رواية ماوراء النصيب الفصل الثلاثون30بقلم دانيا
صلوا على النبي.....
شايله ايودي ولدي في يدي وواقفه قدام الدولاب بطلع لي في غيار سمعت صوت ابوه بتكلم اتلفت لقيتو لسه نايم معرق وبهضرب.. بنفس الكلمات نفس الكابوس من سنتين "مريم انا خلاص ح اتزوجك يامريم " عاينت ليهو بأسف ومشيت عليهو اصحي فيهو قام مخلوع قعد في نص السرير وبقى يعاين فيني بنظرات كأنو اول مره يشوفني ختيت يدي في كتفو وقلت ليهو معتز قول بسم الله دا حلم مجرد كابوس مافي حاجه، ، ولسه مستمر في نظراتو وبدون ما ينطق بحرف للحظه خوفني عليهو عديل ولدي بقى يبكي هو طوالي قام على حيلو وطلع برا الغرفه سمعت صوت امي ليلى بتقول ليهو صباح الخير ياولدي كيف أصبحت؟ طنش مارد ليها طلعت وراهو لقيتو بعاين فيها وبعدين طلع في الحوش .
عاينت لي وهزت راسها بأسف وقالت لا حول ولا قوه إلا بالله ربنا يشفيك ياولدي ويهدي بالك... للحظه دموعي نزلت قلت ليها نعمل شنو سنتين على نفس الحال دا ياامي والله انا بقيت خايفه عليهو ماممكن قالت لي كُر علي يابتي والله النسوي غلبنا ينفع الصبر خلينا شنو نحن ما عملناهو ليهو لا خلينا شيخ رقيه لا خلينا دكتور نفسي من وفاة عمتو مريم وبتها وهو ما قادر يتخطى الصدمه والله موتهن اثر فيهو شديد خلاص ،، قعدت جنبها وختت يدها على كتفي وبقينا نبكي .
قبل سنتين:
عند ياسمين:
خالهم قال مريم بقت في رحمة الله بقيت واقفه ورجليني ما شايلني جسمي كله هبط خالتو ليلى قالت ليهو دا كلام شنو البتقول فيهو دا يااخوي استغفر مريم طلعت مننا الصباح شديده ماواجعها شيء تقول ماتت!! قال ليها ليلى لا إله إلا الله.. الموت دا مايومو واحد كلنا بنموت انتي ما مؤمنه؟ وهي لسه مامصدقه عاينت لولدها الكان قاعد في الكرسي وبهوزز في رجلينو وسارح في عالم تاني مشت عليهو وقفت قدامو وقالت ليهو معتز مريم وينا ؟ ولا حتى رفع عينو عاين ليها، ، إلا شوية نشوف الجثمان طلعوا من المشرحه غلبني اعاين فيهو قعدت ابكي... وخالتو ليلى دي من شافتها استلمت النقاله بالبكاء والصراخ بعد تعب ابعدوها منها في محلنا داك سمعن صوت شافع ببكي جو عساكر اتنين داخلين ومعاهم مرا بتكون في الأربعين من عمرها شايله البت لمن شفتها لمن اتهجمتا كيف الأم ميته والبت حيه وماسكاها مرا المرا دي منو ؟ خالتو ليلى جرت شالتها منها وبقت تشاكل فيهو وبتقول ليها عملتي شنو لمريم ليه قتلتي مريم؟ العسكري مسكها منها وقال ليها كدي روقي يا امي اشر لخالهم نظام تعال سوقهم.
نوادر:
امي ليلى وياسمين طولن من طلعن احترت ياربي الحاصل عليهن شنو؟ جات ممرضه داخله العنبر قلت ليها لو سمحتي بتعرفي الحريم الكانوا معاي؟ قالت لي ااي بعرفهن قلت ليها بس ح اعذبك تشوفيهم لي مالهم اتأخرو تحت... قالت لي كويس التلفون خلنو لي جنبي سمعت صوتو رن شلتو لقيتها دي خالتو ندى رديت عليها حمدلت لي السلامه وقالت لي فاطمه دي اتحسنت شوية ومن الصباح بتقول إلا جاياكم اها مافي خبر عن الجماعه؟ ماقدرت اقول ليها حاجه لإني اصلا ما عارفه الحاصل شنو ياسمين قالت لقتهم تحت ومشن عليهم وتاني م جني قلت ليها لسه والله مافي ربنا يسهل بس قالت لي إن شاء الله خلاص نحن هسي طالعين من المركز جاين عليكم قلت ليها تمام.
اول ما خلصت المكالمه شفت ياسمين وامي ليلى جن واتفاجأت لمن شفت امي ليلى شايله رنو بت مريم في يدها للحظه فرحت قلت ليهن واخيراً لقوهم الحمد لله والله هسي خالتو ندى كانت بتسألني منهم، ، لاحظت لوجوهن ماياهن فجأة امي ليلى بقت تبكي قالت لي مريم يابتي مريم خلاص فاتت وخلتنا ... كلامها صدمني قلت ليها كيف يعني فاتت مننا ياامي؟ بقيت احاول اقوم ماقدرت ياسمين غطت وشها بطرحتها وقعدت تبكي وطلعت برا.. امي ليلى قالت لي مريم لقوها مضبوحة جنب الضفه يابتي قتلوها الله يعاقبهم ويحاسبهم دنيا وآخره، ، في اللحظه دي عديل بقيت مابشوف حسيت الدنيا ضلمت في وشي من الصدمه.
قعدت ابكي بحرقة عليها قلبي نجض على بتها الصغيره المسكينه على صوت بكاء الناس بقت تبكي...جات تمني داخله العنبر بصعوبة قادره تتكلم قالت عمتي فاطمه وقعت عمتي فاطمه ياامي وقعت من صدمتها على مريم، ، طلعنا من المستشفى بحال لا يعلم بيهو إلا الله " مولود جديد لسه ما شاف شيء من الحياه ، وشابه صغيرة في عمرها خسرت حياتها بسبب قاتل مجهول ، وام قادرت الحياة بسبب صدمتها ببتها الوحيدة ، تركن خلفهن طفله رضيعه تبلغ من العمر عام واحد " ، "روان ، أمانة مريم ".
بعد اسبوع من العزاء وبعد تحقيقات الشرطه في جريمة قتل مريم ،، الشرطه قدمت تقرير إنو طليقها يوسف ماليهو علاقه بالجريمه الحصلت ودا لأنو يوسف ليهو اكتر من سنتين برا السودان.
الشرطه كانت دقيقه في تحقيقها حققت مع كل مين له صلة او تواصل مع مريم، ، بس حصلت حاجه غريبه غير متوقعه قبل إقامة العزاء "اختفى تلفون مريم من البيت " ودا الشيء الخلى الجميع مصدر شك ،، حتى اهل البيت وكانو متشددين مع معتز اكتر شيء لأنو اتصدم وبسبب الصدمه الماقدر يطلع منها اختل توازنو العقلي بقى لو شايفك وسامعك مابركز معاك ولا بجاوبك كأنك ماموجود... المرا اللقو عندها البت قالت انا جيت مع زوجي عابرين طريق سمعنا صوت طفل ببكي وقت وصلنا محل الصوت شفنا الطفله قاعده جنب امها الكانت راقدة في الأرض وغرقانه في دمها وطوالي شلنا البت وبلغنا الشرطه.
العساكر من يوم تالت يوم عزاء موقفين كل من " معتز وخالو واولاد خالو الإتنين في الحراصه " بقت علينا اتنين عزاء ومساجين امي ليلى دي بقت لا بتاكل لا بتشرب ووقتها كلو في مصلايتها بتدعي .
بعد تم تلاته اسابيع جات عربية شرطه وقفت قدام الباب نزلوا منها اتنين عسكري ومعاهم معتز...
ويبقى السؤال مطروح: من قتل مريم؟....
