رواية زين وعاليا الفصل الثامن والعشرون28بقلم ملك ابراهيم

"زين كان شايل جواه كلام جده اللي لسه مش قادر يصدقه، وقلق على عاليا، وخوف إنه يخسرها بعد ما لقاها.. وعاليا شافت في عينيه الحزن ده، فما سألتش كتير، هي بس حضنته.. وكأنها بتقوله أنا هنا، مش هسيبك، ومش محتاجة تفسر.

ولأول مرة، عاليا هي اللي مدت إيدها لزين.. مش عشان خايفة، ولا عشان مضطرة، ولا عشان اتفاق.. عشان هي عايزاه هو، بقلبها وبإرادتها"

 فضلت عاليا تضحك طول الطريق على عبد التواب وزين.

في وقت متأخر من الليل.. وقفت جيلان في شرفة غرفتها وهي هتموت من الغيظ ومنتظرة زين يرجع وعمالة تكلم نفسها بغيظ.

جيلان: "معقول كل ده في مشوار هيكونوا راحوا فين بس".

بعد لحظات شافت عربية زين بتدخل الفيلا.. وقفت وهي بتتابع خروجهم من العربية وعاليا كانت بتضحك من قلبها وزين واقف قدامها وبيبص لها بغيظ.

اتكلمت عاليا بسعادة: "النهاردة كان أجمل يوم في حياتي".

ابتسم زين واتكلم بغيظ: "مبسوطة انتي طبعا".

ردت عاليا بشقاوة: "أوي أوي يا زين بيه".

ضحك زين على مرحها وشقاوتها وضمها بسعادة.. بعدت عاليا عن حضنه بهدوء وبصت على الفيلا واتكلمت بإحراج: "تفتكر إن جدتك تكون زعلت مني لأني قضيت اليوم كله معاك خارج البيت والمفروض كنت أبقى موجودة معاهم النهاردة".

ضحك زين واتكلم بتأكيد: "لا ما تقلقيش جدتي مش هتفكر كده أبدا".

هزت عاليا راسها بتفهم.. قرب منها زين وهو بيتكلم بمشاكسة: "يعني ينفع تفكري في كل الناس وتنسي حبيبك".

بصت عاليا حواليها بتوتر واتكلمت بخجل: "زين.. ممكن حد يشوفنا.. وبعدين أنا نسياك في إيه".

اتكلم زين وهو بيقرب منها: "هو انتي نسياني بس.. ده انتي مطلعة عيني بجمالك ده".

قرب منها أكتر وهو على وشك تقبيلها.. اتكلمت عاليا بشقاوة وهي بتبص خلفه: "الحق عبد التواب".

بص زين خلفه بصدمة وفكر إن عبد التواب جه وراهم فعلا.. واتغاظ لما لقى عاليا بتضحك عليه وبعدت عنه وهي بتضحك واتكلمت بمرح: "بهزر معاك يا زين بيه".

بص لها زين بغيظ وجرت عاليا بسرعة على الفيلا وهي بتحاول تهرب منه..

وقفت جيلان في شرفة غرفتها وهي هتتجنن وهتموت من الغيظ لما شافت علاقة زين وعاليا وحست إن مهمتها في الإيقاع بزين عشان يتجوزها هتكون مهمة صعبة جداا.

دخلت عاليا الفيلا قبل زين وكان الجد قاعد ومعاه كمال ابنه.. هدت عاليا خطواتها وقربت منهم بهدوء.

عاليا: "مساء الخير".

رد عليها الجد بابتسامة ورد كمال بتهكم وكان باين عليه التوتر والانزعاج..

دخل زين خلفها على طول وآثار الابتسامة على وجهه..

زين بابتسامة: "مساء الخير".

رد الجد بسعادة وهو بيبص لزين وعاليا ولاحظ السعادة الواضحة جوه عينيهم.

الجد: "أهلا باللي هربوا مننا النهاردة.. يا ترى هربتوا على فين كده..؟".

رد زين وهو بيبص لعاليا بغيظ مصطنع: "أصل عبد التواب كلمني النهارد........".

ما كملش زين كلامه لما سمع صوت ضحك عاليا أول ما سمعت اسم عبد التواب..

بص لها الجد ووالد زين بدهشة وضحك زين على ضحكها لأنه كان فاهم هي بتضحك عليه.. بص الجد لزين عشان يكمل كلامه بعد ما كتمت عاليا صوت ضحكها بإيديها.. اتكلم زين مرة تانية: "أصل عبد التواب.......".

ضحكت عاليا تاني وكتمت صوت ضحكها وهي بتبعد عنهم واتكلمت من بين ضحكها بصعوبة: "أنا هطلع أنا عن إذنكم".

طلعت بسرعة على غرفتهم وهي بتضحك.. ضحك زين وضحك جده على ضحكهم وقاله: "هي إيه الحكاية..؟".

رد زين بضحك: "أصل عاليا مستغربة عبد التواب شوية وكل ما تفتكره تضحك".

اتكلم الجد وهو بيضحك: "يعني انتوا كنتوا في البلد".

رد زين بتأكيد: "آه لأن عبد التواب كلمني النهاردة الصبح وبلغني إن فيه مشكلة وأنا روحت حلتها الحمد لله".

وقف كمال والد زين فجأة واتكلم بملل: "أنا هطلع أوضتي.. تصبحوا على خير".

تركهم وطلع واندهش زين من حالة والده.. بص له جده واتكلم وهو بيقف: "تعالى نكمل كلامنا في المكتب يا زين".

أخد زين جده وراحوا على غرفة المكتب..

رواية زين وعاليا بقلمي ملك إبراهيم. 

دخلت عاليا غرفتها وهي لسه بتضحك وكانت سعيدة جدا باليوم الجميل اللي قضته مع زين.. قربت من خزنة الملابس وخرجت لبس للنوم ودخلت على الحمام تاخد شاور..

وقفت جيلان في غرفتها وهي هتموت من الغيظ وخرجت من غرفتها واتجهت لغرفة جدتها وخبطت بعنف.. فتحت لها جدتها وكلمتها بغضب: "إيه الطريقة اللي بتخبطي بيها دي..؟!!".

دخلت جيلان الغرفة واتكلمت بعصبية: "الأستاذ زين والهانم اللي متجوزها راجعين من بره مزاجهم عالي وعمالين يضحكوا ويهزروا وأنا هموت من الغيظ وحضراتكم نايمين ولا في دماغكم".

ردت جدتها ببرود: "هو مش انتي قلتي إنك مش هتمشي ورا خطتنا تاني".

ردت جيلان بعصبية: "بس انتي يا تيتة عرفتي اللي اسمها عاليا دي وتقدري تساعديني أتخلص منها أسرع".

ردت جدتها بغرور وثقة: "عاليا مفاتيحها كلها معايا.. المهم انتي تركزي وتنفذي كل كلمة أقولك عليها".

ردت جيلان بلهفة: "أنا هعمل أي حاجة بس كل الملايين دي تبقى تحت إيدي".

ابتسمت جدتها واتكلمت بحقد: "برافو عليكي جيلان.. وعيزاكي تعرفي إن الملايين دي كلها من حقنا احنا".

لتتابع كلامها بقسوة وشر: "الملايين اللي أنا هاخدها منهم دي تمن حياة بنتي اللي اتحرمت منها وماتت في عز شبابها.. بنتي اللي عاشت معاهم أسود أيام حياتها وكانت بتنام كل ليلة ودمعتها على خدها بسبب خيانة جوزها ليها..".

لتتابع كلامها بقسوة أشد: "جوزها اللي سافر أول ما ماتت عشان يتفسح ويعيش حياته ولا كأن اللي ماتت دي إنسانة والمفروض إنه كان يحزن عليها حتى ولو شوية".

ردت جيلان بدهشة: "غريبة يا تيتة.. طب وليه تعاقبي زين على ذنب باباه".

ردت جدتها بقوة: "أنا مش بعاقب حد.. زين مهما كان ابن بنتي.. بس برضه ابن الراجل اللي كان السبب إنها تموت واتحرم منها ولازم الكل يدفع التمن..".

ردت جيلان بفضول: "والتمن يبقى فلوسهم..!!".

ردت جدتها بقوة: "دي مش فلوسهم ده حقنا احنا.. ده حق بنتي".

بصت جيلان لجدتها بذهول وهي مش متخيلة كمية الكره والشر اللي في قلبها اتجاه عيلة الشافعي.

رواية زين وعاليا بقلمي ملك إبراهيم. 

بعد ساعتين.. طلع زين على غرفته بعد ما أنهى حديثه مع جده.. دخل الغرفة ولقى عاليا ضامة نفسها ونايمة على السرير ووضعه إيديها الاتنين تحت خدها زي الأطفال.. ابتسم بهدوء وقرب منها وقبل شعرها بعشق.. بعد عنها وقرب من خزنة الملابس وأخد لبس ليه ودخل الحمام.. وخرج بعد وقت وقرب من حبيبته وأخدها في حضنه وهو بيفكر في الكلام اللي جده قالهوله واللي لسه لحد دلوقتي مش قادر يصدقه..

رواية زين وعاليا بقلمي ملك إبراهيم. 

في الصباح.

فتحت جانيت عنيها على صوت موبايلها وهو بيعلن عن استلام رسالة جديدة من أحمد.. بصت على كمال وهو نايم بعمق وأخدت تليفونها ودخلت الحمام وفتحت التليفون واستمعت للرسالة وكانت بصوت أحمد..

صوت أحمد: "إيه الحكاية يا جانيت هانم.. يعني ما ردتيش عليا.. فين المليون جنيه.. النهاردة آخر فرصة ليكي ولو الفلوس ما جهزتش أنا هبعت كل التسجيلات اللي عندي لعيلة جوزك وده آخر تحذير ليكي".

ضغطت جانيت على التليفون بغضب وحاولت تتصل على رقم أحمد ولقته اتقفل.. اتصلت على رقم آخر وانتظرت الرد.. لكنه ما ردش.. حاولت الاتصال تاني وبرضه ما ردش.. وقفت وهي بتفكر.. ممكن يكون اتخلى عنها.. يعني هي كده هتقع لوحدها.. لأ طبعا هي مش هتقع لوحدها ولازم تتصرف في أسرع وقت..

خرجت من الحمام وهي بتنظر لجوزها بسخرية وغضب.. أخدت لبس خروج وجهزت بسرعة عشان تخرج.

رواية زين وعاليا بقلمي ملك إبراهيم.

فتحت عاليا عنيها لقت نفسها نايمة على صدر زين وإيده بتداعب شعرها بهدوء.. ابتسمت ورفعت وجهها تبص له لقته صاحي وعينه مركزة على نقطة معينة بشرود وكأنه في عالم تاني.. اتحركت عاليا وقربت من وجهه واتكلمت بقلق: "زين انت لسه ما نمتش ولا إيه..؟!!".

تأملها زين وهو بداخل تفكيره.. قلقت عاليا أكتر ووضعت إيديها على خده برقة واتكلمت بحنان: "حبيبي فيه إيه..؟!".

هز زين راسه بـ مفيش وبعد عنها ووقف من على الفراش.. قلقت عاليا أكتر ووقفت هي كمان وقربت منه وضمته من ضهره واتكلمت بعشق: "حبيبي فيه إيه.. انت كويس..؟".

لف وبص لها وكان باين عليه الحزن وعينيه كانت بتقولها قد إيه هو محتاج لها.. قربت منه عاليا بتلقائية وقبلته من خده .. اتفاجئ زين من مبادرتها .. وتحدثت عيونهم بلغة خاصة.. فهمتها عاليا وابتسمت بخجل وهزت راسها بالموافقة.. ابتسم زين بسعادة وضمها بقوة.. شالها فجأة واتكلم بعشق: "لسه خايفة جوازنا يكمل ؟؟".

هزت عاليا راسها بـ لا وأخفت وجهها في صدره بخجل.. ابتسم زين بسعادة وضمها : "أوعدك إني عمري ما هجرحك أو أتسبب لك في أي حزن".

ابتسمت عاليا بخجل وقربته منها واستسلمت لقلبها واكتمل زواجهم وأصبحت زوجة زين رسميا.

رواية زين وعاليا بقلمي ملك إبراهيم. 

جلس الجميع لتناول الفطار ولاحظ الكل غياب زين وعاليا.. بصت جيلان لجدتها بمكر.. غمزت لها جدتها بهدوء واتكلمت قسمت بمكر: "أومال زين وعاليا فين؟ يعني امبارح هربوا وسابونا والنهاردة كمان مختفين".

رد الجد بهدوء: "أصلهم رجعوا امبارح متأخر وأكيد مش هيقدروا يصحوا بدري".

اتكلمت جدة زين بمكر: "يا ترى هما هربوا امبارح على فين..؟!".

اتكلم زياد بمرح: "أنا حاسس كده والله أعلم إني هبقى عم قريب.. لأني شوفت قفص مانجة وبيقولوا إن زين اللي جايبه وشكل عاليا بتتوحم وزين أخدها وجاب لها قفص المانجة ده امبارح".

هرب الد.. م من وجوههم وبصوا لبعض بصدمة..

تابع الجد تغير ملامحهم بقلق على عاليا بعد الكلام اللي قاله زياد بدون قصد.

وقف زياد وكلم جده: "أنا هروح الشركة بدل زين وهكلمه يرتاح هو النهاردة".

ليتابع كلامه بمرح: "شكلي هبقى عم بقى ولازم أشيل المسؤولية".

وقف معاه جده واتكلم بهدوء: "وأنا هدخل المكتب شوية.. بعد إذنكم".

هزت جدة زين راسها بهدوء وهي لسه مصدومة وبتفكر لو كلام زياد حقيقي وطلعت عاليا حامل إزاي هيقدروا يبعدوها عن زين.

اتجه الجد على مكتبه وراح زياد على الشركة..

اتكلمت جيلان بعصبية: "وبعدين يا تيتة.. هنعمل إيه في المصيبة دي".

واتكلمت قسمت بتفكير: "فعلا هتبقى مصيبة لو طلعت حامل بجد.. احنا لازم نتخلص من مرات زين بسرعة".

ردت جدة زين بتفكير: "أنا في دماغي حاجة لو ظبطت.. يبقى هنخلص منها وحتى لو طلعت حامل احنا هنخلي زين هو اللي يقـ.. تل اللي في بطنها بنفسه".

ردت جيلان بلهفة: "حاجة إيه دي يا تيتة؟..".

ردت جدة زين بابتسامة ماكرة: "حاجة محتاجة ترتيب مظبوط ولازم مساعدة شخص مهم".

اتكلمت قسمت بفضول: "مين الشخص ده..؟".

ردت جدة زين بمكر: "حمزة".

رواية زين وعاليا بقلمي ملك إبراهيم. 

في شقة أحمد..

وقفت جانيت وهي بتخبط على الباب بقوة وعنف.. طلع بواب العمارة واتكلم معاها.

البواب: "خير يا هانم عايزة مين؟".

جانيت: "عايزة أحمد أو مراته".

البواب: "الأستاذ أحمد جه أخد الست مراته وسافروا".

جانيت بصدمة: "سافروا طب ما قلوش سافروا فين".

البواب: "لا يا هانم محدش يعرف لهم طريق".

وقفت جانيت بصدمة بعد ما اتأكدت إن أحمد قدر يأمن نفسه وحتى مراته مش هتقدر توصلها.. نزلت وهي بتفكر إزاي تخرج من المصيبة دي.. وقفت قدام العمارة وحاولت الاتصال على رقم الشخص اللي بتتعاون معاه عشان تطلب منه إنه يتصرف ويحاول يوصل لأحمد أو يوفر لها المليون جنيه.. لكنه رفض المكالمة وحاولت الاتصال مرة تانية ولقت التليفون اتقفل.. وقفت جانيت واتكلمت بغضب: "أنا كده عملت اللي عليا وانت كده اللي جبته لنفسك..".

فكرت جانيت إنها تروح وتتكلم مع زين وتحكي له كل حاجة وتطلب حمايته..

اتحركت من قدام العمارة ومشت على الطريق وهي بتفكر هتقول إيه لزين.

ظهرت عربية فجأة واتجهت لمكان جانيت بأقصى سرعة وصدمتها بقوة وكمل سائق العربية طريقه بسرعة جنونية....