رواية نقطة عمياء الفصل السابع عشر17 بقلم منة احمد
معتز بصوت واطي ومجهد: نسمة...؟!
كان واقف مستند بإيده على الحيطة، وعينيه معلقة ناحية المكتب. حاول يثبت نفسه، وبص حواليه فلاحظ المعازيم متجمعين في الصاله، وكل واحد بيهمس للتاني باستغراب. حاول يفهم إيه اللي بيحصل، لكن تركيزه كان بيضيع منه، ونَفَسه تقيل، وجسمه مش قادر يشيله.
خطى بالعافية ناحية المكتب، وكل خطوة كانت أصعب من اللي قبلها، لحد ما وصل للباب وفتحه.
وفي اللحظة دي... اتجمد مكانه! وعينه وقعت على أمه، الست اللي خانت أبوه، واللي كانت السبب في طفولته اللي اتحولت لجحيم، واللي كان فاكر إنه مش هيشوفها تاني طول عمره. كانت واقفة تحت قبضة عزام، اللي كان محاوط رقبتها بإيده من شدة غضبه.
فضل معتز باصص للمشهد من غير استيعاب، ووشه شاحب، وعينيه بتتقفل وتفتح بالعافية، وجسمه بيترنح كأنه على وشك يقع في أي لحظة.، لكن الصدمة اللي شافها خلت كل اللي حواليه يختفي من عينه.
نسمة أول ما شافته، سابت مكانها وجريت عليه بخوف: معتز! إنت كويس؟! مالك؟ إيه اللي حصلك؟!
مسكت إيده المصابة، ولما شافت الدم شهقت، وبعدها رفعت إيديها لوشه تحاول تخليه يبصلها وقالت بقلق وانهيار: معتز، بصلي... إنت سامعني؟ إيه اللي حصلك؟!
لكن معتز ما كانش مركز معاها، عينه لسه متعلقة بالست، وكأنه رجع سنين لورا، لنفس الخوف اللي حاول يدفنه جواه وقال بصوت متقطع: هي... هي بتعمل إيه هنا؟!
نسمة بصتله بدموع، وحاولت تسنده أكتر: هفهمك كل حاجة، بس إنت لازم ترتاح الأول، حالتك مش مطمنة خالص.
معتز رفع عينه ناحيتها للحظة، وبعدين رجع بص للست، وصوته بدأ يعلى رغم تعبه وقال بغضب: أنا بسألكم سؤال! الست دي بتعمل إيه هنا؟ وإنتوا جايبينها هنا ليه؟!
عزام قرب من معتز، وأول ما شاف وشه الشاحب والدم اللي ظاهر من تحت الشاش، اتغيرت ملامحه وقال بقلق: معتز... إيه اللي إنت فيه ده؟! وشك مقلقني، وإيدك مالها؟ إنت جاي من المسشتفي تعبان بالشكل ده ليه؟!
معتز من غير ما يبصله: جاوبني يا بابا... إيه اللي بيحصل هنا؟ وليه الست دي ظهرت تاني؟ مش كفاية اللي عملته فينا زمان؟
الست كانت واقفة بتحاول تاخد نفسها، لكنها أول ما بصت لمعتز وشافت حالته، ملامحها اتغيرت. عينيها اتحركت على وشه الشاحب، وحست للحظة إنها شايفة نتيجة كل اللي عملته فيه.
معتز ثبت عينه في عينيها، وقال بصوت مليان وجع: إنتي... إنتي لسه عندك الجرأة تقفي قدامي؟ بعد كل السنين دي؟ إنتي عارفة أنا كنت عامل إزاي بسببك؟ ولا نسيتي اللي حصل؟
الست قربت منه بخطوات مترددة، وعينيها مليانة دموع: ابني... معتز، حبيبي!
معتز رجع إيده بسرعة، وبص لها بقرف وقال بصوت حاد: إياكي تقربي مني! أنا مش ابنك... سمعاني؟ أنا مش ابن واحدة زيك!
الست شهقت من كلامه، لكن معتز كمل وهو بيحاول يتحكم في نَفَسه: انتي إيه اللي جابك هنا تاني؟ مش كفاية إنك ضيعتي طفولتي؟ مش كفاية إنك خليتيني أعيش سنين وأنا خايف من كل صوت ومن كل باب بيتفتح؟ إنتي راجعة عايزة إيه؟ تكملي على اللي فاضل مني؟
الست بدموع: معتز، اسمعني بس... أنا عارفة إني غلطت، وعارفة إنك مش هتقدر تسامحني بسهولة، بس أنا...
معتز قاطعها بصريخ: بس إيه؟! هتكدبي عليا تاني؟ هتطلعيلي حكاية جديدة أصدقها؟ أنا مش عايز أسمع منك كلمة واحدة!
الست: والله أنا مش جاية أأذيك...
معتز بسخرية موجوعة: آه طبعًا! إنتي عمرك ما كنتي جاية تأذيني، صح؟! لما كنت طفل وكنت محبوس ومش عارف أخرج، كنتي فين؟ لما كنت بصرخ وبستنجد بيكي، كنتي فين؟ لما كنت بشوفه داخل عليا وقلبي بيقع من الخوف، كنتي فين؟!
الست بدموع: أنا رجعت عشان أصلح اللي عملته، وأشوفك إنت وآدم... أنا عارفة إن مفيش كلام هيقدر يمحي اللي حصل، بس أنا آسفة يا معتز. آسفة إني كنت السبب في كل الوجع اللي عشته.
معتز بص لها بنظرة قاسية، وابتسم بسخرية: آسفة؟! كلمة آسفة دي سهلة أوي على لسانك! يعني كنتي سامعاني... كنتِ عارفة كل حاجة بتحصل، ومع ذلك اخترتي تسكتي وتقوليلي اسفه! اخترتي تحافظي على نفسك وعلى الراجل اللي كنتي بتخوني أبويا معاه، وسيبتي ابنك يضيع!
الست غطت وشها بإيديها وانهارت في العياط: كنت خايفة... هو كان بيهددني، وأنا مكنتش عارفة أعمل إيه!
معتز صرخ فيها رغم إن صوته بدأ يضعف: كنتي خايفة على نفسك! إنما أنا؟! أنا ابنك اللي كان بيتعذ..ب قدامك! إنتي اخترتي تنقذي نفسك وتسيبيني أواجه كل ده لوحدي!
الست حاولت تقرب منه تاني: أنا عارفة إن مفيش كلام هيصلح اللي فات، بس أنا رجعت عشان أصلح اللي عملته... عايزة أشوفك إنت وآدم، وأحاول أعوضكم عن السنين اللي ضاعت مننا. أنا آسفة يا معتز... والله أنا آسفة إني دمرت حياتك.
معتز بص لها بسخرية، وبصعوبة رفع إيده المصابة شوية.
معتز: تعوضيني؟! فاكرة إن كلمة آسفة هتصلح اللي اتكسر جوايا؟ أنا قضيت عمري بحاول أتخطى اللي عملتيه فيا، وإنتي جاية دلوقتي بكل بساطة تقولي عايزة تعوضيني؟!
الست بصوت مكسور: أنا أمك يا معتز...
معتز صرخ فيها: متقوليش الكلمة دي! الأم مش مجرد واحدة بتولد طفل وترميه للموت! الأم أمان... الأم حضن... الأم اللي ابنها لما يخاف يجري عليها، مش يخاف منها ومن اللي سايباه يعذبه!
الست فضلت تعيط، ومعتز كمل وهو بيحاول ياخد نفسه:
معتز: أنا مش عايز أشوفك... ولا عايز أسمع صوتك تاني. إنتِ خرجتي من حياتي من سنين، وعايزك تفضلي برهها. اخرجي... اخرجي برا!
نسمة كانت واقفة جنبه، مرعوبة من حالته. حاولت تمسك دراعه عشان تهديه، لكنه كان غرقان في غضبه ووجعه.
الست بانهيار: متعملش كده يا معتز... أرجوك، أنا مش هقدر أستحمل إنك تكرهني بالشكل ده!
معتز بص لها بوجع: وإنت استحملتي إزاي وأنا بكره نفسي بسبب اللي حصل؟ استحملتي إزاي وأنا كنت محتاجك ومكنتيش موجودة؟ دلوقتي بس افتكرتي إن عندك ابن؟!
عزام اتدخل بغضب، ووقف بينه وبينها.
عزام: كفاية لحد كده! إنتي لسه عندك عين تطلبي منه يسامحك؟ اطلعي برا قبل ما أطلب البوليس. إنتي السبب في خراب ولادي، وكمان خطفتي بنت بريئة وحرمتي أمها منها سنين!
معتز عقد حاجبيه، وبص لعزام باستغراب، وكأنه سمع حاجة مش قادر يستوعبها وقال بصوت متعب: ثانيه!!!... أنا مش فاهم. إيه علاقة الست دي بنسمة؟ وإيه حكاية إنها خطفت بنت من أمها؟!
نسمة بصت في عينيه، ودموعها بتنزل: أنا البنت اللي اتخطفت يا معتز... أنا اللي الست دي خدتني من أمي وأنا صغيرة، وحرمتني منها السنين دي كلها.
معتز بص لها بصدمة، وحاول يستوعب كلامها: إنتي بتقولي إيه؟! يعني هي... هي اللي خطفتك؟!
نسمة هزت راسها وهي بتعيط: أيوه... هي اللي عملت كده. خدتني من حضن أمي وأنا طفلة، وحرمتني منها كل السنين دي، لمجرد إنها كانت عايزة توجع أبوك.
معتز لف وشه ناحية أبوه: الكلام ده صح ؟
عزام هز راسه بحزن، وخديجة كانت بتحاول تمنع دموعها.
عزام: أيوه يا معتز... نسمة بنت خديجة، والبنت اللي الست دي خطفتها من أمها وهي عندها أربع سنين تقريبًا. كانت عايزة تنتقم مني، فاختارت إنها توجع خديجة في بنتها.
معتز رجع بص للست، وعينيه مليانة غضب.
الست صرخت وهي بتعيط: أيوه! عملت كده عشان هو السبب! هو اللي خد عيالي مني! كنت عايزني أشوفه عايش حياته وفرحان وأنا محرومة من ولادي؟! كنت عايزني أعمل إيه وأنا شايفة أبوكم واخدكم مني؟!
معتز قرب منها خطوة، رغم إن رجليه كانت بتترعش بغضب: إنتي لسه بتبرري؟! لسه شايفة نفسك مظلومة؟! إنتي بتتكلمي عن عيالك وكأنك كنتي أم كويسة ليهم أصلًا! إنتِ اللي ضيعتيهم بإيدك، وإنتي اللي خليتي أبويا يضطر يبعدنا عنك عشان يحمينا!
الست: أبوك هو اللي حرمني منكم!
معتز: أبويا أنقذنا منك! كان المفروض تحمدي ربنا إنه عرف يبعدنا عن الأذى اللي كنا عايشين فيه بسببك
وبعدين أشار ناحية نسمة: والبنت دي ذنبها إيه؟! طفلة ملهاش أي علاقة بمشاكلك مع أبويا! إزاي قدرتي تاخديها من أمها؟ إزاي قدرتي تشوفي أم بتدور على بنتها سنين وإنتي عارفة إن بنتها عندك؟!
الست حاولت ترد، لكن معتز قاطعها: لأ، متتكلميش! كفاية كدب... إنتي مش أم، انتي واحدة ضيّعت ولادها وخطفت بنت بريئة عشان تنتقم، ومفيش مبرر للي عملتيه
بص لنسمة، وملامحه اتغيرت للحظة، وكأنه استوعب حجم اللي حصل لها وقال بصوت مبحوح: كل السنين دي وإنتي محرومة من أمك... بسببها هي؟
نسمة هزت راسها وهي بتعيط، ومقدرتش ترد.
معتز رجع بص للست، وفجأة مسك دراعها بعنف.
الست بخوف: معتز! إنت بتعمل إيه؟ سيب إيدي!
معتز بغضب: تعالي... الناس كلها لازم تعرف إنتي عملتي إيه.
شدها ناحية باب المكتب وخرج بيها للصالة. كانت بتحاول تفلت منه، لكنه كان مصمم، رغم إن جسمه بالكاد شايله.
معتز بصوت عالي: كلكم عايزين تعرفوا إيه اللي بيحصل؟! اتفضلوا... بصوا كويس!
رماها على الأرض قدام المعازيم، فالناس اتخضت ورجعت لورا، وبدأ الهمس ينتشر بينهم. بعضهم بص للست باستغراب، والبعض التاني بص لمعتز اللي كان واقف بالعافية، ووشه شاحب وعرقه بيزيد.
معتز أشار عليها بإيده، وقال بصوت متقطع لكنه مليان غضب: الست دي... هي أمي! أيوه، أمي اللي المفروض كانت تحميني، هي نفسها اللي سابت راجل غريب يعذ..بني وأنا طفل عشان متفضحش خيا..نتها لأبويا! واللي مش بس دمرت حياتي وحياة أخويا... دي كمان خطفت بنت بريئة من حضن أمها عشان تنتقم من أبويا!
الناس شهقت مره واحده من اللي قاله
وفي اللحظة دي، وصل آدم ومعاه ندي من مدخل الفيلا، بعد ما كانوا بيدوروا على نسمة في كل مكان آدم وقف فجأة أول ما شاف الست واقعة على الأرض، وبص لمعتز باستغراب وصدمة: أمي؟! إيه اللي جابها هنا؟! هي رجعت تاني ليه بعد كل اللي عملته فينا؟!
ندي بصت من آدم للست، وبعدها لمعتز اللي كان واقف بصعوبه وقالت بقلق: هو في إيه يا آدم؟! إيه اللي بيحصل؟! ومين الست دي؟!
آدم بص لها بضيق، وصوته خرج محمل بالغضب: دي أمي يا ندي... أمي اللي خلت طفولتنا جحيم! واللي كانت السبب في كل اللي حصل لمعتز، ولسه دلوقتي عرفت إنها كمان خطفت نسمة وحرمتها من أمها سنين!
ندي اتصدمت، وبصت للست اللي على الأرض، وبعدها لنسمة اللي كانت واقفة جنب معتز ودموعها مالية عينيها. ما قدرتش تنطق بكلمة.
معتز رجع بص للمعازيم، وصوته بقى أضعف شوية، لكنه أصر يكمل: كنتوا فاكرين إن الأم مستحيل تأذي ولادها؟ كنتوا فاكرين إن كلمة أم معناها أمان؟! أنا كبرت وأنا فاكر إن أي طفل مهما حصل له، أمه هتبقى أول واحدة تحميه... بس أنا أمي كانت شايفاني بتعذب وسابتني!
بص للست، ودموعه نزلت من غير ما يحاول يخبيها: أنا كنت طفل يا جماعة... طفل مش فاهم ليه بيتحبس، ولا ليه بيتضر..ب، ولا ليه أمه مش بتيجي تنقذه. كنت كل اللي محتاجه إنها تفتح الباب وتاخدني في حضنها... لكنها اختارت تسكت!
الست كانت بتعيط وبتحاول تقوم: معتز، كفاية... أرجوك متفضحنيش أكتر من كده!
معتز بص لها بذهول: لسه كل اللي فارق معاكي فضيحتك؟! حتى دلوقتي مش فارق معاكي أنا عشت إيه؟!
وبعدين كمل وهو بيشير ناحية نسمة:
معتز: ودي كمان... بنت بريئة ملهاش ذنب في أي حاجة. خطفتيها من أمها، وخليتيها تعيش عمرها كله بعيد عنها، بس عشان تنتقمي من أبويا!
نسمة كانت واقفة بتعيط، ولما لاحظت إن معتز بدأ يترنح، قربت منه بسرعة ومسكت إيده وقالت بخوف: معتز... خلاص، كفاية كلام. إنت مش قادر تقف على رجلك، تعالى نروح المستشفى.
معتز حاول يسحب إيده منها وقال بصوت ضعيف: ابعدي عني يا نسمة... أنا لسه مخلصتش.
نسمة بدموع: لأ، إنت كده هتتعب أكتر. بص لنفسك، إنت مش قادر تاخد نفسك حتى! أرجوك متضغطش على نفسك أكتر من كده.
معتز بص لها للحظة، لكن نظره بدأ يتوه.
عزام قرب منهم، وحط إيده على كتف معتز وقال بقلق: خلاص يا معتز، كفاية يا ابني. أنا فهمت إنك موجوع، وعارف إن اللي حصل مش سهل، بس إنت لازم تروح المستشفى دلوقتي.
وبعدين بص للست بغضب وقال: وإنتي... قومي غوري من هنا! وجودك في المكان ده انتهى
آدم كان واقف مصدوم، ولسه بيحاول يستوعب إن نسمة طلعت بنت خديجة، وإن أمه هي اللي كانت السبب في خطفها وقرب منهم و بص للست بغضب، وبعدها اتحرك خطوة ناحيتها: استنوا! إنتوا ناويين تسيبوها تمشي؟! بعد كل اللي عملته ده؟! دي لازم تتحاسب! مش هسمح إنها تخرج من هنا كأن مفيش حاجة حصلت!
وبص لنسمة، اللي كانت ماسكة إيد معتز وبتحاول تسنده: دي دمرت أخويا، ودمرت طفولتنا، وخطفت نسمة من أمها! لازم تاخد جزاءها!
طلع تليفونه بسرعة: أنا هتصل بالبوليس حالًا... المرة دي مش هتفلت من العقاب.
لكن قبل ما يلحق يعمل المكالمة، دوّى صوت طلقة نارية في الفيلا! الكل صرخ واتخض، والمعازيم بدأوا يجروا ناحية الخارج، وبعضهم استخبى ورا الأثاث. خديجة شهقت، ونسمة اتشبثت بإيد معتز ومن وسط الارتباك، ظهر راجل ماسك مسد..س، واتجه بسرعة ناحية الست اللي كانت لسه على الأرض. مسكها من دراعها ورفعها بعنـ..ف، وبعدها وجّه السلا..ح ناحية عزام ومعتز وآدم.
الراجل بسخرية: إيه ده؟! هو أنا جيت في وقت مش مناسب ولا إيه؟!واضح إنكم عاملين حفلة عائلية من غير ما تعزموني!
عزام وقف قدامه بحذر، وعينه على المسد..س وقال بغضب: إنت مين؟! وإزاي دخلت هنا بالسلا..ح ده؟!
الراجل ضحك بسخرية، وشد الست ناحيته: أنا جوزها يا أستاذ... وجاي آخد مراتي. ولا إنتوا فاكرين إنكم هتقدروا تحبسوها عندكم؟
آدم وقف قدام أبوه بحذر: إنت فاكر نفسك هتخرج من هنا بسهولة؟ نزل السلا..ح ده بدل ما اجيب الداخليه تحسبك.
الراجل بص له باستهزاء: الداخليه؟! يا سلام! طب ما تستعجلش عليهم، يمكن يلحقوا يحضروا معانا الليلة دي.
الراجل بص لمعتز وابتسم ابتسامة مستفزة: ما شاء الله... كبرت يا معتز! بقيت دكتور وقد الدنيا! فاكرني يا ابني؟ ولا السنين خلتك تنسى؟
معتز اتجمد مكانه، وعينيه اتسعت، ووشه بقى أشد شحوبًا. رجعت له صور قديمة كان بيحاول ينساها... أوضة مقفولة، ضلمة، صراخه اللي محدش سمعه، وإحساسه بالعجز وهو طفل صغير.
معتز بصوت مخنوق: إنت...؟!
الراجل ضحك وهو بيبصله: أيوه، أنا! إيه؟ افتكرت الأيام الحلوة؟! ولا محتاج أفكرك كنت بعمل فيك إيه لما كنت بتفتح بقك وتهدد تفضحنا؟!
معتز بدأ يعرق بشكل واضح، ونَفَسه بقى أتقل، وإيده ارتعشت وهو بيحاول يسند نفسه. كان باصص للراجل كأنه شايف نفس الكابوس اللي عاشه زمان واقف قدامه من جديد قال بصوت مرتجف: إنت... إنت رجعت ليه؟!
الراجل: رجعت آخد مراتي، وماليش دعوة بيكم. بس واضح إنكم لسه فاكرين نفسكم تقدروا تحاسبونا على اللي فات!
معتز بدأ يترنح، وحاول يسند نفسه، لكنه فضل باصص له.
الراجل: بصراحة أنا مبسوط إني شايفك كده. كنت زمان بتترعب مني، ودلوقتي واقف قدامي مش قادر حتى تثبت على رجلك!
نسمة مسكت إيد معتز بقوة، ودموعها نزلت برجاء: معتز، أرجوك متبصلهوش... أرجوك ابعد عنه! ده معاه مسدس، إنت مش شايف حالتك؟!
معتز سحب إيده بهدوء، وعينه لسه ثابتة على الراجل.
نسمة بخوف: معتز، لأ! متسيبش إيدي... إنت سامعني؟
الراجل بص لنسمة وضحك بسخرية: إيه يا بنتي؟ خايفة عليه؟ ده أنا أعرفه أكتر منك. ده كان بيترعب من صوت خطواتي وهو صغير!
معتز رفع راسه بصعوبة، وقال بسخرية رغم تعبه: إنت فاكر إنك لسه بتخوفني؟!
الراجل ضيق عينه: أمال إنت واقف بترتعش ليه؟
معتز سحب إيده منها وقرب خطوات منه، وعينه ثابتة على الراجل وقال بغضب: أنا عمري ما اخاف منك لو كنت فاكر كدا تبقا عبيط... بس المرة دي مش هسيبك!
آدم بص له بخوف: معتز! إنت بتعمل إيه؟! ابعد عنه، أنا هتصرف!
عزام بص لمعتز وحاول يوقفه بحزم: معتز! إبعد عنه يا ابني! إنت مش في حالتك، ومش هتقدر تواجهه دلوقتي.
معتز من غير ما يبصله: ابعد يا بابا... الراجل ده أنا مستحيل أسيبه يمشي.
آدم رفع تليفونه، وحاول يتصل بالبوليس وهو بيراقب الراجل: معتز، اسمع كلام بابا متقربش منه!
الراجل ضحك ووجه المسدس ناحية معتز أكتر: أهو أخوك عاقل، اسمع كلامه. خليك مكانك أحسنلك... ولا تحب أفكرك تاني إزاي كنت بعاقبك لما متسمعش الكلام؟
معتز قرب منه بتعب وبدون خوف كأنه مستغني عن حياته
الراجل بتهديد: محدش يتحرك! اللي هيقرب خطوة هضربه بالنار!
معتز فضل باصصله، وابتسامة ساخرة ظهرت على وشه رغم التعب: طب اضر..ب... يلا! إنت مستني إيه؟! اقـ..تلني! ولا إنت شاطر بس على طفل صغير محبوس ومش قادر يدافع عن نفسه؟!
الراجل ضحك ببرود: إنت لسه زي ما إنت... فاكر نفسك بقيت قوي؟! أنا ممكن أخلص عليك في ثانية!
معتز خطى خطوة ناحيته، ونسمة حاولت تمسكه تاني.
نسمة بصريخ: معتز ابعد عنه، والنبي! يا عمو عزام، يا آدم، الحقوه!
الراجل بص لمعتز بغضب، وبعدها قال بسخرية: هقتـ..لك عادي... زي ما كنت ممكن أقتـ..لك وإنت صغير! وقتها كنت بتترعب مني، ودلوقتي هخليك تعرف إن مفيش حاجة اتغيرت!
معتز ضحك ضحكة قصيرة، وملامحه مليانة تحدي وقال بتعب: إنت فاكر إنك لسه بتخوفني؟! أنا عشت سنين بسببك مش عارف أنام، ومش قادر أنسى اللي عملته فيا... بس خلاص، مش هفضل طول عمري عايش خايف منك!
وفي اللحظة دي، لمح معتز سكينة على الترابيزة اللي جنبه. ومن غير ما يفكر، مد إيده وخطفها، واندفع ناحية الراجل.
الكل صرخ في نفس اللحظة.
عزام: معتز، لااا!
آدم: معتز ابعد!
نسمة: معتزززز!
لكن الراجل كان أسرع منه، ورفع المسدس وضربه طلقة في بطنه.
صوت الطلقة دوّى في المكان، والسكينة وقعت من إيد معتز، وعينه اتسعت من الصدمة. حط إيده على بطنه، وبص لها لما شاف الدم، وبعدها رجله ماقدرتش تشيله، فنزل على ركبته ووقع على الأرض.
نسمة صرخت من قلبها:
نسمة: معتزززززز!!!
الست نفسها صرخت أول ما شافته واقع.
الست: معتز!!!
لكن الراجل مسكها من دراعها بعنف، وجرها ناحية الباب.
الراجل: يلا! مفيش وقت!
الست كانت بتحاول تبص على ابنها وهي بتعيط.
الست: سيبني! ابني يا راجل! معتز!
الراجل شدها بقوة وخرج بيها من الفيلا، وسط صراخ المعازيم والفوضى اللي حصلت.
آدم جري ناحية أخوه، وعزام وخديجة ونسمة كانوا بيسبقوه. نسمة وصلت لمعتز الأول، ونزلت على ركبتها جنبه، ورفعت راسه وحطتها في حضنها وقالت بعياط: معتز... معتز بصلي! أرجوك افتح عينك!
عزام مسك إيد ابنه وضغط عليها وقال بصوت متهدج: استحمل يا بني... استحمل هاتواااا الاسعاااف. إنت سامعني يا معتز؟ خليك معايا يا حبيبي!
وبعدين بص لآدم اللي عينيه اتمَلَت بالدموع وقال بغضب: آدم! قوم معايا، لازم نمسك الراجل ده قبل ما يهرب!
آدم بص لأخوه بتردد: بس معتز...
عزام: أنا مش هسيبه، وخديجة ونسمة معاه. إنت معايا، يلا!
آدم مسح دموعه بسرعة، وبص لأخوه مرة أخيرة قبل ما يجري مع أبوه ناحية الخارج.
عزام وهو بيجري: خديجة! اطلبي الإسعاف بسرعة!
خديجة كانت منهارة، لكنها طلعت تليفونها واتصلت بالإسعاف، وهي بتحاول تشرح لهم مكان الفيلا وحالة معتز.
أما نسمة، فكانت لسه حاضنة راسه، وإيديها بترتعش وهي بتحاول توقف الد..م وقالت بعياط: معتز، أرجوك متغمضش عينك... بصلي. إنت وعدتني إنك هتفضل قوي، فاكر؟ طب قوم عشان خاطري، أنا مش هقدر أشوفك كده!
معتز فتح عينه بصعوبة، وبص لها. دموعه كانت نازلة على خده، وصوته بالكاد مسموع: سامحيني... يا نسمة.
نسمة هزت راسها بسرعة: أسامحك على إيه؟ إنت معملتش حاجة! متقولش كده، إنت هتقوم وهتبقى كويس، سامعني؟
معتز حاول ياخد نفسه، وبص لها بحزن: أنا... كان نفسي... الأمور تبقى غير كده.
نسمة قربت وشها منه، وهي بتحاول تسمعه: متتكلمش، أرجوك. خليك ساكت لحد ما الإسعاف تيجي. أنا جنبك ومش هسيبك.
معتز رفع إيده بصعوبة ولمس وشها، وكانت إيده ملطخة بالد..م وقال بصوت متقطع: تعرفي... إن اسمك الحقيقي... نور؟
نسمة وقفت لحظة، وبصت له بصدمة وسط دموعها : نور...؟
معتز هز راسه بابتسامة ضعيفة: أيوه... نور.
نسمة مسكت إيده وباستها، ودموعها بتنزل عليها: أنا كان نفسي أسمع اسمي الحقيقي من زمان... بس عمري ما تخيلت إني هسمعه منك إنت بالذات. تعرف؟ الكلمة دي منك ليها معنى تاني عندي.
خديجة قربت منهم، وحطت إيدها على كتف معتز وهي بتعيط: شد حيلك يا معتز... عشان خاطري. نور محتاجاك، وأنا كمان مش هستحمل يحصل لك حاجة. إنت عارف إنك غالي عندي قد إيه؟
معتز بص لها بصعوبة، وحاول يبتسم.
خديجة كملت وهي بتبص لنسمة: نور... حبيبتك اللي كنت بتحبها وإنتوا صغيرين يا معتز. إنت كنت متعلق بيها من زمان، وعمرك ما نسيتها.
نسمة بصت لخديجة بصدمة، وبعدين رجعت بصت لمعتز وقالت بصوت مرتعش: هو... إنت كنت بتحبني وأنا صغيرة؟
معتز ابتسم ابتسامة خفيفة، وهز راسه بالموافقة، لكنه ماقدرش يتكلم أكتر.
نسمة دموعها زادت، وقربت منه وهي بتبص في عينيه.
نسمة: بجد انا كنت عايزة أعرف كل حاجة عنك... بس مش كده يا معتز. مش عايزة أعرف الكلام ده وإنت بين إيديا بالشكل ده.
معتز فضل باصص لها للحظات، وبعدها عينه بدأت تقفل ببطء.
نسمة بخوف: معتز؟! معتز افتح عينك... أنا بكلمك!
إيده ارتخت من على وشها، ورأسه مالت في حضنـ..ها.
نسمة هزته بخفة: معتز...؟!
ولما ملقتهوش بيرد، بدأت تهزه بعنف وهي بتصرخ.
نسمة بانهيار: لا... لا يا معتز! قوم! متسبنيش! إنت سامعني؟! معتز، أرجوك افتح عينك!
خديجة حطت إيدها على فمها، وعينيها اتسعت من الصدمة وهي بتعيط: معتز... يا ابني! لأ، أرجوك!
نسمة فضلت تهز معتز بجنون، ودموعها بتنزل على وشه وقالت بصريخ: معتزززز! متعملش فيا كده! إنت قولتلي اسم نور... طب قوم وقوله تاني! أرجوك قوم!
معتز فضل ساكن بين إيديها، عينه مغمضة وجسمه بلا حراك، كأن روحه فارقته، ونسمة بتصرخ باسمه وتهزه بانهيار، مش قادرة تتقبل إنه بقى مجرد جسد ساكن بين إيديها.