رواية النصيب غلاب الفصل الاول1بقلم عهد عامر
_وكل شئ قسمه ونصيب
-وبعدين
_هيكون ايه بعد الجمله دي يابسنت ودتلو الدهب وكل الهدايا بتاعته
-انتي أكيد بتهزري
بصتلها بـ لامبالاه
_وهوا انا ههزر فـ حاجه زي كده ليه
اتعدلت وبصتلي بصدمه بعد ما اتأكدت اني مبكدبش عليها
-ط.. طب ازاي دا انتو بينكو قصه حب ولا الروايات.. ومتقوليش معدش ليكو مشاعر عند بعض عشان مش هصدقها
_وأنا مقولتش كده
-طب حلو انتو لسه بتحبو بعض ارجعوا بقاا
_معدش ينفع
-ليه
جاوبت عليها بكسره
_خلاص خطب
بصتلي بعدم تصديق
-دا اللي هوا ازاي يعني
_عادي زي أي حد بيفشكل ويخطب
-لا مش عادي يا أميره دي بالذات مش عادي
_هوا انتي بتفتحي فـ حاجات اتقفلت ليه ما خلاص
-طب خطب مين
_بنت خالتو
-آه هيا أمه أكيد.. الوليه الحيزبونه دي
_عيب يابسنت نغلط فيها
ردت عليا بعصبيه
-وهيا مش عيب اللي عملته.. لما تشوفك انتي وأحمد بتحبو بعض وتيجي تخليه يسيبك عشان يخطب بنت أختها
مردتش عليها.. وهيا حاولت تهدى وسألتني
-طب هوا كان رد فعله ايه
رديت عليها بسخريه
_بقولك خطبها
-بس ازاي أحمد ميعملش كده دا روحه فيكي
_خلاص بالله عليكي يابسنت انا مش جايباكي تقعدي معايا عشان توجعي انا مابصدق اتخطى
-هه تتخطي..!
_بقولك ايه قومي امشي
-طب وانتي هتعملي ايه
_هعمل ايه فـ ايه
-بعد ماخطب هتعملي ايه
_هوا انا هوقف حياتي عليه ولا ايه مش فاهمه
ردت عليا بعدم اقتناع
-بس مينفعش تكملي وتتجوزي وانتي قلبك مع حد تاني
_والمفروض اروحله وافضل اترجاه يرجع..!
-انا مش بقول كده انا بـ
قاطعتها
_بسنت انا وأحمد ايوه كنا بنحب بعض بس وكنا فتره حلوه في حياة بعض بس نعمل ايه الظروف مش فـ إيدينا من ناحيه أمه وخالته ومن ناحيه أخويا عشان مش بيحبه
-بس انتو لسه بتحبو بعض يا أميره
رديت عليها وانا بحاول معيطش
_والقدر مش في صالحنا
-يعني خلاص كده معدش فيه أحمد وأميره..!
رديت عليها بألم والدموع بدأت تتمرد وتنزل من عيني
_أيوه
الكلمه دي مرّ عليها شهور وسنين طويله أوي
معرفش فيها أي حاجة عن أحمد ولا حاولت أعرف..
اتخطبت..
واتجوزت خالد صاحب أخويا..
حبه ليا خلاني أحبه واتعود على حبه وحنيته معايا
مش هكدب وأقول اني حبيته الحب اللي كان ليا لأحمد بس حبيته وعمري ما فكرت فـ أحمد وهوا معايا عوضني وحبينا بعض بالعشره والموده وقليل لما كنا بنختلف على حاجه
عدت سنتين من جوازي وخلفت سند ابني اللي انا سِرُّه
واللي بقا هوا وباباه كل دنيتي
وفـ يوم سند ابني جه من الجامعه بيضحك والفرحه مش سايعاه..
_ما تفرحني يا أستاذ سند معاك ولا الحزن لأمك بس
سلم عليا وباس إيدي وهوا بيقول بسعاده
-حزن ايه بس ربنا مايجيب أحزان ياست الكل وبعدين أمي مين ياست انتي دا انتي يبان عليكي أصغر مني
رديت عليه وأنا بضحك على طريقته اللي شبه باباه
_ياواد يابكاش
-تربيتك
_ما انا معرفتش أربي
ضحك على كلامي وقالي
-دعواتك بتهل يا ميرو
رديت عليه بصدمه بعد ما افتكرت حاجه
-كلمتها..!
قعد جنبي وبدأ يحكيلي وعيونه بتطلع فراشات
-انا مش عارف دا حصل ازاي بس فجأه في أول الاسبوع لقيتني روحت وكملتها اصلي خوفت تضيع مني وهيا عليها العيون فـ كل مكان.. روحتلها وطلبت منها نقعد فـ كافيه واتكملنا شويه وطريقة كلمها عجبتني جدا وكل يوم كنا بنقعد مع بعض نتكلم فـ الجامعه ومثلا اشرحلها جزء مش فاهماه اهو اي هبل عشان اخليها تحس بيا وخلاص.. لحد انهارده كنت سمعت واحد بيقول انه بيفكر يخطبها مستحملتش الكلام وبدون اي مقدمات ومن غير ما أهتم باللي حولينا اعترفتلها
سألته بحماس ميناسبش أم أبدا
_وكان ايه ردها
-اتكسفت طبعا عشان زمايلها قعدو يضحكو والشباب يصفروا واخدتها الكافيه فـ مكان هادي وعرفتها عليا
وبعدين سكت..!
سألته بفضول
_كمل وبعدين
ابتسم وكمل
-قالت ان هيا كمان معجبه بيا ساعتها انا مكنتش قادر امسك نفسي من الفرحه وطلبت رقم والدها ادتهولي وقالتلي مرنش عليه دلوقتي عشان هوا مسافر وبس قضينا اليوم اللذيذ مع بعض
بصتله والدموع فـ عينيا
ابني سند كبر وحب..!
يااه دا الوقت بيعدي بسرعه اوي.. دا انا لسه فاكره اول يوم وديته الحضانه..!
استغرب نظرتي ودموعي وسألني بلهفه-مالك ياماما
_مفيش يا حبيبي.. ربنا يتمملكو على خير يارب
-يارب ياميرو يارب.. الا هوا فين الحج
_فـ الشغل ياحبيبي زمانه جي.. قوم غير هدومك على ما احط العشا
-حاضر
دخلت المطبخ ووقفت شويه وانا بفتكر اول يوم سند جه قالي على البنت دي ساعتها انا كنت خايفه أكتر منه عشان كان باين عليه انه بيحبها ومكنتش عايزاه يجرب التجربه اللي جربتها أمه قبل كده فوقت من سرحاني وخالد بيبوس راسي
=حبيبي سرحان فـ ايه..
رديت عليه بحب
_ولا حاجة.. حمدالله ع السلامه
-الله يسلمك
_ادخل غير هدومك على ما أحط العشا
-حاضر
وبدأت اغرف الأكل وهوا دخل يغير وسند جه وحط الأطباق ع السفره وقعدنا كلنا واتعشينا وكل واحد كان بيحكي حصل ايه فـ يومه
خلصنا الأكل وسند باس ايدي وقالي
-تسلم ايدك ياست الكل.. الأكل طعمه يجنن
=اهو انا بقاا كنت واخدها مبتعرفش تعمل سلطه حتى..
بصتله بطرف عيني وكمل وهوا بيضحك ويغمزلي
=بس بقت ولا أجدعها شيف.. وكل مرّه بتبهرني بأكلها
ضحكت عليه بقلة حيله وهما دخلو الأطباق وقومت غسلتهم وخالد كان جايب معاه تسالي وشيكولاتات ليا عشان عارف اني بحبها..
عملتلهم فشار كمان وفضيت التسالي فـ أطباق وسهرنا سهرتنا اللطيفه اللي بتبقى كل آخر اسبوع..
وبعدين دخلنا عشان ننام..
روحت لـ سند الاوضه وسألته
_ليه مقولتش لباباك على البنت
-كنت عايز أقوله لما والدها ينزل من السفر
_ماشي يا حبيبي تصبح على خير..
وروحت اوضتي ونمت جنب خالد اللي اخدني فـ حضنه كالعاده
وعدت الأيام وسند عرفني على حبيبته واللي بالمناسبه اسمها أميره زيي وهيا فعلا كانت أميره كان شكلها جميل وفيها شبه من حد انا عارفاه كويس اوي بس مش مجمّعه هوا مين..
البنت كانت لذيذه أوي واجتماعيه وبتحب تتكلم..
وفـ يوم سند لقيته جاي وهوا حتى مش قادر ياخد نفسه وقالي
-رني على بابا ييجي بسرعه
_فيه ايه يا ولاا
رد عليا بسعاده وحماس
-أبوها جه ياماما جه
ضحكت عليه وقولتله
_طب اهدى طيب وخد نفسك وانا هكلم باباك حاضر
كلمت باباه وقولتله اني عايزاه فـ موضوع وقالي نص ساعه وهكون عندك
وطبعا النص ساعه عدت على سند ابني كإنها سنه وكل شويه يسألني هوا اتأخر كده ليه..
معلش الحب يعمل أكتر من كده..
وهوا باين عليه عاشق..!
الجرس رن لقيت سند ابني قام وفتح علطول وخالد بصله بإستغراب من ابتسامته الواسعه دي.. دخل وباس راسي وسألني
=ايه ياحبيبتي فـ ايه
_الواد ابنك ياخويا
بصله وبعدين رجع بصلي بإستغراب وسألني
=ماله..؟
_حب
مكنش فاهم حاجة و فـ المقابل سند جه وبدأ يحكيله على كل حاجة.. من ناحيه سند بيحكيله بجديه ومن ناحيه كان سامعه بإهتمام وانا كنت بصالهم ومبسوطه وبحمد ربنا عليهم..
رد عليه بجديه
=هتقدر تتحمل المسؤوليه..!
-أيوه يابابا وبعدين انا علطول كنت مسؤول عن نفسي
أيوه سند كان من صغره وهوا بيحب يشيل المسؤوليه وكان بيحب يشتغل ويجرب رغم ان باباه كان رافض انه يشتغل عشان دراسته وكان لسه صغير وكمان الحمدلله حالتنا كويسه أوي بس هوا كان بيصرّ كان واخدها كـ هوايه..
=بس مسؤولية البيت والعيال تفرق
-يابابا انا بحبها.. ومستعد أعمل أي حاجة عشان تبقى معايا
=على بركة الله يابني.. هكلم والدها آخد منه ميعاد وأقولك
-كلمه دلوقتي
رد عليه هوا بيضحك
-يابني اللي يشوفك دلوقتي ميشوفكش بالكايزما بتاعتك برا.. بس نعمل ايه بقاا
وبعدين بصلي وقالي
=الحب ياستي الحب..
ضحكت عليه وأنا بهز راسي بقلة حيله منه
=طيب يا حبيبي هيا اسمها ايه او باباها اسمه ايه
-أميره أحمد الشريف
فجأة… كل حاجة وقفت من حواليّا.
الاسم…
الاسم دا أنا سمعته قبل كده…!
سمعته زمان… من سنين طويلة…
رفعت عيني أبص لسند بعدم تصديق
_قلت اسمها إيه…؟
بصلي بإستغراب وسألني
-مالك يا ماما ما انتي عارفه اسمها
_لا لا بالكامل
ردّ وهو مبتسم
-أميره… أميره أحمد الشريف
اتجمدت مكاني…
ونبضات قلبي بقت مسموعة في وداني.
أميره… بنت أحمد..!