رواية امانة الغائب الفصل الاول1والثاني2بقلم جمانه السعيد
امل عمري ١٤ سنه اليوم عرسي
لا تستغربون اي اليوم عرسي على ابن عمي يحيى
راح احجيلكم قصه زواجي بهذا العمر
زواجي من ابن عمي الي بعمري ماشايفته
اني وحيدة اهلي
ابوي رجال مريض مريض وهو طفل
وكبر ويا المرض
اخو الجبير عمي ابو يحيى عايش بلولايه
يشتغل حارس بمدرسه
ابوي الأخ الاصغر وبعد عدهم اخت اسمها اخلاص
احنا عايشين بناحيه
الناحيه مساحتها ااقل من القضاء
وأهلها يعتمدون على تربية الحيوانات وزرع الاراضي الزراعيه
اكثر اهلها ناس بسيطه ومستواهم المعيشي متوسط
اول احجيلكم عن عمتي
عمتي زوجها عنده ارض زراعيه وحلال عايشين منهن
وعمي ابو يحيى اختار يعيش بلولايه
لان حصل وضيفه وحتى ولده يكملون دراستهم
عمي ابو يحيى عنده يحيى الجبير
الي هو زوجي المستقبلي
يحيى من ازوجنا كان ١٩ سنه
وأخ ازغر منه اسمه فيصل عمره ١٦
مثل ما كتلكم بلبدايه ابوي مريض من هو زغير
وكبر ويا المرض
بس حتى وهو مريض ومايكدر على العيشه
اهله صممو يزوجونه حتى يصير عنده اطفال
يشيلونه من يكبر
انسان مريض ااكيد محتاج احد يدير باله عليه
زوجه تخدمه وجهال يشيلونه من يكبر
اختاروله وحده فقيره من عائله بسيطه
ابسط من البساطه بنيه من الريف لاتقرا ولا تكتب
مخلصه عمرها تركض ورا الغنم والحلال
وخطبوها اله
وأهلها ماصدكو
حتلو مريض وماعنده حياة معيشه ميسره
ميخالف الرجال ما يعيبه شي
خليها تزوج ويصير عدها تطفال لمن باقيه كاعده
جمانه السعيدي
ازوجت امي ابوي وشالة مسوليته
وهيه ساكته وراضيه بهذا الوضع
اجيت اني للدنيا بعد سنتين زواج
صح ابوي وأهله يردون ولد
ضاجو من سمعو اجت بنيه
بس ميخالف البطن الي اجيب البنيه اجيب الولد
بس ظنهم طلع غلط لان امي بعد ابد ما حملت
رغم راحت للساده شالت حرز وطكطكت حرمل
بس بدون فايده
بس ماراحت للدكتوره ولا راجعت ابد
لان وضعهم المادي ما يسمح وماكو يمهم دكتوره زينه لازم تروح للولايه
ماعدها امكانيه تراجع بقت على الساده
ماصار عدها حمل بعد
ماكو غير امل وبس
اجيت اني للدنيا بيت فقير وأب مريض
وأم ما تعرف ادبر اي شي
ننتظر الناس تحن علينا ودزلنا شي
حتى أمورنا تمشي
ماكو اي اعتراض هاي هيه الحياة نعيش وبس
اهم شي متوفر عدنا قوة يومنا
باجر من يجي يجي رزقه وياا
عمتي ابد ما تنسانا دائما اجيبلنا مخضر و يا دجاجه
لو روبه
عمي ابو يحيى كل شهر يجينا مره من يستلم الراتب
يجيبلنا مسواك وينطي ابوي فلوس العلاج
هواي ليالي كنت اكعد من النوم على صوت ابوي يكح
وامي كاعده ويااا
تفورله شي حار بلكت ينفتح صدره
جمانه السعيدي
مسكينه امي اهلها شمروها غير شمره
من انولدت لليوم ماشفت ابوي طلع للشغل لو جابلنا علاكه
كله نايم بلفراش
ماكان يشتغل لان مايكدر
اما اني بلكوه خلصت الابتدائيه
ابوي كال كافي دراسه المهم تعرف تقرا وتكتب
بقيت كاعده بلبيت اساعد امي على مرض ابوي
البيت الي كاعدين بي بسيط
بيت مبني بلوك غرفه وهو زغير ومطبخ
هذا البيت مو بيتنا بيت زوج عمتي مخلينا كاعدين بي
الخاطر عمتي
اساسا هذا البيت جان بيت الحارس الي يحرس
حلال رجل عمتي
بس رجل عمتي نقل الحلال للكاع مالته
وبقا البيت فارغ كعدنا بي
هذا الحجي قبل لا انولد اني
المهم بعمر ١٤سنه ابوي تخربط وزاد المرض علي
وصينا العمي ابو يحيى اجا من الولايه
واخذه للمستشفى بقا اسبوع بلمستشفى
ومات
صمم عمي ابو يحيى الفاتحه تكون بيته بلولايه
رحنا اني وامي ومن خلصت الفاتحه قررنا نرجع البيتنا
صرنا وحدنا قبل الناس ادزلنا مسواك الخاطر ابوي المريض
بس هسه محد بحالنا
اجا خالي من الريف وصمم نروح ويااا
مايقبل نبقى وحدنا بهذا البيت
جمانه السعيدي
عمي من سمع ماقبل
اجا ورانا للريف
عمي....اني اجيت علمود امل
خالي...شبيها امل
عمي...اني مااقبل بت اخوي تعيش هنا
خالي...اذا تريدها اخذها
عمي...اي اخذها اليحيى
خالي...اي بيها الخير اني مااتحمل مسؤليتها
عمي...بس نطلع أربعين اخوي ااجهز غرفتها
واجي اخذها
خالي....كون ابنك مايريدها اني اخذها لحميد ابني
عمي....هو بكيفه مايريدها ياخذها وغصبا ما علي
امل...هذا الاتفاق صار بدون ماياخذون رائيي لا اني ولا امي
هما قررو بكيفهم
عمي يكول امل تزوج يحيى
وخالي مايريد يتحمل هاي المسؤليه
واذا ابقى هنا لازم ازوج حميد
حميد هذا ازغر مني بسنتين ولا يقرأ ولا يكتب
وقته كله مخلصه ورا الحلال
يرجع بليل تعبان ينام بملابسه نفسهن
حتى سبح ما يسبح
وبعده زغير عمره ١٢ سنه وخالي يريدني ازوجه
اتفقو عمي وخالي من تخلص اربيعين ابوي
يجي عمي ياخذني للولايه
هما هناك يجهزون كلشي وازوج يحيى
زواج بسكوت يعني بدون عرس
لان ابوي ستوه مات
عمي من رجع وكال اليحيى اني خطبتلك امل
والزواج بعد أربعين عمك
يحيى تخبل ما يريدني
يحيى...اني ماريد امل
عمي...هو بكيفك تاخذها وغصبا ماعليك بت اخوي
ماتعيش خدامه بيت محيسن ( قصده خالي)
لا والنوب يريدها لحميد
يحيى...بويه ليش ماسئلتني
عمي...شنو اسئلك الشور شوري و اراي رايي
يحيى...اخذها الفيصل
عمي...لا اني كلت انت تزوجها يعني انت تزوجها
يحيى....هو الزواج غصب اصلا امل بعدها زغيره
عمي...شني زغيره جبيره وشاطره
ليش ياخذها الغريب احنا اولى بيها بنيتنا نربيها
بيتنا وتخدمنا امك ما بيها حيل بعد
ضاج يحيى من كلام ابو
مايريد يزوج امل قابل الزواج غصب
امل...... زواجنا اتحدد بعد أربعين ابوي
وعمي راح للنجار حتى ينجر غرفة عرسنا
هذا الحجي سنة ٢٠١٠
كل هاي الهوسه واني مثل الأطرش بلزفه
كلشي ماافتهم ولا اعرف شنو زواج
حتى جسمي ضعيف وماعندي اي ملامح انثويه
ضعيفه وشكلي مخربط من الضيم والفقر
ومااعرف ولا افتهم شنو يعني حياة زوجية
البنات
بس مادام عمي كال كلمه خلاص لازم تتنفذ
قبل الاربعين اجا عمي أخذنا للولايه حتى نروح وياهم
للنجف لان عمي ااجر سياره وراح ياخذ عائلته
كلها ويا
زوجته وولده وعمتي هم لكيناها واصله كبلنا
امل.....بس شافني يحيى هز ايده ما عاجبه شكلي
اني ملامحي كلش حلوه بس مبهذله ماعندي ملابس حلوه
ومااعرف اعتني بنفسي وجسمي جسم طفله
حسيته من شافني ضاج كلش من شكلي
المهم اتجمعنا كلنا ورحنا للنجف
من وصلنا ونزلنا يحيى ما قبل ينزل بقى بلسياره
لان ماعاجبه حتى يجي ويانا بس مايكدر يكسر كلمة ابو
من رجعنا عمي ما قبل نرجع بيت خالي
عمي.....ام امل ابقى هنا اريد اشتري ملابس وذهب
الأمل احنا مانسوي عرس
بس هذا حق رب العالمين
امي ماعدها رائي اصلا تلبس عبايه من يدخل عمي حيل تستحي منه
شيكول اتكول اي
حتى اني ما سئلتني انتي قابله لو لا
بلعكس كانت فرحانه بهذا العرس
لان بيت عمي بلولايه وبيتهم حلو ومعيشتهم ميسره
وهيه تتمنالي هيج قسمه
لان اذا ابقى بيت خالي راح يجبروني ازوج حميد
وراح يضيع عمري بين الزرع والحلال والخدمه
على الاقل هنا راح اعيش مرتاحه
امانة - الغائب
#البارت الثاني
#جمانه السعيدي
@أبرز المعجبين
امل....بعد مارجعنا من الأربعين عمي صمم نبقى بيتهم
لحد مايتم الزواج
فيصل اجا كعد يمنا يسولف علينا ويسئل امي ويضحك
بس يحيى ابد ماشفنا
مايقبل يجي يمنا لان رافض فكرة الزواج
يومين وأخذتنا زوجت عمي ام يحيى للسوك اشترينا ذهب وملابس
اليوم الي بعده راحت وحدها كملت النواقص
من بعدها اخذتني للصالون
حفيت وجهي امي ماقبلت اكص شعري اني شعري طويل واسود حلووو
ماقبلت لا اكصه ولا اميش ولا اصبغ
ام الصالون انطتني كريم مرطب وتفتيح للبشره
لان بشرتي صايره جافه و سمره من قلة العنايه
يمكن تكولون شبسرعه حددتو الزواج وابوج ستوه طلع اربعين
ابوي بعيني وعين امي وحتى عمي وعمتي ميت من زمان
رجال مريض صار اكثر من ٣٥ سنه
ماله اي دور بحياتنا
بلعكس ابوي مات وارتاح من المرض
اني مااكول اني مو حزينه علي لان يبقى ابوي
بس الدنيا لازم تمشي
واني وامي ماعدنا مكان ولا عدنا بيت ولا حتى مصدر معيشه
والضروف حكمت علينا نقبل بهذا الوضع
ونسلم أمرنا لله تعالى
بقينا بيت عمي اني وامي بهاي الاثناء يحيى جان مقدم على الكليه العسكريه طلع قبوله بذني اليومين
وبدا بااجراءات التقديم
يريد بس ينهزم من البيت لان احنا موجودين بي
جمانه السعيدي
بليل سمعته يحجي ويا عمي
يحيى...طلع القبول بس اباشر بعد ماتشوفون وجهي
عمي...بس تمم الزواج وين ماتريد روح
يحي....زواج بلغصب اني سامع البنيه يغصبوها عل الزواج
بس الولد شلون
عمي...بت عمك يتيمه ومالها احد بهاي الدنيا وامها فقيره
تقبل خالها ياخذها خدامه بيته
بنيه زغيره ومؤدبه ليش نخليها تروح للناس الغربه
خليها هنا تربى كدام عيونا
تكبر بينا بعدين انت شنو تريد وحده احسن منها
شبيها على الاقل نعرفها ونعرف اصلها
يحيى...بس اني مااريدها اني ماوحجيت لا على اصلها ولا على فصلها
ماربدها ماعاجبتني هيه كوه خوما كوه
عمي...اي كوه بت اخوي امانه عندي
تزوجها غصبا ماعليك
امل....شكد ضجت من سمعت هذا الكلام يحيى مايريدني
حقه شاب حلو وعايش هنا بلولايه وشايف وعايف
شلون يقبل بوحده مثلي
اني ماكدر ارفضه الموضوع مو بيدي
محد راح يسمعني اذا حجيت
ضميت الحجي بكلبي وسكتت
بعد يومين اجا النجار نصب غرفتنا فوك
شكد اتوسلت بيه زوجت عمي اصعد اشوف الغرفه بس ما قبلت ماعندي واهس الاي شي
خاصه من عرفت يحيى مايريدني وغاصبينا عليه
تحدد يوم العرس سبحت وخالتي ام يحيى جابتلي بنيه أقاربها مكيجتني بلبيت
لان هما ما مسوين عرس كلشي سكته
لبست ثوب بيجي تور الثوب حلو
بس اني ضعيفه ماطلع حلو عليه
اجا الشيخ وعقدولنا محد موجود بس بيت عمي وعمتي واني وامي
صعدتني عمتي الغرفتي
الغرفه حلوه والفرشه بيضه وحلوه
وريحة الغرفه تخبل
بقيت كاعده على الحربايه
صعدن ام يحيى وامي جابلي عشى اتعشينا اني وياهن
ونزلن عمتي وأم يحيى بقيت كاعده اني وامي بلغرفه
كلش خايفه ومتوتره
ومااعرف شراح يصير بيه
امل...يمه خايفه
امي....ليش خايفه ابن عمي مو غريب يحيى حباب
انتي بس اسمعي الكلام ولا تخافين
امل...هو بكيفي اني خايفه منه
امي.....شنو خايفه منه
امل....اني سمعته يكول مااريدها
امي.....معليج بي اهم شي عمج مادام عمج موافق
هاي هيه
وحده يقتنع بعدين الحب يجي بلعشره
بس انتي صيري مطيعه واسمعي كلامه
جمانه السعيدي
اجت ام يحيى كالت يله العريس راح يصعد
نزلت امي واني كلبي يدك براسي من الخوف
بس ماصعد العريس بقيت كاعده وحدي
ااكثر من نص ساعه يله صعد
بس فتح باب الغرفه كمت ارجف من راسي الرجليه
يمكن سمع صوت دكات كلبي
ابد ما حجه اي كلمه
ولا قرب عليه فتح باب الكنتور اخذ دشداشه بدل
سحب المندر الي خالينا بلكاع
خلا من الجها الثانيه وتمدد
بدون ما يحجي ولا كلمه ولا حتى يباوع بوجهي
بقبت كاعده بمكاني
مااعرف شسوي انام لو ابقى كاعده
راسا زمخ بيه بصوت عالي
يحيى...كومي طفي الضوه
امل...كمت امشي واتخربط مااندل وين دكمة الكهرباء
لمن وصلت وطفيتها عبالك ناس تركض وراي
رجعت للجربايه وكعدت عليها
بقيت كاعده خايفه انام ويصيح عليه مره ثانيه
لمن تعبت كلش تمددت
ماحسيت اله خالتي ام يحيى ادك بلباب
فتحت عيوني الدنيا صبح
كمت فتحت الباب
بس شافتني بعدني بثوبي نفسه عرفت احنا ماصار بينا اي شي
ام يحيى....صباح الخير
امل...صباح الخير
مدت راسها بلغرفه شافت يحيى نايم بلكاع
ام يحيى....تعاي انزلي تريكي
امل...اي اجيت
نزلنا اني وخالتي ام يحيى
كعدنا تريكنا اني وامي وخالتي عمي طالع للشغل
عمي بليل يشتغل حارس بلمدرسه
وبلنهار عنده شغله ثانيه
اكو كصاصيب عدهم كاع يخلون بيها الحلال
الي يذبحونه بس ااكو بيهن حوامل ينتظرون يجيبن
وواكو يرضعن وواكو عجول زغار
يعني محتاجات احد يعتني بيهن
عمي كل يوم يروح للكاع يعلف الحلال
ويحلب الهوايش وينظف مكانهن يحسبوله
كل يوم ٥٠ الف
يطلع الصبح يرجع الضهر
العصر ينام وبليل يروح يلزم حراسه
فيصل طالع للدوام
بس اني وامي وخالتي ام يحيى
امي.. اني اروح البيت اخوي
ام يحيى...بعد وكت ابقي عدنا بعد يوم
امي...صارلي هنا اسبوع كافي ارجع البيت اخوي
امل....يمه ابقي وياي
امي...لا كافي اروح
كامت خالتي ام يحيى
امي.. هااا شلونه يحيى وياج
امل....ما حجه وياي ولا حجايه فرش بلكاع ونام
امي...ميخالف يومين اتلاثه ويتعود عليج
امل....يمه شلون تعوفيني وحدي
امي...شعليج يم اهلج اوصيج صيري حبابه
واسمعي الكلام وخاصه كلام عمج
امل...اي ميخالف عود تعاي حتى اشوفج
امي...الله كريم
جمانه السعيدي
امل...ودعتني امي وطلعت بقيت ابجي وراها
هاي اول مره بحياتي نفترق اني وياها
خالتي....ليش تبجين حبيبتي احنا اهلج
امل...اول مره بحياتي نفترك اني وامي
ام يحيى...هسه تتعودين وامج وين رايحه لازم تجي تشوفج
امل...مسحت دموعي اساعدج خاله
خالتي...مااريد اتعبج
امل....لا ماكو تعب
خالتي.....ليش يحيى نايم بلكاع
امل....مااعرف هو دخل وما حجه وياي ولا كلمه
فرش ونام بلكاع
خالتي...ميخالف هسه شويه شويه يتعود عليج
بس انتي يرادلج شويه تسمنيين واني راح اجيبلج
ملابس حلوات واعلمج شلون تعتنيبن بنفسج
انتي حلوه بس محتاجه شوية عنايه
امل...بكيفج خاله
بقينا اني وخالتي نشتغل للمطبخ وتسولف عليه
منا لمن رجع عمي
بس دخل وشافني بلمطبخ
عمي...هاي بنيتي الحلوه ليش تشتغلين
امل....اساعد خالتي
عمي...بعدج عروس ارتاحي
امل....اني اذا اشتغل ارتاح
راسا خالتي أشرت العمي ودخلو جوه
شويه وطلع عصبي يمكن حجتله على يحيى
صعد الغرفتنا فوك
اسمعه يصيح على يحيى ويغلط علي
انت مو رجال فشلتنا ما تستحي
شنو ناقصك لا تسويها شغلة عناد
لان اني هم اعاند وياك
وتعرفني اذا عاندت على شي
يحيى سكت ابد مارد على عمي ولا حجا اي كلمه