رواية اقدار مكبلة الفصل الثالث3بقلم فادية النجار
"اللهم صلِّ على سيدنا محمد وعلى آل سيدنا محمد وعلى أصحاب سيدنا محمد وعلى أتباع سيدنا محمد وسلم تسليماً كثيراً"
كان دكتور آدم قاعد على كنبة الأنتريه، ساندا راسه بين إيديه وعرقه نازل من كتر التفكير. دماغه كانت بتغلي وزي المرجل، وقلبه بيدق بسرعة من التوتر.
(يعني إيه معتز يبعتلي رسالة زي دي؟ عايز يلعب بيا وبأعصابي؟! بس أنا برضه معذور.. هي مقالتليش إنها قابلته في الكلية واصطدمت بيه!)
صوت قلبه:
— انت اديتها فرصة تتكلم أصلاً؟! بدل ما تشكرها على اللي عملته مع الناني وإنها أنقذت بناتك وحمتهم من الضرب والشحططة، قمت جيت عليها وبهدلتها واتهمتها في شرفها وكرامتها!
رد عقله بحجة ومكابرة:
— أنا عملت اللي أي راجل شرقي كان هيعمله لو حد لمحله إن مراته واقفة مع خطيبها القديم! ده رد فعل طبيعي جداً للغيرة والكرامة!
سخر قلبه منه:
— ومن امتى وانت بتعتبرها مراتك يا سي الدكتور؟! افتكر كويس كلامك ليها أول ما دخلت الشقة! انت مفوتش فرصة إلا وتثبتلها فيها إنك مجبور عليها وإنها مجرد ضيفة!
تعلل عقله:
— مش دي الحقيقة؟ أنا عايز أعيش على ذكرى حنين.. حبي الوحيد!
هاجمه قلبه بحقيقة موجعة:
— وهي ذنبها إيه؟! ما انت اللي وافقت ورضخت لضغط أمك وانت عارف إن حبيبة أكتر واحدة اتظلمت في اللعبة دي! بدل ما تعيش شبابها وتفرح بعريس يختارها هي بالاسم، اتجوزت جوز أختها اللي معاه بنتين أيتام وخسرت كل حاجة.. هي اللي خسرانة مش انت!
رد عقله بعناد:
— طب ما كانت رفضت هي وخلصتنا من الموال ده كله!
صدمه قلبه:
— وانت مرفضتش ليه مادام الرفض سهل كده؟!
تأتأ عقله:
— علشان.. علشان البنات! خلاص بس انت اسكت.. هي غلطانة وخلاص!
في نفس الوقت، كانت حبيبة قاعدة في أوضة البنات. كانت "لين" ماسكة في إسدالها بابتسامة صغيرة، وهي شايفة أختها الصغيرة "حنين" راحت في نوم عميق.
لين برجاء وطيبة:
— تعالي نامي جنبنا هنا يا بيبه.. أنا مبسوطة أوي إن الناني الشريرة مشيت وانتي هتفضلي معانا، وإننا هنام في حضنك كل يوم.
حبيبة بابتسامة حنونة وهي بتاخدها في حضنها:
— أنا اللي مبسوطة أوي إني هنام في حضنكم يا قلب حبيبة.. يلا بقى عشان تنامي يا ليونة.
أخدتها في حضنها وقرأت لها أذكار النوم لحد ما نامت. فضلت حبيبة صاحية تبص للسقف، بتفكر في مستقبلها مع الدكتور الجاف ده اللي شايفها مجرد زوجة على الورق، وازاي هتواجه كلام الناس وضغط المجتمع.
في الصالة، حسم آدم أمره ومسك تليفونه وأرسل رسالة قصيرة لمعتز:
(ابعت الدفتر بكرة مع الفراش اللي في الكلية يا معتز... علي المركز . وعيب عليك حركات العيال الصغيرة دي، إحنا دكاترة كبار).
لما معتز قرأ الرسالة، اتجن وشاط غضباً! حس إن آدم بيستخف بيه، فقرر بينه وبين نفسه إنه يهين حبيبة قدام الكلية كلها، لانه عارف انها رايحه الكليه بكره عشان يكشف للكل إنها "غدرت بيه" وتزوجت جوز أختها المتوفية.
مرت الليلة ثقيلة، ونام الكل بعد عذاب طويل من التفكير.
أشرقت شمس الصباح، صحيت حبيبة بكامل نشاطها، توضأت وصلت، وبعدين جهزت فطار جميل ومغذي للبنات وحطته على السفرة. ولما لفت تنادي البنات، لقيت دكتور آدم طالع من أوضته بملابس شغله، وعيونه حواليها هالات سودا من قلة النوم.
آدم بنبرة هادية ومجهدة:
— صباح الخير..
حبيبة بجفاء هادي وثبات:
— صباح النور.. أنا جهزت الفطار للبنات، ورايحة الكلية عشان أتابع الماجستير. وأنا نازلة هعدي على خالتو تطلع تقعد معاهم لحد ما أرجع.
حس آدم بندم صغير في قلبه، وكان عايز يفتح باب للصلح:
— تمام.. طب أوصلك في طريقي للمركز؟
حبيبة من غير ما تبصله:
— لا شكراً، طلبت أوبر على بال ما أجيب عربيتي من عند ماما.. عن إذنك.
نزلت حبيبة وعدت على خالتها سعاد وطلبت منها تطلع للبنات، فوافقت سعاد بحب ودعت لها بالتوفيق.
وصلت حبيبة لمبنى كلية الطب، وفوجئت بـ دكتور معتز واقف في نص الساحة، ماسك الأجندة والمسودة بتاعتها وبيشاور بيها للطلبة والدكاترة اللي ماشيين! كان بيعمل جو وشوشرة حواليها عشان يحرجها.
وكان من بين الحضور دكتور عمر (طبيب جراح وصديق معتز وآدم المقرب اللي حضر كتب الكتاب)، وكان موجود عشان يوصل صاحب ليه للجامعة. لما شاف معتز بيشاور بالدفتر بحركات غريبة، وقف بعيد يراقب المشهد بذهول، وهو عارف إن حبيبة بقت خلاص زوجة صاحبه دكتور آدم.
ما اتهزتش حبيبة.. مشيت بخطوات واثقة، مرفوعة الرأس، وعدت من جنب معتز وكأنه هواء! راحت على طول على مكتب المشرف على رسالتها دكتور فهمي. ولحسن حظها لقيته واقف قدام باب المكتب
معتز اتجنن من طريقتها وتجاهلها! مشي وراها بسرعة لحد ما وصل قدام مكتب دكتور فهمي وهي بتراجع معاه أوراق.
معتز بصوت عالٍ وبتهجم قدام الناس:
— عن إذنك يا دكتور فهمي.. اتفضلي يا دكتورة حبيبة، نسيتي الأجندة والدفتر ده معايا إمبارح!
اتلفتت حبيبة بكل ثقة وهدوء أذهل دكتور فهمي والكل، وقالت بنبرة حاسمة وصوت واضح:
— دفتر مين يا دكتور معتز اللي نسيته معاك؟! قصدك المسودة اللي وقعت مني لما خبطنا في بعض بالصدفة إمبارح في الممر؟ على العموم، الدفتر ده ملوش أي لازمة عندي، دي مجرد مسودة قديمة، والأصول كلها مع دكتور فهمي هنا.. تقدر تحتفظ بيه لو محتاجه!
وبعدين كملت بنبرة قوية هزت المكان:
— واه صحيح.. إحنا هنا في صرح علمي محترم، وإحنا دكاترة ومثقفين، يعني ملوش أي لازمة تحريف الكلام وإيهام الناس إن كان بيننا حاجة في الخفاء! خصوصاً بعد ما بقيت على ذمة راجل محترم.. راجل بيلزمني إني أحترم غيابه قبل حضوره!
صُدم دكتور فهمي وقال باستغراب:
— هو في إيه يا دكاترة؟ هو انتو مش كنتوا متفقين على خطوبة؟ إزاي اتجوزتي يا حبيبة؟
حبيبة بمنتهى الوضوح:
— لا يا دكتور فهمي.. إحنا عمرنا ما اتخطبنا رسمياً، كان مجرد كلام مبدئي ولم يكتمل. وأنا دلوقت زوجة دكتور آدم السوهاجي ،وله مني كل الاحترم والتقدير. أما التصرفات اللي بيعملها دكتور معتز دي، فهي بتقلل منه هو مش مني!
معتز بزعيق وانفعال بعد ما جبهته اتأنطرت:
— بتقلل مني أنا يا دكتورة؟! ليكون أنا اللي غدرت وخنت وسبتك ورحت اتجوزت جوز اختك بعد موتها ؟!
بص الكل بذهول، بس حبيبة ردت بثبات وثقة:
— أولاً.. مفيش حاجة اسمها خيانة في كلام موصلش لخطوبة رسمية وأنا أنهيته بنفسي. ثانياً.. زواجي من جوز أختي المرحومة عشان ألم شمل بناتها دي حاجة تشرفني وما تعيبنيش أبداً! ومن هنا ورايح يا دكتور معتز، لو حصل أي تجاوز أو قلة أدب منك تاني، العميد ومجلس الكلية هما اللي هيفصلوا بيننا.. إحنا دكاترة كبار ومش أطفال بتلعب في الشارع! عن إذنك يا دكتور فهمي.. لو في أي حاجة بخصوص الرسالة ابقى بلغني.
دكتور فهمي بنظرة إعجاب بصلابتها:
— حاضر يا دكتورة.. ربنا يوفقك ويعينك يا بنتي.
سابتهم حبيبة ومشت بين الممرات بكل شموخ، في حين فضلت الطلبة والدكاترة يبصوا لمعتز بنظرات احتقار وسخرية، وده خلاه يمشي من المكان وهو مكسوف ومحرج جداً!
كان دكتور آدم قاعد في مكتبه بالمركز الطبي بتاعه، بيراجع بعض التحاليل والتقارير، بس صورة حبيبة وهي واقفة قدامه بثبات وبتدافع عن كرامتها مش راضية تفارق دماغه.
مسك راسه وقال بضيق:
— اطلعي من دماغي بقى يا شيخة!.. انتي عايزة مني إيه؟!
الباب خبط فجأة.
— ادخل!
السكرتيرة:
— يا دكتور آدم.. دكتور عمر وصل بره وعايز يقابلك ضروري.
— دخليه فوراً!
دخل دكتور عمر وهو بيضحك ومبهور جداً:
— إزيك يا دكتور يا كبير!
آدم:
— عمر! تأخرت ليه يا بني؟ عندنا حالات ومناقشة في قسم الصدر فوق للحالات اللي بتدخل العمليات .
عمر بمقاطعة وضحك:
— اصبر بس يا عم لما أقولك مراتك عملت إيه النهاردة!
آدم بعدم فهم واستغراب:
— مراتي مين؟!
عمر:
— أقصد مراتك الدكتورة حبيبة! يالهوي على اللي عملته في معتز في نص ساحة الكلية قدام الدكاترة والطلبة!
آدم بقلق مكتوم:
— عملت إيه في معتز؟! فهمني يا عمر!
عمر بإعجاب شديد:
— مسحت بكرامته الأرض بالذوق والأدب! وقالتله إحنا مفيش بيننا حاجة، وإني على ذمة راجل محترم يلزمني أحترم غيابه قبل حضوره، وقالتله لو اتعديت حدودك معايا تاني هبلغ العميد ومجلس الكلية! يالهوي يا آدم لو تشوف منظره.. كان شبه الفوطة المبلولة والأرض كانت عايزة تتشق وتقلبه!
وقف آدم مذهول وصدمته جمته:
— حبيبة عملت كده؟!
عمر:
— وأكتر من كده كمان! ده أدبته وقالت إن زواجها منك شرف ليها عشان بناتها الأيتام! والله يا بختك يا عم.. واخدة بالها من اسمك وكرامتك في غيابك أكتر من أي حد!
نزلت الكلمات دي على آدم زي البلسم.. ومكنش عارف ليه حس بموجة غريبة من الفخر والارتياح، عشان هي انتصرت لكرامتها ونسبت نفسها ليه قدام الكل رغم قسوته عليها!