رواية زين وعاليا الفصل السابع والعشرون27بقلم ملك ابراهيم

"عاليا لأول مرة من زمان، ضحكت من قلبها بجد.. جريت، لعبت، لبست جلابية فلاحي، وساعدت في الأكل، وكانت على طبيعتها من غير خوف ولا رسميات.

و زين كان بيبص عليها وهو ساكت، وبيفكر: هي دي البنت اللي قلبي اختارها.. لا بتطلب دهب ولا فلوس، بتقولي سعادتي في قربك وحضنك وإن اسمي جنب اسمك"

اتكلمت جدة زين بتفكير: "أنا قربت منهم أوي الفترة اللي فاتت وقدرت أكسب ثقتهم وخصوصا عاليا.. يعني ممكن بسهولة نقدر نبعدهم عن بعض ونخليه يطلقها من غير ما نظهر في الصورة".

رواية زين وعاليا بقلمي ملك إبراهيم. 

بعد أكتر من ساعتين.

عاليا كانت بتبص على الطريق ومش عارفة هما رايحين فين.. بدأ يظهر على جانبي الطريق أراضي زراعية والواضح إنهم في طريقهم لقرية ريفية.. بصت لزين واتكلمت بفضول: "هو احنا رايحين فين بالظبط".

ابتسم زين واتكلم بحماس: "خلاص قربنا نوصل ما تقلقيش".

ابتسمت عاليا وهي بتتأمل في جمال الطبيعة حولها.. وبعد دقايق وقف زين بالعربية على طريق بتحاوطه الأراضي الزراعية من جميع الاتجاهات.. ابتسم لعاليا وقالها وصلنا.

بصت عاليا حواليها ومش شايفة غير أراضي زراعية.. بصت لزين بدهشة واتكلمت بمرح: "انت هتعلمني الزراعة ولا إيه..؟".

ضحك زين واتكلم بمرح وهو بيحط إيده على خدها بحنان: "لا أنا هعلمك الحب".

ابتسمت عاليا بخجل وفتح زين باب العربية ونزل وفتح لها باب العربية عشان تنزل.. نزلت عاليا وهي بتبص حواليها بإعجاب..

المكان كان هادي وساحر.. أراضي زراعية على مساحات كبيرة جدااا.. اللون الأخضر كان حواليهم في كل مكان.. ترعة صغيرة بتحاوط الأرض برسمة هندسية عشان توصلها الماية.. فلاحين بيشتغلوا بهمة ونشاط.

لفت عاليا بنظرها وبصت لزين واتكلمت بحماس: "الله المكان هنا حلو ومريح أووي".

ابتسم زين واتكلم بعشق: "تعرفي إن انتي فيكي شبه كبير أوي من المكان ده".

قربها منها وتابع كلامه برقة: "أنا بشوف فيكي الراحة اللي بشوفها في المكان ده".

ابتسمت عاليا بخجل وبصت حواليها بتوتر.. ابتسم زين ومسك إيديها بحنان واتكلم بهدوء: "تعالي معايا".

سألته بدهشة لما لقته بياخدها في اتجاه طريق صغير جدا بيفصل الأرض عن بعضها: "هنروح فين..؟".

أخدها زين لطريق صغير واتكلم بحماس: "شايفة البيت الصغير اللي في آخر الطريق ده..".

بصت عاليا ولقت بيت بيظهر من بعيد وبتحاوطه الأراضي الزراعية من جميع الاتجاهات.

أخدها زين ومشيو كتير جدا لحد ما وصلوا قدام البيت وظهر من قريب إنه بيت متكون من دورين ومتحاوط بسور عالي وله بوابة كبيرة ومفتاح البوابة دي كان مع زين اللي قرب وفتحها بكل سهولة.

بصت له عاليا وهو بيفتح البوابة واتكلمت بدهشة: "بيت مين ده يا زين".

ضحك زين واتكلم بمرح: "بيت جد جدي".

عاليا بدهشة: "بيت مين..!".

زين بضحك: "والله بيت جد جدي".

بصت له عاليا بعدم فهم.. ضحك وقالها: "أنا هفهمك.. جد جدي كان بيحب الأرض دي جدا وعشان كده أسس بيته في نص الأرض عشان يشوف الأرض من جميع الاتجاهات.. ولما جدي كبر وبقى شاب.. جده اداه مفتاح البيت ووصاه إنه يسلم المفتاح ده لحفيده.. وطبعا جدي فضل محافظ على الوصية واداني المفتاح ووصاني إني أسلم المفتاح ده لأحفادي إن شاء الله".

هزت عاليا راسها بتفهم.. ليتابع زين كلامه بمشاكسة: "أنا بقى جبتك هنا عشان تعرفي إننا لازم ننفذ الوصية ونجيب لهم أحفاد".

ابتسمت عاليا وردت: "يعني انت عايز أولاد وأحفاد عشان تنفذ وصية جد جدك..!!".

ضحك زين وقالها تعالي معايا.

أخدها ودخلوا وكانت عاليا بتبص حواليها بدهشة واستغربت نضافة المكان وسألت زين وقالها إن فيه ناس بتيجي تنضف البيت ده كل أسبوع.

وقفت عاليا تبص لكل حاجة حواليها بإعجاب وحماس وعجبها جدا الأثاث الريفي والسلم الخشبي اللي بيوصل للدور التاني.. كانت بتتفرج على كل حاجة حواليها بإعجاب واضح جداا.. أخدها زين لباب خلفي للبيت وبيتفتح على أرض الخلفية وكانت مساحتها كبيرة جدا وكان كلها شجر مانجة.. قربت عاليا من إحدى الأشجار بذهول...

عاليا بحماس: "هي دي مانجة حقيقية".

ابتسم زين واتكلم بتأكيد: "طبعا حقيقية".

ابتسمت عاليا واتنططت بحماس وهي بتحاول تقطف المانجة من على الشجرة.. قرب منها زين ورفعها للأعلى.. ابتسمت عاليا وأخدت المانجة وفرحت جدا إنها قدرت توصل ليها بمساعدة زين وكانت بترفع إيديها باحتفال وسعادة وكأنها فازت بكاس العالم..

نزلها زين وهو بيبتسم بسعادة وكان فرحان جدا بسعادتها.. وضع إيده على خصرها وقربها منه واتكلم قدام شفايفها.

زين "بتحبي المانجة".

هزت عاليا راسها بدلع وردت برقة: "امم أوي".

ضغط على خصرها بخفة وهو بيقربها منه أكتر وقرب منها أكتر واتكلم بعشق: "بتحبيها أوي أوي".

عاليا برقة: "أوي ".

كان لسه هيقرب يقبلها بس ظهر صوت من وراهم فجاة. 

"أهلا يا زين بيه.. نورت أرضك".

قالها صاحب الصوت القوي المسؤول عن الاهتمام بالأرض.

بعدت عاليا عن زين بفزع بعد ما سمعت الصوت القوي اللي ظهر فجأة.. بص له زين بغيظ بعد ما ضيع اللحظة اللي كان بيتمنى إنها تدوم.. واتكلم بغيظ: "إيه يا عبد التواب مش تخبط قبل ما تدخل".

بص عبد التواب حواليه على الأرض الواسعة واتكلم بعدم فهم: "أخبط على إيه يا بيه؟".

رد زين بخشونة: "مفيش يا عبد التواب.. المهم طمني إيه الأخبار".

رد عبد التواب بصوته القوي: "الأخبار زي ما بلغتك في التليفون يا بيه والفلاحين رافضين يكملوا شغل في الأرض اللي إذا يوميتهم زادت".

اتكلم زين بتأكيد: "والمفروض إن اليوميات بتزيد كل قد إيه".

عبد التواب: "كل موسم يا بيه".

هز زين راسه بتفهم واتكلم بهدوء: "فهمت يا عبد التواب.. طب هما ما زادوش في الموسم ده؟..".

عبد التواب بتأكيد: "زادوا يا بيه بس الزيادة مش عاجباهم".

زين بتفكير: "تمام يا عبد التواب اجمع كل الفلاحين وأنا هتكلم معاهم".

عبد التواب: "أمرك يا بيه بس عشان أجمعهم هاخد يجي ساعة كده أو ساعتين عشان هلف عليهم واحد واحد".

زين بهدوء: "تمام مفيش مشكلة.. أنا هنتظر هنا لحد ما تجمعهم كلهم".

عبد التواب: "أمرك يا بيه استأذن أنا عشان ألحق أجمعهم بسرعة".

هز زين راسه بهدوء ومشى عبد التواب والتفت زين لعاليا واتكلم بمشاكسة: "انتي مش هتاكلي المانجة ولا إيه".

ضحكت عاليا وهي بتقلد صوت عبد التواب الضخم واتكلمت بشقاوة: "هاكلها طبعا.. أمرك يا بيه".

ضحك زين على شقاوتها واتكلم بتحذير مرح: "عاليااااااا".

ضحكت عاليا أكتر واتكلمت بصعوبة من كتر الضحك: "أصل بصراحة انتوا عاملين زي المسلسلات القديمة أوي كل شوية أمرك يا بيه أمرك يا بيه".

ضحك زين على طريقتها وهي بتقلد صوت عبد التواب.. وصوت ضحكها خطف قلبه وكان سعيد جدا بسعادتها.. قرب منها وأخدها في حضنه وهو بيدعي ربنا من قلبه إن ضحكة حبيبته تدوم العمر كله.

بعدت عاليا عن حضنه بهدوء واتكلمت بجدية: " زين هو أنا ممكن أطلب منك طلب".

ابتسم زين ورد بعشق: "أنا حياتي كلها فداكي".

اتكلمت عاليا بتوتر: "هو ممكن يعني أطلب منك إنك توافق على زيادة الفلاحين.. هما أكيد محتاجين الزيادة دي".

ابتسم زين وشدد على ضمها واتكلم بتأكيد: "طبعا يا حبيبتي أنا هوافق ولازم ياخدوا حقهم وزيادة.. ما تقلقيش".

ابتسمت عاليا واتكلم زين بفضول: "قوليلي يا عاليا انتي ليه ما بتطلبيش حاجة لنفسك".

ردت عاليا بعدم فهم: "مش فاهمة".

اتكلم زين بتوضيح: "يعني مثلا عمرك ما طلبتي مني فلوس أو مجوهرات أو أي حاجة.. مع إنك عارفة إنك لو طلبتي أي حاجة في الدنيا أنا هجبهالك".

ابتسمت عاليا وردت ببساطة: "لأن أنا سعادتي مش في الفلوس ولا المجوهرات".

زين بفضول: "أومال سعادتك في إيه".

تأملته عاليا بعمق واتكلمت بصدق: "سعادتي في قربي منك.. في حضنك اللي بيطمني وبيحميني من الدنيا كلها.. سعادتي في وجود اسمي جنب اسمك.. سعادتي فيك انت".

ابتسم زين بسعادة وضمها واتكلم بعشق: "طب أحبك أكتر من كده إيه".

حركت عاليا رموش عينيها بالطريقة اللي بيعشقها زين.. ضحك واتكلم بمرح: "انتي عارفة كويس الحركة دي بتجنني".

ضحكت عاليا واتكلمت بمشاكسة: "طب أنا عايزة أكل المانجة بقى قبل ما يجي عبد التواب يا زين بيه".

ضحك زين على طريقتها وقربها منه واتكلم بمشاكسة: "عايزة تاكلي المانجة".

ردت عاليا بدلع: "امم".

تأمل شفايفها وقرب منها....

"الفلاحين في انتظارك يا زين بيه".

قالها عبد التواب بصوته القوي.

ضحكت عاليا بخجل وبعدت عن زين.. بص لها زين بغيظ ولف بوجهه اتجاه عبد التواب ولقى زوجة عبد التواب واقفة جانبه وبتبتسم لهم بوجهها البشوش..

اتكلم زين بصوت خشن مع عبد التواب: "إيه يا عبد التواب هو انت مش قلت قدامك ساعة أو اتنين عشان تجمع الفلاحين".

رد عبد التواب بصوته القوي: "أنا لقيتهم كلهم موجودين يا زين بيه.. عرفوا بخبر وصولك هنا واتجمعوا على طول".

قربت فرحانة زوجة عبد التواب وهي بتبتسم وبتسلم على زين: "البلد كلها نورت يا زين بيه".

وبصت لعاليا واتكلمت بفضول: "الهانم الحلوة دي تبقى مرات حضرتك".

ابتسم زين واتكلم بلطف: "أيوا يا فرحانة مدام عاليا مراتي".

قربت فرحانة من عاليا وهي بتسلم عليها بحرارة.

فرحانة: "نورتي يا ست هانم.. البلد كلها نورت".

ردت عاليا برقة: "بلاش ست هانم دي.. قوليلي عاليا بس".

ابتسمت فرحانة واتكلمت بسعادة: "ده انتي ست الستات يا ست عاليا.. لو تسمحي يعني كنت عايزة أطلب منك طلب انتي وزين بيه".

ردت عاليا بابتسامة: "آه طبعا اتفضلي".

اتكلمت فرحانة بخجل: "أنا نفسي أعزمكم على الغدا عندي وعارفة إنه مش هيكون قد المقام بس وحياة عيالي أنا نفسي تشرفوني".

ابتسمت عاليا وبصت لزين وهو هز راسه بالموافقة..

ردت عليها عاليا بحماس: "أنا موافقة بس بشرط".

فرحانة بجدية: "ده انتي تؤمري يا ست عاليا".

ردت عاليا بابتسامة: "أولا أنا اسمي عاليا بس بلاش ستي ولا هانم.. وكمان تسمحيلي أساعدك في عمل الأكل".

لتتابع عاليا حديثها مع فرحانة بصوت منخفض: "عشان أعرف زين بيه إنه متجوز ست بيت شاطرة".

ضحكت فرحانة بسعادة واتكلمت بحماس: "بس أنا مش عايزة أتعبك معايا".

ردت عاليا بحماس: "ولا تعب ولا حاجة بالعكس ده أنا متحمسة جدا".

ابتسم زين بسعادة من تأقلم عاليا مع المكان بسرعة واتكلم بهدوء: "طب هنروح احنا نشوف الفلاحين عشان ما نتأخرش عليهم".

ابتسمت عاليا ومشي زين مع عبد التواب ومشت عاليا مع فرحانة على بيتها..

رواية زين وعاليا بقلمي ملك إبراهيم. 

بعد وقت قليل وصلت عاليا مع فرحانة بيتها.. اتكلمت فرحانة بإحراج: "معلش بقى يا ست عاليا البيت مش قد المقام".

ردت عاليا بابتسامة: "ما تقوليش كده يا فرحانة وعايزة أقولك إن أنا من أسرة متوسطة الحال.. يعني بلاش كلمة ست دي.. عشان خاطري قوليلي عاليا بس وكمان أنا عايزة أساعدك بجد".

ابتسمت فرحانة بسعادة واتكلمت باهتمام: "بس انتي لو ساعدتيني لبسك هيتبهدل".

اتكلمت عاليا بحماس: "خلاص يبقى تسلفيني حاجة من عندك".

ردت فرحانة بإحراج: "بس هدومي يعني زي ما انتي شايفة كده.. كلها جلاليب".

عاليا بحماس: "وأنا عايزة ألبس زيك".

فرحت فرحانة جدا وجرت بسرعة جابت لها جلابية فلاحي من بتوعها.. لبستها عاليا وهي فرحانة بيها جدا وكانت جميلة وبسيطة وجمالها طبيعي ويخطف القلب.

وقفت عاليا تساعد فرحانة وهي مستمتعة جدا ببساطة كل حاجة حواليها.. وكان أولاد فرحانة بيجروا ويلعبوا حواليهم وعاليا كانت بتلعب معاهم وبتساعد فرحانة وقضت معاهم وقت جميل جدا..

بعد وقت وصل عبد التواب ومعاه زين وكانت عاليا بتجري وتلعب مع أطفالهم وهي لابسة الجلابية الفلاحي.. اتفاجئ زين بجمالها باللبس الفلاحي وكانت بتلعب وتجري بشقاوة مع الأطفال.. استأذن منه عبد التواب ودخل يشوف مراته جهزت الغدا ولا لسه.. ووقف زين ينظر لعاليا وهي بتلاعب الأطفال وابتسم وهو بيتخيلها وهي بتلعب مع أطفالهم.. شافت عاليا زين وهو واقف بيبص عليها بشرود.. قربت منه واتكلمت بحماس وهي بتلف: "إيه رأيك يا زين حلوة عليا صح؟".

ابتسم زين واتكلم بعشق: "انتي دايما حلوة يا عاليا في كل حاجة".

ابتسمت عاليا بخجل وتشابكت نظراتهم بعشق.

"الغدا جاهز يا بيه".

قاله عبد التواب بصوته القوي.

ضحكت عاليا على شكل زين اللي كان هيتجنن من الغيظ وكل ما يقرب منها أو يبص لها يظهر عبد التواب بصوته العالي المزعج.

قعدوا واتغدوا كلهم مع بعض وكانت عاليا سعيدة ومستمتعة جدا وكان زين ملاحظ الراحة اللي عاليا شعرت بيها في المكان والاندماج اللي حصل بينها وبين فرحانة.. وبعد انتهاء الغدا شكر زين عبد التواب وفرحانة على استضافتهم وسلمت عاليا على فرحانة وشكرتها جدا واستأذنوا منهم وأخد زين عاليا ورجعوا لعربيته وركبوا العربية وبص لعاليا واتكلم بعشق: "شكلك اتبسطي النهاردة".

ابتسمت عاليا وردت بمشاكسة: "أوي أوي يا زين بيه".

ضحك زين واتكلم بمرح: "مش عارف والله أنا حاسس إن لو قربت منك دلوقتي هلاقي عبد التواب طالعلي".

وبص خلفه وتابع كلامه بتأكيد: "الحمد لله مش موجود..".

"نسيت قفص المانجة يا زين بيه".

قالها عبد التواب وهو واقف جنب باب العربية في اتجاه زين وكان شايل قفص كبير مليان مانجة.

اتفاجئ زين من وجوده المفاجئ جانبه وضحكت عاليا بصوت عالي وكانت حرفيا هتموت من الضحك على شكل زين.

رد عليه زين بغيظ مكتوم: "متشكر يا عبد التواب هستأذنك بس تحطه في شنطة العربية..".

وضعه عبد التواب في شنطة العربية واتكلم بصوته القوي: "مع السلامة يا بيه وأبقى سلملي على البيه الكبير".

شكره زين وشغل العربية بسرعة وانطلق بيها عشان يهرب من عبد التواب.. وفضلت عاليا تضحك طول الطريق على عبد التواب وزين..