رواية عوالم بنت الباشا الفصل الثاني2بقلم صباح عبدالله فتحي
عند مدخل القصر كانت عوالم داخلة مع حسنات خادمة القصر.. عوالم بصت بانبهار حواليها.
عوالم
اللهم بارك ما شاء الله هو ده بيت في الدنيا ولا قصر من قصور الجنة؟ ولا أكون أنا اللي لسه نايمة وبحلم؟
حسنات بضحك
بيت يا عوالم.. وإنتي صاحية وزي الفل.
حسنات سكتت شوية وبعدين قالت وهي بتحذرها
حسنات
اسمعي يا عوالم الكلمتين اللي هقولهم لكِ دول تحطيهم حلقة في ودانك إنتي فاهمة؟ أول حاجة لسانك ما يعرفش غير حاضر ونعم تخلصي شغلك وما تطلعيش من بيت الخدم غير لضرورة قصوى حد من أهل البيت قالك كلمة كده ولا كده اعملي نفسك مش سامعة حاجة. إحنا جايين ناكل عيش وعاوزين نحافظ على لقمتنا لا نلاقي نفسنا ميتين من الجوع فاهماني يا عوالم؟
عوالم ما كانتش مركزة في حاجة من اللي حسنات قالتها وكان بالها مع مراد اللي كان خارج من القصر وهو بيتكلم في الموبايل.
مراد
طيب نص ساعة كده وهكون عندك ولا تزعلي نفسك وهجيب لكِ كل اللي نفسك فيه اتفقنا.
مراد نفخ بزهق وبعدين قال.
مراد
يا بنت الناس افهمني وافهمي طبيعية شغلي مش علشان بغيب عنك ابقي خلاص مش حبك ومش عوزك بس غيبي بيبقي غصب عني طبيعية شغلي صارم شوية ولازم تفهمي النقطة دي. وبعدين ما انا في الأجزة بفسحك واعملك كل اللي نفسك فيه اي لازمة بقا اللي بتعملي ده.
مراد اتحرك في اتجاه عربيته وركبها.. حسنات بصت لعوالم باستغراب بعدين خدت بالها من مراد.. سحبتها من إيدها وهي بتقول بغيظ.
حسنات
يا ختي اتنيلي على خبتك ده خاطب وهيتجوز كمان شهرين بلا وكسة.
عوالم بغيظ
طيب وأنا مال أهلي يا ختي بتقولي ليه؟
حسنات بقلق
يا خوفي من لسانك اللي هيكون سبب خراب بيتي ده.
ـــــــــــــــــــــــــــــــــــــــــــ
جوا القصر.. حسنات دخلت لاقت منى قاعدة بتشرب قهوتها وهي سرحانة.. بصت لعوالم بتحذير وهي بتقول
حسنات
الحمد لله الست منى صاحيه تعالي أعرفها عليكي وحطي جزمة جوه حنكك وماتنطقيش غير بنعم وحاضر الست دي مناخيرها في السما وحرف واحد ما عجبهاش إحنا الاتنين هنرتمي بره البيت إنتي فاهمة؟
عوالم بصت ناحية منى باستغراب
عوالم
مش باين يعني إنها بتعض.
حسنات بغيظ
طيب تعالي يا ختي ورايا وإنتي ساكتة وهتشوفي بنفسك بتعض ولا ما بتعضش.
حسنات اتوجهت ناحية منى وهي متوترة وعوالم مشيت وراها وهي بتبص حواليها بانبهار واستغراب
عوالم
يا لهوي بقى أنا هعيش في القصر ده.. بس يا رب ما يكونش فيه ناموس يبقى الجمال ده كله ملوش ريحة لازمة.
في نفس الوقت وقفت حسنات قدام منى
حسنات
صباح الخير يا منى هانم أنا زي ما عرفت حضرتك جبت بت من البلد تساعدني شوية في الشغل يا هانم.
حسنات بصت لعوالم اللي واقفة زي التايهة سحبتها وقربتها من منى
حسنات
أهي يا هانم اسمها عوالم بت شاطرة وخفيفة وهادية ومحترمة قوي واللي هتقولي عليه أوامر.
عوالم بصت حواليها وهي بتقول باستغراب
عوالم
هي مين دي.. بتتكلمي على مين يا خالة؟
حسنات اتوترت جدًا قرصتها من دراعها
حسنات
بس اسكتي ربنا ياخدك هتخربي بيتي.
منى بصت لعوالم من فوق لتحت بغرور وبعدين قالت
منى
إنتي عندك كام سنة يا شاطرة؟
عوالم
عشرين سنة يا خالة.
منى بصت لها بغيظ وحسنات ضحكت بقلق
حسنات
معلش بقى يا هانم لسه مش فاهمة أصول الشغل.. منى هانم يا عوالم مش خالة خالة دي تقوليها لأخت أمك يا حبيبتي.
عوالم بصت لها بغيظ وفضلت ساكتة.. منى بصت لهم بقرف
منى
طيب يلا غوري من وشي إنتي وهي مش هنقعد نرغي طول النهار وإنتي يا حسنات علميها أصول وقوانين الشغل كويس علشان إنتي عارفة ممنوع أي غلط كلامي مفهوم؟
حسنات بتوتر
مفهوم مفهوم يا هانم تأمري بأي حاجة تانية؟
منى شاورت لها تمشي.. حسنات سحبت عوالم واتوجهت على بيت الخدم وعوالم مشيت معاها وهي ساكتة وبتبص للمكان وهي حاسة إنها تعرف البيت ده ومش أول مرة تشوفه بس فكرة إن إحساسها مجرد تهيؤ لا أصل لها.
عوالم بتمتم مع نفسها
هو انا ليه حاسه اني أعرف البيت ده ومش أول مره أدخلها.. يالهوي شكل جماله لحص شوية العقل اللي كانت هكمل الطريق بيهم.
ــــــــــــــــــــــــــــــــــــــــــــ
بعد ساعتين.. عوالم شغالة مسح في السلم من فوق لتحت وقفت وهي حاطة إيديها على ضهرها وبتتنفس بالعافية من كتر التعب
عوالم
الله يهد حيلك يا خالة حسنات هو ده اللي ساعتين زمن وكمل باقي اليوم نوم…
في نفس الوقت كان سليم نازل السلم وهو باله مشغول بحاجة.. وقف لما سمع صوت عوالم وبص لها باستغراب
سليم
إنتي بتقولي إيه؟ ما سمعتش كويس.
عوالم اتخضت منه وصرخت بفزع
عوالم
بسم الله الرحمن الرحيم.
بصت له بغضب
عوالم
في إيه يا جدع إنت؟ ما تحمحم اللهي يحمحم عليك قريب أنا خلفي مقطوع لوحده.
سليم بحنق
يا خربتك بلعه إذاعة أربعة وعشرين ساعة.. وبعدين إنتي اتجننتي؟ إزاي تتكلمي معايا بشكل ده؟
عوالم بغيظ
ما تتكلم بشكل اللي يعجبني.. إنت هتشركني في الكلام كمان؟
سليم بغيظ
هو أنا كنت شاركتك في حاجة قبل كده وأنا ما أعرفش؟
عوالم بصت له بغيظ وبعدين قالت وهي بترجع تمسك المساحة علشان تكمل شغلها
عوالم
روح يا خال شوف لك شوفة غيري شكلك فاضي وجاي تشغلني.
سليم اتغاظ منها جامد ورد بحنق
سليم
هو ما بقاش في غيرك علشان أقف أشغلها؟
عوالم فضلت ساكتة وما ردتش.. سليم نفخ بزهق وسبها ومشي وهو متعصب منها.
ــــــــــــــــــــــــــــــــــــــــــــــــــــــــــــــــــــــ
في كافيتريا.. مراد قاعد مع خطيبته ريم.. ريم بنت جميلة لكن واضح من ملامحها المضيقة إنها مش حابة مراد.
مراد بزهق
وبعدين بقى معاكي يا ريم هو أنا كل ما أنزل إجازة ألاقيكي قلبة بوزك بالشكل ده؟
ريم ببرود
بصراحة يا مراد أنا حاسة إني مش قادرة أتقبل طبيعة شغلك دي.. أنا مش حاسة بأي فرحة حتى مش حاسة إني مخطوبة من الأساس.
مراد باستغراب
يعني إيه الكلام ده يا ريم؟ لما إحنا لسه مخطوبين وبتقولي الكلام ده أمال لما نتجوز هتعملي إيه؟
ريم
أنا بقولك اللي أنا حاسة بيه يا مراد.. أنا مش عاوزة أظلمك ولا أظلم نفسي في العلاقة دي بس بجد أنا مش مرتاحة فيها من يوم ما اتعينت ظابط في الجيش وإنت بقى كل تركيزك في شغلك.. بقيت بحس إني ممكن أكون آخري اهتمامك مش بقيت أول القائمة زي ما كنت زمان.
مراد بحيرة
طيب وأنا أعمل إيه يا بنت الناس طبيعة شغلي كده.. أسيبه يعني وأقعد في البيت علشان ترتاحي ولا اعمل اي.
ريم بزهق
أنا مش حابة طبيعة شغلك دي.. وبعدين إنت ما شاء الله عندكم شركة خاصة وليك فيها مكان والدك الله يرحمه.. يعني لو سبت شغلك ده مش هتموت من الجوع.. أنا حابة تكون مدير أعمال في شركتكم حاسة إن ظابط في الجيش ده مش من مستواك ولا من مستوايا.. أنا...
مراد بص لها بهدوء مريب وريم اتوترت وسكتت فجأة.
مراد
إنتي إيه يا ريم؟ كملي.. سكتي ليه؟
ريم بلعت ريقها وقالت بقلق
ريم
بصراحة أنا بقيت أتكسف من شغلك ده يا مراد.. بقيت لما حد من صحابي ولا حد من أهلي يسألني عن شغلك أتكسف أقول له إنك ظابط صف تاني في الجيش.
مراد قام بهدوء وطلع محفظته وحط حساب الكافيتريا على الترابيزة.. وبص لريم قبل ما يمشي.
مراد
انتي مش هتشغلني الشغل اللي علي مزاجك والكلام بينا لحد هنا منتهي. ويا ريت تعرفي والدك إني هاجي زيارة عندكم على الساعة تسعة بالليل عن إذنكم.
ريم قامت وهي متوترة وفضلت تبص ناحيته وهو ماشي. وتمتمت بقلق
ريم
احييه انا عكيت ولا أي يالهوي عليا..
طلعت جري وراه وهي بتقول.
ريم
مراد لو سمحت استني مش قصدي والله ازعلك.
بس كان مراد خرج من الكافتريا وركب عربيته ومشي وما لتفتش حتى لصوت ريم.. ريم وقفت قدام الكافتريا وهي بتبص لعربية مراد وهي بتبعد.
ريم بخوف
يارب أسترها انا بحب مراد.. مش عارفة اي اللي خلني اقول اللي قولته ده أكيد زعل مني..