رواية النصيب غلاب الفصل الثالث3بقلم عهد عامر

_أ.. أميره..!؟ 

قالها وهوا واقف مكانه وعينيه بتفتش فـ ملامحي كإنه عايز يتأكد انه انا مش مجرد وهم.. 

اتجمدت مكاني مش قادره اتحرك ولا حتى أهرب بنظري بعيد عنه.. 

كنت مفكره الموضوع هيعدي عادي بس طلعت انا اللي مبفكرش..! 

بصيت على خالد بسرعه و اللي كان بـ يضغط على إيده بمنتهى العصبيه وعروق إيده بارزه بـ طريقه تخوف..! 

زهراء مراته اللي واقفه وبتبص على أحمد بحزن وبتغمض عينيها بـ قهر..! 

وسند..

 اللي عينيه كانت بتتنقل مابيني ومابين أحمد وعلامات الحيره كلها على وشه..! 

وأنا واقفه مكاني عاجزه وهوا لسه باصصلي والدموع بدأت تظهر فـ عينيه..! 

قطع الصمت صوته بس المرّه دي كان أهدى.. و أوطى بس لسه الصدمه على وشه 

-أميره..! ط.. طب ازاي..! 

بلعت ريقي بصعوبه.. وحاولت اتماسك.. 

وبصيت لـ خالد اللي نظره واحده منه كانت كفيله اني أفوق.. 

ورديت عليه بـ هدوء عكس الإعصار اللي فـ قلبي

_احنا جايين نتكلم عشان الولاد مش عشان حاجه تانيه

ضم حواجبه بـ استغراب وهوا بيقولي

-ولاد..! 

خالد المرّه دي اللي قرر يتكلم بـ ثبات

= سند ابني.. وبنتك أميره

لقيت عينيه برّقت من الصدمه وهوا لسه بيستوعب جملة ابني اللي اتقالت دلوقتي.. 

وبعدين بصلي وهوا بيتكلم ونفسه حسيته تقيل.. 

-هوا سند ابنك..! هوا انتي مرات خالد..! 

رديت عليه بـ ابتسامه خفيفه

_بالظبط

حسيت ان ملامح وشه بهتت وهوا بيبصلي بـ نظرة حزن و عتاب..! 

بيعاتبني انا..! 

مين لينا ليه الحق عند التاني..! 

هوا انا اللي سبته ولا هوا..! 

انا اللي اتجوزت وسبته ولا هوا..! 

وبعد دا كله يبصلي بـ نظره زي دي..! 

اتكلمت زهراء بسرعه عشان ميحصلش حاجه

-ا.. ايه يا أحمد انت عارف ان سند وأهله جايين انهارده ومدام أميره تبقى مامته وأستاذ خالد باباه.. احمم اتفضلو يا جماعه اقعدوا وانا هروح أشوف العروسه.. 

قعدنا وهوا كان لسه واقف وباصص قدامه بـ شرود وزهراء مسكت إيده وبصتله عشان ميفتحش الموضوع.. وهوا فـ المقابل ابتسملها ابتسامه خفيفه وقعد قدامنا.. 

قطع الصمت صوت كعب خفيف واللي مكنتش غير أميره بنته.. 

قولتلكو اني شبهت عليها قبل كده بس مكنتش أعرف انها تبقى شبهه هوا..! 

حطت الصينيه قدامنا وجت قعدت جنبي وانا بصالها ومبتسمه على خجلها.. 

اتكلم خالد من غير عصبيه بالعافيه عشان الولاد

=احم.. احنا جايين انهارده عشان نطلب إيد أميره بنتك لـ ابننا سند زي ما الأولاد عايزين

رد عليه وهو بيحاول يتعامل طبيعي

-احنا نتشرف طبعا يا أستاذ خالد.. سند ونعم الأخلاق والتربيه وانا سألت عليه بنفسي

اتكلمت ساعتها وانا ببص لـ أميره بإبتسامه

_طب الحمدلله.. ايه رأيك ياعروسه

ردت وهيا بتفكر إيديها بخجل 

-اللي حضرتك تشوفه يابابا

-يبقى على بركة الله نقرأ الفاتحه

قرأنا الفاتحه وانا بصيت لـ سند ابني الي باصص لـ أميره وكإنه مش مصدق انها هتبقى خطيبته

ساعتها طلّع علبه من جيبه وفتحها وكان فيها خاتم رقيق وجميل أوي وقدمه ليها وهوا بيقولها

-حاجه بسيطه لـ غاية ميعاد الخطوبه

ولبسهالها وانا وزهراء زغرطنا بـ سعاده وفرحه وانا بصالهم بـ حب وبدعي ربنا يتمملهم على خير ومايوريهم اللي انا شوفته فـ الفتره دي.. 

قامو دخلو البكلونه عشان يكونوا مع بعض شويه واحنا فضلنا قاعدين وكإن على روسنا طير ومستنيين حاجه تحصل.. 

خمس دقايق بالظبط عدت قبل ما تدخل البني آدمه اللي دمرت حياتي  وكسرت قلبنا احنا الاتنين.. 

واللي لما شافتني بصتلي وكإنها بتحاول تفتكر أنا مين.. 

قومت ساعتها وسلمت عليها وقربت منها وانا بهمس

_ازيك ياطنط.. أنا ابقى أميره أكيد فاكراني

شهقت بـ صدمه وفضلت عينيها تدور فـ كل مكان اللي عيني وبتحاول تبلع ريقها بـ صعوبه.. قدرت موقفها واخدتها قعدتها وناولتها مايه وشربتها وبعدين هديت وبصت لـ أحمد وبصتلي وقالتلي

-هوا انتي مامت سند

رديت عليها بـ ابتسامه

_أيوه 

ومسكت ايد خالد وبقربها مني وانا بكمل كلامي

_ودا خالد جوزي

بصتلي وهيا بتحاول تبتسم

-ربنا يخليكو لـ بعض يابنتي

_يارب

قعدنا شويه وزهراء مراته استأذنت عشان تتكلم فـ الفون وبعدين سمعنا صوت حاجه خبطت برا وسند جه وقالنا ان فيه عربيه خبطت العربيه بتاعتنا طلع هوا وخالد يشوفو فـ ايه ومامته وأميره واقفين يشوفو مين فـ البكلونه

وفضلنا انا وهوا واقفين مكانا وكل واحد باصص قدامه

 قطع الصمت وهوا بيقولي بـ نبرة حزن واستفسار

-مبسوطه معاه..؟ 

تجاهلت سؤاله وسألته وانا ببص للبنت واتكلمت بهدوء

_ليه أميره..؟ 

ابتسملي ابتسامة خفيفة وهوا بيرد على سؤال

-كان اسم غالي عليا

سكت لحظه بعدين كمّل بنبرة حاول يداري فيها الحزن ومسح دمعه نزلت من عينيه وهوا بيقول

-يمكن مقدرتش أحافظ عليكي بس اسمك فضل معايا

مقدرتش أرد بـ حاجه غير 

_ربنا يخليهالك.

وهوا فـ المقابل رد وقالي

-ويخليلك سند.

سكت وقعدت وهوا نزل شاف فـ ايه 

وبعد شويه طلعو كلهم والموضوع عدى على خير وبعدين استأذنا وروحنا.. 

طول الطريق خالد كان ساكت بس وباصص قدامه وهوا سايق.. 

حاولت أتكلم عليه بس مكنش بيرد عليا.. 

أول ما وصلنا البيت خالد دخل أوضة المكتب من غير ولا كلمه وبعد شويه سمعنا صوت تكسير حاجات.. 

غمضت عيني ع الحال اللي وصلنا ليه.. 

سند كان لسه هيروح يشوفه بس انا منعته وبعدين راح على أوضته.. 

قربت على أوضه المكتب 

فتحت الباب بهدوء ولقيت كل اللي على المكتب مرمي على الأرض

_خالد

فـ نفس اللحظه اللي نطقت فيها اسمه لقيته بصلي وعيونه حمرا زي الدم وبيتنفس بسرعه وبصوت عالي وعروق ايده ووشه باينه أوي.. 

لدرجة اني خوفت.. 

ولأول مرّه أخاف من خالد..! 

حاولت أقرب منه.. حطيت ايدي على كتفه عشان اهدّيه

وهوا بس باصص قدامه وصدره بيطلع وينزل بغضب.. 

وقبل ما أتكلم كلمه لقيته مسك دراعي بعصبيه وغيره وبيقولي

=انتي ازاي تبصيله كده هاا..! 

هوا انا اريل واقف معاكي..! عمالين تتنيلو تبصوا لـ بعض وانا ولا ليا لازمه هاا  ما تردي

بصيتله وعيني كلها مليانه خوف وتوتر.. معرفتش أرد أقول ايه فـ كمل بـ عصبيه أكتر وهوا بيشدد على دراعي جامد

=لو لسه بتفكري فيه وافقتي بيا ليه..رضيتي تتجوزي وانتي لسه عايزاه ليييه.. عماله تطمني فيا وانا مش عايزه غيرك ياخالد وانا وانا وانا.. وانتي أول ما شوفتيه منزلتيش عينيكي من عليه.. انتي ازاي كده..! 

وقال عايزانا نكمل فـ الخطوبه ويتجوزوا وكل يوم تشوفيه وقلبك يحنله أكتر 

شديت دراعي منه وانا برد عليه بعصبيه من كلامه

_اخرسسس.. انت ازاي تقولي كده انت اتجننت 

-انا برضو اللي اتجننت ياهانم..! ولا انتي اللي مش محترماني ولا محترمه ابنك اللي خلاص هيتجوز وجايه تحنيلي للماضي من تاني ومش بعيد تخونيني معاه.. 

كل حاجة سكتت بعد ما ضربته بـ الكف على وشه..!

مستحملتش انه يقولي كلام زي دا..! 

رديت عليه بصراخ والدموع فـ عيني

_انت اتجننت.. انت استحاله تكون طبيعي انت ازاي تفكر فيا بالقرف دا.. انت مشوفتش اللي انا شوفته فـ حياتي وأحمد كان مجرد شخص دخل حياتي فـ فتره كنت ضعيفه فيها واستغلها وقربت مني زيه زيك بالظبط انت كمان كنت زيه استغليت اني ضعيفه وروحت اتقدمتلي واتجوزنا.. وانا عمري ما اشتكيت بل وحبيتك يا خالد وتيجي انت فـ لمح البصر تهد كل اللي بينا واللي بنيناه كل السنين اللي فاتت.. 

قربت من وشه جامد وانا بتكلم بـ قرف

_انت زيك زيه يا خالد مفيش حاجه بينكو مختلفه.. غير ان انت خلقت معايا ذكريات أكتر وعلقتني بينك أكتر لكن توصل للكلام المتخلف اللي قولته دا يبقى من هنا ورايح لا عايزاك ولا عايزاه انا اللي كنت غلطانه اني فضلتكوا على نفسي وانا دلوقتي وبـ كل ذرة عقل بقولها

"طلقني ياخالد".. 

                       الفصل الرابع من هنا