رواية اقدار مكبلة الفصل الاول1بقلم فادية النجار
بسم الله الرحمن الرحيم
اللهم صلي وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين
**حبيبة (بصدمة وذهول):**
- يعني ايه يا ماما اتجوز؟! كلام ايه اللي حضرتك بتقوليه ده؟!
**عايدة (الأم بهدوء وصرامة):**
- تتجوزي يعني تتجوزي! هي ليها معنى تاني يا حبيبة؟
**حبيبة (بنبرة انفعال):**
- لا يا ماما ملهاش معنى تاني، بس تفتكري دي حاجة ممكن أوافق عليها؟ أتجوز جوز اختي الله يرحمها؟!
**عايدة:**
- وموافقش ليه إن شاء الله؟ مش أحسن ما عيال اختك واحدة غريبة تربيهم؟ أهو انتي اللي تاخدي بالك منهم وتكبريهم.. وبعدين انتي عارفة إن "حنين" الصغيرة يا دوب مكملة سنتين، يعني لسه بيبي ومحتاجة رعاية.
**حبيبة (برفض قاطع ):**
- وانا مالي يا ماما؟ أنا لسه صغيرة وعايزة أعيش حياتي! وبعدين انتي عارفة إن دكتور "معتز" كان هيجي يخطبني من قبل وفاة حنين، بس كان مستني فترة الحداد تخلص!
**عايدة (بصرامة قاطعة):**
- مفيش منه الكلام ده خلاص، ومتخليهوش يجي! أنا اتفقت مع خالتك على كل حاجة، ويوم الخميس نكتب الكتاب والموضوع اتقفل.. هي بس تقنع آدم.
**حبيبة:**
- انتي ازاي يا ماما تقرري حاجة زي دي انتي وخالتو من غير رأينا؟! تتفقوا كدة من ورانا؟! أنا آسفة، أنا رافضة الموضوع ده تماماً، والأحسن تخلي خالتو متقولش لآدم لأنه هيرفض زيي بالظبط.. وده رأيي النهائي يا ماما، أنا مش موافقة!
**عايدة (بتهكم):**
- وإيه هو بقى رأيك يا ست حبيبة؟ إنك تتجوزي وتعيشي حياتك وما تفكريش في الأيتام اللي أمهم ماتت وسابتهم من غير حول ولا قوة؟! يا بنتي راعي ربنا فيا.. أنا كان ممكن أجيبهم يعيشوا معايا، بس أبوهم ليه حق فيهم، وهما لسه صغيرين ومحتاجين أُم.. وانتي بكرة تتجوزي وتنشغلي، مين هياخد بالهم منهم؟ متكونيش أنانية يا حبيبة!
**حبيبة (والدموع في عينيها):**
- أكون أنانية علشان عايزة أعيش حياتي وأرفض تحكماتك؟! انتي ازاي أمي؟! ازاي كنتي شايفة بنتك وحبها لجوزها وعايزاني أروح أخد مكانها وأعيش حياتها؟! ارحميني بقى يا ماما!
**عايدة (بشبه ابتسامة ومواجهة حادة بعدم رحمه):**
- وإيه يعني لما تعيشي حياتها؟ مش ده اللي كنتي بتحلمي بيه؟ أنا كنت عارفة عشقك لآدم من زمان.. اللي كنتي بتتمنيه جه لحد عندك، اشمعنى دلوقتي بترفضي؟
**حبيبة (بلجلجة وتوتر):**
- انتي.. انتي تقصدي إيه بكلامك ده؟!
**عايدة:**
- أقصد إني عارفة إنك انتي اللي كنتي بتحبي دكتور آدم ابن خالتك من قبل حنين!
**حبيبة (بإنكار واضطراب):**
- كدب! ده مش صحيح!
**عايدة:**
- لا صحيح، وسكتي وقتها علشان خاطر أختك يوم ما جه وطلب إيد حنين.. ولأن حنين مكانتش تعرف إنك بتحبيه وافقت.. يعني يا بنتي الحق مسيره يرجع لصاحبه، وحبك لآدم لازم يرجع يعيش في النور. وتكون مع بنات اختك..
**حبيبة (بكسرة):**
- أنا استحالة أوافق على كل ده! دي كانت فترة طيش ومراهقة، وأنا كنت واهمة نفسي إني بحبه بس طلعت غلطانة.. وعلشان كده وافقت على دكتور معتز!
**عايدة (بنبرة رجاء وتوسل):**
- طيب لو قلتلك وحياتي عندك يا حبيبة توافقي.. هتقولي إيه؟
**حبيبة (بقلة حيلة ونحيب):**
- حرام عليكِ يا ماما.. انتي ليه عايزة تحطي النار جنب البنزين؟! أنا مش قادرة أفكر مجرد التفكير إني أنا وآدم نكون مع بعض.. الله يخليكِ، طيب إيه رأيك لو قلتلك إني مش هتجوز خالص؟ هاتي البنات هنا وأنا هربيهم وأعيش عشانهم ومش هتجوز أبداً.. بس بلاش تقوليلي أتجوز آدم، علشان خاطري!
**عايدة (تقترب منها بحنية وتقبل رأسها):**
- مش هينفع يا حبيبتي.. هو مش هيرضى يبعد عن بناته، صدقيني أنا قلت لخالتك، بس هي قالت إن آدم هيرفض يعيشوا بعيد عنه.. عشان كده قررنا إن الأفضل هو جوازكم انتو الاتنين.
تركَتها حبيبة ودموعها تسيل على وجنتيها، ودخلت غرفتها وأغلقت الباب.
جلست حبيبة على فراشها، وأمسكت بصورة تجمعها بحنين وآدم وأخته "هنا"، كانوا قد التقاطوها في المصيف منذ حوالي ست سنوات.. كانت حبيبة وقتها في الثانوية العامة، وكان آدم بالنسبة لها ليس فقط دكتور العائلة المتميز بل مثلها الأعلى، الشغف الذي جعلها تعشق الطب وتلتحق بنفس كليته لتسير على خطاه.
فضلت تحبه بجنون وسراً، وفي اليوم الذي أنهت فيه الامتحانات، سمعت أنه قادم إلى منزلهم ليطلب يد إحدى الفتاتين.. تذكرت كيف كانت طائرة من الفرح، وكيف قضت اليوم بأكمله تجهز نفسها وتنتظر قدومه على أحر من الجمر، لتتحطم كل أحلامها في اللحظة التي نطق فيها وقال بابتسامة:
- "أنا يا خالتو بطلب إيد حنين منك تكون شريكة حياتي ومراتي."
فاقت من سرحانها ودموعها تحرق وجهها، وقالت بصوت خافت مكسور:
- "ليه الدنيا مصممة تجرح قلبي؟ أنا كنت ما صدقت إني نسيتك أو بحاول أنساك.. ليه عايز تفضل تقتل فيا بدم بارد؟ آاه يا رب.. عينّي وقويني على اللي جاي."
في منزل دكتور آدم بعد ما جيه من المركز الخاص بيه وبعد ما أخبرته امه بقراها هي وخالته
لم يكن الوضع لدى آدم مختلفاً كثيراً؛ كان يجلس في صالون شقته وعلامات الضيق والغضب تعلو وجهه.
**آدم (بفعال):**
- أنا مش هتجوز يا أمي بعد حنين! وبعدين ازاي انتو وخالتو تفكروا في إني أتجوز حبيبة؟! ده اسمه جنان!
**سعاد (الأم بجفاء متصنع):**
- أنا مجنونة يا آدم؟ الله يسامحك يا ابني.. شكراً. بس انا بحاول اساعدك بطريقتي انك تكمل حياتك
**آدم (بندم ومحاولة تهدئة):**
- أنا آسف يا أمي، مكنتش أقصد.. بس تفتكري إن ده حل؟ انتي عايزاني ازاي أتجوز بعد حنين؟ ومين؟ حبيبة؟! دي زي أختي!
**سعاد:**
- لا مش أختك يا آدم، هي أخت حنين مش أختك أنت.
**آدم (بحزن شديد):**
- بس حنين كانت حبيبتي ومراتي! أنا قلت هعيش أربي بناتي ومش عايز أتجوز تاني يا أمي.
**سعاد (بنبرة حاسمة وصارمة):**
- أنا بقولك يا آدم.. لو مَوافقتش على كلامي صدقني هغضب عليك، ومن دلوقتي متكلمنيش!
**آدم (بقلة حيلة):**
- ده ليه يعني؟! وبعدين أنا مش عيل صغير عشان حضرتك تقوليلي أعمل إيه وما أعملش إيه.. أنا دكتور عندي 32 سنة! وبعدين حبيبة.. دكتور معتز صاحبي وزميلها في الكلية وكان متكلم عليها، يعني دي هتكون خيانة لصحبي! يا أمي ارجوكِ افهميني، حبيبة تستاهل حد هي تكون بتحبه ويكون اختارها.مش لمجرد انه يتفرض عليها
**سعاد:**
- أنا قلت كلمتي يا آدم ومش هرجع فيها.. يوم الخميس هنروح نكتب كتابك انت وحبيبة، وهي هتيجي تعيش معاك هنا في شقتك انت وحنين، وده آخر كلام عندي!
**آدم:**
- يعني إيه يا أمي ده آخر كلام؟!
**سعاد:**
- يعني هتتجوز حبيبة يا آدم.
**آدم:**
- وأنا مش موافق!
تعبت امه لأنها مريضه ضغط وبسبب تفكيرها في مستقبله هو وبنات كان سوف يغشؤ عليها لولا أن ادم سندها
ادم... اهدي يا أمي ابوس ايدك
سعاد.... مش ههدي غير لما تسمع كلامي يا ادم واطمن من ناحيتك انت والبنات
وتركته والدته وغادرت الشقة، ليجلس آدم يمسك رأسه بين يديه، حتى اهتز هاتفه برقم معتز.. زفر بضيق وقال لنفسه: *"مش وقتك نهائي يا معتز.. أقولك إيه بس؟"*
**آدم:**
- السلام عليكم ورحمة الله وبركاته.
**معتز:**
- وعليكم السلام ورحمة الله وبركاته.. إزيك يا صاحبي؟ فينك يا عم؟ يعني لو مَسألتش أنا انت ما تسألش؟
**آدم (بتعب):**
- الحمد لله يا معتز، بس انت عارف الظروف اللي بمر بيها.
**معتز:**
- عارف يا ادم وربنا يعينك ويقويك، وإن شاء الله شدة وتزول..
**آدم:**
- إن شاء الله.. معتز، عايز أقولك على حاجة.
**معتز:**
- إيه يا عم قول على طول، مالك كده كأنك مكسوف؟
**آدم:**
- أمي قررت إني أتجوز يوم الخميس الجاي.
**معتز (بابتسامة ومزاح):**
- بجد والله؟ أمك دي معلمة! أيوه صح، هي كده عملت اللي المفروض يتعمل، خصوصاً إن البنات محتاجين حد ياخد باله منهم.. بس مين العروسة اللي أمك اختارتها؟
**آدم (بلجلجة وتلعثم):**
- حبيبة.. أخت حنين.
**معتز (بصدمة وعدم تصديق):**
- انت بتهزر؟! حـ.. حبيبة مين؟ اللي هي يعتبر المفروض خطيبتي؟! أكيد انت بتهزر أو متلخبط صح؟
**آدم:**
- أنا آسف يا معتز.. بس ده اللي حصل.
**معتز (بغضب مكتوم وعصبية):**
- وده حصل ازاي بقى؟! يعني من بين كل البنات ملقتش تتجوز بعد مرتك غير خطيبتي؟! ليه يا آدم؟ ده أنا كنت مستني فترة الحداد تخلص علشان أروح أكلم أمها ونكمل موضوع جوازنا! انت مش هتعمل كده وتتجوز حبيبة يا آدم.. أنا بقولك اهو!
**آدم (بقلة حيلة وشحوب):**
- أعمل إيه يا معتز؟! أمي قالتلي هغضب عليك لو موافقتش، وانت عارف كدة كويس.. وبعدين قولي، لو انت مكاني كنت عملت إيه وانت بتختار بين عيالك اللي لسه لحمة حمراء وبين رضا أمك؟!
**معتز (بقسوة):**
- أكيد مكنتش برضو هوافق إني أتجوز خطيبة صاحبي!
وأغلق الخط في وجهه فجأة.
**آدم (بصراخ مكتوم):**
- أنا معرفش ليه كلكو ضدي! أنا مش عايز أتجوز.. مش عايز ومحدش حاسس بيا!
مرت ثلاثة أيام وجاء يوم الخميس او اليوم الموعود بالنسبه لادم وحبيبة التي كانت حبيسة غرفتها، ترفض الخروج أو الحديث مع أحد، ووالدتها تدخل لها بالطعام الذي لا تمس منه إلا ما يبقيها على قيد الحياة.
حتى . دخلت عايدة عليها وفي يدها فستان أبيض بسيط.
**عايدة:**
- خدي الفستان ده وقومي جهزي نفسك، زمان الناس جايين عشان كتب الكتاب.
نظرت حبيبة إلى الفستان الهادئ البسيط، ولللحظة أدركت أنه فستان أختها "حنين" الذي ارتدته وهي حامل في ابنتها الصغرى.. رأت أمها الأسئلة المفجوعة في عينيها، لكنها لم تملك إجابة، فالخالة هي من أرسلته.
**حبيبة (بصوت مرتجف):**
- مش ده فستان حنين يا ماما؟
**عايدة (بتهرب):**
- مش عارفة.. يمكن شبهه يا حبيبة، ده خالتك لسه بعتاه.. قومي بقى اجهزي، زمان المأذون على وصول.
**حبيبة (في سرها وهي تأخذ الفستان):**
*(ماشي يا ماما..
حبيبه في نفسها.... أخدته وأنا حاسة إن في حاجة بتقبض قلبي وهتموتني.. حسيت قد إيه أنا صغيرة قدام نفسي، وعرفت إن آدم بعته عشان يعرفني إنه مجبور عليا، وأن حنين هتفضل بينا وعمره ما هينساها.. قمت ولبست الفستان اللي كان زي الشوك بيلسع جسمي، بس مش لازم أضعف عشان خاطر أمي والبنات.. لبسته ولفيت الطرحة من غير أي مكياج ولا أي حاجة على وشي).*