رواية لا يقدر بمال الفصل الثالث3بقلم ناهد خالد
- ايه الجنان اللي انتَ بتقوله ده؟ انتَ اصلا دخلك ايه عشان تقول نبيع ولا ما نبيعش!
قالها ماهر وهو بيواجه طه وباين عليه الغضب, فرد طه بمنتهى الهدوء:
- مش انتَ عاوز تبيع, والاء كمان عاوزه تبيع, قولي يا حضره المحامي في الوضع اللي احنا فيه دلوقتي, اتنين عاوزين يبيعوا والوريث التالت مش عاوز يبيع, ايه الحل؟
رد المحامي:
- الحل اللي احنا بنقوله نصيبهم هم يتباع وهي نصيبها يتكتب باسمها.
- وما فيش حل تاني؟
- فيه, انها تشتري نصيب اخواتها.
ابتسم طه وهو بيقول:
- بالظبط, جيهان هتشتري نصيبكم ما فيش داعي لحد غريب يدخل يشتري.
كلهم بصوا لبعضهم بصدمه بما فيهم جيهان اللي همست له من بين صدمتها:
- طه انتَ بتقول إيه؟ انا مش معايا تمن البيت!
بصلها وابتسم وقال:
- انا معايا يا حبيبتي.
زادت صدمتها من رده, لان هي عارفه كويس ان المبلغ اللي معاه ما يغطيش تمن البيت كله, ولكن قبل ما تقول حاجه كان ماهر بيقول:
- تشتريه؟ انتَ واثق من اللي انتَ بتقوله ده؟
- هو انتَ شايفني عيل صغير بيتكلم قدامك ولا ايه! ولا انا فاضي عشان اجي اهزر معاك! انتَ عاوز تبيع وانا هشتري ايه المشكله في كده!
ضغط ماهر على اسنانه بغيظ وقال:
- ايوه بس انا خلاص لقيت الشاري واتفقت معاه انتَ جيت متاخر.
ابتسم طه بتحدي وهو بيقوله:
- ما فيش حاجه اسمها كده يا ماهر, في قانون بيلزمك انك تبعلي او تبيع لاختك بمعنى الاصح بما انها الوريثة التالته وبما انها شاريه, هي لها حق انتفاع اولى من الشاري الغريب, ده لو جارك عاوز يشتري منك القانون بيلزمك تبيع له اولى من انك تبيع لحد غريب برضو, ولا ايه يا متر؟
- كلامك مظبوط لو الوريثة التالته عاوزه تشتري يبقى ده حقها, وهي أولى.
-تمام يعني انتَ فلوسك جاهزه؟
سأله ماهر بتحدي, فرد عليه:
- اسبوعين وفلوسي هتبقى جاهزه.
- وانا ما عنديش استعداد استنى, ومدام في شاري تاني جاهز هبيع له.
- بس انا مش هبيع لحد غير اختي.
خرجت الاء من سكوتها وهي بتقول جملتها اللي خلت عادل يهمس لها بغضب:
- انتِ بتقولي إيه, إيه اللي يخليكِ تستني بطلي جنان.
بصتله باستنكار وهي بتقول:
- وايه اللي يخليني استعجل اختي اولى مدام في نيتها تشتري.
- اعتقد كده موقفك اتأزم يا ماهر, وما اعتقدش ان الاستاذ عنده استعداد يشتري نص البيت بس.
قالها طه فرد الشاري:
- والله انا ما بقتش فاهم حاجه, يا ريت لما توصلوا لحل اخير ابقوا تكلموني, انا سمسار وعندي شغل كتير مش فاضي للحوارات دي كلها.
وسابهم ومشي, ووقتها قال عادل:
- خلاص يا ماهر ما فيش مشكله لو هي عايزه تشتري, نستنى اسبوعين ما حصلش حاجه يعني في النهايه برضو هي اولى.
بصتله جيهان بقرف طول الوقت كان منافق, بيمشي مع المركب اللي فيها مصلحته بس, وتحت ضغطهم اضطر ماهر يوافق وقال:
- اسبوعين بالضبط ولو ما كنتش جاهز بفلوسك والعقود انا هشوف شاري غيرك.
—-----------------
- ليه يا طه؟ ايه اللي يخليك تشتري البيت وانتَ اصلا مش معاك فلوسه؟
- ما هو انا قررت نبيع شقتنا هنا واكمل على الفلوس اللي معايا في البنك ونشتريه.
وشقتهم كانت في منطقه حيوية اكتر من بيت اهلها, فطبعا بيعها هيجيب مبلغ كويس جدا تقريبا نص مبلغ البيت.
- ايوه بس ليه؟ انتَ الشقه دي اصلا لما اشتريتها عشان نتجوز فيها كنت فرحان بيها قوي وبموقعها.
ابتسم لها وهو بيقول:
- اه بس كنت فرحان بيكي اكتر! وبعدين انا كنت فرحان بالشقه علشان انتِ هتشاركيني فيها, مش مهم الشقه ولا البيت المهم ان المكان تبقى انتِ موجوده معايا فيه, وبصراحه انا لما فكرت في الموضوع لقيت ان انا بالنسبه ليا مش فارق معايا اذا كنت اقعد في الشقه هنا او في البيت عندكم هناك, بس انتِ فارق معاكي, والموضوع مأثر على نفسيتك جامد, انا عمري ما كان ليا بيت مرتبط بذكرياتي تتمثل فيه واحس باحساسك دلوقتي, لكن مع ذلك قادر افهم قد ايه الموضوع بيكون صعب وقد ايه بيكون حلو انك تفضلي في البيت اللي عشتي فيه عمرك وبنيتي فيه ذكرياتك, يمكن انا ما اعرفش الاحساس ده علشان ابويا كان طول عمره بيحب التجديد, روحنا مية مكان ونقلنا لكذا شقه وكذا بيت وكذا منطقه, لكن والدك كان حاجه تانيه, هو اتمسك بالبيت اللي تربى فيه وسابه له والده, ودلوقتي دورك تتمسكي بنفس الحاجه, وعاوز عيالنا كمان يبقى لهم هويه, بيت يجمعهم يعيشوا فيه كل ذكرياتهم ويكونوا فيه مع بعض, والبيت عندكم اربع شقق احنا هنسكن في شقه والباقيين هيبقوا لاولادنا ان شاء الله.
-انا بحبك اوي.