتزعقي لآدم ليه؟!
ندي اتجمدت، وبلعت ريقها بتوتر أنه مش معتز، بينما آدم كان باصصلها بصدمة وضيق.
ندي بتردد: هو... ده مش معتز؟
نسمة باستنكار: معتز إيه بس يا ندي؟! ده آدم، أخوه!
آدم بص لندي بنظرة جانبية ساخرة، وبعدها عدّل هدومه وقال ببرود: تشرفت بمعرفتك يا آنسة... رغم إن الترحيب كان محتاج شوية تهذيب وتتكلمي بأسلوب كويس مع الناس.
ندي بصدمه وضيق: والله هو اللي قالي إنه معتز.
آدم بابتسامة باردة: واضح إنك بتحكمي على الناس بسرعة أوي يا آنسة... طب ما كنتي تتأكدي الأول قبل ما تعمليلي المحاكمة دي كلها؟
ندي اتغاظت ولسه هتتكلم، لكن نسمة تدخلت بسرعة وقالت بابتسامة هادية: معلش يا آدم، هي مكنتش تعرف إنتَ مين. اتفضل، ادخل.
آدم دخل وقعد معاهم، ولسه مستغرب من اللي حصل وقال وهو باصص لنسمة: ممكن أعرف إيه الحكاية اللي خلت الآنسة تستقبلني كأني داخل أقبض عليها؟
ندي ببرود: اسأل أخوك، هو أكيد عنده الإجابة.
نسمة بصتلها تحذيريًا، فندي سكتت وهي بتبص بعيد بضيق.
آدم بجدية: نسمة، أنا سمعت كلام مش مريح من الانسه. معتز عمل معاكي إيه؟
نسمة بتوتر: مفيش حاجة يا آدم، متشغلش بالك.
آدم بضيق : مش هقدر متشغلش بالي، خصوصًا لما ألاقي صاحبتك بتتهم أخويا إنه ظلمك.
نسمة نزلت عينيها وقالت بسرعة: أنا اللي قصرت في المذاكره ، فسقطت في مادته. عادي، بتحصل.
ندي بصتلها بصدمة، وكانت لسه هتتكلم، لكن نسمة رمقتها بنظرة ترجّيها تسكت. ندي ضغطت على شفا..يفها وسكتت، رغم إن الغضب كان واضح على ملامحها.
آدم فضل باصصلها شوية وكدا اتاكد أن معتز بيحب نسمه ونسمه بتحبه بعد اللي سمعه من صحبتها، وبعدها اتنهد بخنقه و بهدوء: ماشي يا نسمة، مش هضغط عليكي. بس لو فيه حاجة مضايقاكي، متحاوليش تشيليها لوحدك.
اتكلموا شوية في مواضيع مختلفة، لحد ما نسمة بصتله بتردد، وبدأت تفرك في صوابعها: آدم... أنا عايزة أقولك على حاجة.
آدم مال راسه ناحيتها باهتمام: قولي يا نسمة، فيه إيه؟
نسمة أخدت نفس عميق، وبعدين رفعت عينيها ليه وقالت بتردد: أنا قعدت مع نفسي وفكرت كتير في موضوع الجواز... ووصلت لقرار.
آدم اعتدل في قعدته، وقلبه بدأ يدق أسرع وقال بقلق: قرار إيه؟ خوفتيني يا نسمة.
نسمة بصتله للحظات، وبعدها قالت بصوت هادي وتوتر: أنا وافقت... إننا نتجوز يا آدم.
آدم اتسمر مكانه، مش مصدق اللي سمعه، وندي فتحت عينيها بصدمة وبصت لنسمة كأنها بتتأكد إنها سمعت صح.
آدم وندي في نفس اللحظة: إيه؟!
نسمة فضلت باصة لآدم، بينما هو لسه بيحاول يستوعب قرارها المفاجئ، من غير ما يعرف إذا كانت موافقتها دي نابعة من قلبها فعلًا... ولا من وجعها بسبب معتز.