رواية زهرة المشمش الفصل الاول1بقلم هدير اسامة
يا بنتي روحي قوليله يمضيلك على التيشيرت
لأ طبعا ، مينفعش
ليه يا زهرة ، دا انتي بتلفي وراه كل الماتشات وباين عليكي أوي .
أول ما قالتلي كده اتكسفت ، أنا اه بلف وراه كل الماتشات وباين عليا فعلا ، بس لأ حرام كده ، أنا مش هاجي هنا تاني ، أنا تقريبا نسيت نفسي ، الله يهديني ويهديه .
ها يا زهرة ، كابتن سُلَيم جاي ناحيتنا أهه .
لأ يا ليلى ، يلا نروح .
لكن فجأه لقيت ليلى شدت مني التيشيرت، وندهت عليه
كابتن سُلَيم ، كابتن سُلَيم ، عاوزه اقولك صاحبتي معجبه بيك جدا
ممكن تمضيلها ع التيشيرت ..
أول ما عملت كده اتكسفت اوي ووشي احمر وكنت هعيط ، بس قولت بما إني مش جايه تاني ومش هتابع ماتشات تاني هاخد التيشيرت منه واحتفظ بالتوقيع وحسابي معاها بعدين على كلمة معجبة بيك دي، وقفت وأنا باصه في الأرض ، أنا مش مدركة ايه بيحصل ، أنا أول مره أقف على مسافة قريبة منه كده ، دايما كنت بشوفه من بعيد..
لقيته مركز معايا ومستغربني وانا واقفه وعيني في الأرض مرفعتش عيني فيه
قالي اسمك ايه علشان أكتب الإهداء ..
رديت عليه وأنا باصه في الأرض : زهرة
لقيت ليلى بتقوله : اسمها زهرة المشمش
لقيته ابتسم اوي كده وقالي أول مره أسمع الاسم دا ، اشمعنا بقا زهرة المشمش .
اتكسفت أوي وقلبي بيدق بسرعه ، أنا بجد واقفه معاه وبكلمه ، يارب سامحني، دا أنا هروح البيت اجلد ذاتي ومش هرحمها ، أنا ازاي كده ..
لقيت ليلى صاحبتي قطعت الصمت وقالتله: مامتها كانت بتحب زهرة المشمش ومن حب باباها في والدتها سماها على اسم اكتر حاجه بتحبها ..
لقيته بيضحك بصوت عالي اوي وقالي : وليه يعملوا فيكي كده طيب ..
أول ما قال كده سيبته ومشيت فضل ينادي عليا : التيشيرت يا زهرة .
ليلى : هات يا كابتن أنا هديهولها ..
أنا اللي حطيت نفسي في الموقف دا ، أنا اه بشجعه من قبل ما حد يعرفه أصلا ، ومكدبش عليكم أنا قلبي مشدود ليه ، ودا الذنب الوحيد في حياتي ، أنا الحمد لله لبسي فضفاض وملتزمة وبصلي الوقت بوقته والسنن كمان الحمد لله ، وبدأت حفظ قرآن من فترة قريبة ، لكن الحمد لله إني بدأت ..
ذنبي الوحيد إني بفكر فيه ليل نهار ، متابعه كل اخباره، دا انا حتى بعمل زووم على صورته علشان بس أفضل أبص لملامحه شويه ..
انا خلاص من النهارده خدت قرار ، همسح كل صوره ليه على موبايلي وهبطل اتابع أخباره وربنا يسامحني على اللي كنت بعمله ، بس يارب قلبي مشغول وهحاول أتغلب عليه ..
أول ما ليلى جت لقيتني خلاص على أخري ومش طيقاها
ايه يا زهرة في ايه ؟
ـ بقا كده يا ليلى تحرجيني بالمنظر دا .
احرجك ايه ، ما انتي طول الماتشات بتاعته حاطه التيشيرت في شنطتك وانا عارفه إنك نفسك في كده ، دي غلطتي .
ـ ايوه يا ليلى غلطانه ، أنا اه نفسي في كده بس حرام عليا ، أنا أصلا بلف وراه ليه ، هاتي التيشيرت .
خدت منها التيشيرت وحدفته في الأرض وقولتلها : مبقاش ينفع أفكر فيه تاني ، انا شكلي الدنيا غرتني ..
كل دا وليلى واقفه مصدومه من رد فعلي ، لكن الصدمة الكبيرة وأنا بلف ضهري لقيت سُلَيم واقف يتفرج من بعيد ،والتيشرت اللي عليه توقيعه على الأرض
انا مكنتش أعرف إنه هيقف ويسمعني ، لكن كنت عارفه إن هو مختلف علشان كده حبيته ...
أول ما عيني جت في عينه ، اتوترت ، المهم خدت بعضي ومشيت بسرعه
لدرجة نسيت ليلى ، ليلى اللي مش بيتبل في بؤها فولة ..
ليلى خدت التيشيرت من على الأرض وراحت تعتذرله لكن رده على ليلى كان غريب ، غريب لدرجة إن ليلى مقدرتش تحكيلي هو قال عني ايه
صاحبتك دي شكلها عندها مشكلة نفسية ، ممكن اديلك رقم دكتور شاطر وأنا واثق إنه هيساعدها ، عن إذنك ...
وسابها ومشي ..
أول ما سُليم راح أوضة تبديل الملابس ، فضل يفكر في زهرة ، غريبة أوي البنت دي ، أكيد هي مريضة نفسيا فعلا ، لكن ازاي ووالدها ووالدتها كانوا محاوطين البيت بحب على كلام صاحبتها .. عموما مش هشغل بالي ، أنا هشوفها فين تاني ...
ـــــــــــــ
مالك يا زهرة حزينة ليه كده؟
مافيش يا ماما ، أنا بس هقعد في الجنينة شوية وهبقى كويسة .
طيب هعملك فنجان شاي واجي أقعد معاكي .
راحت زهرة علشان تقعد في الجنينة لكن لفت انتباهها شجرة المشمش ، الزهور بتاعتها بدأت تطلع ما شاء الله
، وقفت قصادها وهي بتفتكر كلام سُليم وهو بيقول وليه يا أهلك يعملوا فيكي كده ..
وأثناء ما هي سرحانة جت والدتها وقفت وراها وقالتلها ، يااااه بقا عندي في الجنينة زهرتين مشمش ..
ضحكت زهرة وقالتلها: ليه بجد زهرة المشمش، ليه مش زهرة اللوتس مثلا..
والدتها بحب : ناس كتير بتحب اللوتس واللافندر وانواع كتير من الزهرة بس محدش بيفكر في زهرة المشمش مع إنها جميلة جدا وهادية ومش متاحة طول السنة ، وكمان مش بتلفت نظر أي حد غير اللي بيحبها، أو اللي يلحق يحبها لإنها متاحه قدام عينك وقت قصير جدا
تعرفي إن زهرة المشمش دي من أول الزهور اللي بتعلن إن الربيع جه. بتتفتح قبل حتى ما الشجرة تلبس ورقها، كأنها عندها شجاعة تبدأ الجمال قبل أي حد. عشان كده صاحبة اسم زهرة المشمش بتكون مميزة برقتها، لكن جواها قوة، ووجودها يبعث الأمل في قلوب اللي حواليها
وانتي كده يا زهرة ، مش أي حد يجي ياخدك مني بالساهل ويمشي ، لأ دا لازم يكون عارف قيمتك ويشوف الجمال اللي جواكي قبل اللي بره
أول ما ماما قالتلي كده ارتحت ، حسيت كإنها بتقولي إني حاجه كبيره أوي ، الله يسامحك بجد يا سُليم ، انت شككتني في اسمي ، بس أنا عارفه إنك أكيد متقصدش ...
ــــــــــــــــــــــــــ
بالمناسبه ، نسيت أقولكم إني فاتحه محل زهور صغير كده ، الزهور دي بابا اللي بيزرعها وأنا عرضت عليه أفتح مشروعي الصغير ورحب جدا ، وبجد لقيت نفسي وسط الزهور أكتر من البني آدمين ..
صباح الخير يا ليلى، راحه فين كده الصبح بدري؟
ليلى بضيق : راحه أشوف نتيجتي ادعيلي يا زهرة .
زهرة بحب : الله يوفقك يارب يا ليلى ، المهم تشوفي النتيجة وتطمنيني وتيجي تاخدي البوكيه بتاع حلاوة نجاحك مني
المهم ليلى مشيت وأنا زي كل يوم بحب أقرأ الوِرد بتاعي بين الزهور علشان ربنا يكرم والبركة تملى المكان ..
وفي الأثناء دي سُليم كان رايح يقابل حبيبته قبل التمرين وقرر ياخدلها بوكيه ورد ، والبوكيه دا يا ترى من محل ميييييين؟؟؟؟