رواية زين وعاليا الفصل الثاني والثلاثون32 بقلم ملك ابراهيم
"عاليا راحت أول يوم شغل، وهي فاكرة إنها هتثبت نفسها.. لقت قدامها ورق كتير، وشغل أصعب مما كانت متخيلة، وحست إنها تايهة.
بس أول حاجة عملتها.. طلبت المساعدة من زين.
وهنا بانت حقيقة حبهم.. عاليا مش بتدور على شغل عشان تبعد عن زين، هي بتدور على نفسها، بس أول ما تحتاج المساعدة بجد.. بتطلبها منه هو"
وصل زين المستشفى عشان يطمن على حالة جانيت واتفاجئ بواحدة من الممرضات وهي بتقوله: "الحالة اللي تبع حضرتك فاقت امبارح وحالتها صعبة جداا بعد ما عرفت اللي حصلها".
وقف زين يفكر في وضع جانيت وهو مش عارف هيعمل إيه بعد ما فاقت وإزاي هيقدر يساعدها تخرج من الحالة اللي هي فيها.
سأل الممرضة عن الدكتور المتابع لحالة جانيت وطلب منها تبلغه إنه محتاج يتكلم معاه قبل ما يدخل لجانيت.
في أوضة الدكتور.. قعد زين قدام الدكتور واتكلم بهدوء: "لو سمحت يا دكتور كنت عايز أعرف تشخيص الحالة النفسية لجانيت بعد ما فاقت".
رد الدكتور: "للأسف حالتها بقت أصعب لما عرفت اللي حصلها وفيه دكتور نفسي شافها امبارح وقال إن حالتها النفسية صعبة جدا وطبعا ده شيء متوقع".
اتنهد زين بحزن: "طب هو احنا ممكن نعمل إيه عشان نساعدها تخرج من الحالة دي".
الدكتور: "لازم تفهم وتؤمن إن اللي حصلها ده من عند الله.. وأكيد ربنا له حكمة في اللي حصلها ده.. قل لن يصيبنا إلا ما كتب الله لنا".
رد زين بهدوء: "ونعم بالله".
بص زين قدامه وهو عارف إن مهمة إقناع جانيت إن اللي حصلها ده أكيد له حكمة ربنا وحده اللي يعلمها.. هتبقى مهمة صعبة جدا وخصوصا إن جانيت عمرها ما كانت قريبة من ربنا ويمكن اللي حصلها ده حكمة إنها تقرب من ربنا ويغفر لها ذنوبها في الدنيا.
قال الرسول صلى الله عليه وسلم: «إذا أراد الله بعبد خيراً عجّل له العقوبة في الدنيا، وإذا أراد الله بعبده الشر أمسك عنه بذنبه، حتى يوافي به يوم القيامة».
صدق رسول الله ﷺ.
وقف زين وشكر الدكتور وخرج عشان يدخل لجانيت ويتكلم معاها.. وقف قدام أوضتها وهو بياخد نفس عميق ومش عارف هيبدأ منين ولا هيقول إيه..
خبط على الباب وفتحه بهدوء.
كانت جانيت سرحانة في حياتها اللي فاتت.. وكانت بتفتكر كل حاجة هي عملتها.. الخير والشر.. وكانت بتبكي بحزن وهي شايفة إن الشر اللي هي عملته أكتر بكتير من الخير.. شافت شريط حياتها وهو بيجري قدامها وشافت كل حاجة غلط ومحرمة هي عملتها.. شافت الدنيا الخداعة المتزينة بألوان مزيفة وقدر شيطانها يخدعها ويبين الدنيا في عينيها إنها أبدية ولازم تعيش فيها لنفسها وتعمل اللي يسعدها وحللت لنفسها ما حرمه الله.. شافت قد إيه كانت مستهترة.. شافت قد إيه هي استخدمت جمالها في المحر..مات وحولت نعمة ربنا عليها للعنة كانت بتصيب أي حد يقرب منها.
دخل زين بخطوات هادية وهو شايف عينيها متثبتة على نقطة معينة والدموع اللي بتنزل بصمت.
نطق اسمها بهدوء.. حركت عينيها وبصت له وبعدت وشها بسرعة للاتجاه التاني تبعده عن عيون زين.
اتكلم زين بحزن: "ليه بتبعدي وشك عني يا جانيت.. مش عايزة تشوفيني".
ردت جانيت ببكاء ووجع: "مش عايزاك انت اللي تشوفني.. مش عايزة أشوف صورة وشي المشوه في عيون حد".
حزن زين جدا ووجعه كلامها.
يا الله رحمتك.. بقى اللي كانت ليل ونهار واقفة قدام المراية وبتتأمل في جمالها وطول الوقت بتستعرض جسمها وجمالها بفخر وهي مبسوطة جدا لما بتشوف انعكاس صورتها في عيون الجميع.. توصل لكدا.. توصل إنها بتخبي وشها بعيد عن العيون عشان ما تشوفش انعكاس صورتها في عيون حد.
اتكلم زين بهدوء: "بس التشوه عمره ما كان في الملامح يا جانيت.. التشوه بيكون في قلوب البشر".
ردت جانيت وهي بتبكي: "وأنا الأول كنت من البشر اللي التشوه في قلوبهم ودلوقتي بقى في ملامحي وعجزي".
اتكلم زين: "ما تبصيش للي حصلك بالشكل ده.. شوفيه من منظور تاني.. مش يمكن اللي حصلك ده كان إنذار عشان تراجعي كل حاجة غلط انتي عملتيها.. مش يمكن ربنا بيديكي فرصة تتوبي عن كل ذنب عملتيه".
ليتابع زين بذكر حديث عن أبي هريرة رضي الله عنه أن النبي صلى الله عليه وسلم قال: «ما يصيب المؤمن من وصب ولا هم ولا حزن ولا أذى، حتى الشوكة يُشاكها، إلا كفّر الله بها عن خطاياه».
بصت له جانيت وهي بتفكر في كلامه وبتراجع كل ذنوبها اللي كانت بتعدي قدام عينيها وكانت فعلا عارفة إن ده عقاب من ربنا.. لكن بعد كلام زين وذكره للحديث الشريف.. بدأت تحس بنور بيظهر جواها وأمل جديد إن ربنا بيعطيها فرصة عشان تتوب وترجع له.
جانيت بأمل: "يعني ممكن ربنا يغفرلي كل ذنوبي ويسامحني يا زين".
رد زين بتأكيد: "طبعا يا جانيت.. ربنا غفور رحيم.. وطول ما احنا عايشين الأمل موجود ورحمة ربنا كبيرة ووسعت كل شيء".
بدأت تظهر ابتسامة على وش جانيت وهي بتفكر في رحمة ربنا الكبيرة وإن عندها فرصة تقدر تقرب فيها من ربنا ويغفر لها كل ذنوبها.
ابتسم زين وهو بيبص للنور اللي بدأ يظهر على وشها فعلا مع ابتسامتها وهي بتفكر إزاي تقرب من ربنا وتستغفره على كل ذنب هي عملته في حياتها.
بصت جانيت لزين واتكلمت: "أول ذنب بطلب من ربنا إنه يغفرهولي.. هو ذنبي في حقك وحق عاليا.. وأول حاجة لازم أعملها هي إني أقولك على كل حاجة كانت بتحصلك من وراك وعن الشخص اللي كان بيخطط لأذيتك".
بص لها زين واتكلم بهدوء: "ما تتعبيش نفسك يا جانيت.. أنا عارف كل حاجة وعارف مين الشخص ده".
اتفاجأت جانيت وتابع زين كلامه بتأكيد: "المهم دلوقتي أنا عايزك تتابعي مع دكتور نفسي عشان يساعدك تتخطي الفترة دي وتقدري تبدأي من جديد.. وعايزك كمان تتأكدي إن احنا عمرنا ما هنتخلى عنك وأي حاجة هتحتاجيها هتكون عندك ولو محتاجة تسافري خارج مصر أنا مستعد أحجز لك طيارة خاصة تسافري أي بلد انتي حابة تعيشي فيها".
نزلت دموعها بحزن وسألته: "هو كمال طلقني...؟".
نزل زين وشه في الأرض وهو مش عارف يرد يقول إيه.
ابتسمت جانيت واتكلمت: "أنا عارفة يا زين إن باباك مش هيتقبلني بحالتي دي ومش مستغربة إنه يتخلى عني".
لتتابع بقوة: "أنا فعلا عايزة أسافر وأبعد عن هنا.. وياريت يكون في أسرع وقت".
هز زين راسه واتكلم بهدوء: "زي ما تحبي يا جانيت.. ارتاحي انتي وأنا هرتب كل حاجة وهتسافري البلد اللي تختاريها".
هزت جانيت راسها بهدوء وهي بتبكي واستأذن منها زين وخرج من الأوضة والمستشفى كلها وراح على شركته.
رواية زين وعاليا بقلمي ملك إبراهيم.
وصلت جدة زين الفيلا وطلعت على أوضتها.
دخلت وراها قسمت وهي بتتكلم بقلق: "ماما باسل بقاله أكتر من عشر أيام ما أعرفش عنه حاجة وتليفونه مقفول مش عارفة أعمل إيه".
ردت والدتها بغضب: "أنا اللي مش عارفة أعمل إيه مع الناس اللي ابنك واخد منهم فلوس وضيعها بغبائه وبيهددونا دلوقتي إنهم هيفضحونا لو الفلوس دي ما رجعتش".
لتتابع كلامها بانفعال: "انتي عارفة لو زين ولا جده عرفوا حاجة.. احنا هنروح كلنا في داهية".
ردت قسمت بانفعال وصراخ: "انتي السبب في كل ده انتي اللي هتضيعي أولادي مني".
اتكلمت والدتها بحدة: "أنا يا قسمت.. أنا اللي هضيع أولادك بعد كل اللي عملته عشانكم".
قسمت بغضب: "عملتي إيه هاا.. انتي عمرك ما عملتي أي حاجة عشانا.. دايما بتعملي لنفسك وبس..".
لتتابع قسمت كلامها بحزن: "جوزتيني لواحد بكرهه عشان نفسك.. عشان المهر الكبير اللي دفعهولك.. أجبرتيني أخلف منه وأدفن نفسي معاه عشان برضه نفسك وعشان تعيشي في المستوى الوهمي اللي طول عمرك عايشة فيه.. وجوزتي أختي الله يرحمها غصب عنها برضه عشان نفسك".
لتتابع بقسوة: "حتى لما عرفتي إنها تعبانة وممكن تموت في أي وقت.. ما اهتمتيش وكل همك كان الفلوس اللي هي بتبعتهالك.. أصل مش مهم.. إيه يعني لما بنتك تموت المهم انتي تفضلي عايشة في المستوى بتاعك.. إيه يعني لما تتعذ..ب كل يوم من خو..فها من المو..ت اللي هي مستنياه كل لحظة..".
لتتابع ببكاء: "إيه يعني تمو..ت كل يوم وهي خايفة من اليوم اللي هتسيب عيالها فيه وتتحرم منهم.. إيه يعني لما تمو..ت كل يوم وهي عايشة مع إنسان ما بتحبوش وانتي غصبتي عليها تتجوزه".
اتكلمت جدة زين بغضب: "أنا ما غصبتش واحدة فيكم على حاجة.. انتوا اتجوزتوا بمزاجكم".
ردت قسمت بحدة: "احنا عمرنا ما عملنا حاجة بمزاجنا.. انتي اللي دايما ممشيانا على مزاجك..".
لتتابع بسخرية: "احنا اندفنا بالحياة وانتي عشتي حياتك بالفلوس اللي كنتي بتاخديها من أجوازنا.. كنتي بتاخدي تمن عذابنا.. وبعد موت شهيرة أختي.. طبعا اتقطعت عنك الفلوس اللي كانت بتبعتهالك وأنا جوزي مات من الحسرة بعد ما خسر فلوسه كلها.. وقتها انتي اخترعتي موضوع إن مو..ت بنتك بسبب جوزها عشان تقنعي نفسك وتقنعي اللي حواليكي إن انتي ليكي حق عند عيلة الشافعي".
ردت والدتها بعنف: "لا يا قسمت.. شهيرة أختك ما..تت بسبب جوزها بسبب خيا..نته ليها.. بسبب الذل والقهرة اللي كانت عايشة معاه فيهم".
قسمت ببكاء: "ما تضحكيش على نفسك يا ماما.. أنا وشهيرة موتنا بسببك.. بسبب طمعك.. بسبب المظاهر الكدابة اللي عشتي بيها طول حياتك.. بسبب شكلك ووضعك الاجتماعي اللي كان عندك أهم من بناتك..".
لتتابع بقوة وهي بتمسح دموعها: "بس أنا مش هسمحلك تضيعي ولادي وولاد أختي زي ما ضيعتينا..".
ابتسمت والدتها بسخرية واتكلمت بقسوة: "ما تعمليش نفسك الملاك البريء يا قسمت.. انتي كنتي شريكة في خطتنا دي من الأول.. من أول ما باسل اتفق مع جانيت إنها توقع زين.. وانتي بنفسك اللي اقترحتي إننا نغير خطتنا وجانيت تسيب زين وتتجوز كمال.. عشان جيلان هي اللي تتجوز زين ونبقى كده استولينا على أموال العيلة كلها".
ردت قسمت ببكاء: "للأسف شيطاني كان ضاحك عليا.. كنت خايفة من الفقر اللي طول عمرك بتخوفينا منه.. كنت بهرب من الحقيقة وبحاول أقنع نفسي بكلامك إن ده حقنا..".
لتتابع ببكاء هستيري: "بس من يومها وأنا بتعذب.. من يومها وكل ليلة شهيرة تجيلي في المنام وتبصلي بحزن وخيبة أمل.. كل ليلة تجيلي وهي بتبكي وتقولي أولادي يا قسمت.. بلاش أولادي أرجوكي..".
بصت لها والدتها بجمود: "واحنا عمرنا ما هنأذي أولادها.. دول مهما كان أحفادي".
عيطت قسمت وضمت وشها بحزن..
اتكلمت والدتها بقوة: "أنا عيزاكي بس تعرفي إن انتي لو قلتي أي حاجة.. انتي وولادك اللي هتروحوا في داهية.. مش أنا".
بصت لها قسمت بحزن وخرجت من أوضتها وهي بتبكي.. ووقفت جدة زين وهي بتبص قدامها بغموض.
رواية زين وعاليا بقلمي ملك إبراهيم.
عند عاليا.
قعدت المهندسة دنيا اللي طلب منها حمزة إنها تدرب عاليا على مكتب جنب عاليا وبدأت تشرح لها كل حاجة عن شغلهم.
دنيا: "هو ده كل اللي مطلوب منك تعمليه.. فهمتي يا عاليا".
بصت عاليا للأوراق الكتير جدا قدامها واتكلمت بذهول: "هي إيه كل الأوراق دي والمفروض إن انتوا لسه شركة جديدة".
ابتسمت دنيا واتكلمت بهدوء: "دي أوراق لمشاريع كانت لشركة تانية وشركتنا هي اللي هتكمل المشاريع دي".
هزت عاليا راسها بتفهم وبدأت دنيا تشرح لها كل حاجة وكانت عاليا بتحاول تتعلم منها.. لكن الموضوع كان صعب جدا في أوله.
اتصل زين على عاليا وبصت عاليا للهاتف وابتسمت لما شافت اسم زين واستأذنت من دنيا وردت عليه وهي بتبتسم.
عاليا بصوت هادي: "ألو".
قعد زين على مكتبه في شركته واتكلم بهدوء: "حبيبتي عاملة إيه طمنيني".
عاليا: "الحمد لله يا حبيبي كله تمام".
زين: "يعني مرتاحة في الشغل ده".
ردت عاليا وهي بتبص للأوراق الكتيرة اللي على مكتبها: "آه يا حبيبي.. هو حلو".
زين بمشاكسة: "هو إيه اللي حلو".
ردت عاليا وهي بتبص للأوراق الكتير قدامها ومش عارفة هتعمل إيه في كل الشغل ده: "الشغل يا زين هيكون إيه يعني".
ضحك زين واتكلم بمرح: "لو محتاجة أي مساعدة أنا موجود.. ما تتكسفيش".
ردت عاليا وكأنها بتكلم نفسها: "لو على المساعدة فأنا محتاجة مصر كلها تساعدني".
قربت منها دنيا واتكلمت بصوت واطي: "عاليا أنا لازم أمشي دلوقتي.. والأوراق دي ممكن تاخديها معاكي البيت وتعملي كل اللي أنا شرحتهولك وترتبي المشاريع على حسب تاريخ التسليم".
هزت عاليا راسها بالموافقة وهي على وشك البكاء.
سمعهم زين وضحك واتكلم بمشاكسة: "أنا هقفل بقى لأني مشغول وانتي شكلك فاضية وما عندكيش شغل".
ردت عاليا بغيظ: "آه فاضية جدا.. مش قادرة أوصف لك المكتب اللي قدامي مفيش عليه ولا ورقة".
رد زين بتريقة: "معلش حبيبتي هما أكيد مش عايزين يضغطوا عليكي عشان النهاردة أول يوم ليكي".
ردت عاليا وهي على وشك البكاء: "اقفل يا زين.. اقفل وادعيلي".
قفلت عاليا التليفون وبصت للأوراق واتكلمت بندم: "يا ريتني كنت اشتغلت معاك يا زين.. مش كان زمانه مدلعني دلوقتي وأي شغل صعب كان هيخلصهولي هو...".
بصت قدامها فجأة بعد ما جت في بالها فكرة وابتسمت وقالت: "يا حبيبي يا زين".
وقربت من الأوراق وأخدتهم كلهم وهي بتبتسم واتكلمت بثقة: "تعالوا انتوا بقى معايا البيت وأخلي زين حبيبي يساعدني".
وأخدت عاليا كل الأوراق ونزلت لقت السواق اللي وصلها الصبح هي وجدة زين مستنيها.. ركبت معاه ورجعها على الفيلا.
رواية زين وعاليا بقلمي ملك إبراهيم.
قفلت جيلان باب أوضتها عليها كويس وفتحت هاتفها واتكلمت بغضب: "أيوا يا باسل انت فين..؟".
رد باسل: "موجود يا جيلان.. اتصلتي أكتر من مرة فيه إيه؟".
جيلان بعصبية: "انت اللي فيه إيه.. انت فين مش المفروض كنت ترجع مصر بعدنا بيومين..".
رد باسل بملل: "ومين قالك إن أنا ما رجعتش مصر".
اتكلمت جيلان بذهول: "انت في مصر! طب انت فين وليه ما جيتش هنا وليه مش بترد على ماما دي هتموت من القلق عليك".
رد باسل بعدم اهتمام: "سيبك من ماما دلوقتي وقوليلي.. هي جدتك فين..؟".
جيلان: "ما أعرفش.. هي الصبح خرجت مع البنت دي اللي زين متجوزها وأنا من الصبح حابسة نفسي في أوضتي ما خرجتش".
اتكلم باسل بمكر: "ما بتضيعش وقت".
جيلان بعدم فهم: "قلت إيه..؟!".
رد باسل: "سيبك من اللي قلته واسمعي اللي هقوله دلوقتي كويس".
ردت جيلان: "اتفضل اتكلم".
باسل بغموض: "أنا عايز مرات زين"..