رواية عالم تاني الفصل الاول1بقلم هبة محمد
يعني إيه يا بابا مش معاك فلوس، انا قلت ليك عليهم من بدري؟!
-مش معايا والله يا بنتي.
_يعني أي؟!
-أنتِ عارفة انو المرتب لسه منزلش، ومصاريف أخواتك واخدة كل اللي معايا، أستني عليا أول الشهر وأنا هديهم ليكِ حاضر.
_يا بابا حرام عليك انا قايله ليك بقالي أسبوع، والرحلة أخر الأسبوع ده، أعمل أنا إيه دلوقتي؟؟
-قولي أن شاء الله خير وربنا هيدبرها بإذن الله
"وقام بتقبيل جبهتها بحنان وهو يقول بهقر وضعف...
-حقك عليا يا حبيبتي، بس غصب عني والله.
" لم ترى كم هو متعب أو مقهور من حاله بل قالت بكل قسوة....
_أوف بقى أنا تعبت من القرف ده كل حاجة عايزاها مفيش مفيش، معيش فلوس، لما أنت مش قادر على خلفتنا ومصارفنا بتخلفنا ليه؟!
"نظر إليها والدها بصدمة من قولها كيف تقول ذلك عنه وهي تعلم جيدًا أنه ليس بيده ذلك لو كان بيده شيء لما تأخر عنه أبدًا فصفعها على وجهها بقوة...
-أنتِ بنت قليلة الأدب وأنا معرفتش أربيكِ، مفروض أنتِ كبيرة وعاقلة وعارفة الظروف وانا لو معايا مش هتأخر عليكِ في حاجة، يا خيبة أملى فيكِ يا هنا.
_يا بابا انا مش صغيرة عشان تعاملني كده.
-انا اصلا مش موافق على مرواحك للرحلة دي بس قلت اهي مش بتخرج خليها تفك عن نفسها شوية، بدل قعدتها في البيت مع اني مش مرتاح ليها وأنتِ بتقولي دا فيها ولاد.
_يا بابا أنت عارفني كويس وعارف أخلاقي.
-ما هوا ده اللي مطمنى، وخلاني أوافق انك تروحي، وكمان انو سُهى صحبتك رايحة معاكِ.
_في الحقيقة سُهى مش رايحة الرحلة، هنا قالت كده لباباها عشان يوافق بس_
_يعني يا بابا دلوقتي هتديني الفلوس ولا لأ..
-اخر الأسبوع الفلوس هتكون عندك يا هنا.
سكت قليلًا ثم أكمل:
- تصبحي على خير يا بنتي.
" دخلت اوضتي بعد ما سمعت كلامة وأنا مش واخدة بالي من نبرة الحزن والتعب اللي في صوته وعلى وشه اهم حاجة عندى الفلوس لاني نفسي أروح الرحلة دي من زمان واكون زي اصحابي في الجامعة لي يا رب اكون عايشة في بيت فقير بيحاول يجيب اللقمة بالعافية، لي مخلقتنيش في بيت مش أكلين هم نجيب فلوس كل شهر منين..
_فتحت الموبيل وقلبت عليه شويه وانا بشوف آخر الاخبار ولفت نظري صورة رنا صحبتي معايا في الجامعة، وهيا منزله استوري بفستان جديد كالعادة وبصيت ليها بحقد لانو عندها كل حاجة بتحتجها، وانا ريقي بينشف على 500جنيه عشان رحلة بتاجي كل كام سنه مرة، وبعدين فضلت اقلب فيه شوية لحد ما عطشت فقمت أشرب من المطبخ.
"وأنا ماشية في الطرقة سمعت صوت ماما وهي بتكلم بابا وبتقوله.
_هتجيب الفلوس منين يا حسن دا احنا مش معانا إلا 200جنية لأخر الاسبوع.
-هعمل اي انا يعني يا ناهد، هشوف حد أتسلف منه وربنا ييسر بإذن الله او اشوف شغل بعد الضهر.
_شغل إيه اللي بعد الظهر يا حسن، صحتك متستحملش يا حبيبي التعب ده كله، قلها مش معايا وخلاص.
-لأ يا ناهد إن شاء الله ربنا يديني الصحة وأقدر أجيبهم، مش عايز البنت تكون أقل من صحابها لازم تحس انها زيهم عشان متحسسش بنقص من حد" قطع كلامة سعال حلقهِ الجاف "
_مالك يا حسن أنت تعبان ولا إيه.
-انا كويس متقلقيش عليا لما انام هكون كويس.
_طيب يلا عشان تتعشى أنت مكلتش من الصبح اي حاجةغير لقمة الفطار.
-مليش نفس والله يا ام هنا.
_طيب يا حبيبي ارتاح شوية ربنا يديك الصحة والعافية يارب.
__________________________.
_أنتِ واقفة بتعملي أي عندك هنا، شفتي الحالة اللي أبوكِ وصل ليها بسببك وعدم أحساسك بيه.
-أنا عملت إيه يعني لكل ده، ده كله عشان 500جنية اي العيشة دي.
_تصدقي أنتِ بنت قليله الأدب وناقصة رباية وانا معرفتش أربي بصحيح.
-يا ماما هوا انا عملت ايه طيب، والله حرام عليكم بجد.
_حرمت عليكِ عشتك، واحدة غيرك كانت شالت عن ابوها الحمل اللي شايلة على كتافة ومش راضي يحسسكم بيه مش تزودي عليه همه كمان.
-خلاص مش عايزاهم مش علشان 500طلبتهم طلعتوني اني معنديش دم ولا متربية وكأني خرقت خرق في الإسلام.
_طيب امشي من قدامي عشان أنتِ الكلام معاكِ ملوش لازمة، يلا تعالي حطي معايا الاكل عشان ناكل.
-مش واكله حاجة وهوا ده اصلا أكل يتاكل.
_طيب يلا امشي مش وشي، ربنا يهديكِ يا بنتي، وتفوقي قبل فوات الأوان وتلاقي كل حاجة ضاعت من بين أيديكِ.
-ربنا يريحني من أم البيت ده بقى.
_______________________.
تاني يوم الصبح في الجامعة.
_مالك يا بنتي وشك عامل كده لي على الصبح؟!
-سُهى والنبي سبيني في حالي أنا مش طايقه نفسي.
_يا ساتر استر يارب أي بس اللي حصل.
-مفيش يا ستي اتخنقت مع ماما وبابا عشان فلوس الرحلة، وزعلنا مع بعض، روحت قولتلهم مش عايزة حاجة منكم.
_أنا مش عارفة أنتِ مصممه على الرحلة دي لي يا هنا، رحلة زي اي رحلة وأنتِ مش بتسمعي على الكلام اللي بيحصل فيها من مسخرة وقله أدب بين الشباب والنبات هناك.
-يا سُهي عايزة اجرب حاجات جديدة عايزة اشوف الناس عايشة ازاي، عايزة اخرج من القوقعة اللي انا عايشة فيها دي بقى أنا تعبت.
_انا مش عارفة أنتِ مالك بقالك فترة مش طبيعية وبتقولي حاجات غريبة وأنا مش واخدة عليكِ كده.
-معلش محدش بيفضل على حاله، كل الناس بياجي عليها وقت وتتغير.
_ هنا انا مش عايزاكِ تفكري كده، كلنا العيشة بتاعتنا صعبة وضيقة بس الواحد لازم يحمد ربنا انه بخير وبصحة حلوة وأهلنا معانا وجنبنا وبيحبونا لازم مننساش ده، وأحنا أحسن من غيرنا كتير الحمدلله.
-أحنا احسن من غيرنا في أي، حد حالة منيل زينا كده.
_أيوة يا هنا في ناس كتير حالتها صعبة اوي، مش عشان هما مش بيبينوا ده او احنا مش شايفينه يبقى مفيش، بلاش تبصي للناس اللي أعلى مننا وتسيبي دول، وبعدين تقولي مفيش حد زينا.
-يا ستي ولا أبص ولا مبصش كله محصل بعضه مفيش فرق.
_لأ فيه فرق لما ترضي بالعيشة بتعتك وتحمدي ربنا عليها مهما كانت أيه، هترتاحي وهتعرفي وقتها الفرق.
-تعرفي أنا عايزة أي بجد ونفسي في أيه.
_نفسك في إيه يا ست هانم أشجيني.
-كان نفسي أعيش عيشة مختلفه بناس مختلفة بظروف مختلفه، مش العيشة دي عايزة أشوف الناس اللي معاها فلوس كتيرة دول حياتهم عاملة ازاي بيعيشوا يومهم ازاي فهماني.
_ونحققلك ده أزاي يا ست هانم نجبلك فانوس سحري ولا نروح عالم الخيال عشان نعيشك العيشة دي.
-مش عارفة بقى أي حاجة تحصلي وتغير ليا كل حياتي توديني عالم تاني غريب في كل حاجة كان نفسي أعشها.
_ هنا أسكتي يا حبيبتي ووحدي الله شكل روايات الرعب والخيال اللي بتقرأيها لحست مخك وجننتك على الأخر.
-يا ستي ولا لحست مخي ولا حاجة دي هيا الحاجة الوحيدة اللي بتخليني أهرب من الواقع اللي عايشة فيه ده.
_اللا قوليلي يا بت أنتِ عايزة تروحي مكان تاني بناس تانية وتبعدي عني اه يا واطيه اللي مش بيطمر فيكِ الصُحبة ولا العيش والملح.
-دا انا لو رحت في اي داهية بردو هتكوني معايا هوا انا عارفة اخلص منك ولا أعرف غيرك.
_أنتِ تطولي اصلا تكوني معايا، انا مفيش زيي يا بنتي.
-ما هوا ده اللي مخليني مش عارفة أسيبك.
_حبيبتي والله مش عارفة أعمل في حبك ليا ايه.
-ولا اي حاجة ساندوتشين فول وطعمية ويبقى كتر خيرك اوي.
_دايمًا همك على بطنك، يا جعانة.
-ما انا انبارح عملت فيها زعلانة ومكلتش بجد هموت من الجوع.
_طيب يا ستي امشي قدامي يكش يطمر في معدتك.
قالت لها بمشاكسة:
-طيب والمحاضرات اللي علينا.
_محاضرات اي بقى اللي ضاع نصها هوا اللي يمشي معاكِ يفلح في سنينهُ.
_____________________________
بعد انتهاء اليوم تجهزت كل منهم لكِ تذهب إلى بيتها.
_يلا سلام بقى أنا همشي ورايا مشوار كده قبل ما أروح.
-رايحة فين؟!
_هروح المكتبة كده أجبلي كام كتاب حلوين أقرأهم.
- ماشي خلي بالك من نفسك، وابقى طمنيني عليكِ بعد ما توصلي.
_ماشي يا حبيبتي يلا مع السلامة.
-سلام، هنا متنسيش، زي ما قولتك لازم تصالحي باباكِ وماماتك انهاردة ماشي، ولو عملتِ كده اوعدك اخرجك خروجة تحفة ماشي بلا رحلة بلا قرف ماشي يا حبيبتي.
_خلاص يا سُهى حاضر، مش هنسى.
"بعد شوية وصلت للمكتبة اللي كنت بدور عليها من زمان مكتبة قديمة وفيها كتب غريبة وعجيبة جدًا دي الأراء اللي سمعتها عنها وانا بدور عليها.
_دخلت ليها وانا جسمي شد لوحدة أول ما دخلتها وقلبي بدأ يدق بسرعة رهيبة أستغربتها، دخلت بين الأرفف وانا متوترة من المكان وهبته أخدت ليا كام كتاب حلوين عجبوني وروحت أحاسب عليهم عند الكاشير.
_لقيت راجل كبير بيبصلي بنظرات غريبة اوي خفت منه وطول ما أنا بحاسب عليهم منزلش عينه من عليا وكأن مفيش إلا أنا في المكان، خلصت حساب ولفيت عشان أمشي...
لقيته بقولي بصوت عميق اكنه طالع مع نفق خوفني اكتر:
-" مستنيكِ بكرة تاني، متخافيش... ".
أستغربت منه أوي وخفت في نفس الوقت:
_ماله الراجل ده بيكلمني كده لي وكأنه بعرفني من زمان وأي اللي مستنيكِ بكرة ومتخافيش، هوا انا لحقت أقراهم عشان أجاي اخد غيرهم تاني بكرة.
_ومخفش من أي، مجنون ده ولا أي؟!