رواية الفستان الابيض الفصل الاول1بقلم يارا علاء الدين
لما فتحت الدولاب ولقيت فستان فرحي متعلق قدامي، وقفت مكاني، وأنا مستغربة، إزاي؟ ده من يوم الفرح وهو جوه شنطته فوق الدولاب.
في اللحظة دي، ماكنتش أعرف إن الفستان الأبيض ده كان أول خيط في الحقيقة اللي هتقلب حياتي كلها.
ـــــــــــــــــــــــــــ
اسمي ندى، عندي 33 سنة، ومتجوزة من كريم بقالنا 8 سنين.
لو سألت أي حد يعرف كريم هيقولك إنه راجل ميتعوضش.
عمره ما اتأخر عليا، ولا خلاني أحتاج حاجة وأطلبها مرتين، وحتى بعد سنين الجواز، كان لسه بيجيبلي هدايا من غير مناسبة.
أوقات كنت ببصله وأقول لنفسي:
"أنا عملت إيه حلو في حياتي عشان ربنا يرزقني بواحد زيه؟"
يمكن عشان كده، كان صعبان علي أوي لما الموضوع ده حصل لإنه ميستاهلش كده مني.
الموضوع بدأ من حوالي سنة، في الأول كانت حاجات بسيطة.
أنسى فين حطيت مفاتيحي.
أنسى دفعت الحساب في السوبر ماركت ولا لأ.
أقفل البوتاجاز وأرجع أبص عليه تاني .
كنت بضحك وأقول:
"واضح إني كبرت وبقى عندى زهايمر."
لكن مع الوقت... النسيان بقى غريب.
أوي.
في مرة نزلت السوبر ماركت أجيب كام حاجة.
وأنا واقفة عند الكاشير، الكاشير بصلي وقالي:
"حضرتك نسيتي الشنطة بتاعتك كالعادة."
استغربت وقولتله:
"كالعادة؟"
قالي وهو بيضحك:
"ده تالت مرة تنسيها عندنا الاسبوع ده حضرتك ."
ابتسمتله مجاملة...لكن من جوايا كنت متأكدة إنها أول مرة تحصل.
رجعت البيت مضايقة، وحكيت لكريم.
مضحكش، ولا أنكر اللي حصل.
قرب مني وقال بهدوء:
"أنا كمان ملاحظ إنك بقيتي بتنسي كتير، يمكن من لغبطة النوم ياحبيبتي، حاولي تظبطي الموضوع هيفرق معاكي جدًا.
الجملة دي فضلت ترن في ودني طول الليل.
أنا كمان ملاحظ.
يعني الموضوع مش في دماغي أنا بس؟ بس بصراحة أقتنعت أوي إنه من لغبطة النوم، أصل الأم اللي عندها طفل زي سليم الله يكون في عونها.
من يومها بقيت أركز في كل حاجة بعملها.
لدرجة إني بقيت أكتب كل حاجة في نوتة صغيرة عشان أبقى فاكرة التفاصيل
صحيت الساعة كام.
خرجت إمتى.
اشتريت إيه.
هعمل ايه انهارده.
كل حااجة.
كنت فاكرة إن النوتة دي هتطمني...
لكن حصل العكس.
بعد أسبوع، فتحتها عشان أشوف يوم الخميس، أصلي اشتريت طقم من المحل وكنت عايزة أفتكر دفعت كام، عشان أجيب اثنين كمان..
لقيت مكتوب بخط إيدي كده وسط الكلام:
"الساعة 8 بالليل... نزلت مع كريم واتعشينا برا."
فضلت باصة للجملة، وأحاول أفتكر الموضوع ده بس مفيش أي حاجة خالص ..
أنا مش فاكرة إني نزلت يومها من البيت أصلًا!
جريت على الموبايل، فتحت الصور، أصلي مبروحش مكان من غير ما أتصور فيه.
لقيت صورة ليا أنا وهو في مطعم.
تاريخها...نفس اليوم.
فضلت مكبرة الصورة دقيقة ورا التانية.
أنا ببتسم.
وهو مبتسم.
كل حاجة طبيعية.
إلا حاجة واحدة...
إني مش فاكرة إن ده حصل أصلًا، طب إزاي؟
قفلت الصور بسرعة واتصلت بكريم.
قولتله:
كريم هو إحنا خرجنا يوم الخميس اللي فات؟
ضحك وقالي:
"قولي إنك عايزة تخرجي تاني علطول بلاش الطريقة دي أنا حافظها !
قولتله بعصبية:
رد عليا ياكريم لو سمحت.
قالي وهو مستغرب:
آه يا ندى... خرجنا، وإنتِ اللي اخترتي المطعم.
سكت شوية، وبعدين سألني:
"إنتِ كويسة؟"
لأول مرة...
خوفت من السؤال أكتر من الإجابة.
هو أنا ممكن يكون عندي فصام؟ ممكن أكون مريضة وأنا معرفش؟
ده السؤال اللي أتردد في بالي لما كريم كان بيسألني وبيقولي :
إنتِ كويسة ؟
قولتله :
اااه يا كريم اااه كويسة متقلقش.
قفلت الموبايل وإيدي بتترعش.
وقعدت على الكنبة ومبقتش عارفة أفرق بين اللي أنا فاكراه واللي بيحصل حقيقي .
لحد ما فجأة…
سمعت صوت جرس الباب بيرن.
قومت فتحت الباب وأنا بحاول أطرد الأفكار دي من دماغي.
كانت جارتنا أم هدى.
ست كبيرة دايمًا بتسأل عني، بتفكرني ب ماما الله يرحمها، بس النهارده شكلها كان مختلف.
لقيتها واقفة بتبصلي بقلق، وقالت بصوت واطي:
"إنتِ كويسة يا بنتي؟"
ابتسمت غصب عني وقولتلها:
"آه الحمد لله، اتفضلي ياحبيبتي.
سكتت ثانيتين، وبعدين قالت الجملة اللي جمدتني:
"طب وإنتِ كنتِ فين امبارح بالليل؟"
قولتلها:
"في البيت… طول الليل، هكون فين يعني يا طنط.
هزت راسها بسرعة وقالتلي:
"لأ يا حبيبتي… أنا شوفتك بعيني."
كملت وهي بتبص حواليها كأنها خايفة حد يسمع:
"إنتِ كنتي خارجة من العمارة الساعة ٤ الفجر… كان شكلك متوتر كده وقلقان كأنك بتدوري على حاجة؟
سكت.
حسيت الدنيا بتلف بيا، قولتلها بسرعة:
"أنتِ أكيد غلطانة… أنا ما خرجتش، وبعدين إزاي هنزل في وقت زي ده وليه أصلًا؟ وهنزل لوحدي كده؟
بس هي قاطعتني:
"أنا حتى ناديت عليكي… وإنتِ بصيتيلي ومشيتي مردتيش عليا."
رجعت خطوة لورا، وأنا مش عارفة أستوعب اللي هي بتقوله.
في اللحظة دي كريم دخل من باب الشقة وبصلي ......
