رواية ماوراء النصيب الفصل الثالث والعشرون23بقلم دانيا
صلوا على النبي......
اخدوا العينات ورجعنا قعدنا منتظرين النتيجه معتز سألها قال ليها بقيتي كيف حاسه نفسك احسن؟ هزت راسها بمعنى نعم ورجعت ختت راسها في كتفي شويه والنتيجه طلعت استلمتها نوادر وانا سندت مريم وخشينا للدكتور قال لينا اقعدوا قعدنا وشال الفحوصات شافها عاين ليها كدا ورجع عاين لمريم وإبتسم وقال ليها الف مبروك انتي حامل في الشهر التاني.
كلنا صابتنا حالة زهول تقول كبو فينا مويه باردة عاينت لنوادر الكانت بتعاين لمريم في حالة صدمه ومريم بتعاين للدكتور بعدم تصديق وإندهاش...ساد الصمت بينا الدكتور زاتو احتار فينا بقى يوزع نظراتو علينا واحدة واحدة كسر الصمت وقال "هي متزوجه؟ " قلت ليهو ايوه متزوجه كيف مامتزوجه؟ على قدر ما انا مصدومه وكلام الدكتور خلاني انفعل رغم إنو ردة فعل الدكتور طبيعيه لأنو هو شاف تعابير وشنا عشان كدا فكر إنو هي ما متزوجه او كدا.
الدكتور سكت ودنقر في الورق القدامو كتب لينا روشته استلمتها منو وقمنا طلعنا برا معتز كان قاعد في الكرسي منتظرنا من شافنا قام قال لينا اها الدكتور قال شنو؟ كل واحدة منتظره التانيه تكلمو بقينا نعاين لبعض مريم بقت تبكي... عاين ليها وقال بسم الله مالكم؟ قلت ليهو الدكتور قال مريم حامل ،، سكت مسافه وهو بعاين ليها وبعدين ابتسم وقال مبروك والله بتبكي ول بتفرحي؟ في النهايه دي قسمة من ربنا البكاء بغير شنو؟ خليكي زوله متفائله وما تفكري في الماضي كتير عايني لولدك وبس وإن شاء الله يجي بالسلامة وتربي احسن تربية وماتشيلي هم شيء نحن كلنا معاكي .
ركبنا العربيه ومعتز شال الروشته مشى الصيدليه اشترى الدواء وجاء راجع ماشين على البيت امي اتصلت... رديت عليها قلت ليها ااي ياامي جاين عليكم قراب.
اول ما وصلنا البيت لقينا ناس امي قاعدات في البرندة منتظراتننا استلمننا بالكلام اها مريم كيف قالوا عندها شنو؟ مريم كانت ماسكه يدي عاينت لي وقالت لي دايرة اخش ارتاح في الغرفه قلت ليها تمام سقتها ودخلنا الغرفه عمتي جات ورانا قالت لي تقى يابتي مريم طلع عندها شنو ؟ عاينت لمريم الكانت راقدة وخاته يدها على وشها وباين عليها زعلانه ،، رجعت عاينت لعمتي وقلت ليها مريم حامل ياعمتي من قلت ليها كدا تعابير وشها كلها اتغيرت قالت لا حول ولا قوة إلا بالله حمل شنو يابت؟ قلت ليها ياعمتي دي قسمتها قعدت في طرف السرير وبقت تعاين لمريم وقالت الحمد لله عاد يابتي والله البقولو غلبني... حكمه رضى مافي اعتراض على حكمة ربنا قعدت في الكرسي جنب عمتي ومسكت يدها وقلت ليها الأطفال نعمه ياعمتي ويعني شنو لو حامل مريم مااول مرا بطلقوها بتطلع حامل وماآخر واحدة عاينت لي بأسف وقالت لي كلامك صاح يابتي لكن الناس يقولو عنها شنو؟ قلت ليها ماتفكري في كلام الناس يتكلمو ليه اصلا؟ ماتشغلي بالك بكلام الناس.
عند نوادر :
من جينا من المستشفى والوقت كله معتز سارح في افكارو الليل كله قدر ما اصحى بلقاهو قاعد في الكرسي وشارد في افكارو قمت قعدت في نص السرير قلت ليهو انت مالك ما نمت؟ عاين لي وقال مافي حاجه كنت بتصفح في الفيس...عاينت للساعه عامله واحدة صباحا قلت ليهو تعال نوم عشان بكره جاينا ضيوف نسيت.
بكره بعد العصر الجارات جننا كم واحدة وشويه وهل ياسين جو جابو شيلة تقى وحددو موعد العرس بعد عشره ايام... تقى اتحبست وقينا مشغولين على مدار الإسبوع مع تجهيزات العرس ودق الريحه وكمان ناس خالهم رحلو في بيت ناس مريم واهلهم القراب جو والبيت اتملأ ناس والليله دق الريحه من بعد الفطور شغالين فيها طبعا دي اول مره احضر دق ريحه لأنو هناك ماعندنا حاجات زي دي...كنت في المطبخ بعمل في العصير جاتني تمني قالت لي امي بتناديكي خلي العصير انا بعملو قلت ليها طيب.
مشيت عليهم امي ليلى قالت لي تعالي يابتي اقعدي معانا عشان تتعلمي ابتسمت وقلت ليها حاضر جيت قعدت جنب مريم... في واحدة من الحريم بقت تعاين لي وعاينت لماما ليلى قالت ليها ماشاء الله مرت ولدك عسل الله يبارك وشكلها نشيطه وخدومه تقول ما عايشه برا ماشاء الله إجتماعيه وقدرت تتأقلم سريع .. امي ليلى عاينت لي وابتسمت قالت ليها ااي والله مافيها كلام قاطعت كلامها المرأ قالت ليها ومريم ماشاء الله شايفاها طولت معاكم صحي راجلها ماجاء معاها؟