رواية اقدار مكبلة الفصل الرابع4بقلم فادية النجار
"اللهم صلِّ على سيدنا محمد وعلى آل سيدنا محمد وعلى أصحاب سيدنا محمد وعلى أتباع سيدنا محمد وسلم تسليماً كثيراً"
رجعت حبيبة البيت ورجليها مش شايلينها من كتر التعب وضغط اليوم في الكلية، بس أول ما فتحت الباب، لقت بنات أختها "لين" و"حنين" صاحيين، وقاعدين جنب خالتها سعاد على الكنبة والضحك مالي البيت، وصينية الفطار زي ما هي ملمستش.
حبيبة بلهفة واعتذار وهي بتحط شنطتها على جنب:
- آسفة جداً يا خالتو إن التأخير جه مني.. معلش عطلتك معايا.
سعاد بابتسامة كلها حنية:
- يا حبيبتي ولا تأخير ولا حاجة! هما البنات لسه صاحيين من شوية، و قررو انهم مش هياكلو ولا لقمة إلا لما تيجي بالسلامة.
حبيبة:
- خلاص يا خالتو، اقعدي يلا نفطر كلنا سوا أحسن فطار.
سعاد:
- لا يا حبيبتي، أنا أخدت جرعة الإنسولين وأكلت لقمة خفيفة تحت قبل ما أطلع عشان السكر ما يهبطش.. افطرو انتوا وبالهنا والشفا.
حبيبة بصرامة محببة وهي بتمسك إيديها:
- مفيش الكلام ده يا خالتو! من النهاردة مفيش حاجة اسمها تاكلي لوحدك.. إحنا هنفطر ونتغدى سوا كل يوم، والبيت ده بيتك قبل ما يكون بيتنا!
سعاد بتنهيدة مليانة حب ودفا:
- يا قلبي انتو لسه عرسان في أول أيامكم.. مش عايزة أكون تقيلة عليكم ولا أضايقكم.
حبيبة قالت في سرها بمرارة: (عرسان إيه بس يا خالتو! ده جواز على الورق بقرار منكم!).. بس ابتسمت بخفة وقالت:
- وجودك عمره ما يضايقني يا خالتو، بالعكس ده هو البركة كلها! يلا بقى اقعدي، وانتو يا قمرات اقعدوا على السفرة عقبال ما أغير هدومي وراجعالكم فوراً.
دخلت حبيبة أوضتها الصغيرة، غيرت هدوم الخروج ولبست بيجامة بيت بسيطة وأنيقة، وهي فاكرة إن آدم لسه في المركز الطبي ومش هيرجع دلوقتي. عملت صينية الشاي باللبن وخرجت بيها.
حبيبة:
- اتفضلي يا خالتو.. الشاي بلبن من غير سكر زي ما بتحبيه، بألف هنا على قلبك.
سعاد:
- الله يهنيكي يا حبيبتي.. تسلم إيدك.
قعدت حبيبة جنب "لين" وأدتها المج بتاعها بحذر:
- اشربي يا ليونة بالراحة يا قلبي عشان سخن.. تمام؟
لين:
- حاضر يا بيبه!
سعاد بضحكة:
- يا بت قوليلها يا خالتو.. عيب كده!
لين بتمسك وطفولة:
- لا! هي بيبه وبس!
ضحكت حبيبة بحب ورفعت الطفلة حنين الصغيرة على رجلها ودعبستها:
- قلب بيبه انتي! وأنتي بقى عملتلك لبن دافي.. اشربي يا نينو!
ضحكت الطفلة حنين وقالت بتلعثم عذب: "بيبه!"
بصت سعاد لحبيبة بعيون مليانة فخر ودعاء، وقالت:
- والله العظيم يا حبيبة انتي تستاهلي كل خير.. ربنا يباركلي فيكي يا بنتي. قلبي مرتاح والبنات معاكي. بس قلعي الطرحة دي يا بت! انتي مش شايفه الجو حر إزاي ومفيش حد غريب؟
حبيبة بكسوف وارتباك خايفة من مجيء آدم:
- لا خليني كده أحسن يا خالتو.. مرتاحة كده.
سعاد:
- فكي يا بنتي الطرحة وخدي راحتك! هو أنا غريبة ولا إيه؟!
قلعت حبيبة الحجاب نزولاً على رغبة خالتها، وشعرها الأحمر القاني الطويل الناعم نزل على كتافها وظهرها زي الشلال!
سعاد بإعجاب وشغف:
- بسم الله ما شاء الله! تبارك الخلاق فيما خلق.. طول عمرك يا حبيبة شعرك مميز ولونه يجنن، ربنا يحفظك من العين يا بنتي!
حبيبة بابتسامة خجولة:
- تسلميلي يا خالتو.. ده من ذوقك.
لين بتأمل وإعجاب طفولي:
- أنا نفسي لما أكبر شعري يبقى طويل وجميل زيك كده يا خالتو بيبه!
حبيبة وهي بتلاعبها وتزغزغها:
- وهيبقى أحلى وأطول من شعري كمان يا روح خالتو!
الصالة اتملت بضحك الصغار وسعاد.. وفي اللحظة دي بالذات، اتفتح باب الشقة ودخل دكتور آدم!
اتسمر آدم في مكانه.. المشهد قدامه كان شبه حلم كان يتمنى يتحقق؛ أمه قاعدة معاهم في بيته، والضحكة مالية المكان، والبنات طايرين من الفرحة. افتكر إزاي كان بيترجى مراته المرحومة حنين عشان توافق أمه تعيش معاهم، وكانت بترفض بلطف.
عين سعاد جت على ابنها اللي واقف مش قادر يتحرك، وعينيه معلقة على حبيبة وضحكتها الصافية.
سعاد بابتسامة مكتومة:
- تعالى يا آدم.. واقف بعيد ليه يا بني؟
أول ما اسمه اتقال، التفتت حبيبة بسرعة، ومع لفتتها شعرها الأحمر الساحر تطاير حوالين وشها.. وبسرعة وارتباك شديد، سحبت الطرحة وغطت بيها شعرها.
حس آدم بغصة وندم في صدره.. اعتبرته غريب عنها وبتخبي جمالها عنه!
آدم وهو بينحنح وبيحاول يسترد ثباته الطبي:
- السلام عليكم ورحمة الله وبركاته..
الجميع:
- وعليكم السلام ورحمة الله وبركاته.
سعاد:
- تعالى يا بني.. أنا هقوم أسيبكم على راحتكم.
حبيبة باندفاع واستغراب:
- ليه يا خالتو؟! إحنا مش اتفقنا إننا هنتغدى ونفطر سوا من هنا ورايح؟
سعاد:
- يا بنتي ملهاش لازمة التضييق، عشان تكونوا على راحتكم وأنا كمان أكون على راحتي.
حبيبة:
- بصي يا خالتو.. انتي هتقعدي معانا هنا طول اليوم، وعن النوم انزلي شقتك عادي لو مرتاحة في سريرك! يلا بقى نجهز الغدا سوا..
سعاد بابتسامة رضا:
- برضه مصممة يا بت؟
حبيبة:
- اه مصممة جداً!
نطق آدم بصوت هادي وفيه نبرة جديدة حبيبة ماشفتهاش منه قبل كده:
آدم:
- استني يا حبيبة.. عايزك بعد إذنك في المكتب كلمة.
بصت سعاد لحبيبة وغمزتلها:
سعاد:
- روحي يا حبيبة شوفي جوزك عايز إيه، وأنا هطلع العلبة من الثلاجة عقبال ما تجيلي.
هزت حبيبة رأسها ودخلت وراه أوضة المكتب. دي كانت أول مرة تجري فيها رجلها المكان ده، حتى أيام اختها حنين ما دخلتش مكتبه خالص.
آدم بهدوء وهو بيقعد ورا مكتبه الأنيق:
- اقعدي يا حبيبة.. متخافيش.
قعدت حبيبة على حرف الكرسي وهي مستنية بسكون تشوف هيقول إيه.
بصلها آدم بجدية وقال بوضوح:
آدم:
- أنا آسف يا حبيبة.
رفعت حبيبة رأسها بصدمة وبصت في عينيه باستغراب كأنها بتسأله من غير كلام: بتعتذر عن إيه؟
آدم بصدق ونبرة رجولية حاسمة:
- أيوه زي ما سمعتي.. أنا بقولك أنا آسف، وعايزك تتقبلي اعتذاري.
حبيبة:
- أنا مش فاهمة حضرتك بتعتذر عن إيه يا دكتور آدم؟
آدم:
- بتأسف عشان انتي صونتي اسمي وكرامتي وعرضي النهاردة في الكلية قدام الدكاترة والطلبة كلهم.. ودي حاجة أنا مديون لك بيها جداً يا حبيبة.
ابتسمت حبيبة ابتسامة كبرياء وقوة وقالت بنبرة حازمة:
حبيبة:
- أولاً يا دكتور آدم، مفيش داعي للأسف.. ثانياً، اللي أنا عملته النهاردة مع دكتور معتز عملته عشان ديني وأخلاقي وضميري وكرامتي! أنا صونت نفسي واحترامي لذاتي قبل ما أصون أي حد تاني.. يعني انت مش ملزم إنك تتأسفلي أو تحس إنك مديون لي!
عيون آدم اتوسعت بفخر وإعجاب شديد.. دي مش مجرد بنت اتجوزها بغصب، دي ست أصلها طيب وكبريائها شامخ زي الجبال.
قرب منها خطوة، ومراعي مسافتها وخصوصيتها، وقال بصوت حنين:
آدم:
- أنا مش بتأسف بس على موقف النهاردة، لأن ده طبيعي ومن أصلك وتربيتك النظيفة.. أنا بتأسف على سوء الظن والقسوة اللي اتعاملت بيهم معاكي قبل كده.
كسوف حبيبة زاد وبصت للأرض:
- حصل خير.. عن إذنك عشان أروح أساعد خالتو.
آدم:
- اه صحيح.. بمناسبة وجود أمي هنا، أنا بجد بشكرك من قلبي على اللي عملتيه.
حبيبة:
- تقصد إيه؟
آدم:
- أقصد إنك قدرتي تنفذي اللي أنا فشلت فيه لسنين.. إنك تقنعي أمي تقعد معانا وما تفضلش وحيدة تحت.
حبيبة:
- أنا معملتش حاجة، وجود خالتو هو البركة والخير للبيت ده كله.. عن إذنك.
وجت تخرج، فناداها بطريقة حابب يرفع بيها الحرج عنها:
آدم:
- حبيبة.. استني.
التفتت: "نعم؟"
آدم:
- مش عايز أكون سبب في تقييد حريتك في بيتك.. يعني مش لازم كل ما تشوفيني تجري تلبسي الطرحة وتتغطي كأني غريب.. انتي هنا في بيتك يا حبيبة، فهماني؟
وش حبيبة جاب ألوان وحمر جداً من طريقة كلامه الرقيقة، فقالت بارتباك خجول:
- اه.. اه فاهمة، بس أنا كده مرتاحة.. عن إذنك!
خرجت مسرعة ووشها بيلتهب من الخجل، وأول مرة من شهور طويلة يبتسم آدم ابتسامة طالعة من جوه قلبه بجد!
خرجت حبيبة للمطبخ وهي بتحاول تهدئ أنفاسها، فنظرت لها خالتها سعاد بابتسامة خبيثة:
سعاد:
- إيه يا بت يا حبيبة؟ مال وشك أحمر كده كأنك طالعة من الفرن؟! أوعى يكون آدم ابني ضايقك أو زعلّك؟
حبيبة بارتباك:
- لا لا يا خالتو والله مفيش حاجة خالص!
سعاد:
- أومال كان عايزك في إيه؟
حبيبة:
- كان.. كان بيسأل عن أوراق الرسالة الماجستير يعني!
سعاد بدعاء مخلص:
- ربنا يوفقك يا بنتي وينجحك ويكفيكي شر خلق الله!
دخلوا المطبخ أعدوا الغدا في جو مليان بهجة، والبنات بيلعبوا في الصالة. وقبل ما يقعدوا على الأكل، رن جرس الباب بقوة.
قام آدم يفتح بنفسه، لقى خالته عايدة (أم حبيبة) واقفة وشها متجهم وعينيها مليانة غضب.
آدم بترحيب وتهذيب:
- خالتو عايدة! اتفضلي يا خالتو نورتينا.. تعالي الغدا جاهز.
عايدة بجفاء واضح وما ردتش التحية:
- تسلم يا آدم.. فين حبيبة؟
قامت حبيبة من على السفرة عشان تسلم على أمها بحب، بس أمها تفادت حضنها وقالت بصوت حاد قدام الكل:
عايدة:
- إيه المهزلة والمسخرة اللي سمعت أنها حصلت في الكلية النهاردة دي يا حبيبة؟! والكلام اللي معتز جايبه في حقك وحق العيلة؟!
الكل اتصدم في الصالة!
حبيبة بشهقة واستغراب:
- مهزلة إيه ومسخرة إيه يا ماما؟! أنا مش فاهمة حضرتك بتتكلمي عن إيه!
عايدة بقسوة وإصرار:
- بتكلم عن الفضايح والقيل والقال! ومن هنا ورايح مفيش مرواح للجامعة تاني يا حبيبة! انتي دلوقتي ست متجوزة، وبيتك وبنات اختك المرحومة أولى بيكي وبالوقت ده كله! تاخدي بالك من جوازك وبيتك وبس!
وقفت حبيبة مذهولة، حطت إيدها على بقها والدموع اتجمعت في عينيها.. طول عمر أمها مش مهتمة بطموحها، بس الماجستير كان حلم عمرها اللي سهرت له الليالي!
حبيبة بصوت مخنوق ومكسور:
- مفيش جامعة إزاي يا ماما؟! ده حلمي ودراستي اللي تعبت فيها سنين!
سعاد بانفعال على أختها:
- جرى لعقلك إيه يا عايدة؟! إيه الكلام الفارغ اللي بتقوليه ده؟! البنت مش مقصرة في حاجة!
عايدة:
- ده كلام العقل والمنطق يا سعاد! الست في الآخر مالهاش غير بيتها وجوزها، وشهادتها دي في الآخر هتتحط في الدرج ومش هتشتغل بيها!
دموع حبيبة وانكسارها خلوا دكتور آدم يغلي من جوه.. أخد خطوتين ووقف قدام خالته بكل هيبة وحزم:
آدم بنبرة قاطعة وصارمة وقفت الكل:
- بعد إذنك يا خالتو عايدة.ومع احترامي ليكي . الكلام ده مرفوض تماماً وما يقبلش النقاش! وعذراً يعني.. مين أدالِك الحق إنك تاخدي قرار نيابة عن حبيبة، أو تقولي إنها تقعد من دراستها وتسيب حلمها؟!
عايدة اتصدمت من رد آدم الحاسم وقالت:
عايدة:
- أنا أمها يا آدم وعارفه مصلحتها!وايه يعني لما تقعد مش احسن من الكلام اللي بيتقال .
آدم بثبات ووقار:
- أنا بحترمك يا خالتو فوق راسي لأنك أمها وخالتي.. بس حبيبة دلوقتي مراتي، وبيتها هو بيتي! حبيبة هتكمل الماجستير، وهتناقش الرسالة وهتأخدها بامتياز كمان! ولو حبت تكمل دكتوراه أنا بنفسي هكون أول واحد بيشجعها وبيسندها! ومسمحش لأي حد، كائن من كان، إنه يتحكم في بيتي أو يحبط مراتي أو يهد حلمها بسبب كلام ناس ملوش قيمة! القرار ده بيني وبين مراتي وبس!
التفتت عايدة لأختها سعاد بتدور على دعم:
عايدة:
- وأنتي إيه رأيك يا سعاد في الكلام ده؟! عاجبك كلام ابنك؟!
سعاد بثقة وفخر بابنها:
- هما أحرار يا عايدة! جوزها وموافق وبيشجعها على العلم، إحنا ندخل ليه في حياة دكاترة كبار فاهمين مصلحتهم؟! ربنا يوفقهم ويحميهم. ويفضلو في نجاح وتقدم طول العمر .
الهدوء ساد المكان، في حين كانت حبيبة بتبص لآدم بذهول وصدمة مليانة امتنان، ونظرتها ليه بدأت تتغير تماماً بعد ما وقف زي الاسد عشان يحمي حلمها وكرامتها قدام أقرب الناس ليها!