رواية ماوراء النصيب الفصل التاسع والعشرون29بقلم دانيا

           

رواية ماوراء النصيب الفصل التاسع والعشرون29بقلم دانيا


صلوا على النبي.....
وقفت متجمدة في محلي وقعدت اعاين ليهم وانا مصدومه من منظر معتز وكلام خالو ابوي زاتو قدار واقف معاهم ماشفتو إلا بعد اتحرك جاء وقف قدامي وقال لي دايرة شنو؟ وشال مني الورقة صرفت نظري عاينت ليهو تعابير وشو مابتتفسر قال لي ارجعي انا بجيبهم ليكم، ، قلت ليهو بصوت مبحوح في شنو يا ابوي ؟ عاين لي وقال لي مافي حاجه ارجعي ليهم فوق انا هسي بجي واوعك تقولي ليهم حاجه قلت ليهو لكن ياابوي... قاطع كلامي وقال امشي يابت بنهرة كدا. 

رجعت وانا بالعافيه بطلع السلم " رجليني خدرانات وقلبي مقبوض ماقادرة اتخطى منظرهم " اتزكرت كلام خالو قلت معقوله مريم؟ لالا الله يكذب الشينه الله لا يقدر إن شاء الله... اول ما وصلت خالتو ليلى كانت قاعدة في الكرسي قدام العنبر قامت على حيلها وقالت لي وين الحاجات الفُتي تجيبيها الممرضه سألت منك؟  سمعت صوت ابوي وراي قال هدي الأدويه شالتها منو وقالت ليهو عذبناك معانا يكتر خيرك مشت ودتها وهو بدون ما ينضم رجع نزل. 

قعدنا زي ربع ساعة كدا نوادر ولدت الدكاترة جو باركو لينا وقالوا لينا جابت ولد والحمد لله الأم والطفل كلهم بخير وصحة... الممرضه جات طقشتني في كتفي وبإبتسامه كدا قالت لي ماتزغردن هيي عاينت ليها وعاينت لخالتو ليلى ،، خالتو ليلى قالت ليها البركه في سلامتهم يابتي لكن الفيهو نحن خلي بالنيه الممرضه فهمت كلامها قالت ليها حمد لله على سلامتها مره تانيه ويربى في عزكم ودلالكم يارب وربنا يهون القواسي قالت ليها امين يارب. 

مسافة يطلعوها من غرفة العمليات للعنبر الصباح اصبح والشمس سطعت... بعد ودوها العنبر مشينا عليها اول ما شافتنا مسكت في خالتو ليلى وبقت تبكي وكلنا بقينا نبكي معاها قالت ليها ياامي ليلى انتي فعلا امي ماحوجتيني لأمي بأي شيء والله ربنا يحفظك ويطول لينا في عمرك لكن كنت محتاجه معتز معاي في اليوم دا معقوله ماالقاهو في اهم يوم ؟ اها رجع اتصل عليكم او كدا؟ خالتو ليلى قالت ليها مااتصل والله يابتي ولا عارفين عنهم شيء تراهم ناس واختفو وبقوا مابردو حتى على تلفوناتهم ... انا غلبني السكات قلت ليها ياخالتو ليلى لكن هم قاعدين هنا تحت ،، كلهن رفعن روسيهن بقن بعاينن فيني خالتو ليلى قالت لي قاعدين وين يابت؟ قلت ليها هنا في المستشفى ظهرت عليها ملامح الخوف والتوتر قالت لا حول ولا قوه إلا بالله العلي العظيم الجابهم المستشفى شنو جو يحضرو ولادة نوادر؟ كدي خليك هنا ياتمني مع اختك دي انمش نشوفهم ربنا يحفظنا ويسترنا ... قالت لي ورح عليهم يابتي قلت ليها لا ياخالتو مانمش ليهم كدي انتظر شويه يمكن يتصلوا، ، اتزكرت كلام ابوي ياداب حسيت بالخوف. 

قالت لي يابتي يتصلو شنو كدي ورح وطلعت قدامي ماقدرت اقول شيء نوادر قالت لي ااي عليك الله امشي معاها هم هنا ومابقولو لينا ولا بطمنونا عن مريم عاد بالغوا والله... قلت ليها مريم ؟طق الكلام جاء في راسي حسيت العنبر دا بلف بي لف قلت معقوله مريم؟ مشيت نزلت وراها خالهم اول ما شافنا تعابير وشو اتغيرت بقى يعاين لينا مسافة وبعدين اتحرك كم خطوه علينا... خالتو ليلى بقت تسأل فيهم بإستغراب في شنو مالكم قاعدين هنا؟ مش مشيتو تفتشوا مريم ؟اخوها قال ليها اهدئي ياليلى بقت تعاين ليهم واحد واحد بدهشه واستغراب ركزت على معتز مشت عليهو وقالت ليهو اجي ياولدي مالك قاعد كدي وين مريم؟ اخوها جاء مسكها من يدها وقال ليها اقعدي دايرة تتكلم قال ليها اقعدي قعدت وهي بتعاين ليهو بعد إطمئنان... بدأ بمقدمه وايات من القرآن وبعدين لفظ بالعبارة المره العباره الهزت دواخلنا وضلمت الدنيا علينا "مريم بقت في رحمة الله ".

من قتل مريم🤔😥😥



تعليقات



<>