رواية ماوراء النصيب الفصل السادس عشر16بقلم دانيا
صلوا على النبي......
عاينت لمعتز وقالت ليه بصوت مبحوح الف مبروك ربنا يتم ليك على خير قال ليها الله يبارك فيك... امي قالت تقى امشي ختي ليهم العشاء مريم قالت اتعشينا والله.
معتز قال لينا بعدا قوموا نوموا وخلو مريم تنوم وترتاح يلا تصبحوا على خير هو مشى على الصالون وفضلنا نحن قلت لمريم تعالي نومي معانا انا وتمني عاينت لأمها وقالت دايرة انوم جنب امي الليله اشتقت ليها قلت ليها تمام.
الصباح:
معتز اول ما خلصت من شراب الشاي قلت لأمي انا طالع داير اشوف التجهيزات في الصالة وباقي الحاجات ماشه كيف قالت لي هيي ياولدي والحنه ما دايرين نختها ليك كان طلعت ما بتجي هسي قلت ليها ياامي موضوع الحنه دا خلو للمساء وانا شايف لو كسرتو حنكو بكون احسن ... قالت لي لا والله ما بنخلي ياولدي انا عندي غيرك كم احضر عرسهم عشان ما اخت ليك حنه!! كلامك دا ما تقولو لي قلت ليها حاضر لكن ما هسي هسي انا عندي شغل كتير منتظرني قالت لي سمح ياولدي ربنا يوفقك.
قلت ليها ناس عمتي فاطمه في غرفتهم ؟ قالت لي ااي جوا قلت ليها اصبح عليهم قبل اطلع.. مشيت دقيت ليهم الباب عمتي عاينت لي وقالت لي اتفضل ياولدي صباحك نور قلت ليها كيف اصبحتو ومريم كيف من تعب السفر، ، قالت لي كويسه والله.
المساء جيت راجع البيت قريب المغرب لقيتهم مرتبين الحوش ومشغلين سماعه واتفاجأ بكمية من الناس معاهم جاتني تقى جنب الباب مبسوطه قالت لي ديل كلهم الجيران قلنا دام ما عندنا اهل هنا كتير نعزم الجيران عشان يعملوا جو ضحكت وقلت ليها والله انتوا حماسكم عالي ماشاء الله.. قالت لي خش اجهز مسافة اخت ليك الغداء عشان ح نبدأ بعد المغرب.
سلمت على الضيوف القاعدين وخشيت جوا شلت لي غيار مشيت استحميت وطلعت سمعت صوت دقطقه في الباب قلت اتفضل سمعت صوت مريم قالت فاضي شويه؟... عاينت ليها كانت ما على بعضها قلت ليها انتي كويسه؟ قالت لي كويسه بس دايرة اتكلم معاك في موضوع قلت ليها قولي، ، قالت لي بالنسبه لموضوع الطلاق انا ما قدرت اكلم امي حسيت الزمن ما مناسب ... سكت مسافه وبعدين قلت ليها ادي نفسك وقت ما ضروري تتكلمي عن الحصل هسي اتكلمي لمن تلقي نفسك جاهزة ومن ناحية امك هي إنسانه فاهمه وواعيه واكيد ح تفهم إنو القسمه انتهت انتي ما تشلي هم شيء قالت لي إن شاء الله قامت ماشه قلت ليها مريم!! اتلفتت علي وقالت نعم قلت ليها العلاجات حقتك ما تنسيها اخديها في مواعيدها قالت لي سمح.
عند تقى:
الجيران ما قصروا معانا وقفوا معانا كأنهم اهلنا ختينا الحنه لمعتز وشغلنا السماعه وبقينا نرقص تمني جات نادتني قالت لي تعالي مسكتني من يدي قلت ليها مالك يابت في شنو؟ قالت لي تعالي دايراك امي كانت قاعدة جنب معتز في السرير قالت لينا مالكم؟ تمني قالت ليها مافي حاجه.
دخلنا جوا قلت ليها في شنو؟ ختت اصبعها على خشمها قالت لي هس، ، وساقتني على غرفة عمتي وقفتا جنب الباب سمعت صوت بكاء جاي من جوا عاينت لتمني بإستغراب وقلت ليها دي مريم؟ هزت لي راسها بمعنى نعم قلت ليها بصوت منخفض ليه قاعدة تبكي ؟ قالت لي ما عارفه من قبيل انا لاحظت ليها قعدت معانا برا حبه بس ودخلت جوا وقت جيت اديها العصير سمعتها بتبكي قلت ليها عمتي وين؟ قالت لي بتصلي العشاء في برندة المطبخ قلت ليها خلاص انتي امشي وزعي العصير للضيوف انا بشوف مريم.
دقيت ليها الباب فجأة سكتت وبعد مسافه قالت اتفضل فتحت الباب وخشيت لقيتها قاعده في طرف السرير وارتبكت لمن شافتني حاولت تتصرف طبيعي قالت لي الأغاني صدعت بي قلت ارتاح شويه... حاولت اتقاضى منظر عيونها المحمرة والحزن الباين في وشها لكن قلت في نفسي "لا مريم دي بتكون حاصله ليها حاجه ح اقعد معاها واحاول اواسيها " قعدت جنبها وقلت ليها مريم انتي كويسه؟ رفعت راسها عاينت لي وقالت لي ااي كويسه ليه السؤال دا؟قلت ليها مافي حاجه مجرد سؤال ولو حسيتي في حاجه مضايقاكي اختك موجوده بتقدري تحكي لي سكتت وانا قمت طلعت خليتها.
اليوم التاني الصباح بعد الفطور طوالي عقدوا بين الظهر والعصر الكرامه كانت غداء والطباخ شغال في بيت الجيران وبيتنا اتملى ناس وواحدين مابنعرفهم عدينا اليوم كله في زحمة العرس امشي وتعال وودي وجيب وبعد الغداء اتحركنا مشينا الصالة .
عند معتز ماشي على الكوفير اجيب العروس وانا بين متحمس ومتوتر حاتم بقى يضحك فيني قال لي يازول اركز انت يازول انت ماشي تستلم العروس م ماشي الجهاد ضحكت وقلت ليهو يومك بجي .
اول ما شفتها نسيت كل شيء قعدت اعاين ليها بدهشه لعدة ثواني وانا ما مصدق إنو اليوم دا جاء قلت بسم الله ماشاء الله البنات المعاها وقفن بيني وبينها وقالت لي ماتحلم تسوقها بالسهوله دي وبقن يضحكن... ابتسمت وقلت ليهن ايوه ومطالبكم شنو يا اناسات؟ واحد فيهن قالت لي مطالبنا بسيطه عاينن لبعض وبقن يتبسمن ناديت حاتم قلت ليهو تعال جاء قال لي خير يا زعيم في ترس ولشنو؟ وبقى يضحك قلت ليهو والله زي ما انت شايف.
قال ليهن شوفن مطالبكن كلها بتسألني منها انا دا شبك لبيك حاتم بين ايديكم لكن خلو العاشق الولهان دا شوف مرتو... قالن ليهو ياسلام مافي اي مانع انتبهن معاهو وانا مشين بهناك للعروس وقفت قدامها وبقيت اعاين ليها وهي مدتقرة من الخجل ابتسمت وقلت ليها ربنا يحفظك لي انتي اصلا حلوه لكن الليله حلوه شديد ماشاء الله تبارك الرحمن.
عند تقى:
سمعنا صوت بوري برا قالوا العرسان وصلوا طلعنا رحبنا بيهم ماشاء الله تبارك الرحمن عرسان السرور طالعين حلوين مع بعض والعروس عسل عديل واخواتها وراها كلهن لابسات زي بعض معتز سلم على امي في راسها وهي ما قدرت تمسك دموعها دخلوا بقينا نرقص جاتني مريم اتكلمت معاي ما كنت سامعاها من الجوطه دنقرت عليها قالت لي في اذني "دايرة مفتاح البيت "قلت ليها بسم الله يابت راجعه مالك....