رواية جدو حبيبي مغلبني الفصل الثاني2بقلم حياة محمد الجدوي
اللهم صل وسلم وبارك عليك يا سيدي يا رسول الله
ساره وهى بتبكى : الندل الجبان بعت ورقة طلاقى ببحسب إنه كده قطع كل علاقته بينا طيب وأنا وأولاده هنعيش إزاى وفين بعد ما البنك ما حجز على كل حاجه دي الفلوس اللي معايا مش هتعمل حاجه لا هتكفى إيجار بيت ولا مدارس طيب هعمل ايه وهتصرف إزاى
&&&&&&&&&&&
الأستاذ صبحى: أنا آسف يا مدام
ساره : ملهاش أى لازمه المهم هيحصل ايه دلوقتي
الأستاذ صبحى: يا مدام أنا ماشي في الإجراءات القانونية وإن شاء الله اقدر ارفع الحجز عن الڤيلا وعن فلوسك
ساره: ياريت يا أستاذ ويكون في أقرب وقت لأنى بجد مش عارفه هتصرف ازاى الفتره الجايه دى
بعد ما خرجت من عند المحامى ركبت تاكسى ووصلت للشقه المفروشه إللى عايشه فيها
ساره: مساء الخير يا أولاد إيه البهدله دى كلها مش معقول كل يوم اتكلم عن تنظيم البيت وترتيبه
مازن: إحنا جعانين وإنتى بتتكلمى عن البيت
ساره: يا خبر ابيض نسيت أشترى أكل وأنا جايه
مرام : وبعدين هناكل إيه دلوقتي
ساره: أنا هتصل بالدليفرى وهو هيجيب الأكل
بس تعالوا نرتب البيت على ما يجي الأكل
قام مروان ومازن وبصوت واحد: مش فاضيين هنخش نلعب جوه
مرام: أنا كمان هدخل ألعب معاكوا
بعد شويه كانوا على السفره بياكلوا
ساره : مالكم قاعدين ساكتين كده
نفخ مازن بضيق: زهقنا يا ماما
ساره: من إيه بس
مازن: من كل حاجه من بعد ما سيبنا الڤيلا واحنا قاعدين هنا في الشقه دى لا بنروح النادى ولا بنخرح حتى المدرسه بطلنا نروحها
ساره: يا حبايبي افهمونى إحنا ظروفنا اتغيرت ومش هقدر ادفع أقساط المدرسه الانترناشونال إللى إنتوا فيها
مروان: أف كل حاجه ظروفى ظروفى إحنا زهقنا
ساره: يا حبيبي إنتوا خلاص بقيتوا كبار ولازم تحسوا بيا وتفهمونى وتقدروا ظروفى البنك حجز على كل حاجه والفلوس إللى معايا ماتكفيش لحاجه حتى الشقه المفروشه دى مش هعرف أدفع إيجارها
مروان: كمان وهنعيش فين
إتنهدت ساره وقالت : مفيش عندى حل غير ده
مرام: هنروح فين ؟
فى بيت قديم فى منطقة ريفيه كان الحاج إمام قاعد على الأنتريه القديم وبيشرب فنجان قهوه وهو راجل كبير عنده حوالى ٧٠ سنه وفجأة سمع خبط على الباب
إمام : أيوه ياللى بتخبط استنى أنا جاى أهو
فتح إمام الباب
إمام: إنتى عايزاه إيه
ساره: إزيك يا عمو
إمام: عمو؟! ... إنتى مين !؟ وبتسألى عن مين بالظبط ؟
ساره: مش حضرتك إمام أحمد إمام أنا ساره يا عمو بنت أخوك محمد الله يرحمه
إمام : أه افتكرت يااااه ياساره بقالى كتير أوى ماشفتكيش
ساره: معلش يا عمو الدنيا مشاغل مش هقول أنا ندخل
إمام: اتفضلوا
دخلت ساره ومعاها أولادها
ساره: بصراحه يا عمو أنا جايه لحضرتك عشان يعنى ..بصراحه....يعنى
إمام : مالك بتتلجلجى كده ليه جايه ليه
ساره: بصراحه يا عمو أنا جايه هنا عشان مفيش عندى أى مكان اعيش فيه أنا وأولادى
ضحك إمام وقال: يعنى جايه من بعد ١٥ سنه تقولى أنا عايزة اعيش عندك كنتى فين من زمان ولا ما افتكرتيش إن ليكى عم إلا لما اتزنقتى
ساره: أنا عارفه إنى غلطانه وإنى قصرت في حقك بس أنا ماليش غيرك
إمام : وأنا مش موافق يالا إرجعى مطرح ما جيتى
ساره: يا عمو ماينفعش اروح فين يعنى
إمام: مش مشكلتى أنا مش عايزك في بيتى
ساره : كده يا عمو ماشى بس أنا مش جايه اقعد في بيتك أنا جايه اقعد في حقى
إمام: حقك منين
ساره: أنا عارفه إن البيت ده يبقى بيت العائلة وعارفه كمان إن بابا الله يرحمه مارضيش ياخد حقه في البيت وسابه لك من زمان فأنا هنا عشان اقعد في نصيب بابا
إمام: بقى جايه بعد السنين دى كلها تقاسمينى في بيتى يا بنت محمد
ساره: حاشا لله يا عمو أنا جايه اعيش معاك وأنا لو كان عندى أى خيار تانى كنت سئلت البيت ده لك وعمرى ماكنت هقاسمك فيه بس بجد أنا ظروفى وحشه اوي
فكر إمام شويه وبعدها قال
إمام: شوفى يابنت محمد أنا هسيبك تعيشى هنا في البيت ده بس بشروطى
ساره : تقصد إيه
إمام : أقصد هتعيشى هنا بس أنا اللى بحط القواعد والقوانين وإنتى وأولادك هتمشوا على النظام بتاعى قلتى إيه
ساره: هقول ايه ماشي يا عمو