رواية ماوراء النصيب الفصل الثاني والعشرون22بقلم دانيا
صلوا على النبي......
معتز عاينت لي بإستغراب شديد ورفع حاجبه قال لي مادايراه ليه الحاصل شنو مش كنتي قبلانه وانتي الجيتي كلمتيني بيهو؟ قلت ليهو ايوه انا لكن هسي مادايراه، ، زاد إستغرابو قعد في طرف السرير وقال لي اقعدي واشرحي الحاصل شنو؟ قلت بيني وبين نفسي لا انا ما دايرة اوريهو بموضوع البت دي قلت ليهو بس مافي سبب... قال لي تمام مافي مشكلة الله يكتب الفيهو الخير وقام طلع.
قمت طالعه وراهو جاء راجع تاني قال لي ناس عمتي فاطمه ديل حا يرحلو عندنا هنا وبيتهم وح نأجرو لخالي فضو ليهم واحدة من غرفكم إنتي وتمني اقعدو في واحدة وجهزو ليهم التانيه، ، قلت ليهو ليه دايرين يأجرو بيتهم؟ قال لي عمتك وبتعرفيها ماراضيه غير تعتمد على نفسها ومهما حاولنا نشرح ليها إنو موضوع الشغل دا صعب عليها وح يتعبها مادايره تسمع مننا قلت ليهو والله عمتي فاطمه مسكينه والعملتو مريم ماهين لكن نعمل شنو ربنا يهديها خلاص بشوف تمني ونتفاهم في موضوع الغرفه راحلين متين هم؟ قال والله ما عارف يمكن يوم الجمعه.
بعد يومين :
عمتي فاطمه ومريم جو داخلين ومعاهم معتز وود خالي شايلين ليهم الشنط امي قالت ليهم نورتو بيتكم عمتي فاطمه قالت ليها والله خجلانين منكم عديل ماصاح نضايقكم... امي قالت ليها ضيق شنو يا بت بالعكس والله تونسونا وتتقلونا زاتو مريم قالت ليها تسلمي يا عمتي، ، بعد رتبنا ليهم ملابسهم وحاجاتهم في الغرفه طلعنا برا اتغدينا وقعدنا نتونس ونضحك وامي وعمتي فاطمه بقن يحكن لينا حكاوي زمان ونوادر كانت مبسوطه شديد وكل كلمه يقولوها ما تعرف معناها تسأل منها ضحكنا فيها قلت ليها انتي شكلك قبل كدا مافي زول ونسك بحكايات زمان قالت ااي والله يونسني منو يابت نحن هناك في السعودية نادر من تلقانا مجتمعين في البيت كلنا كدا زي قعدتكم دي... ابوي وقتو كلو في الشغل واخواني الأولاد ديل ماعندهم زمن لينا اصلاً عرسي دا ابوي جابهم غصب عنهم واختي نسيم زمنها كلو مع صاحباتها وامي مع شغل المستشفى بتجي تعبانه وبتنوم طوالي وانا ياهو مع الجامعه لكن بعدا انا اكتر زول بتواجد في البيت... قلت ليها ياحليلك ياخ طيب احسن ليكي هنا او هناك؟ قالت هنا اكيد والله جوكم حلو وعاجبني شديد وعندي نيه اقول لمعتز ما نسافر تاني امي قالت ليها والله تكوني عملتي فايده يابتي انا زاتي ولدي دا مادايراه يمشي مني تاني.
في نص الونسه جاتني مكالمه من ياسمين عاينت ليها وصمت التلفون.
الصباح طلعت مشيت الصيدليه اول ما فتحت الباب وقعدت حبه الباب فتح سمعت صوت زول قال السلام عليكم، ، قلت وعليكم السلام رفعت راسي عاينت ليهو اتفاجأ إنو دا ياسين للحظه قلبي بقى يدق بسرعه صرفت نظر عنو وبقيت مركزة في التلفون او عامله نفسي مركزة قلت ليهو اتفضل... دخل وجاء وقف قدامي وقال لي "السبب شنو؟ " عملت نفسي ما فاهمه قلت ليهو سبب شنو؟ قال انتي عارفه انا قصدي شنو ، امبارح اخوكي رد لي الجواب وقال لي مافي نصيب هو ليه قال كدا؟ قلت ليهو بكل برود دم "لو معتز قال مافي نصيب معناها مافي " بقى يعاين لي بإستغراب شديد قال لي كيف يعني هو ليه يقول كدا شاف مني شنو عشان يرفضني؟ هو لو شاكي او كدا خليه يسأل ويستفسر عني في كل المنطقه وغير كدا نحن جيرانكم لينا اكتر من خمسه سنه وبتعرفو اهلي واختي صاحبتك وابوي كل الناس بعرفوهو يعني انا ما قادر افهمكم انتي بتقولي لي انتظر اخوي يجي من السعودية واخوكي لمن جاء وجيتو بأهلي رحب بينا احلى ترحيب وكان مبسوط طيب هسي الإختلف شنو؟ رفعت راسي عاينت ليهو وقلت ليهو لأنو انا ما كنت بعرفك كويس ابتسم إبتسامة جانبيه باردة وقال وهسي عرفتيني يعني؟ عرفتي عني شنو عشان تقولي كدا؟ قلت ليهو شوف ما ضروري عرفت او ماعرفت لكن دا آخر كلامي.
وقف عاين لي مسافه وقام ماشي على الباب تاني اتلفت عاين لي وقال لكن انا مابستسلم ياتوريني شفتي مني شنو يا ح ارجع اتقدم ليكي إن شاء الله عشرة مرات لمن ترضي بي ... وفتح الباب داير يطلع كلامو استفزاني من غير ما احس قلت ليهو وانت بت اهلك دي وقت عاجباك كدا ما تعرسها هي ليه جايني؟ اتلفت وبقى يعاين لي بإستغراب شديد قال لي بت اهلي منو؟ ماتكوني قصدك ناديه!! قبل اجاوبو قال لي انتي مجنونه؟ ناديه دي زي اختي الصغيره والله لو فكرتي فيني كدا بتكوني ظالماني شديد الله يسامحك وبعدين انتي شفتي مننا شنو زاتو ؟اترددت في الكلام وقلت ليهو انسى كلامو خلاني احس نفسي غبيه دنقرت منو ومانضمت بحرف بقى يضحك قال لي ما مشكلة نعتبرها دي غيره منك ودا تصرف حلو وعاجبني وطلع مشى.
بقت بكره الصباح معتز جاء قال لأمي وعمتي بكره الناس ديل قالوا جايين جايبين الشيله يلا بعدا احبسو بتكم عاين لي وبقى يضحك وانا مت من الخجل.... نوادر بقت تعاين لي قالت ياحليلك ح نفقدك والله تمني قالت ليها تفقديها شنو يابت انتي قايلاها ماشه وين بيتهم هدا خامس بيت قالت عليك الله!! بقينا نضحك فيها قلت ليها والله انتي ظريفه خلاص.
المساء قاعده في عرفتي وبتزكر في الموقف جات تمني قالت لي امي قالت ليكي تعالي امشي مع مريم المستشفى عاينت ليها بإستغراب وقلت ليها مريم مالها قبيل مش كانت كويسه؟ قالت لي ماعرفه مالها قاعده في غرفتهم وبتستفرق كل شويه وعمتي نادت لأمي كلمتها وامي قالت يودوها المستشفى بتكون جاها تسمم او كدا قلت ليها طيب بجي هسي.
لبست عبايتي ومشيت لقيت امي وعمتي ونوادر وتمني كلهم متلمين في الغرفه على مريم وهي راقدة في السرير مهبطه مره واحده... قلت ليها اجي مالك يابت الحاصل شنو؟ قالت لي ماعارفه والله لكن من بعد الغداء بطني طامه وحيلي مهدود، ، جاء معتز بقى ينادي لي قال لي اطلعوا سندتها طلعنا في الحوش نوادر قالت لي امشي معاكم قلت ليها ورح ركبنا في العربية في المقاعد الوراء ونومت مريم في رجليني ونوادر ركبت قدام أمي قالت لينا اضربو لينا بعدين قلت ليها سمح.
وصلنا المستشفى دخلناها على الدكتور انا خشيت معاها ومعتز ونوادر قعدتو برا في الإستقبال... الدكتور سألها كم سؤال كدا وبعدين كتب ليها فحوصات طلعنا مشينا المعمل