رواية ضره من عالم اخر الفصل التاسع عشر19بقلم نوسه حمد
موت سند تعبني شديد وكان نفسي اكمل معاي الحياه لاني حسيت نفسي منكسره اكتر من اول بالذات بعد موت امي قدام عيوني وهجران ابوي ليها وزواجو من بت ح تخرب سمعتنا في الارض كنت كل يوم قبل ما انوم بتزكر فيهو سند برسل ليهو رسايل لغايه ما يوم بليل جاتني رساله من سند انا لمن شفت اسمو في الشاشه انخلعت واعصابي كلها باظت وبقيت متوتره فتحت الشات وروحي طالعه لقيتو كاتب لي نوسه انا بره افتحي الباب انا مشتاق ليك انا غلبني البعملو كيف سند يرسل لي وهو ميت التلفون وقع من يدي وشهقتا وكتمتها بي يدي ساره جات قالت لي نوسه فشنو وانا الدموع ملت عيني وشفت ساره طشاش طشاش رفعت التلفون وبقت تقرا قالت لي نوسه انتي موش زوجك متوفي قلت ليها اي البت بقت ترجف وانا بقيت فيها هي والباب بقا يضرب وانا وهي قعدنا في ركن واحد وحاولت اطبطب عليها بس هي خافت شديد حسيتا ح تجن والباب يضرب قريب النص ساعه والرسايل م وقفت والشي الخوفني اكتر سند في الواتساب كاتب لي افتحي الباب وفي الرسايل النصيه كاتب لي نوسه اوعك تفتحي الباب انا ما رديت علي اي رساله وفضلت الصمت لغايه ما ضرب الباب وقف شيلت التلفون اتصلت علي محمد واظنو كان نايم قال لي نوسه خير فشنو الاولاد حاصله عليهم حاجه قلت ليهو محمد القال ليك سند مات منو وسند مات متين والدفنو منو والحضرو منو كنت بسال وانا متوتره قال لي نوسه استهدي بالله انتي حلمانه ولا شنو قلت ليهو لا بس سند رسل لي رسايل في الواتساب وكان واقف بره الباب محمد قال لي كلام غريب نوسه اوعك تفتحي الباب قلت ليهو م فتحتو وعلي فكره جاتني رساله نصيه بتقول لي م تفتحي قال لي بسم الله قلت ليهو يعني شنو فكرت سند الجنيه رجعت ليهو وساقتو وهسي جاي يرجع لي وهي معاهو وح اعاني زي زمان ساره بقت منططه عيونا والخوف زاد زياده محمد قال لي كل شي وارد اسمعيني الباب م تفتحي وانا بكره الصباح بجي اسوقك نمشي مكان شغل سند قلت ليهو تمام حاولت انوم بس قلبي في ساره بعد المواقف دي خشمها مافتحتو حاولت اطبطب عليها بس كانها ما سامعه وعيني سرقتني نومتا صحيت الصباح بصوت الباب بضرب بقيت مخلوعه وماقدرت افتحو وسمعت صوت التلفون بضرب لقيتو محمد رديت عليهو قال لي افتحي فتحت الباب بس ساره البيت كلو فتشتو ما لقيتا محمد قال لي احتمال في الحمام الحمام برضو مافيهو فتحت الدولاب لقيتا شالت ملابسها عرفت انها فاتت خلتني وليها حق لو في مكانا انا بخاف محمد اتصل لي قريبهم وكلمو بالحاصل قال ليهو نهايه اليوم بعرف ليك اخبارا لو رجعت لي اهلا محمد قال لي لبسي اولادك وانا منتظرك بره في العربيه لبست اولادي سريع ولبست لي عبايه وطلعت معاهو مشينا القسم دخلنا مكان شغل سند لقينا زميلو محمد قال ليهو دي زوجه سند نحنا عاوزين نعرف قبر سند وسند مات كيف قال لينا سند اتوفي في مهمه وحصل فيها انفجار كل المعاهو ماتو وهم من ضمنهم حتي جثثهم كانت م واضحه لمن لميناهم كلهم في كفن واحد ودفناهم يعني ما كان في ملامح واحد ظاهره فيهم واعضاهم كلها مقطعه وسترناهم وممكن انا اوديكم للضابط الكبير يأكد ليكم كلامي ونطلع ليكم شهاده وفاه وربنا يصبرك وعندك مرتب شهري ح تصرفيهو عشان تعيشي اولادك ديل هم مفتكرننا اننا جايين نفتش لي حقوق سند
قلت ليهو انت متاكد انو سند معاهم في المهمه دي قال لي متاكد انا كنت في العربيه الوراهم وبعد عربيتهم اتفجرت نحنا ما كملنا سير قلت ليهو طيب سند مات كيف ورسل لي وين تلفونو قال لي تلفونو معاهو في العربيه كان قلت ليهو دي رسايل من سند ودي رسايل نصيه منو الضابط زاتو انخلع زي خلعه ساره قال لي انا بقول ليك شايفهم بي عيني العربيه اتفجرت وكل الفيها ماتو كيف يعني يرسل ليك محمد قال ليهو دا المحيرها طلع تلفونو وبقا اتصل التلفون مغلق ورسل في الواتساب الرساله ما وصلت قال لي اكيد الرقم دا م حق سند قلت ليهو لا حقو ووريتو ليهو لقاهو نفس الرقم المسجل عندو قال لي اتصلي اتصلت طوالي دخل جرس انا انخلعت وقفلت والضابط ومحمد بقو مخلوعين اكتر مني قال لي رسلي في الواتساب رسلت الرساله وصلت الضابط لمن عرقو سال من الخوف قال لي طيب رسلي ليهو تسجيل قولي ليهو سند سجل لي انا مشتاقه لصوتك عملت زي ما الضابط قال واستلمها ورسل لي وش عابث وما ردا قلت ليهو سجل حلف ابا يرد علي الضابط قال لي والله الا تلفونو دا شالو شيطان بس راجلك مات قدام عيني انا الخوف سيطر علي وعارفه ماضي سند معناتا دي الجنيه عاوزه تنتقم مني انا واولادي ومحمد زاتو حسيتو خايف رجعنا من القسم ماقال لي ارح معاي البيت زمان ما خافو مني بس هسي الحاصل علي دا بخوف وصلت البيت وشايله شهاده الوفاه بتاعت سند في يدي ومعاها مبلغ مالي اداني ليهو الضابط اولادي يبكو من الجوع غلبني اعمل اي شي مرا يوم يومين وكل يوم بتجيني رسايل من سند وفي وقت معين الباب بضرب كل م اتصل لمحمد مابرد علي عرفت انو خلاص ناس محمد باب وانقفل ما ح يقبلو يعيشو معاهم واحده ملاحقها جان الصباح بدري قومتا ختيت لي ملعقه في النار وقلبي بتقطع عملت لي اولادي كل واحد فيهم علامه وكانو ببكو من الالم حضنتهم علي ودموعي سايله وقلبي مقطوع الابواب كلها اتقفلت في وشي وعرفت الجن ملاحقني انا ولازم انقذ اولادي منو الصبح قبل يأذن كتبت ورقه انو الاولاد ديل جو بالحلال بس معرضين للخطر البلقاهم يكسب فيهم اجر ويربيهم ومشيت ختيتهم قدام جامع وقلبي بنقطع وحسيت نفسي خلاص عقلي راح وجدعت التلفون في البيت وخليتو فاتح ومشيت بعد صلاه الصبح جيت راجعه لقيت اولادي ماف عرفت انو في زول شالهم قلبي انقطع وبقيت متشرده في الشوارع بشحد الناس ونهايه اليوم بنوم في كرتونه وفي نظر الناس كلهم انا مجنونه بعطفو علي وبرحموني اختر البهدله عشان اشوف نظره حنيه في الناس القنعت من شفقت اقرب الناس لي وبقيت معروفه عند الناس هناك في المنهم بعطف علي بنيه خالصه في المنهم بعطف علي قدام الناس بالنهار بلف في السوق وبليل بنوم في الجامع من اكتر اللحظات البكون فيها مرتاحه بصلي وبقرأ قران والجامع كان قريب لموقف كل الركاب بجو يصلو فيهو كنت بخدمهم وبجيب ليهم مويه يشربوها في البعاف مني وفي البشربها وهو مبتسم
مرت الايام وامام الجامع قال لي يابتي انا متاكد انك م مجنونه بس الحاجه الخلتك تصلي للمرحله دي شنو انا ما عارفها وانا هسي ما جيت عشان احلل ليك شخصيتك بس انا زول بعرف ربنا شديد وحاسي انك كويسه وجيت اقول ليك تسمحي لي اتزوجك والمك من الشارع لو وافقتي اتزوجك بالحلال واسترك واخاف فيك الله وما طالب منك غير انك تخافي فيني الله وربنا يقسم لي والد منك انا مشكلتي متزوج وزوجتي ما بتلد وانا مراعي لي مشارعها ما اتزوجت فيها بس خلاص انا بقيت زول كبير في السن عاوز اجيب لي ولد ينفعني ما رديت عليهو قال لي استخيري وبنتظر منك رد تمام سكتا وما رديت وقلبي انقطع ودموعي عشره عشره وقررت اصارحو بالحقيقه لو قبل اتزوجو وانستر واكتفي بالحياه علي كده لو رفض هو حر تاني يوم جا لقاني مستحميه ونظيفه ابتسم قال لي النظافه من الايمان ولاول مره افتح خشمي وارد عليهو قلت ليهو انا كويسه بس الحصل علي انا بجنن لكن انا م جنيت قال لي قولي قلت ليهو ح اقول بس ع شرط قال لي اتفضلي قلت ليهو لو قبلت بي خلاص لو ما قبلت بي تكتم البقولو ليك دا وتخليني للشارع ارحم قال لي اي شي تقولي انا موافق عليهو حتي لو قلتي لي انك غلطتي وانك ما بت انا بسترك ومستحيل احكي اي شي لزول قلت ليهو لا الحمد لله انا عمري ما غلطت في شرفي قال لي واضح لو عاوزه تلعبي ما بتختاري انك تتخفي في ثوب الجن كأن سلكتي اي طريق تاني بالحرام تجيبي منو قروش قلت ليهو الحمد لله ربنا يسترني لغايه ما يشيل امانتو قال لي انا البسترك احكي فشنو حكيت ليهو قصتي كلها بقا متاثر شديد وقال لي انا عاوز اعتب عليك كيف ترمي اولادك انا دموعي كانت في عيني قلت ليهو انا خوفت عليهم من الجن وربنا عالم بالفي قلبي كان شنو قال لي ربنا يغفر ليك وعشان انا اثبت ليك انو انا معاك نحنا نمشي مكان ختيتي الاولاد ونشوف الشالهم منو قلت ليهو تمام من مكانا داك مشينا الجامع وسالنا مالقينا رد قالو ما بعرفو حاجه او شكلو الزول اللقاهم ما عرفوهو قال لي طيب بتتزكري مكان كنتي ساكنه قلت ليهو اي مشينا وطقينا الباب جونا ناس وسالناهم قالو مابعرفو شي قلت ليهو نمشي نسال ناس محمد قال لي هو عارف انك جدعتيهم قلت ليهو لا قال لي طيب ح يعرف من وين قلت ليهو فعلا ومشيت معاهو البيت دخلنا لقيت مرتو سلم عليها وشكلها زوله تقيه شديد قال ليها دي نسيبه بت ما مقطوعه من شجره بس كبرت ولقت في حياتا مصايب وما لقت البسندها انا عاوزك تعتبريها اختك قبل تكون ضرتك انا مجرد ما سمعت كلمه ضرتك اتزكرت منظر امي وهي مشلوله وفاقده للنطق تعبت من الضر ما بالك الزوله دي زوله مكمله ومافيها غلطه هل ح تتقبل الضر وح تعاملني بالحسني ولا ح اعيش ضر الدنيا الاكعب من الضر المن العالم الاخر ……. يتبع تفتكرو البحصل شنو تفتكرو الرسايل الكانت بتجي لي نوسه من منو هل من الجن ولا سند عايش ولا في زول مستخدم جهازو وفعلا سند مات وتفتكرو هل نوسه ح تلقا اولادها تاني ولا خلاص كده دورهم انتهي