رواية ماوراء النصيب الفصل الرابع والعشرون24بقلم دانيا
#مــاوراء_النصيـــب
#البارت_الرابع_والعشرون
#للكاتبة_دانيا
صلوا على النبي....
قالت ليها ومريم ماشاء الله شايفاها طولت معاكم صحي راجلها ماجاء معاها؟ سؤال المرا خلنا كلنا نتوتر خاصة مريم عاينت لمريم الكانت قاعده جنبي في السرير إلا اسمع صوت امها قالت "مريم جات مطلقه تاني م راجعه " من قالت كدا الحريم بقن يتقاطعن بيناتهن ويعاينن لمريم المرا القبيل سألت عاينت لأم مريم وقالت ليها كُر علي يافاطمه دا كلام شنو؟ لشنو يطلقوها في سنتها كر علي يابتي دي عين عديل كدا ها مره البت دي شوفي ليها شيخ عديل اتلقي طاقيها عارض ... امي ليلى قالت ليها انقع نصيبها معاهو يا ام هاني دي قسمتها كدا وإن شاء الله بجيها الأحسن منو، ، المرا عاينت ليها وقالت لكن حتى لو نصيب ماقدر اجي معقوله يطلقوها في سنتها ؟ ام مريم عاينت ليها وقالت ليها هيييي ياام هاني ولدك معاويه معرسهن اربعه وعشان يعرس الخامسة طلق واحدة واجاب بدالها واحدة اخير كلنا نسكت ونخلي النضم في موضوع القسمه دا نحن ما لمينا للقطيعه لمينا لدق الريحه .. الحريم قالن لأم هاني صح كلام فطومه انتي مالك بتريدي تتدخلي في حياة غيرك طوالي سكتت .
مريم قامت قالت ماشه اشوف تقى لو دايرة حاجه وطوالي طلعت مشت.
يوم العرس:
عند تقى من اصبحت الناس مشغولين مع تجهيزات الفطور والعقد وانا قاعده في بيت خالي معاي تمني ومريم ونوادر بتمش وبتجي.. للساعه عشرة كدا قاعده اسمع صوت الضرب على والزغاريد والكواريك مريم عاينت لي وبقت تزغرد قالت لي مبروك ياعروس عقدو وجات حضنتي وانا مشاعري متضاربه بين الفرحه والتوتر ملخبطه، ، جات تمني حضنتي وبقت تبكي قالت لي الف مبروك ح اشتاق ليكي بكتني معاها جن بنات خالي بقن يضحكن قالن لي تمني زحي كدا يابت خلينا نبارك ليها البشوفك بتبكي بقول هي مسافره منك ماياهو بيتها كم خطوه.
شويه وجات نوادر خاشه باركت لي وقالت لباقي البنات عقبالكن كلكن إن شاء الله نحضر عرسكن مريم قامت طلعت برا.... عاينت ليها بإستغراب لكن ما اهتميت نوادر قالت لي يلا نمشي نجيب ليكي الفطور عشان بعد شويه ح تطلعي الكوفير .
نوادر:
مشيت محل الطباخ قلت ليهو عاوزة فطور العروس لقيت مريم واقفه قدامي عاينت لي وقالت لي انا جيت اشيلو.. ابتسمت وقلت ليها اها كويس وفي كلامي معاها دا الطباخ جهز الصينيه وادانا ليها قلت ليها خلاص نشيلها سوى إبتسمت وشلنا الصينيه ومشينا قلت ليها مريم بالنسبه لكلامي القبيل ماتكوني زعلتي مني او كدا!! اها قصدك موضوع العرس؟مافيهو حاجه مالو لو مطلقه مابعرس تاني ولشنو؟ قلت ليها لا ما كدا بالعكس والله من حقك تعرسي احسن راجل وإن شاء الله نفرح بيكي عاينت لي وابتسمت إبتسامة باردة وقالت انتي متأكده ح تحضري؟ عاينت ليها بإستغراب وقبل اسألها قصدها شنو ؟ قالت لي وصلنا ادخلي انتي اول.
المساء مع زحمة العرس امشي وتعال وودي وجيب معتز ساقني من يدي وقال لي تعالي هنا يازوله بتعملي في شنو من قبيل؟ خشي اجهزي وإلا بنمشي نخليك قاعده قلت ليهو دقيقه اودي البندول دا للحبوبه منتظراني عاين ليهو وشالو مني قال لي جيبي انا بوديهو انتي يلا ادخلي سريع ماارجع القاكي ماجهزتي.
العربيه الكبيرة جات وقفت معتز طلع كل الضيوف الفي البيت قال ليهم امشوا اركبو في العربية عشان الزمن... وجاء داخل لقاني جهزت بس فضل اللمسات الأخيرة بقى يعاين لي بنظرات كلها حُب شفتو في المرايا واقف جنب الباب وبعاين فيني لمن خجلت اتلفت عليهو وقلت ليها جاهزة، ، بقى يتبسم ويعاين لي من فوق لتحت قال لي طالعه حلوه شديد التوب اخلو ليكي ،، ضحكت بخجل وقلت ليهو جد؟ مش كنت بتقول لي ما بتعرفي تشيلي التوب وبتتعولقي؟ ضحك وقال لي لكن ما اتعلمتي وعارفك زكيه وشاطرة بتتعلمي سريع مد لي يدو وقال لي مشينا ؟ مسكت يدو وقلت ليهو مشينا طلعنا برا لقينا البيت فاضي فيهو بس ماما ليلى وعمتي فاطمه ومريم وتمني مشن مع العروس وباقي الناس ركبو في الباص امي ليلى من شافتنا قالت ماشاء الله تبارك الله ربنا يحفظكم لي ياعيالي.
عند مريم:
وصلنا الصالة مع العروس والعريس وبين الناس الكتار ديل كلهم معتز وامو وامي ومرتو ما ظاهرين سألت عنهم قالوا جايين براهم بعربية معتز... الناس بقت تمشي تبارك للعرسان وانا قاعده مواجه الباب بتسائل مالهم اتأخرو كدا؟جات وقفت جنبي ناديه قالت لي غريبه ام العروس تتأخر على عرس بتها كدي على كلامها شفتهم جوا داخلين وعيني ما وقعت غير على معتز ونوادر وهم ماشين جنب بعض بدون ما احس قلت كان المفروض الدخله دي ادخلها انا ،، ناديه عاينت لي وقالت وهسي المانع شنو مش ود عمك؟ عاينت ليها بتوتر وانا ما مستوعبه قلت شنو قلت ليها ماكدا يابت انتي ما فاهمه شيء انا قصدي زمان قبل اعرس كنت مخطوبه ليهو... قالت لي عارفه قصتك الفاتت لكن انا قصدي ليكي في الوقت الحالي الفات دا ما خلاص فات وانتهى لكن الجاي مامعروف، ، عاينت ليها بإستغراب وبقيت بحلل كلماتها في راسي ضحكت وضربتني في كتفي قالت لي بهظر معاكي دي وجهة نظري انا بس "اولاد اعمامنا ليه نخليهم للغريبات " قلت ليها اولاد اعمامنا؟ إبتسمت وفاتت مني على العرسان اتلفت عاينت ليها وعاينت لياسين