رواية اقدار مكبلة الفصل الثاني2بقلم فادية النجار
في ظل الماضي
اللهم صلِّ على سيدنا محمد وعلى آله وصحبه وسلم تسليماً كثيراً.
كان آدم قاعد في الصالة وشكله باين عليه التعب والهم.. أمّه كانت مصممة على الجوازة دي ومستعدة تعمل أي حاجة عشان تتم، وهو كان حاسس إن كأن العقد ده نهاية حياته مش بداية جديدة. القعدة ما كانش فيها غير المأذون والشهود القريبين بس.اللي بينهم الدكتور عمر صاحب عمره
ادم.... فجأة سمع صوت خطوات، رفع راسه شاف حبيبة طالعة من أوضتها. في الأول ما كانش عايز يبص لها، بس عينيه جت على الفستان! بتفصيلته وبساطته افتكره على طول.. ده فستان حنين! افتكر أمه لما كانت في أوضته هو وحنين الصبح ، بص لها بعتاب كبير، بس هي ردت عليه بنظرة ناشفة وكأنها بتقوله: "ده أمر واقع يا آدم!"
أما حبيبة، فكانت حاسة بإهانة كبيرة وهي لابسة الفستان ده، وكأنه حمل ثقيل على قلبها.
المأذون قال بهدوء:
- إيه يا جماعة، نبدأ بدام العروسة وصلت؟
آدم بص لأمه بأمل إنها ترجع في كلامها، بس لما لقى إصرارها، قال بصوت مجهد:
- اكتب يا شيخنا..
المأذون كتب العقد وقال: "بارك الله لكما وبارك عليكما وجمع بينكما في خير." وبعدها وّجه القلم لحبيبة:
- امضي يا بنتي..
أمسكت حبيبة القلم، ونزلت نقطة حبر صغيرة على الورقة، ومضت اسمها وهي حاسة إنها بتوقع على حاجة بتجبرها على عيشة مش عايزاها. آدم هو كمان مضى، والمأذون خلص أوراقه ومشى.
قام آدم على طول من غير ما يستنى مباركة من حد، ولا حتى بص لحبيبة اللي كانت بتحاول تداري دموعها.
سعاد الأم قالت:
- أيوه كده يا حبيبي.. خد مرتك ويلا نمشي ، والبنات يبيتوا معايا النهاردة، أنا هكلم الشغالة تنزلهم شقتي.
رد آدم بصرامة:
- لا يا أمي! بناتي يفضلوا في بيتي، أنا لسه مكان الناني وهي قالت إنهم نامو وهي استأذنت تروح . هما مش هيبعدوا عني.
سعاد قالت له:
- اللي تشوفه يا حبيبي، المهم انك خلاص اتجوزت.. يلا يا حبيبة.
حبيبة ما قدرتش تسلم على أمها أو تحضنها عشان ما تضعفش، باست رأسها ومشت ورا آدم بخطوات ثقيلة. أمها عايدة كانت بتبص لها بأسى وبتقول في سرها: "سامحيني يا بنتي.. غصب عني."
نزلت العيلة، وآدم فتح باب العربية لأمه عشان تركب قدام، بس هي قالت:
- لا يا حبيبي، هركب ورا عشان دماغي وجعاني من النور.. تعالي يا حبيبة اقعدي جنب جوزك.
حبيبة قالت في سرها تعجباً من الكلمة جوزك والله انك طيبه يا خالتو بس انتي وامي السبب الله يسامحكو ، وبعدين ردت:
- حاضر يا خالتو.
في الوقت ده، كان دكتور معتز قاعد في عيادته مستني آدم يرفض الجوازة دي، لحد ما جاله تليفون من الشخص اللي بيراقب البيت:
- أيوه يا دكتور.. المأذون لسه طالع وانا سالته قال انه كتب الكتاب ودلوقتي ، هما نازلين وراه حالاً اهو وبعتلك صورهم !
معتز اتصدم وقام متضايق جداً بعد لما شاف حبيبه وهي لابسه فستان ابيض لواحد غيره :
- يعني خنت صداقتي يا آدم؟!
خرج وركب عربيته ومشي بسرعة شديدة.
وصل آدم قدام العمارة، ونزل مع أمه وحبيبة اللي كانت مش مركزة ومش عارفة تعمل إيه.
آدم قال من غير ما يبص لها:
- اطلعوا انتو، وأنا هجيب الشنط وأطلع وراكم.
سعاد قالت:
- تعالي يا حبيبتي متخافيش..
صعدت حبيبة وهي حاسة إنها جية مكان مفروض عليها. وعند باب الشقة، وقفت سعاد وقالت:
- ادخلي يا حبيبتي مع جوزك، تصبحوا على خير.
هزت حبيبة رأسها، ودخلت الشقة اللي كانت بترفض تدخلها نهائي وبتحجج باي حاجه هي يمكن مدخلتش غير لما اختها تعبت . فاقت على صوت آدم وهو بيتكلم ببرود:
- عشان نكون واضحين.. الجواز ده على الورق بس، عشان نرضي أمهاتنا، وده آخر ما عندي. وبالنسبة لوجودك هنا، هعتبرك مش موجوة اصلاً! الشقة فيها 3 أوض: أوضة النوم الخاصة بيا أنا وحنين مقفولة وملكيش دعوة بيها.. الأوضة التانية للبنات.. وعندك الأوضة الصغيرة اللي في آخر الممر فيها سرير ودولاب أظن هيكفوكي.
هزت حبيبة رأسها بسكوت. وفجأة، كان فيه خبط شديد جداً على الباب.
آدم فهم مين اللي بيخبط وقال:
- ادخلي جوه ومتخرجيش!
فتح آدم الباب، وفجأة معتز ضربه بالبوكس في وشه!
معتز قال بغضب شديد:
- عمر ما كنت أفتكر إنك تخدعني كده يا صاحب عمري! مالقتش غير خطيبتي عشان تتجوزها؟!
خرجت حبيبة بسرعة وقالت بضيق:
- معتز اهدى انت فاهم غلط! صدقني أنا وآدم اتجبرنا على الجوازة دي!
معتز رد بسخرية:
- بتبرري إيه يا حبيبة؟! اتجبرتوا ازاي يعني؟! عيال صغيرة مش قادرين ترفضوا؟! لا، آدم خاني وانتي كمان خنتيني وعمري ما هنسي خيةزتكو دي واستلقو وعدك معايا !
ادم.... معتز انت بتقول ايه وبعدين الزم حدودك وانت بتتكلم مع حبيبه لأنها دلوقتي علي اسمي.
وبص لآدم عندما قال بقت علي اسمي وقال:
- فاكر إنك بتدافع عن مرتك؟ ماشي يا آدم.. بس افتكر إني عمري ما هسامحكم!
آدم قال ببرود:
- امشي يا معتز، مش وقت كلامك ده دلوقتي.
معتز قال وهو ماشي:
- مش خلصت على كده يا آدم.. هتشوف.
وضرب الباب وراه.
آدم بص لحبيبة وقال بعصبية:
- انتي السبب!
حبيبة ردت:
- سبب إيه؟! أنا عملت إيه؟!
آدم قال:
- انتي ليه وافقتي؟! كنتي ارفضي! كان عندك سبب قوي إنك بتحبي معتز وهو بيحبك، إنما أنا كنت مضغوط بمرض أمي والبنات!
حبيبة قالت بضيق:
- انت الراجل وما قدرتش ترفض، وعايزني أنا اللي أقف وش أمي وأرفض؟! وانت مرفضتش ليه؟!
آدم قال:
- قلتلك أمي تعبت وضغطت عليا!
حبيبة ردت:
- وأنا أمي ضغطت عليا بدموعها! وبعدين احنا هنا عشان البنات، متفتكرش يا دكتور آدم إن سكاتي ده ضعف، أنا سكت عشان خاطر عيال أختي بس!
سابته ودخلت أوضتها الصغيرة، وهو فضل واقف في الصالة مش عارف يفكر.
قفلت حبيبة الباب، بصلت للفستان، قلعته ورمته، وقعدت على السرير وبتحاول تنام وتخلص من اليوم ده. أما آدم، فتح الموبايل علي صورة حنين وقعد يفكر فيها لحد ما نام بهدومه على الكنبة.
في الصباح، قامت حبيبة، اتوضت وصلت، ولبست إسدال واسع وخرجت بالهدوء. لقت آدم نايم على كنبة الأنتريه وقميصه متبهدل عرفت انه مدخلش أوضته هو وحنين . دخلت المطبخ عملت قهوة وحضرت لبن عشان البنات.
وهي طالعة بالصينية، باب أوضة البنات اتفتح، وخرجت لين وهي ماسكة إيد أختها الصغيرة حنين.
لين قالت بفرحة:
- خالتو! انتي هنا؟!
حبيبة ابتسمت وقالت:
- أيوه يا ليونة.. أنا هنا.
لين قالت:
- أنا مبسوطة أوي لما ناناه.قالت إنك هتعيشي معانا!
حبيبة قالت:
- يلا نغير هدومنا ونفطر.الاول ابه رايكو..
حنين الصغيرة قالت بتلعثم:
- بيبه!
حبيبة شالتها وبستها:
- يا قلب حبيبة انتي.. يلا نغير ونظبط الشعر الجميل.
آدم صحي على صوتهم، وشاف حبيبة وهي حاضنة البنتين، بس قال لنفسه بقسوة: "مفيش حد زيك يا حنين."
قعدت حبيبة البنات وبتسرح لهم بالراحة، فالين قالت:
- أنا بحبك يا خالتو عشان بتسرحيلي بالراحة، مش زي الناني بتوجع شعري..
حبيبة استغربت وقالت:
- طيب ليه مقتليهاش تسرحلك بالراحة يا ليونة؟
لين قالت بصوت واطي وخوف:
- لا.. عشان متضربنيش انا وحنين!
حبيبة اتصدمت:
- هي بتضربك انتي و حنين يا لين؟!
لين ردت:
- أيوه، بس متقوليش حد عشان متزعلش منا.. ماشي؟
حبيبة قالت يمكن البنت بتبالغ، بس الشك دخل قلبها. خرج آدم من أوضته بعد ما غير هدومه ولابس هدوم الخروج.
- صباح الخير يا بنات!
جريوا عليه: "بابا!"
لين قالت:
- خالتو هتفضل عايشة معانا يا بابا؟
آدم رد بجفاف:
- أيوه يا حبيبتي.. يلا كملوا فطوركم.
خرجت حبيبة وادتله القهوة: "اتفضل."
آدم ما ردش، وبص للين وقال:
- خليكي هادية يا لين مع الناني لأنها بتقول إنك مببتسمعيش الكلام!
لين خافت وقالت: "حاضر يا بابي.. هسمع الكلام!"
حبيبة لاحظت الخوف ده وقلقها زاد.
في اللحظة دي الباب خبط، وآدم قام يفتح.. كانت هند الناني.
هند قالت بتصنع:
- صباح الخير يا فندم.. البنات صحيوا؟
آدم قال:
- أيوه صحيوا.. أنا ماشي، عايزين حاجة؟ (باسهم وخرج).
هند اتفاجأت بوجود حبيبة، فقالت بنبرة مش عاجباها:
- السلام عليكم.. خير يا هانم، حضرتك هنا ليه من بدري في حاجه حصلت يعني ؟
لين قالت:
- بابا جاب خالتو خلاص وهتعيش معانا!
هند اتصدمت، فحبيبة قالت بثبات:
- اتجوزنا إمبارح يا هند.. في حاجة؟
هند حاولت تتدارك موقفها:
- لا يا فندم.. ألف مبروك!
استأذنت حبيبة عشان تغير هدومها وتروح الكلية تخلص أوراق الماجستير،بس هند لاحظت انها دخلت الاوضه الصغيره ومدخلتش اوضه ادم وحنين
بعد شويه خرجت بعد لما لبست هدوم خروج وقالت لهند بوضوح: "خلي بالك من البنات." ونزلت لخالتها سعاد تحت وطلبت منها تطلع تقعد مع البنات لأنها ما كانتش مرتاحة لهند.
أول ما حبيبة خرجت، هند اتجننت لأنها كانت طمعانة تتجوز آدم بعد وفاة مراته!
لين قالت:
- عايزين نلعب في أوضة اللعب..
هند قالت بغضب:
- مفيش لعب! ولو سمعت صوت واحدة فيكم هعاقبكم!
لين مسكت أختها بخوف:
- خلاص هنسكت..
حنين الصغيره عيطت: "عايزة بيبه!"
هند جابت عصاية وقالت بقسوة:
- دلوقتي عايزه بيبه عارفه لو مش سكتوا خالص هضربكم انتو الاثنين! ويا ويلكم لو قولتو لأبوكم!
في الكلية، حبيبة كانت بتخلص الأوراق وقابلت زميلتها علا.
علا قالت بفرحة:
- حبيبة! مش مصدقة، وحشتيني أوي!
حبيبة ردت:
- علا! حمد الله على السلامة، رجعتي امتى؟
علا قالت:
- بقالي يومين.. بابا توفى الله يرحمه فقلنا نرجع نعيش هنا.. أخبار حنين وطنط إيه؟
حبيبة قالت بحزن:
- حنين الله يرحمها يا علا. وماما الحمد لله.
علا اتصدمت:
- البقاء لله يا حبيبتي.. ربنا يرحمها!
حبيبة قالت:
- ادعيلها.. هبقى أكلمك، أنا مستعجلة عشان ميعاد دكتور فهمي.
وهي طالعة مسرعة من المبنى، خبطت في حد والحاجة وقعت على الأرض.. رفعت رأسها لقت معتز!
معتز قال بسخرية:
- إيه يا عروسة؟ قابلتك في الكلية يوم صبحيتك خير !
حبيبة جمعت أوراقها وقالت بجمود:
- أهلاً يا دكتور معتز..
معتز قال:
- بقيت دكتور معتز؟! نسيتي إننا كنا مخطوبين وانتي سيبتيني؟!
حبيبة قالت بقوة:
- دكتور معتز، احترم نفسك! أنا ست متجوزة دلوقتي.. ما كانش بينا حاجة رسمية وربنا ما أردش، ياريت تحترم الزمالة وتراعي ربنا في كلامك.
سابته ومشت، ومعتز أخد الأجندة بتاعتها اللي وقعت منها على الأرض وهي مشافتهاش وهو بيتبسم ب خبث.
حبيبة وهي ماشية تذكرت كلام لين عن الناني، فقررت ترجع البيت فوراً.
في الشقة، سعاد نزلت شقتها تحت تجيب تليفونها عشان تطلب بنتها اللي في أمريكا، وسابت البنات مع هند.
هند بدأت تزعق للبنات، وجابت العصاية وعايزة تضربهم..
في الوقت ده، حبيبة كانت طالعة وقابلت خالتها وهي نازله اخدت منها المفتاح عشان تطلع بيه. أول ما فتحت الباب، سمعت صراخ البنات وصوت ضرب!
دخلت لقت هند بتضرب لين بعصاية وحنين بتعيط على الأرض.
حبيبة صرخت فيها:
- انتي بتعملي إيه يا مجرمة؟!
هند ارتبكت:
- أنا معملتش حاجة! أنا بعاقبهم بس عشان اتخانقوا وضربو بعض!
جريت لين واستخبت ورا حبيبة، وحبيبة شالت حنين ودخلتهم الأوضة وحاولت تهديهم:
- خليكم هنا يا بنات. وامسكي التاب العبي عليه يا ليونه مع حنين وانا جايه تاني تمام
لين.... خالتو متخليش ناني تضربني تاني لان أيدي وجعتني
نزلت دمعه من عين حبيبه علي كلام الطفله وخرجت مره اخري .
خرجت لهند وقالت بغضب شديد:
- والله لأبلغ البوليس ! بتضربي أطفال يا مجرمه ؟!
في اللحظة دي، دخل آدم وسمع الصوت:
- في إيه؟! وصوتك عالي ليه كده؟!
حبيبة قالت بدموع:
- انت السبب يا آدم! سايب بناتك للمجرمة دي!
هند كدبت بسرعة:
- الحقني يا دكتور آدم! المدام جت زعقتلي ودخلت زعقت للبنات علشان بهدلو الشقه وهما بيلعبوا!
حبيبة قالت:
- أنا اللي زعقتلهم؟! بص يا ادم الهانم بتضربهم بالعصايا وتخوفهم!
هند قالت:
- لا دي بتكذب يا فندم! ومثلت البكاء
طلعت لين وهي بتعيط:
- لا! خالتو مش بتكذب.. انتي اللي بتضربينا أنا وحنين وبتشدي شعرنا شوف ضربتني بالعصايا علشان لعبنا بالألعاب لما تيته كانت هنا !
آدم اتصدم:
- إيه الكلام ده يا لين ؟!
هند ارتبكت وقالت:
- شايف يا فندم؟ بتعلم البنات الكدب ازاي؟! أنا هقدم استقالتي!
حبيبة صرخت:
- استقالة إيه؟! اقسم بالله لتدخلي السجن على اللي عملتيه في البنات!
آدم قرب من هند بغضب شديد ومسكها من هدومها:
- انتي بتضربي بناتي؟!
طلعت سعاد على الصوت واتصدمت لما عرفت. آدم طلب البوليس فوراً، واستلمتها الشرطه وأخدت هند ، اللي اكتشفو في التحريات إن كان فيها بلاغات سابقة من عائلات أخر ضدها بتعنيف الأطفال بس كانت مغيره اسمها .
قعد آدم وهو حاضن بناته وندمان جداً:
- ليه يا لين مقلتليش؟
لين قالت:
- عشان كانت بتقولي إنك مش هتصدقني وهتصدقها هي..
آدم بتأثر من كلام ابنته قال:
- لا يا حبيبتي.. أنا أصدقك انتي وأكذب الدنيا كلها!
سعاد قالت بحزن:
- أنا مش عارفة إزاي كانت بتخدعنا كده.. شكراً يا حبيبة إنك لحقتيهم.
حبيبة قالت:
- دول بنات أختي يا خالتو، المهم إن ربنا كشفها.
سعاد نزلت شقتها، ولين قالت لحبيبة:
- بيبه.. أنا هنام معاكي النهاردة!
حبيبة ابتسمت:
- ماشي يا قلبي.. هغير هدومي وأجي أنام معاكوا.روحي استنيني في اوضتك ودخلت هي اوضتها علشان تغير
آدم كان بيبص لهم ومستغرب حب البنات لها. وفجأة جاله مسج من معتز:
(على فكرة.. قول لحبيبة إنها نسيت الأجندة بتاعتها معايا ابقي ابعتها تاخدها).
خرجت حبيبة بعد ما غيرت هدومها، لقت آدم واقف في الصالة ومضايق جداً.وعيونه بتخرج شرار.
جت تعدي تروح لأوضة البنات، بس وقف قدامها ومسك إيدها بقسوة:
- انتي ازاي تروحي تقابلي معتز النهاردة؟!
حبيبة قالت بوجع:
- سيب إيدي! أنا مروحتش قابلت حد!
آدم قال بعصبية:
- أومال بعتلي ليه يقولي خلي حبيبة تيجي تاخد الأجندة بتاعتها من عندي؟! احترمي اسمي واسم العيلة اللي بقيتي شايلاها!
حبيبة بصتله بقوة وقالت:
- دكتور آدم.. احترم نفسك معايا! أنا مش واحدة من الشارع عشان تتهمني الاتهام ده! لو سألت بهدوء كنت عرفت إننا اتقابلنا بالصدفة في الكلية وأنا بخلص أوراق الماجستير والاجنده تلاقيها وقعت مني هناك وهو استغل الأجندة عشان يعمل مشكلة! بس متنساش نفسك.. متنساش مين هي حبيبة الدالي!
آدم حس إن كلامها صح بس كبريائه منعه يعترف، فقال:
- وليه مقلتيش من الأول؟!
حبيبة قالت بسخرية:
- لأن الوقت ما سمحش مع المصيبة اللي اكتشفتها لعيالك! وبعدين مش انت اللي قلت كل واحد يعيش حياته؟ أظن مفيش داعي تمثل دور الزوج دلوقتي.. سيب إيدي بقى عشان أروح للبنات!
سابت إيده ودخلت أوضة الصغار وقفت الباب.. وفضل هو واقف في الصالة لوحده، وكلامها بيرن في دماغه.