رواية ماوراء النصيب الفصل العشرون20بقلم دانيا
صلوا على النبي......
دورت العربية مشيت وقفت جنبها ونزلنا اول ما شافتنا اتوترت شويه صبحنا عليها وخالي دنقر في صونيتها ومرر يدو عليها وقال ليها ماشاء الله يافطومه فتحتي ليكي مشروع؟ كويس والله اخير من قعاد ساي عاينت ليهو وابتسمت بإحراج وقالت ليهو ااي والله يااخوي جمال قعاد البيت مامنو نفع.. وانا ساكت قلبني الكلام.
عند تقى:
بعد الظهر اتصلت للبت الشغاله معاي قلت ليها وصلتي وين يابت انا ما وريتك الصباح قلت ليكي دايرة ارجع البيت بدري، ، قالت لي جنبك وقبل اتم كلامي معاها الباب فتح عاينت لقيتها دي هي بقينا نضحك قلت ليها مستهبله وقت جنبي بتردي ليه؟ قالت حبيت اخسرك رصيد قلت ليها بخصمو من راتبك وضحكت وسلمت عليها وطلعت... وقفت اقرب ركشه ووريتو ماشه وين قبل اصل البيت امي ضربت لي قلت ليها خلاص ياامي جيت قريبه ليكم قالت لي استعجلي العصر قرب وانتي ماجيتي ،، بتكلم معاها وبعاين على جوانب الطريق صدفه عيني وقعت على اتنين قاعدين في احد الكافتريات للحظه حسيت نفسي مشبهه ساي لكن قبل نبعد عنهم طلعت راسي من الركشه عاينت وراء اتأكد وياهم زاتهم "ياسين وناديه " .
في اللحظه دي كمية التضارب في الأفكار الحسيت بيهو قلت معقوله في بينهم حاجه يعني؟ لالا ياتقى الموقف عادي ماهم اولاد اهل ، لكن قعدتهم " قاعدين قصاد بعض ونسه وضحك وكبابي عصير " مخي شطب كل انواع الشك خشت في راسي اتزكرت موضوع جيتهم لينا عاينت للساعه عامله قريب تلاته قلت المفروض يكون في بيتهم بجهز في نفسو البقعدو هنا شنو ؟.
وصلت البيت استلمتني امي في الباب خشي خشي سريع يابت ترى قلت ليكي ما تمشي الشغل الليله وقت مشيتي ماتجي سريع امشي اجهزي... عاينت ليها وقلت ليها ياامي خليني ارتاح شويه على الأقل ماممكن دخلت مشيت المطبخ على طول لقيت نوادر وتمني ومعاهم مريم من شافني بقن يتقاطعن بيناتهن ويضحكن نوادر قالت لي واخيرا جيتي ياعروستنا من الظهر امي ليلى قلبها القعاد تمني قالت لي امي بتبالغ في كل شيء يعني شنو كان اتأخرت في النهايه هم مابجوا العصر طوالي كدا !! نوادر قالت ليها حقها يابت في النهايه دا عرس اول بت ليها... عاينت ليهن بزهج قلت ليهن خلاص ضمنتن إني حأعرسو يمكن ما ارضى بيهو.
مشيت جهزت وانا لسه راسي ملخوم بعد الشوفتو دا ماعارفه اتصرف كيف؟ شويه وسمعت صوت برا السلام عليكم نوادر كانت قاعدة معاي في الغرفه قالت لي جو شكلهم ح اطلع اشوفهم واستقبلهم طلعت كدا جاتني ياسمين داخله مبسوطه جات حضنتني وقالت لي عروس اخوي... قلبي بقى يدق بسرعه وحسيت نفسي متوتره... شويه وطلعنا برا سلمت على ناس امها وقعت معاهم غريبه لاحظت إنو ناديه ما جات معاهم.
بعد طلعوا مننا معتز وخالي طلعوا مشوا الجامع لصلاة المغرب بعد جو راجعين معتز كان قاعد في غرفتو مشيت عليهو دقيت الباب قال اتفضل.. كان واقف قدام الدولاب بطلع ليهو في غيار اتلفت عاين لي وقال لي في حاجه؟ قلت ليهو مافي حاجه لكن جيت اقول ليك قبل اتم كلامي قال لي كدي لبعدين خالي دا منظرني طالعين على بيت عمي هنا قلت ليهو كويس .
معتز:
مشينا بيت ناس عمتي فاطمه دقيت الباب جات مريم فتحت لينا سلمنا عليها ودخلنا لقينا عمتي قاعدة في الحوش سلمنا عليها وقعدنا مريم ماشه تخش جوا قلت ليها تعالي يامريم ماتجيبي اي شيء جاهزين والله تعالي اقعدي.... عمتي قالت لا والله تشربو لينا حاجه خالي قال ليها فاطمه نحن ضيوف؟ نحن اسياد البيت لو دايرين حاجه بنقول ليها سوي تعالي اقعدي يابت جات قعدت ،، قلت ليها كيف صحتك ياعمتي؟ قالت كويسه والله ياولدي نحمد الله، ، قلت الحمدلله.
قلت ليها عمتي فاطمه انا ما ولدك؟ قالت لي ولدي كيف ماولدي؟ قلت ليها طيب طالما معتبراني ولدك ليه بتشتغلي ومادايرة تشيلي المصاريف حقتك؟ معقوله ياامي تشتغلي وانا موجود فايدي شنو طيب؟ دنقرت وراسها وقالت لي والله ياولدي انت ما قصرت وغلطانه كان قلت قصرت العملتو لي انت لو جبت ولد من بطني ما كان بعملو لي.
قاطعت كلامها وقلت ليها طيب حتى لو ما دايرة تشيلي مني انا جيتك بموضوع داير يحل النقاش دا كلو طالما اصبح بينا في حواجز ورسميات والموضوع هو بدال ما تتعبي وتشتغلي وقعدة في الشمس وقومه من الصبح انا فكرتي تجوا تقعدو معانا نسكن كلنا في بيت واحد هو انتوا كم ونحن كم عشان نتفرق؟ كدا منها بتكونو مع الناس وماتحسو بالوحدة ومنها بطمئن عليكم اكتر ،، وبيتكم دا تأجرو .