رواية الفستان الابيض الفصل الثالث3بقلم يارا علاء الدين


رواية الفستان الابيض الفصل الثالث3بقلم يارا علاء الدين

قعدت قدام الدكتور وأنا حاطة الشريط قدامه على المكتب، إيدي كانت بتترعش.

الدكتور بصله ثانيتين بس… وبعدين رفع عينه ليا.

وقال بهدوء:
إيه ده؟
بلعت ريقي وقولتله:

لقيت شرايط كتير كانوا في درج المطبخ وأنا طبعًا مش فاكرة حطتهم امتى؟! هو ده بتاع إيه يادكتور؟

سكت لحظة.

وبعدين مسك الشريط بإيده ..
ملامحه ما اتغيرتش …لكن عينه ضاقت وقالي:

"إنتي بتاخدي الدوا ده من امتى ؟"

هزيت راسي بسرعة:

"أنا مش فاكرة إني أخدته…  أنا مباخدش أدوية أصلًا يادكتور، أنا معرفش هو بتاع ايه عشان كده جيت لحضرتك !

الدكتور سكت ثانيتين أطول من الطبيعي.

وبعدين قالي:

احنا كده عرفنا سبب الحالة اللي إنتِ فيها!

بعد ما سمعت الجملة دي اتجمدت مكاني، بس الدكتور كمل :

"الدوا ده خطير يا مدام ندى، الدواء ده مش مجرد حاجة بتسبب نسيان بسيط… ده مع الاستخدام المستمر بيعمل تشوش في الذاكرة وإحساس بعدم الثبات، يعني اللي حصل معاكِ هو السبب فيه من غير أي شك.

محدش بيوصف الدواء ده أصلًا دلوقتي من كتر الآثار الجانبية بتاعته!

ابتسمت وأنا دموعي نازلة على وشي، مش عارفة أفرح إني مش مريضة نفسيًا زي ماكنت خايفة، ولا أزعل لإني مش عارفة ايه اللي وصلني لكده؟

الدكتور اتكلم بثبات: 
احنا لازم نعرف كنتي بتاخديه ازاي؟ والجرعة اد ايه؟ أنا محتاج أتكلم مع أ.كريم.

هزيت راسي و قولتله :
هخليه ييجي لحضرتك. 

 قومت من الكرسي وأنا مش قادرة أستوعب اللي حصل.
طول الطريق بعد ماخرجت من العيادة والأفكار بتطاردني لحد ماوصلت البيت...

دخلت البيت وأنا تايهة، الشريط لسه في شنطتي، وكلام الدكتور بيتردد في دماغي:
"الدوا ده خطير يامدام ندى!

قفلت الباب ورايا ببطء، ووقفت في نص الصالة أبص حواليّا.
كل حاجة زي ما هي.
لعب سليم مرمية على الكنبة.
المجّ على الترابيزة.
ريحة أكلة لسه خفيفة في المطبخ.
بيت عادي جدًا...
بس أنا ما بقيتش حاسة إنه بيتي.

طلعت شريط الدوا من الشنطة وحطيته قدامي على الترابيزة.
إيدي كانت بتترعش وأنا ببص عليه،مين كان بيديني الدوا ده؟
وإزاي؟
ولو أنا فعلًا باخده من فترة...إزاي مش فاكرة ولا مرة؟

أول اسم جه في دماغي كان كريم.

بس أول ما الاسم جه... قلبي رفض يصدّق.
كريم؟
كريم اللي عمره ما زعلني؟
كريم اللي كان بيبصلي كأني الدنيا كلها؟
لا...
أكيد لا.
أكيد فيه تفسير تاني.

فضلت قاعدة لحد ما سمعت صوت مفتاح الباب.
كريم دخل وهو بيقلع جزمته وبيقول بحنية:
عاملة إيه ياحبيبتي؟

رفعت عيني وبصيتله.
أول مرة في حياتي أحس إني مش عارفة الراجل اللي قدامي.

لما شاف الشريط قدامي، وقف مكانه وشه ما اتغيرش أوي...
بس عينه اتوترت..لمحة صغيرة جدًا...
بس أنا شوفتها.

قولتله بصوت هادي بشكل غريب:
"تعرف إيه عن الدوا ده يا كريم؟"

سكت.
ثانية...
اتنين...
ثلاثة.
وسكوته ده لوحده كان كفيل إنه يأكدلي حاجات كتير..

وبعدين قرب مني وقال:

"إيه ده؟  جبتيه منين؟"

ضحكت.
ضحكة قصيرة باهتة، أنا نفسي اتخضيت منها.
وقولت:
"من درج المطبخ يا كريم... من تحت المعالق."

وشه قلب ألوان ولأول مرة من سنين...كريم ما عرفش يرد بسرعة.

قومت وقفت وأنا ماسكة الشريط في إيدي وقولت:
"الدكتور قال إن ده سبب كل اللي بيحصلي، قال إني باخده باستمرار وبجرعات كبيرة
فأنا عايزة أفهم...

كريم بصلي وقت طويل أووي، وبعدين قعد على الكرسي كأن رجله مبقتش شايلاه.
حط إيده على وشه، وفضل ساكت.

صرخت فيه وقولت:
"رد علياااا!"

رفع عينه ليا...وكانت أول مرة أشوف فيها كريم بالشكل ده.
مش هادي.
مش مطمن.
مش الراجل اللي دايمًا عارف بيقول إيه.
كان مكسور...
وخايف.

قال بصوت واطي:
"أنا."

حسيت الكلمة نزلت على دماغي بقوة مقدرتش أستحملها.
بصيتله وأنا مستنية يقول بعدها:
بهزر.
معرفش حاجة.

لكنه كمل:
"أنا اللي كنت بحطهولك."

رجعت لورا خطوة، واتخبطت في طرف الكنبة.
"إنت إزاي؟

دموعي نزلت وأنا بزعق:
"إنت إزاي ياكريم؟
ليه ؟ 

أنا كنت بموت كل يوم من الخوف، فاهم يعني إيه كنت فاكرة إني بتجنن؟!"
مصعبتش عليك ولامرة؟

كريم انفجر هو كمان وقالي :
"ماكنتش عايز أأذيكي!"

ضحكت بصدمة وقولتله:
"مكنتش عايز إيه ؟ أمال ده إيه؟

قعد يبكي، لأول مرة أشوف كريم بيعيط بالشكل ده.
وقالي:
"أنا كنت خايف..."

"خايف من إيه؟"

بصلي وقال الجملة اللي كسرت آخر حتة جوايا:
"خايف تفتكري."

سكت, حتى النفس وقف جوايا.

قولتله بصوت مخنوق:
"أفتكر إيه يا كريم؟"

بص بعيد عني، وكأنه مش قادر يبص في وشي وهو بيقول:

                 الفصل الرابع من هنا
تعليقات



<>