رواية عين مش شايفة روح دافية الفصل الاول1بقلم مريم الجنيدي
_ ممنوع ممنوع تشيلي أو تحركي أي حاجة من مكانها، ممنوع الصوت العالي، ممنوع تأخير الوجبات، ممنوع الكلام الكتير، ممنوع تلمسيه أو تيجي جنبه أو تقربي مسافة متر
_ كل دي ممنوعات! فين المسموحات؟!
_ مريم من فضلك مستر نوح مش بيحب حد يلعب في ثوابته وبيضايق جدًا
_ تمام حاضر أي حاجة تانية!
_ لا كدا تمام أوي اتفضلي
دخلت البيت أدور على مستر نوح إللي أكلوا دماغي بيه، بعد ما اتقبلت في وظيفة مساعدة منزلية، وعديت على اختبارات كتير وصلت للنهائيات أخيرًا، لكن اتصدمت لما شوفت أن مستر نوح دا شاب في التلاتينات وكان لابس نضارة شمس و باصص بعيد، نضارة شمس في بيت اضاءته ضعيفة! مستر نوح أعمى! بدأت أفهم التعليمات إللي اتقالت ليا
_ مساء الخير يا مستر نوح أنا مريم، المساعدة الجديدة لحضرتك
قال بنبرة باردة مفهاش أي مشاعر
_ زينب قالت لك التعليمات
_ آه متقلقش كله هيكون تمام، قولي بس أنت تحب تاكل أي عشان ألحق اظبط الأكل على المعاد، أنا طبخي روعة، صدقني هتدمنه و
رد بحده وهو يشاور بإيده، لكن راسه كانت مايله لقدام
_ بس .. بس أسكتي، أنا مش بحب الكلام الكتير، مش عايز دوشة
قولت بعفوية
_ دوشة أي شايفني بغني! المهم قول عايز تاكل أي!
_ قايمة الأكل في المطبخ، في الفطار و الغدى و العشاء، ياريت تلتزمي منغير تغير
_ تمام تمام
بصيت للبيت المبهدل وبدأت أشيل الحاجة وارتبه، لقيت صوته بيسأل بدهشة وراسه ناحية الصوت
_ أنتِ بتعملي أي!
_ بنضف المذ.بلة إللي أنت عايش فيها، طايق نفسك إزاي في الوضوع دا
رد بنبرة ذهول
_ هتنضفي دلوقتي!
_ آه أكيد مش هسيب الدنيا كدا، دا أنت ربنا رحمك إنك مش شايف القرف دا
حمحم بإحراج، ولف وشه الناحية التانية، وأنا كملت التنضيف، وبعدين قولت بفضول
_ هي أختك راحت تجيب أي بالظبط قالت مش هتتأخر
ماردش عليا ولا كأن بتكلم، لكن أنا سألت تاني
_ بس أختك دي بسم الله ماشاء الله مزة جدًا، هي متجوزة؟!
لم بجيبها مرة آخرى وأكملت هي حمل كل شئ حوله وتنضيف المحيط به، لتقول
_ أنت بتفضل قاعد هنا كدا!! مش بعرف أنضف وحد قاعد باصص عليا كدا
المرة دي رد بسخرية حادة شوية
_ بس أنا مش باصص
ضحكت بصوت عالي لما استوعبت غبائي
_ آه صح نسيت، أصل أنت قاعد مركز أوي، ما تروح نشوفلك شغله ولا مشغلة كدا يا أستاذ نوح
_ أنا قاعد في صالة بيتي براحتي، أنتِ مش هتقوليلي أقعد فين، روحي شوفي شغلك
_ ما أنا بشوف شغلي أهو، بس ممكن طلب!
زفر بنفاذ صبر
_ ممكن أشغل حاجة أسمعها وأنا بنضف
_ لا قولت مش عايز دوشة
قالها وقام واقف، وبدأ يتحرك بهدوء وأنا وقفت أبص عليه مش عارفة أساعده ولا أي، وهو وقف فجأة وقال ببرود
_ وقفتي شغل وواقفة تتفرجي عليا لي؟!
إنتفضت بخضة وأنا بضرب على صدري
_ ينهار أبيض أنت شايف! أنت مش المفروض أعمى!!
أتنهد بيأس
_ أنا أعمى بس مش اطرش ومش بحس، كملي شغلك وماتركزيش معايا مش بحب كدا
_ تمام يا مستر نوح، روح استريح أنت ولا شوف رايح على فين عقبال ما أخلص ولا أنا أركز ولا أنت تركز
دخل أوضة وقفل الباب بعنف شوية، وأنا اتنهدت و بدأت أكمل شغلي، خلصت تنضيف الصالة ودخلت المطبخ أغسل الحاجات إللي مش نضيفة وروحت أشوف القايمة إللي محطوطة للوجبات، آه كنت متوقعة أكل مايع، فتحت التلاجة و خرجت منها الحاجة وبدأت أعمل أكل من تجويدي
بعد ساعة ونص روحت عند الأوضة إللي دخل فيها وخبطت بصوت عالي لحد ما سمعت صوته بيقول بغضب مكتوم
_ أدخل
دخلت وبصيت للأوضة العاتمة الكئيبة المقفلة، وكان هو قاعد على السرير بهدوء
_ أنا حضرتك الغدى أغرفلك؟!
قال بنبرة حادة ووشه موجه ليا كأنه فعلًا بيبص ليا
_ تغرفيلي! هو أنتِ مش عندك قائمة بالمواعيد و الوجبات، أنتِ اتأخرتي عن معادك نص ساعة وأنا مش بحب التسيب دا
زعقت بصوتي العالي إللي متعودة أتعامل بيه
_ تسيب أي في الزريبة إللي كنت بنضفها دي هو أنا كنت بلعب، أنا مبحبش أقعد في مكان مش نضيف أنا عقبال ما نضفت وخلصت وعملت الأكل لسه مخلصه دلوقتي
سكت شوية وأنا كنت بتنفس بعنف، لكن هو رد بنفس البرود المستفز
_ أنتِ بتزعقي لي، قولتلك مش بحب الصوت العالي و الدوشة
_ أنا مش بزعق دي نبرة صوتي
رد بسخرية باردة كأنه قاصد يستفزني ويطلع أسوأ ما فيا
_ يا سلام، بالنسبة لصوتك دلوقتي أي إستعارة مكنية؟
_ أنا مش هرد احترامًا ليك بس
_ والله! أخيرًا اخدتي بالك إن المفروض تحترميني، شاكر افضالك
_ وهو أنا كنت قليت أدبي عليك بس يا مستر نوح، أنت جازز نحيتي لي كدا!
_ أنا مش بحب عدم النظام و الصوت العالم والدوشة، وأنتِ مش بتعملي غيرهم من ساعة ما وصلتي، تحبي تفقدي وظيفتك في أول يوم ليكِ!!
سكت شوية وأنا بحاول أهدى عشان مالسوعوش بكلامي ويرجع يقول أنا إللي قليلة الأ..دب، وافتكرت أن لازم أحافظ على وظيفتي عشان محتجاها في الوقت الحالي، لكن حبيت أحط كرامتي في الأول واحافظ عليها
_ على فكرة أنا مش بتهدد، ومش بحب الأسلوب دا كمان، أنا شغالة مساعدة مش عابدة لو أنت مش أخد بالك ماشي!!
خرجت وقفلت الباب بعـ.نف، لكن رجعت أفتحه تاني بنفس العنـ.ف ولاحظت أنه إنتفض من مكانة، لكن قولت بهدوء
_ ها ماقولتش أغرفلك؟!
مش عارفة هو عامل كدا لي، بس رد بهدوء بدون أي تعبير
_ تمام
حطيت الأكل على السفرة، ووقفت أتابعه وهو بيخرج من الأوضة بضهر مفرود، و ملامح مفهاش تعبير، كان بيتحرك ببطء لكن ظهر إنه حافظ الطريق، قعد على السفرة في كرسي جانبي على البداية، مد أيده لكن كان قدامه فاضي، فخرجت من المطبخ المفتوح وقولت بهدوء
_ أنا حطيت الأكل على بداية الترابيزة فكرتك بتقعد هناك، ثواني هحطه قدامك
_ أنا بقعد على الكرسي دا
حطيتك الأكل قدامه، وهو بدأ يشم إللي قدامه، وسأل بشك
_ دا أي دا!
_ مشقعة باللحمة المفرومة
ضر.ب على الترابيزة بعصبية
_ مسقعة !! جبتي مسقعة دي منين هل كان مكتوب في القائمة مسقعة!!
_ ما بصراحة لقيت الأكل إللي مكتوب دا مايع، ومافهمتش نصه ببتعمل إزاي فاقولت أعمل حاجة ترم عضمك وأكون بعرف أعملها
_ في اختراع إسمه نت تشوفي من عليه الوصفة، هو مش قولت مش بحب عدم النظام، أنا محدد ليكي تعملي أي، إزاي تتصرفي على مزاجك؟!
_ ما أنا مش معايا باسورد الواي فاي، لأن مش هفتح من الباقة فيديو يوتيوب دا ينـ.سف الباقة دا، وبعدين أنا دي باللحمة المفرومة مش أورديحي
_ هو أي مجادلة وخلاص، أنتِ ماتعرفيش تمشي على نظام! مش مكتوب أكل معين، يبقى تعملي إللي مطلوب منك منغير تأليف، اتفضلي روحي أرمي الأكل دا واعملي أكل من القايمة
كان لسه هيقوم من على السفرة، بس أنا زقيته من كتفه وقعدته تاني، وهو رفع وشه تحيتي بسرعة كأنه مش مصدق إللي عملته، بس أنا زعقت بعصبية
_ أرمي مين، دي نعمة ربنا، عايز ربنا يسخطك قرد يعني ولا أي!! أنا مستحيل أرمي نعمة ربنا، وبعدين أي الزعيق دا كله، مالها المسقعة أنت دوقتها!! حكمت عليها منغير ما تدوقها لي، أنا مفيش حد يرفض المسقعة بتاعتي أبدًا، ما تاكل ونحمد ربنا يا مستر نوح وبوس إيدك وش وضهر، غيرك مش لاقي اللقمة
فتح بوقه وقفله أكتر من مره، بيحاول يجمع كلمة، لكن صوت الباب إللي اتفتح واتقفل وصوت أخته إللي دخلت تقول بحذر
_ مريم .. نوح أنتم فين! آه أنتم هنا أي الأخبار
نوح قام بعصبية عنيفه من على السفرة لدرجة الكرسي وقع، وقال بصوت عالي غاضب
_ تسنيم تعالي ورايا حالًا
رح على الأوضة كان بيمشي بحذر لكن بخطوات عارفة طريقها، تسنيم أخته بصت ليا بمعنى في أي، فأنا قولت بشفايف ملوية بإعتراض
_ عايزيني أرمي نعمة ربنا، مش عاجبه المسقعة باللحمة المفرومة، كنت أعملها أورديحي يعني !!
ردت عليا بذهول وعنين واسعة بعدم تصديق
_ مسقعة!!!
إنتفضت أنا وهي على صوته من الأوضة إللي هز البيت زي الرعد، فطلعت تجري على الأوضة وراه
بعد شوية خرجت وشافتني قاعدة في المطبخ قولت أول ما شوفتها
_ أنا عملت أكله فهمتها كدا من القايمة أهو عشان نختصر عصبيته، وهاكل أنا المسقعة
بصت ليا وللأكل وقالت بحزن
_ مريم ... أنا بجد آسفة بس نوح مش موافق عليكِ