رواية حكاية حياة الفصل الرابع4 بقلم اية الفرجاني

رواية حكاية حياة بقلم اية الفرجاني
رواية حكاية حياة الفصل الرابع4 بقلم اية الفرجاني


محمود رفع عينه وبص لحسن بغضب وقال:

انت السبب! انت اللي لعبت بدماغي! 

حسن قام وقف وقال بتهديد:
ما تنساش نفسك يا محمود، انت بتكلم المعلم حسن!

فلاش باك - من شهرين 

محمود كان قاعد في محل حسن، بيحسب فلوس الإيجار اللي مش قادر يدفعها 

حسن كان قاعد قدامه وبيقول بحسرة:

يا حسرة يا محمود، الواحد بقاله 42 سنة وربنا مرزقنيش بولد يشيل اسمه وبيبصله بنظرة خبيثة واكمل:

بقولك إيه يا محمود، بنتك حياة اللي بتجيلك المحل دي.. عندها كام سنة دلوقتي؟ 

محمود بتوتر:
19 يا معلم، ليه؟ 

حسن:
بسم الله ما شاء الله كبرت وبقت عروسة، بص يا محمود انت عارف اني ربنا مرزقنيش بولد، وستاتي الاتنين كبروا، وانا نفسي في حتة عيل يشيل اسمي ويورث المال ده كله، وانا شايف بنتك حياة هي اللي هتعرف تجيبلي الواد
محمود:
بس يا معلم حياة صغيرة و.. 

حسن قاطعه وطلع مفتاح شقة ومفتاح محل:
مفيش بس، صغيرة اي منا مجوز بنتى نجاح وهيا قدها وبعدين انت بقالك سنين ساكن إيجار وفلوسك ضايعة، أنا هكتبلك الشقة اللي انت ساكن فيها دي باسمك والمحل ده كمان، وفوقهم 500 ألف مهر، بس توافق تجوزهالي. 

محمود عينه لمعت،و قال:
البت مش هتوافق ي معلم، دي عنيدة وبعدين انت برضو كبير عليها 
حسن ضحك:
الراجل مش بيكبر ي حسن مدام جبه مليان وانا الحمد لله عندى خير لو فضلت اصرف منه مليون سنه مش هيخلص وافق انت بس وسيب الباقي عليا، هنكتب الكتاب عند محامي بتوكيل منك انت كأبوها، ولما نخلص نبقى نقولها، وساعتها هتوافق غصب عنها، ولو رجعت في كلامك الشيكات اللي هتمضي عليها دي هتحبسك

محمود بعد تفكير وطمع وافق، ومضى على شيكات بأكتر من تمن الشقة والمحل عشان حسن يضمن إنه ميرجعش في كلامه

#عودة الفلاش

محمود قال وهو بيعيط:

انت ضحكت عليا.. كتبتلي شقة ومحل ومضيتني على شيكات عشان تربطني! 

حسن ببرود:
انت اللي بعت بنتك يا محمود، انا مشترتش حد غصب، انت اللى وافقت وطمعت 

ريان كان واقف مصدوم من اللي بيسمعه، بص لمحمود بقرف:

هو انت بني آدم ازاى؟ بتبيع لحمك عشان شقة؟ 

محمود قعد على الأرض وحط وشه في الأرض، لأول مرة يعيط بجد:

أنا ضعت.. ضعت بنتي.. 

ريهام طول الخناقة كانت واقفة ساكتة بتبص لهم بقرف، مرة واحدة قالت بصوت عالي:

بس! كفاية! انا اتصلت بالشيخ مصطفى وهيجي دلوقتي حالاً وهو اللي هيقولنا جوازة حياة دي حلال ولا حرام. 
بعد ربع ساعة الشيخ جه

الشيخ: خير يا جماعة؟

ريان قرب منه وحكى كل حاجة من الأول:

بص يعم الشيخ، حياة عندها 19 سنة، أبوها كتب كتابها على الراجل ده من وراها بتوكيل من غير ما هي تعرف ولا توافق، ولما عرفت هربت وجت عندنا، وأنا كتبت عليها عشان أحميها، وبعدين أبوها والراجل ده جم خدوها بالعافية من بيتنا وهي بتعيط وبتقول انها مش عايزاه، وراحت معاه وهي مجبرة عشان خافت علينا منهم 

الشيخ سأل حسن:
الكلام ده حصل يا حسن؟ 

حسن سكت

الشيخ اتكلم.:
بصوا ي جماعه عشان نحكم بالعدل وبحكم الدين، في الإسلام الجواز ليه أركان وشروط، وأهم شرط هو رضا البنت
النبي صلى الله عليه وسلم قال: "لا تُنكح البكر حتى تُستأذن"، ولو البكر سكتت فسكوتها رضا، لكن لو قالت لا أو بكت ورفضت يبقى الجواز باطل

والإكراه يُبطل العقد، يعني لو الأب أجبر بنته البالغة العاقلة على الجواز غصب عنها فالجواز باطل عند جمهور العلماء، حتى لو كان فيه ولي وشهود ومهر، لأن شرط الرضا ساقط
أما حتة إنها راحت معاه بعد كده، فده مش رضا، ده اسمه إجبار، هي راحت عشان خافت على خالتها من الفضيحة والحبس، والمُكره لا إثم عليه وفعله لا يُعتد به

ريهام بصت للشيخ وقالت:
طب يا شيخ وجوازة ريان؟ 

الشيخ اتنهد وقال:
عشان أكون حقاني قدام ربنا، الجوازتين فيهم مشكلة

بص لريان:
يا ابني انت كتبت عليها من غير ولي، وأبوها موجود، وجمهور العلماء - المالكية والشافعية والحنابلة - بيقولوا "لا نكاح إلا بولي"، يعني جوازتك انت كمان ناقصة شرط

ريان اتصدم:
يعني إيه يا شيخ؟ يعني حياة مش مراتي؟ 

الشيخ:
يا ابني، جوازة حسن باطلة بسبب الإكراه وعدم رضاها، وده بإجماع، كأنها لم تكن.

وجوازتك انت باطلة بسبب عدم وجود الولي، لكن الفرق كبير
. 
حسن بفرحة:
يعني هي مراتي؟
يعني إيه يا شيخ؟ يعني حياة مش مراتي؟ 

الشيخ:
يا ابني، جوازة حسن باطلة بسبب الإكراه وعدم رضاها، وده بإجماع، كأنها لم تكن.

وجوازتك انت باطلة بسبب عدم وجود الولي، لكن الفرق كبير
. 
حسن بفرحة:
يعني هي مراتي؟

الشيخ زعق فيه:
لا انت ولا هو! هي دلوقتي لا مرات ده ولا مرات ده، هي بنت حرة، ووليها الحالي فاسق لأنه أجبرها وباعها، فالولاية بتسقط عنه وتتنقل للي بعده، لجدها أو عمها أو خالها أو للقاضي،، نفسي تفهموا انكم تبطلوا تدخلوا المحامين فى جوازتكم لان معظمها باطله لابد من تحقق شروط الجواز كاملة 

ولف لمحمود:
انت ي محمود بولايتك دي ظلمت بنتك، وربنا هيسألك، وولايتك سقطت

وبعدين بص لحياة اللي كانت طالعة من الأوضة وسامعة:
حمدلله على سلامتك يا بنتي، انتي دلوقتي حرة، مش على ذمة حد، لو عايزة تتجوزي ريان اللي برضاكي، هنحتاج ولي تاني غير أبوكي، عمك أو خالك أو القاضي هو اللي يجوزك

حياة بصت لريان بعياط، وريان قال بسرعة:
أنا موافق أتجوزها تاني دلوقتي حالاً بولي وقاضي وكل حاجة، المهم تبقى حلالي قدام ربنا

ريهام قالت:
عمها موجود، أخو محمود، راجل طيب وهيوافق

الشيخ من وقت ما قال جوازه حياة "باطلة" وحسن وشه بقى أحمر زي الدم، عروقه كلها ظاهره مسك الكرسي ورزعه في الأرض

حسن بزعيق يهز المستشفى:

باطلة؟! باطلة ازاي يا شيخ؟! ده أنا دافع دم قلبي!

بص لمحمود وشاور عليه:
اسألوه! اسألوا أبوها! ده واخد مني شقة ومحل و 500 ألف جنيه مهر، وماضيلي على شيكات 5 بمليون جني! 

طلع صور الشيكات من جيبه وحدفها في وش ريان:
انتوا فاكرين هتضحكوا عليا؟! انت وابوها متفقين عليا! بعتولي البت تعمل انها مظلومة عشان تلهفوا فلوسي وبعدين تقولوا باطلة؟! 

محمود قام مفزوع:
كداب! انت اللي طمعتني! 

حسن قرب منه ومسكه من هدومه:
اخرس! انت ماضي وباصم، ولو مرجعتش فلوسي والشقة والمحل هحبسك، وهفضحكم في البلد كلها! 
وهحبسك بالشيكات اللى معايا 

ولف لريهام وريان وحياة اللي واقفة ورا الباب وبتترعش:
وانتي يا حلوة اللي عاملة فيها بريئة، هلف البلد كلها وأقول حياة هربت مع عشيقها وسرق مهرها، واخلي سيرتك على كل لسان، محدش هيرضى يبص في وشك تاني ! 
ريان مقدرش يمسك نفسه، مسكه من زمارة رقبته وزقه في الحيطة:

اخرس يا حيوان! لو جبت سيرة حياة على لسانك هقطعهولك! 

الأمن والدكاترة اتلموا عليهم بيحجزوا بينهم. 

حسن وهو بيتسحب لبره بزعيق وجنون:

مش هسيبكم! هتشوفوا حسن الورداني هيعمل فيكم إيه، هخلي أبوها يبيع هدومه في السجن، وهخليكي انتي يا حياة تتمني الموت ومتلاقيهوش! 
وطلع بره وهو بيكسر أي حاجة قدامه، وسابهم واقفين مصدومين

ريهام قالت بقلق:
ده مجنون وهيعملها يا ريان.. 

محمود قعد على الأرض وهو بيقول:
هيحبسني.. ده معاه شيكات ادانه عليا. 

حياة انهارت ووقعت على الأرض بتعيط:
بسببي.. كل ده بسببي.. 

ريان بص لهم كلهم وقال ببرود يخوف:
سيبوه.. خليه يعمل اللي هو عايزه، حسابه معايا أنا

محمود قرب من حياة وهي قاعدة على الكرسي، نزل على ركبه ومسك إيديها، دموعه نازلة:
سامحيني يا حياة.. سامحيني ي بنتى، أنا بعتك عشان شقة ومحل، طمعت.. والشيطان لعب بدماغي، وحسن فهمني إنه هيستتك.. سامحيني يا بنتي كنت معمى 
حياة بتبصله مصدومة، عمرها ما شافت أبوها بيعيط، حضنته وهي بتعيط:

مسامحاك يا بابا.. بس مش هقدر اثق فيك زي الاول 

ريهام قطعت اللحظة وقالت:
حياة مش هترجع معاك يا محمود، هتيجي معايا لحد ما تصحصح وتقف على رجليها.

محمود هز راسه وهو موطي:
موافق.. خليها معاكي، هي أمانة عندك

بعد وقت حياة راحت مع ريهام و بالليل

حياة قاعدة في الصالة مكسوفة ومش قادرة ترفع عينها في ريان، إيديها مشبكه في بعض

حياة بهمس:
أنا.. أنا متشكرة أوي يا خالتي، انتي وريان وقفتوا جنبي وأنا.. 
ريهام قاطعتها بزعيق حنين:
بس ي هبله! مفيش بنت تعتذر من أمها، انتي بنتي يا حياة، فاهمة؟ 

حياة ابتسمت بدموع

وقتها ريان اللي كان ساكت طول الوقت ده حتى فى الطريق اتكلم، وبص لحياة بهدوء:
حياة.. عايزك تنسي كل اللي حصل، تفكري في اللي جاي بس

سكت ثانية وكمل:
وكلامي عن الجواز وكتب الكتاب اللي كتبناه قبل كده.. أنا عملته بس عشان أبعد حسن عنك وأحميكي، انتي دلوقتي حرة، حرة تختاري شريك حياتك براحتك، محدش هيجبرك على حاجة تاني أبداً

وبعدين وقف وشال مفاتيحه:
وعشان متتضايقيش من وجودي في البيت، أنا عندي شقة تانية في المعادي، هروح أقعد فيها واسيبكم براحتكم

قال كده ومشي ناحية الباب

حياة اتصدمت، قلبها وقع، كانت فاكرة نظراته ليها إعجاب، فاكرة إنه حبها زي ما هي بدأت تعجب بيه طلع كله وهم ومساعدة وشفقة

ابتسمت بحزن وقالت بصوت واطي وهي بتبص في الأرض:
شكراً يا بشمهندس.. 
ريهام اتفاجئت من كلام ريان، بصتله وهو ماشي ومردتش، بس عنيها كأنها بتقول 

"انت بتعمل إيه يا غبي؟

راحت واخدة حياة من إيدها ودخلتها الأوضة:

تعالي يا حبيبتي ارتاحي، انتي تعبتي أوي النهاردة

حياة دخلت الأوضة وقفلت الباب، أول ما بقت لوحدها دموعها نزلت، مش عارفة بتعيط على حسن ولا على أبوها ولا على ريان اللي قالها انتي حرة كأنه بيقولها انتي مش فارقة معايا

عند محمود في البيت الساعة 12 بالليل
كان قاعد لوحده في الضلمة،فجأه سمع خبط جامد على الباب....... 

فتح لقى ظابط وعساكر والناس كلها واقفه وراهم...... 

                الفصل الخامس من هنا 
لقراءة باقي الفصول اضغط هنا
تعليقات



<>