رواية عين مش شايفة روح دافية الفصل الثاني2بقلم مريم الجنيدي
_ مريم ... أنا بجد آسفة بس نوح مش موافق عليكِ
إنتفضت من مكاني وبصيت ليها بصدمة
_ كل دا عشان المسقعة!! أنا هتكلم معاه
كانت لسه هتتكلم بس أنا ماعطتهاش فرصة وجريت على اوضته فتحتها منغير ما اخبط حتى وللمرة التانية ألاحظ انتفضتته وقال بصوت غاضب
_ زينب!!
_ لا أنا مريم، أنت بجد عايز تمشيني عشان المسقعة، للدرجة دي التفاهه يعني! مافكرتش إن بقالي أسبوع بجري في الشوارع عشان الشغل دا، تحليل مخدرات لا فيش لا مش عارفة أي، ولا كأني هشتغل في الوزارة وفي الآخر بعد أول يوم تقول مش عايزني!!! دا الله يكون في عون إللي عايشين معاك، مش فاهمة قاعد تؤمر وتتأمر ليه والله، على العموم مش هقل من نفسي معاك أنا ماشية، وعلى فكرة أكلك إللي عايزة في المطبخ
كنت لسه هخرج وأنا شايلة هم الدنيا فوق كتافي، مش عارفة هعمل أي، والفلوس إللي معايا هتكفي أشوف شغل تاني، لكن صوته الجامد وهو بيقول
_ استنى
لفيت ليه وكان وشه نحيتي في الإتجاه إللي واقفه فيه بالظبط
_ نعمين
اتنهد كأن هيقول أسوأ حاجة مرت عليه
_ خلاص موافق تكملي شغل، بس تلتزمي بالتعليمات كلها، عدم النظام اكتر حاجة بكرهها
أبتسمت بسعادة وقولت بفخر
_ بس لو ماكنتش تحلف عليا .. ينفع أخد باسورد الواي فاي!!
اتنهد ومسح فوق عينيه
_ تمام خديه من زينب
_ أسخن الأكل واحطلك! عملتلك الكوردن بلو إللي مكتوب في القائمة
_ تمام
إجاباته كانت مختصره بس مش مهم، المهم إن رجعت الشغل بسلام
إنتفض نوح في الصباح على صوت عالي ألتفتت حواليه بيحاول يستوعب الصوت العالي منين، وهمس بذهول
_ الواد قلبه بيوجعه وعايز حد يدلعه!!
قام من على السرير بسرعة وهو بيحاول يمشي بثبات بالخطوات إللي حافظها، لبس النضارة و فتح باب الأوضة فضر.به علو الصوت الحقيقي، حط أيده على ودانه وهو بيزعق
_ مين فاتح الزفت دا، أقفلوا الزفت داا
كان لسه هيمشي في الصالة، لكن رجله اتزحلقت في ماية!! مسك الباب بسرعة وعاد خطوة لورا
جريت عليه وأنا بقفل السماعات الصغيرة بتاعتي
_ مستر نوح أنت كويس! مش سامعني وأنا بقول خلي بالك أنا بمسح؟؟
زعق بعصبية وهو بيضرب الباب
_ وهسمع إزاي بالزفت إللي شغال دا!!
_ لا قول هتسمع ازاي وأنت حاطت إيدك على ودنك
_ عشان الصوت العالي بيأذي ودني، مش قولت مش عايز دوشة !! أنتِ مفيش فايدة فيكي
_ دوشة أي بس أنت كويس طيب، أنت كنت هتاخد الصالة زربو على دماغك، رجلك كويسة!!
_ أنا متزفت كويس! بعد كدا أوعي تقلبي ماية نهائي
_ وهمسح إزاي انا على الناشف!
_ مش عايز مجادلة، مش عايز مجااادلة
قولت بهدوء
_ خلاص خلاص، أعصابك مش كدا
اتنهد بنفاذ صبر ودخل الأوضة وهو بيقول
_ نشفي الماية دي حالًا
بعد شوية لميت البيت وأنا إللي بغني منغير السماعات وسمعت صوته العالي
_ الدوشة!!
وشوشت نفسي بحنق
_ تعالى أكتم صوتي كمان
بعد شوية روحت ناحية الأوضة بتاعته وقولت
_ الفطار جاهز يا مستر نوح
استنيت شوية لحد ما فتح الباب وهو لابس لبس جديد وبدأ يمشي بهدوء وثبات ناحية السفرة، لكن فجأة وقف وهو بينحني على صباع رجله وبيصرخ بصوت مكتوم
_ يا .. أنتِ زقيتي السفرة من مكانها!
قولت بخوف وأنا شايفة وشه الأحمر من الألم
_ لا والله
_ لا زقاتيها أنا حافظ مكانها كويس، زقتيها وصباعي اتخبط
_ ما يمكن صباعك إللي راح ناحيتها
قال بعصبية وهو بيبص نحيتي
_ أنا مش عايز مجادلة، مش عايز مجادلة، مفيش أي حاجة تتحرك من مكانها سنتي فاهمة!
_ خلاص بقا يمكن اتزحزفت وأنا بمسح بتحصل عادي، وبعدين مش أنت بس إللي صباعك بيتخبط بلاش دراما كل الشعب المفتح والمقفل صوابعه بتتخبط
اتنهد بصوت عالي وبدأ ياكل، فقعدت قدامه وبدأت أكل أنا كمان
_ أنتِ بتعملي أي!
_ بفطر، لسه مافطرتش وقولت أقعد أفطر معاك بدل ما ما تاكل لواحدك وأختك راحت الشغل ولا مش عارفة فين
قال بإرتباك مش عارفة لي
_ بس أنا بحب أكل لواحدي
_ بس أنا مش بحب أكل لواحدي، وبعدين الرجالة وهي بتاكل لواحدها بيبقى منظرها يصعب على الكا.فر نفسي أفهم السر وراء شكلكوا الغلبان وأنتم بتاكلوا
ساب الأكل من يده وقعد بهدوء، بصيت ليه بعدم فهم
_ في أي سيبت الأكل لي، دا إللي في القايمة والله
قال بحده وهو بيشيح بوشه الناحية التانية
_ مش بحب حد يبص عليا وأنا باكل
رديت بعدم فهم لقصده
_ ومين هيبص عليك وأنت بتاكل، هو أنت المانوليزا!!
_ ممكن تكملي أكلك بهدوء
_ لا قول قصدك أي!!
سكت وما اتكلمش وحاولت أفهم قصده، هل قرفان أكل معاه، فقولت بحده وأنا بقف
_ أنت قرفان أكل معاك!! على العموم وصلت، بس أنا أيدي نضيفة و أنا إللي عامله الأكل أصلًا، أو يمكن مش من المستوى إن أقعد معاك على السفرة، وصلت خلاص أنا راحة أنضف كل براحتك
مشيت وأنا متعصبة من غروره الغير مبرر، مش بحب الناس إللي مناخيرها في السما، لكنه قال بصوت مسموع، حسيت فيه بالإحراج
_ أنا إللي ببهدل الدنيا وأنا باكل، ومش بحب حد يبص عليا وهو بياكل عشان ... مايقرفش أو يضايق
لفيت بصيت عليه بسرعة وأنا مش مصدقة إللي قاله، حسيت بغصه في قلبي، فرجت وقعدت على السفرة قدامه وقولت بهدوء
_ أنا مش بضايق ولا بقرف، كل براحتك عادي دا كويس إن أنت مش بتشوفني عشان أنا إللي ببهدل الدنيا وأنا باكل
ظهرت شبح إبتسامة على طرف شفايفه وبدأ ياكل وأنا كنت ببص عليه بطرف عيني كأنه شايفني وأنا براقبه، والحقيقة مش فاهمة بيبهدل الدنيا إزاي، دا بياكل في منتهى الشياكة، هو أوقات بيوقع حاجات بسيطة، بس ماكنش مقرف نهائي بالعكس أنا منغير ما أحس لقيتني براقب كل تحركاته، لحد ما قال بصوت بارد
_ مش كنتي عايزة تاكلي وفاتحة محاضرة قد كدا عن الطبقية، مش بتاكلي لي وبتراقبيني!!
رديت بإرتباك وأنا باكل بسرعة
_ باكل على فكرة ... ثم أنت بتعرف منين بجد؟
_ بسمع حركتك، صوت حركاتك عالي، ولما بيقف بعرف إنك بتبصي عليا
_ دا أنت خارق بقا
_ مش خارق، بس حاسه السمع عندي بقت أقوى، بفقيت بسمع حاجات دقيقة، زي حفيف هدومك وهي بتتحرك، صوت مضغك للأكل، صوت الخطوات، عشان كدا الأصوات العالية بتضايقني
حسيت إن كنت غبية وأنا مشغلة اغاني بصوت عالي فقولت بإحراج
_ آسفه إن شغلت السماعات الصبح، أصل أنا مش بعرف أشتغل بهدوء
_ أنتِ مش بتعرفي تعملي أي حاجة بهدوء يا مريم
ضحكت وكملت أكل، وهو قام قعد على كنبة معينة في الصالة، وقال بهدوء
_ القهوة .. اعمليها وغيري فرش السرير بتاعي من فضلك
_ قهوتك أي!
هز رأسه وهو بيقول
_ نفسي تكلفي خاطرك شوية وتقراي القايمة إللي منظمة كل حاجة بالتوقيت المظبوط، أنا بفكر حتى الساعة ٧، أنا فطرت النهاردة ٨ والقهوة بشربها ٧ ونص سادة، هشربها دلوقتي ٨ ونص
_ أي المشكلة في ساعة تأخير يا مستر نوح معدتك هتقفل يعني عندها شفتات ولا أي!
_ ممكن تعملي القهوة منغير مجادلة، مش عايز مجادلة
دخلت عملت ليه القهوة وقربت منه
_ احطها فين!
مسح فوق عينه وقال بنفاذ صبر مس عنده غيره
_ يعني مفيش غير ترابيزة صغيرة جنبي، يبقى هتحطيها فين فوق دماغي!
قولت ببرود وأنا بحط القهوة جنبه
_ ما تهدى على نفسك شوية يا مستر نوح، والله هتلاقيكي اتعاميت من عصابيتك دي، خليك ريلاكس شوية مش مستاهلة
كان لسه هيرد، بس مسكت أيده ووجهتها ناحية الفنجان
_ بص أهي عشان ما تخبطش فيها وتوقعها وأنا لسه ماسحة، ماشي!!
شد أيده بسرعة وقال ببرود
_ هي مش زينب قالت مش بحب حد يلمسني!
_ آه وقالت أقف بعيد عنك مسافة متر كأن عندك الحصبة، بس المهم كنت بوريك مكانها عشان لو كبتها على الأرض إللي لسه مسحاها مش هيحصل طيب
_ أنا نفسي أفهم مين شغال عند مين
قولت بإبتسامة وأنا بقلده
_ لا أنا مش شغالة، أنا مساعدة، وبعدين مش عايزة مجادلة أنا مش عايزة مجادلة
سيبته ومشيت لأوضته عشان أغير الفرش، كانت كئيبة ومقفولة، قولت بصوت عالي
_ أي القرف دا يا مستر نوح، حد ينام على ملايه كحلي!!
شيلت الملاية ودورت على ملاية تانية، كان كله غامق لحد ما لقيت واحدة جوا خالص لونها بينك، شديتها بإنتصار وفرشتها، وفتحت الشباك والبلاكونة الهوا يدخل، و شيلت مشايات الأرض وكنست ولمعت و رشيت معطر، واخدت سبت الغسيل في اوضته عشان أغسله
_ بقولك أي يا مستر نوح، تحب أعمل ليك، مخبوزات!! بعرف أعملها جميلة أوي
_ لا
_ تمام هروح أعملها، والله ماهتقدر تقاومها
روحت للمطبخ وهو قام وراح ناحية الأوضة، كنت براقبه بإهتمام، وقف على باب الأوضة واتنفس بعمق، ودخل لكن وقف قدام الشباك ونادى بعنف
_ مريم ... مريم
_ أي خير يا مستر نوح
_ أنتِ فاتحة الشباك لي! هو أنا قولتلك افتحيه! قولتلك غيري الملايات بس، بتتصرفي من دماغك لي!!
_ بهوي الأوضة لأن كانت مكمكمة، دي تجيب المرض
زعق بصوت عالي وهو بيحاول يوصل للشباك
_ اقفلي الزفت دا حالًا
_ وهو مضايقك في أي! ما أنت كدا كدا مش شايف
_ حاسس بالشمس إللي داخله بقولك اقفليه
قولت بسخرية وأنا رايحة ناحيته
_ هو أنت مصاص دماء عشان تخاف من الشمس يا مستر نوح، ما تدخل الشمس وتهوي الأوضة أي مشكلتك!!
من عصبيته وهو بيتحرك اتخبط في السرير وتوازنه اختل ناحية الشباك وهو بيحاول بمسك في أي حاجة وهو مش شايف، وأنا بصرخ بفزع وأنا بجري عليه
_ نوووووح