رواية ماوراء النصيب الفصل السابع والعشرون27بقلم دانيا
صلوا على النبي......
مشيت عليهم قلت ليهم مالكم في شنو؟ امي ليلى قالت لي يابتي مريم لهسي ماجات البت حيرتنا مشت وين وفطومه مشت ليها المركز قالوا ليها الليله ما جات.. قلت ليها هيي ياامي قبيل الظهر انا لمن سألتكن منها قلتن لي بتكون لقت المركز زحمه عاد بالغت طيب اتصلتو لمعتز كلمتو؟ امي ليلى قالت لي هسي كنت بقول لفطومه اضربي ليه قلت ليها تمام انا ابتصل عليهو اكلمو استر يارب طيب سألتو ياسمين احتمال تكون معاها عمتي فاطمه قالت لي بري ما خليت زولا ماسألتو.
ضربت لمعتز خشى جرس طوالي رد سلمت عليهو وطوالي قلت ليهو يامعتز ضربت ليك عشان اكلمك مريم من الصباح مشت ببتها المركز عشان تديها الجرعه حقت التطعيم مشت بعد الفطور لحد هسي ما جات وعمتي فاطمه مشت ليها في المركز ناس المركز قالوا الليله ما جاتهم... قال لي كيف الكلام دا ؟ بتكون مشت وين يعني اتصلوا عليها عمتي قالت لي قولي ليهو تلفونها خلتو في البيت، ، كلمتو قال والله دي عوجه دي مشت مع منو هي؟ قلت ليهو براها قال لا حول ولا قوه إلا بالله انتوا ياناس حاصلة حاجه زي دي وياداب بتكلموني ؟ من الظهر ما جات المفروض تتصلوا خلاص اقفلي ولو جات اتصلي لي وانا بمشي افتشها قلت ليهو سمح.
قعدنا لقريب المغرب على اعصابنا ومريم مارجعت وعمتي فاطمه دي خلاص الضغط قام عليها ونعتز يشيل ويتصل وانا من شدة التوتر لمن حسيت بإنقباضات في بطني ... ماخلينا زول بنعرفو عايش في الحِله دي ما ضربنا ليهو جونا ناس خال معتز ومرتو وبناتو واولادو يسألو خالهم قال لينا خلاص انا والأولاد نطلع نفتش برضو ولو لقيناها نديكم خبر.
المغرب اذن وينك انتي يامريم؟ وبي بتك الصغيره دي تمشي وين؟ بقيت اتصل لمعتز في الدقيقة تلاته مرات احيانا يرد واحيانا لا ... آخر مره قال لي طالعين مع شرطة المباحث نفتشها تاني م رد علي البكاء كملناه البت قطعت قلوبنا عليها من الخوف قعدت اتزكر موقف الشجار الحصل بينها وبين معتز قبل شهرين وحاجه بسبب موضوع العرس ماالعرس ورفضت ود خال معتز الإتقدم ليها وقالت ما عاوزة راجل عاوزة تربي بتها وبس قلت معقولة طلعت من البيت زعلانه؟ لكن لو زعلانه من الموضوع دا كان طلعت في وقتها داك ليه تستنى شهرين؟ مخي جاط بالأفكار بقيت ما قادره استوعب حاجه.
عند معتز :
راكبين في عربية الشرطه دي من العصر ماخلينا مكان في المنطقة دي ما حمناهو البت اختفت عن الوجود حتى مكاتب الباصات قالوا ماشافوها.... الدنيا بقت ليل والظلام سد والساعه جات قريب عشرة زاتو ،، المباحث المعاي جاهو اتصال رد عليهو واضح من نبرة صوتو في حاجه حاصله قال يازول انت متأكد؟ جنب الضفه؟ خلاص تمام جايين.
بعد خلص المكالمه قال للسواق سريع بإتجاه الضفه قلت ليهو في شنو؟.
اول ما وصلنا كان في مجموعه من الناس متلمين ومن ضمنهم كان في عربية شرطه وكم عسكري واقفين في شكل دائري نزلنا من العربية وانا ما فاهم اي حاجه عدت السؤال للضابط ليه جينا هنا ؟ عاين لي وخت يدو في كتفي وقال لي شوف انا ما عارف دي ياها المقصودة او لا لكن الشباب هنا قالوا لقوا جثه بت وبلغوا عليها خليك قلبك واتحلى بالإيمان وكل شيء في الدنيا دي مسطر ومكتوب، ، كلام الضابط القالو لي خلى جسمي رجف للحظه حسيت بالدنيا بتلف بي هو بتكلم جنبي وانا ما قادر اسمع او استوعب هو بقول في شنو!! بدون ما احس مشيت كم خطوه حتى في المشي رجليني حاسي بيهم تقال وضربات قلبي ماشه في تزايد وقف وراء الشباب المتلمين وقلت ليهم كدي زحو واريتهم ما زحو.
