رواية الفستان الابيض الفصل الثاني2بقلم يارا علاء الدين


رواية الفستان الابيض الفصل الثاني2بقلم يارا علاء الدين

في اللحظة دي كريم دخل من باب الشقة وبصلي وقال:

خير ، واقفين على الباب كده ليه ، فيه حاجة ؟

أم هدى بصتله، وبعدين بصتلي، وسكتت فجأة.

وقالت:

"لا أنا همشي بقى يابني أنا كنت جاية أتطمن على ندى."

ومشيت بسرعة.

قفلت الباب وقلبي بيدق بطريقة غريبة.

بصيت لكريم، وقولت له بصوت مكسور:

أم هدى بتقول أني نزلت من البيت لوحدي امبارح الفجر.

سكت لحظة أطول من الطبيعي، وبعدين قالي بهدوء:
إيه ده، حصل إمتى الكلام ده؟ بس أنا صحيت الصبح كنتي نايمة جنبي.

دموعي نزلت غصب عني وأنا بقوله:
أنا مبقتش فاهمة حاجة ياكريم، أنا بعيش حاجات من غير ما أعرفها.

قعدت على الأرض وانفجرت في العياط.
وهو قرب مني وقال:

"اهدي ياحبيبتي مفيش حاجة… إحنا هنروح لدكتور، ونطمن، وبإذن الله كل حاجة ليها حل"

قولتله بصوت حاد:
أنا مريضة فصام ياكريم!

طبطب عليا وقالي:
اوعي تقولي كده تاني، إنتِ زي الفل، بكرة باذن الله نروح لدكتور وهتتأكدي من كلامي.

بعدها دخل ياخد شاور، وأنا قعدت على السرير وفيه جملة واحدة بس بتتكرر على لساني:

أنا مريضة أنا مقتنعة بكده، بس ياترى كريم هيستحملني ولا هيسيبني ويشوف غيري ؟

تاني يوم الصبح ركبت مع كريم العربية وكنت ساكتة طول الطريق.

كلام أم هدى لسه بيرن في ودني:
"إنتي كنتي خارجة من العمارة لوحدك الفجر"

كريم حاول يتكلم معايا طول الطريق يهديني شوية بس أنا مكنتش سمعاه.

لحد ما وصلنا عيادة دكتور مخ وأعصاب.
دخلنا، وفضلت قاعدة متوترة وخايفة، خايفة يأكدلي اللي في دماغي!

كل دقيقة فيه صراع جوايا أجري من هنا بسرعة ولا أدخل وأواجه!

لحد ماجه دورنا، قعدت قدامه وسألني بهدوء:

"خير يا مدام حضرتك بتشتكي من إيه؟"

بلعت ريقي وقولتله:

"بنسى حاجات… مش فاكرة إنها حصلت. وبشوف صور ليا في أماكن أنا مش فاكرة إني روحتها."

لقيت كريم بعدها اتكلم وحكاله مواقف كتير من الي بتحصل معايا..

قعد يسألني أسئلة كتير:

فيه حاجة ضغطاكي اليومين دول؟ فيه أي حدث مهم حصل من قريب؟

حاجات شبه كده، وبعدها لقيته بيبتسم وبيكتب في الروشتة أدامه وقالي:

"هنعمل شوية تحاليل بسيطة… عشان نستبعد أنيميا أو نقص فيتامينات أو أي سبب عضوي."

هزيت راسي من غير ما أجادل.

كريم كان قاعد جنبي  وقالي:

"متقلقيش ياحبيبتي ده أكيد إرهاق "

سكت مكنتش لاقية أي كلام أقوله، أصلي إحساسي دايمًا بيطلع صح.

مش قادرة أوصف أد ايه اليومين دول عدوا عليا كأنهم سنتين، ولأول مرة أكون خايفة التحاليل تطلع سليمة، وأطلع مريضة نفسيًا!

بعد يومين جبت النتيجة، قريتها وأنا مصدومة، روحت للدكتور في نفس اليوم. كان نفسي ينفي كل اللي أدامي ده .

الدكتور فتح التحاليل بهدوء، وقال:

"التحاليل طبيعية تقريبًا… مفيش حاجة خطيرة، فيه أنيميا بسيطة… لكن مش كافي يفسر النسيان بالشكل ده، بس في العموم أنا هكتبلك دوا تمشي عليه اسبوعين وتجيلي تاني، لو مفيش تحسن، يبقى كده التشخيص تقريبًا هيتأكد.

خرجنا من العيادة، وأنا مش شايفة أدامي، كريم عمال يطمني ويقولي :

هتبقي كويسة، كل اللي في دماغك مش حقيقي متقلقيش، الدوا باذن الله هيعدل كل ده.

وأنا ساكتة مش قادرة أتكلم، مش عايزة حد يطمني أنا عايزة حد يقولي الحقيقة وخلاص.
مش هفضل في العذاب ده اسبوعين!

الليلة عدت معرفش إزاي، كريم جالي قبل ما ينزل للشغل  وقالي:

متقلقيش ياحبيبتي كل حاجة هتبقى كويسة، قومي يالا افطري، واشربي قهوتك كده، ومتفكريش كتير.

ابتسمت وقولتله:
حاضر .

قالي: 
ربنا يخليكي ليا يارب ياحبيبتي.

نزل الشغل وأنا قررت أقوم فعلًا أفطر وأروق المطبخ كده قبل سليم مايصحى.

وأنا برتب في درج المطبخ، إيدي لمست حاجة غريبة، موجودة تحت المعالق كده من جوه أوي.  

شدّيتها ببطء، لقيت شريط دوا صغير.

لكن الاسم عليه كان ممسوح معرفتش اقرأه.

استغربت ايه اللي هيجيب شريط دوا هنا؟ 

بس أكيد أنا اللي حطيته ونسيت.

قولت أرجعه مكانه تاني وأحاول أهدى شوية، ومفكرش كتير زي ما الدكتور قالي، بس.........

لما جيت احطه تاني، لقيت شريط تاني جمبه، طلعت كيس المعالق خالص من الدرج بس اللي خضني...

إني لقيت شرايط كتييييير أووي!

كل اللي عملته وقتها إني خدت شريط منهم وجريت على أوضتي، لبست هدومي، وسبت سليم عند أم هدى، وقررت أروح للدكتور عشان أعرف  ده بتاع ايه؟ وأقوله يمكن أفهم حاجة!



تعليقات



<>