رواية حق الرفض الفصل الثاني2بقلم اية طه
بعد ما محمد وأمه مشيوا الباب اتقفل لكن محدش في البيت اتحرك.ملك فضلت واقفة مكانها وأبوها لسه واقف قدام الباب.
بصت ملك لابوها وقالت: مبسوط؟ جبتهم لحد هنا عشان تسمعني قدامهم وأنا برفض.
جمال: أنا كنت بحاول أصلح الموضوع.
ملك: لا يا بابا إنت كنت بتحاول تجبرني.
جمال: بت أنا أبوكي.يبقى احترمي كلامي.
ملك: أنا بحترمك بس مش معنى إني بحترمك إني أوافقك على كل حاجة.
سامح كان واقف بعيد قال: ملك خلاص بقى الحصل حصل واللى انتى عايزاه تم ايه لازمته كتر الكلام دلوقتي..
ملك بصت له: خلاص إيه؟ المشكلة مش فيه.المشكلة في إنكم شايفين إني لما أقول لأ يبقى لازم حد يقنعني إني غلط.
دينا قالت بهدوء: مش لازم تكوني غلط بس يمكن تكوني مستعجلة.
ملك بصت لها: مستعجلة في إيه؟ يعني شايفه أوافق الأول وأفكر بعدين؟
دينا: لا مقصدش بس ممكن تدي نفسك فرصة.
ملك: بس أنا اديت نفسي فرصة.من ساعة ما عرفت إنه متقدم لي.
سامح ضحك: وهي دي الفرصة؟ يعني إنتي شوفتيه كام مرة؟
ملك: ايوا فرصة يا سامح وانا شوفته مرتين.
سامح: وانتى فى المرتين دول حكمتي إنه مش مناسب؟
ملك: أنا ما قلتش إنه مش مناسب.قلت إني مش عايزاه.هو كويس.ومحترم.وشغله كويس.وأهله ناس كويسين.بس انا مش حاساه.
جمال ضحك بسخرية: مش حاساه؟ يعني إيه بقى مش حاساه؟
ملك: يعني مش شايفة نفسي معاه.
جمال: وهتشوفي نفسك مع مين ان شاء الله؟
ملك: مش عارفة.لسه..
جمال رفع إيده كأنه كسب النقاش: دي المشكلة. إنتي مش عارفة عايزة إيه ورافضة اللي قدامك.
ملك بصت له: ومين قال لك إني لازم أعرف دلوقتي؟
جمال: امال عايزه تعرفي امتى العمر بيجري.واللى زيك مش هقولك متجوزين لا دول عندهم عيال كمان...
سامح قال: بس يا ملك، بابا عنده حق في حاجة.إن الجواز مش لازم يبدأ بحب كبير.
ملك: بس أنا ما طلبتش حب كبير.طلبت يكون فى على الاقل قبول.
دينا قالت: والقبول ممكن ييجي بعد الجواز.والشاب فعلا مش بيعبوه حاجه بالعكس اى واحده تتمنى شاب زي دا وخصوصا اننا نعرفه بصفه شخصيه يعنى مطمنين وواثقين فيه..
ملك بصت لها: إنتي مصدقه بالكلام ده فعلا؟ القبول بيجي بعد الجواز يا دينا؟
دينا سكتت.سامح بص لمراته: مالك سكتى ليه ردي.
دينا ابتسمت ابتسامة باهتة: أيوه يا ملك بيجي بعد الجواز وبتبقى عشره فيها مودة ورحمة..
ملك لاحظت إن عينيها ماكانتش بتقول نفس الكلام.
ملك: إنتي مبسوطه فى عيشتك مع سامح؟
دينا اتفاجئت: إيه السؤال ده؟ انا متجوزك اخوكي فوق 10 السنين...
ملك: انا سألتك سؤال سعيده معاه ولا لا مش بقالك اد ايه متجوزه؟
سامح اتدخل: ملك متدخليش بيني وبين مراتي دى حياتى الشخصيه وانتى ملكيش دعوه بيها سامعه.
جمال: يا بنتي مفيش بيت سعيد طول الوقت.
ملك: أنا ما قلتش طول الوقت.
جمال: يبقى إنتي عايزة إيه؟
ملك: عايزة لما أصحى الصبح أبقى مش ندمانة.
تاني يوم ملك نزلت شغلها.كانت لسه بتقفل باب العمارة سمعت صوت أم نادية من البلكونة
ملك رفعت رأسها: صباح الخير يا طنط.
ام ناديه: رايحة الشغل؟ يا بنتى انتى مش هتتجوزي بقى؟ عايزين نفرح بيكي قريب كدا الشغل مش هينفعك...
ملك ضحكت غصب عنها: هو حضرتك لسه بتفكري في الموضوع؟
ام ناديه: يا بنتي هو انا بس اللى بفكر ده موضوع البلد كلها.بصي إنتي دمك خفيف وزي العسل بس والله أنا خايفة عليكي.البنت كل ما تكبر الاختيارات قدامها بتقل.
ملك وقفت: طب سؤال يا طنط ليه الاختيارات بتقل للبنت بس؟ يعني الراجل لما يكبر يقولوا ناضج وعاقل وعارف هو عايز إيه والبنت لما تكبر يقولوا فرصها بتقل.
ام ناديه: يا بنتى هي دي الدنيا. إنتي عايزة تغيري الناس؟ والكون يمشي على مزاجك انتي...
ملك: لا.يا طنط انا عايزة أغير حياتي أنا.
ابتسمت ومشيت.لكنها ماخدتش بالها من الست اللي كانت واقفة في مدخل العمارة وسمعت الحوار كله.بعد أقل من ساعة الخبر كان وصل لبيتهم.
ملك رجعت من الشغل لقت أبوها مستنيها.
جمال: تعالي إنتي قولتي لأم نادية إنك مش ناوية تتجوزي؟
ملك بصت له: لا انا قولت إني مش هتجوز الشخص اللي مش عايزاه.
جمال: اه يعني ناوية ترفضي كل حد؟ قوليلي بقى مين معشمك بالجواز ومخليكي قاعده مستنبه جنابه...
ملك بصدمه: لا مش هرفض كل حد... هوافق لما ألاقي الشخص المناسب. وانا معنديش حد يا بابا معشمني وكنت اتمنى ان الحوار بينا ميوصلش لهنا لاني فى الاخر بنتك وحضرتك المفروض تكون واثق فى تربيتك على الاقل لو مش واثق فيا...
جمال: وإنتي فاكرة إن الحياة هتستناكي؟إنتي مش فاهمة أنا خايف عليكي. اسمعي كلامي.
ملك: بس الخوف مش تصريح إنك تتحكم فيا.وتجبرني وتجرح فيا بالشكل دا يا بابا...بابا أنا مش ضد الجواز.أنا ضد إني أتجوز عشان أريحكم.
جمال: تريحينا؟؟ إحنا عايزين مصلحتك.
ملك: طب اسألوني أنا مصلحتي إيه. مش يمكن شايفه مصلحتي فى حاجه تانهي او مش شايفه ان مصلحتي فى الجوازه دي...
جمال بص لها : طيب.اعملي اللي إنتي عايزاه.
ملك ابتسمت: بجد؟من غير ضغط؟من غير كلام من قرايبنا؟
جمال: ايوا بجد من غير كل دا... بس خليكي فاكره انتى اخترتي ولازم تتحملي نتيجه اختيارك....
ملك قربت منه وحضنته.وبعدين دخل غرفته.ملك فضلت واقفة مكانها.
كانت فاكرة إنها كسبت أول معركة.
لكنها ماكنتش تعرف إن أصعب حاجة مش إنك تقول "لأ" للناس... أصعب حاجة إنك تفضل متمسك بـ"لأ" لما الناس تبدأ تخليك تشك في نفسك.