رواية ماوراء النصيب الفصل التاسع عشر19بقلم دانيا
صلوا على النبي.......
ياسين اتلفت علينا وقام على حيله قال وعليكم السلام بيتنا الليله نور والله ياسمين عاينت لي وطقشتني في كتفي وضحكت قالت احم احم .. ياسين جاء وقف قدامي ومد يدو سلم علي ومشى دخل الصالون ياسمين قالت لي تعالي ياتقى اقعدي مسافة اجيبه وعاينت لناديه وسألتها وانتي مالك رجعتي؟ ردت اا والله بس كنت مصدعه شويه عشان كدا رجعت وبكره زاتو عندي جامعه قلت اجهز.
ياسمين مشت على المطبخ وانا فضلت واقفه في محلي منتظراها ناديه عاينت لي من فوق لتحت وقالت لي اقعدي مسافة تجي، ،قلت ليها لا كدا مرتاحه طوالي ياسمين جات مرقنا.. في الشارع قلت ليها إنتي البت دي جات تقعد عندكم ولشنو؟ قالت لي حاتقعد معانا فترة الجامعه سالتها وبتبقى ليكم شنو هي؟قالت لي بت اخو مرت خالي كلامها حسيتو غريب " في نفسي قلت وكيف اهلها يقبلو تقعد معاهم في بيت فيهو شباب؟ " .
عند معتز:
بعد الظهر الضيوف طلعوا والأهل الجايين يقعدوا كم يوم كان في خالي واولاد خيلاني اتنين قاعدين قلت ليهم عن إذنك بس خاشي آخد لي دوش خالي قال لي اتفضل ياولدي... مشيت الغرفه ناديت نوادر جات قلت ليها طلعي لي غيار عاوز استحمى قال لي حاضر، ، مشت على الدولاب طلعت الغيار وختتو لي في السرير قالت لي يامعتز!! قلت ليها احكي قالت لي بت عمتك دي ياها نفس البت؟ سكت مسافه قبل اجاوبها دنقرت شلت الملابس وقلت ليها ايوه هي ومشيت خشيت الحمام.
عند مريم:
عدت الليل كله بكى مره تتزكر يوسف ومره تتزكر معتز حست كل ابواب الدنيا اتقفلت في وشها ومن جهه عمتي فاطمه الزعلت منها وبقت حتى كلام معاها ما بتتكلم ... للحظه اتمنت لو ما رجعت من يوسف وسببت لأمها الوجع والخيبه دي كلها دموعها من خدها بقن ما بجفن كياتها كئيبه لأبعد حد.
الصباح قامت على صوت امها وهي بتنادي يامريم يامريم انا مرقتا طلعت من غرفتها لقت امها واقفه في الهول وماسكه صونية خاتاها في كتفها قالت ليها صباح الخير ماشه وين ياامي؟ ردت ليها "ماشه الشغل " مريم عاينت لأمها بإستغراب وقالت ليها انتي قاعده تشتغلي؟ امها ردت ليها بصوت فيهو نوع من الحسرة قالت ليها مااشتغل اتصرف كيف؟ معتز المسكين دا كفاهو والله ما قصر معانا انا خجلانه منو زاتو هسي لو كان قروش الأرض قاعده كان عملنا لينا بيها مشروع لكن الله يهديكي يابتي تبعتي امور الشيطان وضيعتيها لينا نعمل شنو الله راد ليها كدي لكن إن شاء الله تكوني اتعلمتي من الغلط.
عند تقى:
قاعدين في المطبخ مع امي ونوادر بنعمل في الفطور معتز جاء جاب عدة الشاي وقال ياامي المساء جيرانا ديل جاين ياسين واهلو يتقدمو لتقى اتصل لي من امبارح... اجهزو ولو في حاجه ناقصه كلموني اجيبها ليكم من السوق ،، كلام اخوي معتز وترني شيئًا ما ماعارفه لشنو فجأة حسيت بتوتر وخوف امي قالت ليهو ما استعجلوا ياولدي؟ معتز ضحك وقال ليها زول يضرب ليك يقول ليك جايك تقول ليهو ماتجي!! قالت ليهو ربنا يكتب ليها النصيب ياولدي.
بعد مشى نوادر قاعده جنبي ختت يدها في كتفي وقالت لي الف مبروك حبيبتي تتهني عاينت ليها وابتسمت قلت ليهم لا انا الليله عندي دوام ماممكن اقعد امي قالت لي هوي يا بت دوام شنو اضربي للبت الشغاله معاكي قولي ليها الليله ما بقدر أمشي تمشي بدلك قلت ليها لا ياامي انا بحاول اجي بدري.
عند معتز :
طلعت من البيت مع خالي قال زهج وداير يفرق شويه سقتو مشيت بيهو على السوق اول ما وصلت الظلط خالي قال لي اقيف اقيف يامعتز وقفت العربية وقلت ليهو نسيت حاجه؟ قال لي القاعدة جنب البقاله ديك مش عمتك فطومه؟ عاينت على إتجاه البقاله...