رواية ماوراء النصيب الفصل الرابع عشر14بقلم دانيا
صلوا على النبي.......
قلت ليهو غلط غلط شنو يا زول بدون ما احس ضربته بنيه على وشو إلا اشوف مريم وقعت على الأرض دفرتو مني وجريت رفعتها جاء داير يمسكها مني عاينت ليهو بغضب وقلت ليهو سيبها اوعك تقرب ليها رفعتها وجريت بيها على العربية اهلو اتلمو فيني في شنو في شنو مريم مالها ؟ عاينت ليهم بغضب نظرة إستحقار يوسف جاء طالع من الصالون ابوهو بقى يعاين ليهو كأنو بسألو الحاصل شنو؟
قعدت مريم في المقعد الخلفي وجيت داير افتح الباب الأمامي ابوه قال ليهو يوسف اركب امش معاهم، ، اتلفت عليهم وقلت ليهم يمش مع منو؟ رفعت اصبعي ووصفت عليهم وقلت ليهم مافي زول فيكم ح يمش معاي انا حسابي معاكم بعدين لسه ما انتهى.
ابو يوسف قال لي شوف يا ولد هوي نحن ما عندنا حرمه بتمش مع زول غير راجلها ،، رديت عليهو "انا ود عمها ووليها" قاطع كلامي يوسف وقال كلام ابوي صاح انا اولى ليها منك ... قلت ليهم ياناس هوي لا إله إلا الله كترة النقاش ما بتنفع وانت يايوسف انا من هسي بختها ليك واضحه "مريم دي اختى دربها " وانا عندي معاك حساب.
يوسف قال تحاسبني انت منو يازول عشان تحاسبني في مرتي وعشان كلامك دا علي الطلاق الليله ما تسوقها المستشفى تنزلها هسي انا بوديها..جاء فتح باب العربية وداير يطلع مريم منها مسكتو من يدو وزحيتو منها قلت ليهو انت مجنون ولشنو؟ قال لي انت المجنون السايق ليك مرا ماشي بيها قلت ليهو المرا دي بت عمي يا حيوان مااي مرا رد لي "يازول بلا بت عمك معاك وانا زاتي ما بعرفك ولا عرستها منك " عاين لي نظرة إستحقار وقال "هي لو معتبراك راجل ومالي عينها ماكان خلتك يامتطفل.
كلامو استفزاني مسكتو عصرتو على العربية داير اضربو اهلو حجزو مني قلت ليهو والله إلا اسجنك اصبر لي ابوهو قال لي سوقها سوق عربيتك وامش نتلاقى في المستشفى.
ركبت العربية ودورت في خلال دقايق وصلت المستشفى دخلتها الطوارئ الدكاتره استلموها مني وانا طوالي طلعت برا صادفت يوسف وابوهو وجزء من الرجال الكانو معاهم برا في باب المستشفى... يوسف وقف بعيد وابوهو جاء علي قعدت اعاين فيهو قبل افتح خشمي معاهو هو بدأ في الكلام قال لي شوف يا ولدي انا عارف إنو يوسف غلطان وكلنا بنتأسف ليك حتى يوسف وكمان هو مستعد يحلف ليك قسم قدامك إنو الحصل تاني م بتكرر وفي النهايه المشاكل الزوجية دي بين الراجل ومرتو بتحصل .
رفعت راسي عاينت ليهو بإستحقار شديد وهزيت راسي رغم إنو للحظه كنت محترمو قلت ليهو ياناس ياناس خافو الله، ، مشاكل شنو هسي في زمتكم الحاصل دا انتوا شايفنو حاجه عاديه؟ ياخ البهيمه ما بتستحق تتعامل بالعنف دا.. لكن انا كلامي معاكم انتهى هنا قبل اخلص كلامي التاتشر وقف قدامنا فيهو اربعه عساكر نزلو منو واحد فيهم قال "معتز" قلت ليهو ايوه انا معتز والمجرم ياهو قدامكم وصفت ليهم على يوسف.
بعد اتقبض يوسف دخلت جوا لقيت مريم صحت وعلى وشها لسه اثار الضرب واضعه ،، عاينت لي وابتسمت قالت سبحان الله.. قلت ليها بقيتي كيف هسي قالت كويسه.
بيتنا في المستشفى والصباح بعد اطمئنت عليها طلعت مشيت اجرت ليها بيت صغير تقعد فيهو لمن تبقى كويسه حبه تشد حيلها ونسافر... طلعتها من المستشفى وانا في الطريق اتصل لي رقم غريب رديت طلع دا ابو يوسف قال لي ياولدي خلونا نحلها برا قدام العمدة طق قفلت الخط في وشو.
عاينت لي وقالت دا منو؟ قلت ليها مامهم بعد وصلتها البيت وختيت ليها الفطور قلت ليها انا طالع شويه وجاي انتي اخدي راحتك ولو جاء اي زول دق الباب ما تفتحي لمن تتأكدي دا انا قالت لي سمح قمت ماشي قالت لي شكرا يامعتز شكرا ليك كتير والله لو ما جيتك انا كان متى.. اتلفت عاينت ليها وما اتكلمت معاها طلعت خليتها.
مشيت مركز الشرطه قابلت الضابط المسؤل بدأ يشرح لي عن عقوبة العنف الأسري والضرب والكلام دا قلت ليهو شوف يا سعادتك انا الحاجه البتهمني الزول دا يطلق مريم الباقي دا كلو ما مهم عندي دي حاجات بترجع ليكم انتوا.
وانا في طريق الرجعه للبيت اتصلت لي امي قالت لي وين انت يا ولدي عرسك بعد بكره وانت حايم كفاك تعال عرسك اهم قلت ليها جاي ياامي لكن كلمي عمتي فاطمه قولي ليها بعد شويه بتسمعي صوت بتك.
بعد وصلت البيت دقيت الباب جات مريم قالت منو؟قلت ليها انا معتز طوالي فتحت الباب قالت لي حمد لله على السلامة قلت ليها الله يسلمك... خشيت جوا جابت لي مويه وقامت ماشه قلت ليها مريم اتلفت عاينت لي وقالت نعم قلت ليها اقعدي دايرك في موضوع.
قعدت قلت ليها انا ما ح أسألك من المضى انا ح اسألك عن من هنا وقدام انتي دايرة تكملي حياتك مع يوسف او دايراه يطلقك؟ رفعت راسها عاينت لي وسكتت.
ماذا سيكون جواب مريم؟