رواية رشيد وكارمن الفصل الرابع4بقلم ملك ابراهيم
"أول اعتراف بالحب، وأول فراق، وأول صدمة هتقلب حياة رشيد كلها!"
- عدي مات النهاردة الفجر.
كانت كلمات الممرضة زي الصاعقة اللي طاحت بيها، انتفض جسمها بفزع، بصت لوالدة عدي وهي بتبكي وبتصرخ بانهيار، قد ايه اتمنت لو كان اللي بتشوفه دلوقتي ده هزار من عدي او كابوس مزعج وهتفوق منه! لكن كل اللي بيحصل حواليها بيبان حقيقي! أيوه عدي مبقاش في الحياة دي! مش هتشوفه تاني. مقدرتش تستحمل فقدانه بعد ما اتعودت عليه! جريت وهي بتبكي بانهيار، مش عارفة رايحة فين! لكن رجلها خدتها لأوضة رشيد.. فتحت باب الأوضة وهي بتبكي. كان واقف قدام الشباك، لف يبص ليها بصدمة، وقفت قدامه بتبكي وقالت بانهيار: "عدي مات!"
حدق بيها بصدمة. قربت منه وهي بتبكي بانهيار وبتردد كلامها من غير تصديق: "عدي مات.. روحت أوضته وملقتوش.. مات من غير ما اشوفه.. يعني انا كده مش هشوفه تاني.. كان نفسي اودعه."
قرب منها وهو بيحاول يهديها، قال ليها بحنان: "عدي كان تعبان اوي وطول الوقت بيتألم.. هو دلوقتي ارتاح من الألم واكيد هو في مكان احسن."
هزت راسها بالرفض وقالت ببكاء: "انا كنت حبيته واتعلقت بيه اوي.. ليه يخليني اتعلق بيه واحبه كده وهو هيسبني.. ليه كل الناس اللي بحبهم بيسبوني وبيبعدوا عني.. انا مش عايزة اعيش في الدنيا دي لوحدي."
قلبه اتوجع عشانها، مش عايز يشوفها في الحالة دي، عارف انها اتعلقت كتير بعدي ومش ممكن تتخطى موته وفراقه بسهولة. قرب منها ومسك ايديها وقال ليها بصدق: "بس انا مستحيل اسيبك او ابعد عنك.. انا هفضل دايما معاكي يا كارمن متخافيش."
بصت ليه والدموع نازلة من عينيها بغزارة لحد ما بقت مش قادرة تشوف، قالت بصوتها الباكي: "لما تخرج من المستشفى اكيد هتنساني.. انا مش عايزة احب حد تاني.. كل اللي بحبهم بيبعدوا عني!"
ضغط على ايديها بقوة عشان تنتبه لكلامه وقال ليها بقوة: "انا مستحيل انساكي.. عشان انا بحبك."
[عادت من ذكرياتها على اعترافه لها بالحب]
وقفت عربية الأجرة اللي بتنقلها هي وصاحبتها في الحي السكني اللي ساكنة فيه، رجعت للواقع، محستش بالدموع اللي غرقت وشها وهي بتفتكر الماضي، قالت ليها مودة بدهشة: "مالك النهاردة يا كارمن مش طبيعيه!"
جففت دموعها بصوابعها ونزلت من العربية بصمت، وقفت تستنشق الهوا عشان تهدى شوية، وقفت مودة جنبها وقالت بقلة حيلة: "طب اطلعي ارتاحي يا كارمن شكلك تعبانه النهاردة."
ختمت كلامها وهي متجهة للعمارة اللي ساكنة فيها: "يلا تصبحي على خير."
وقفت كارمن تستنشق الهوا البارد، ياريته يبرد قلبها ويهديها شوية، اتقدمت للعمارة اللي ساكنة فيها، فضلت تطلع السلم لحد ما وصلت للدور الأخير، اتقطعت أنفاسها وفضلت تنهج بتعب، وقفت بسطح العمارة تبص للأوضة المتهالكة اللي ساكنة فيها مع والدتها، اتجهت للأوضة وفتحت الباب. كانت الأوضة مليانة دخان، اتقدمت جوه الأوضة ومعاها كحة قوية بعد ما استنشقت كل الدخان ده، جريت للشباك وفتحته بقوة، لفت تبص لوالدتها القاعدة فوق السرير براحة ومسكة في ايديها واحدة من السجاير وجنبها عدد كبير من السجاير اللي خلصت بعد ما شربتها، قربت من والدتها وقالت ليها بغضب: "ايه كل السجاير دي.. انتي كده بتمو..تي نفسك بالبطيئ وبتمو..تيني معاكي!"
رمقتها والدتها ببرود، طلعت الدخان من بوقها في الهوا وقالت بملل: "جبتي اكل وانتي جايه؟"
حدقت بوالدتها بصدمة، عارفة ان الكلام معاها هييجي من غير فايدة، زفرت بقلة حيلة واتجهت للتلاجة الصغيرة المحطوطة في الأوضة، أخدت من جواها حتة جبنة مع رغيف عيش وحطتهم قدام والدتها، رمقتها والدتها بغضب ورمت الأكل في وشها وصدح صوتها بصراخ: "طول اليوم برا البيت وراجعه تأكليني جبنه!!"
غمضت عينيها بتعب، متحملتش أكتر، خلاص اكتفت النهاردة. فتحت عينيها وبصت لوالدتها من غير رد فعل، بس الدموع نازلة من عينيها بصمت، انهارت في البكاء قدام والدتها، جريت من الأوضة لبره، وقفت تلتقط أنفاسها بسطح العمارة، والهوا البارد بيتخبط في جسمها، حاسة بالبرودة الشديدة، مبقتش تستحمل اللي بيحصل معاها، قسوة والدتها وفراق حبيبها وحياتها اللي بقت بائسة والفقر اللي بقى رفيقها، وشغلها الشاق طول اليوم من غير راحة، وفي المقابل عليها انها تسكت وتصبر وتواجه كل حاجة لوحدها. غمضت عينيها وسمحت لدموعها انها تنزل، مش ممكن تعمل حاجة تانية عشان تفرغ اللي جواها من ألم. افتكرت لما كانت بتبكي بضعف زي الحالة دي، ازاي كان بيخفف عنها رشيد، رجعت بذاكرتها مرة تانية للماضي، لما اعترف ليها رشيد جوه المستشفى عن مشاعره اتجاهها.... ✋.
- انا مستحيل انساكي.. عشان انا بحبك.
بصت ليه بصدمة بعد ما سمعت كلماته، بعدت عنه شوية وهمست بذهول: "بتحبني!!"
قرب منها وهز راسه بالموافقة وقال بثقة: "اه يا كارمن بحبك."
اترعش جسمها بصدمة وهي بتبص ليه بذهول، مداهاش فرصة للتفكير؛ ازاي وامتى حبها؟ وقف قدامها وهو بيتأملها بنظرات عاشقة وكمل: "اول مرة شوفتك فيها اتخلق جوايا احساس جديد مكنتش عارف ده ايه! شعوري اتجاهك مختلف واول مرة اشعر بيه، انتي قدرتي تدخلي قلبي في الفترة القليله اللي عرفتك فيها، كل يوم كنت بتأكد ان مشاعري اتجاهك حب مش أي حاجة تانيه، انا بعترف بحبي ليكي دلوقتي وانا واثق ومتأكد من صدق مشاعري."
وقفت بتسمع كلماته بصدمة، شعورها بالحزن لفقدان عدي مع شعورها بالصدمة من كلامه اللي جه في وقت مكنتش جاهزة تسمعه فيه، وقف عقلها عن التفكير، أرادت تبعد شوية عشان تقدر تستوعب اللي بيحصل معاها، هزت راسها بصدمة واتجهت لبره الأوضة بسرعة من غير رد على كلامه، وقف بصدمة بيتابع خروجها من الأوضة، حس انه اتسرع في اعترافه ليها بمشاعره، اتسلل جواه شعور بالندم بعد اعترافه ليها بالطريقة دي وفي الوقت ده.
جريت لأوضتها وهي في حالة من الصدمة، قفلت باب الأوضة وقعدت فوق السرير، كلماته كانت بتتردد على ودنها، قلبها كان بيخفق بقوة، دموعها نازلة من غير توقف، كانت حزينة على فقدان عدي، وقلبها بينبض بشعور جديد اتجاه رشيد، كانت في حالة سيئة ومش حاسة بحاجة غير ألم وخفقات سريعة في قلبها ودموع نازلة على وشها من غير توقف.
فضلت على الحالة دي لحد الصبح بدري، دخلت الممرضة الأوضة وقالت ليها ان والدتها رجعت من السفر وقالت لإدارة المستشفى انهم يسمحوا ليها بالخروج دلوقتي، وقالت ليها ان والدتها مستنياها دلوقتي بالعربية بره المستشفى، كانت محتاجة أوي لوالدتها، ساعدتها الممرضة في جمع متعلقاتها وهدومها جوه الشنطة، خرجت من الأوضة وهي حزينة وعينيها لامعة بالدموع، بصت لأوضته وعايزة تروح ليه عشان تودعه قبل ما تمشي، لكنها اتكسفت من مواجهته بعد كلامه معاها، تابعت مشيها ومشيت من المستشفى، قلبها كان بيخفق بقوة مع كل خطوة بتخطوها وبتبعدها عنه، كانت بتلتفت وراها وهي في حيرة؛ مش عايزة تبعد عنه وتسيب المكان ده اللي جمعهم ونشأ فيه حبهم.
رواية رشيد وكارمن بقلمي ملك إبراهيم.
كانت والدتها قاعدة جوه العربية وبتبص لتليفونها بملل، قربت من العربية وقام السواق بمساعدتها وأخد الشنطة من ايديها وحطها بالعربية، طلعت جوه العربية جنب والدتها ورا، كان استقبال والدتها ليها بارد زي ما اتعودت منها، بصت ليها والدتها نظرة سريعة وقالت ببرود: "عامله ايه دلوقتي؟ كويسه"
كان سؤالها بيضم الإجابة المنتظرة اللي بتطالبها والدتها انها متقولش غيرها، هزت راسها بحزن وجاوبت: "اه كويسه."
هزت والدتها راسها بالموافقة وقالت للسواق بلغة الأمر: "وصلنا البيت."
اتحركت العربية من قدام المستشفى، رجعت والدتها تبص لتليفونها من غير ما تلاحظ الحزن والألم اللي بتعاني منه بنتها، لفت كارمن براسها لشباك العربية اللي جنبها ودموعها نازلة بصمت، اتمنت في اللحظة دي انها تروح لرشيد وتقوله قد ايه هي محتاجة ليه انه يكون في حياتها وانه ميسيبهاش ابدا.... ✋.
فاقت من شرودها وجففت دموعها بصوابعها، حاسة دلوقتي انها محتاجة ليه بجد، ده اللي كانت حاسة بيه في الماضي، ومش ممكن تواجهه دلوقتي بعد اللي عملته فيه، هو عمل كتير عشانها وعشان سعادتها، وهي عملت ايه في المقابل.. اتسببت في تدمير حياته، خسر شغله في الشرطة عشانها، وكان على وشك انه يفقد حياته كمان. انهارت في البكاء من جديد كل ما افتكرت اللي عملته فيه، همست بتردد بصوت باكي حزين: "انا اسفه"
رواية رشيد وكارمن بقلمي ملك إبراهيم.
عند رشيد.
وصل رشيد بعربيته لمنزل عيلته، وقف بالعربية قدام المنزل، حاسس بألم شديد في قلبه، رؤيته ليها النهاردة مكنتش في صالحه، صحت الماضي جواه من جديد، كان فاكر انه قدر يتخطى الماضي وعلى استعداد يبدأ حياته من جديد، بقت بتلاحقه كل ما فتح عينيه والماضي بيلاحقه كل ما غمض عينيه. سند براسه على مقود العربية ورجع بذكرياته للماضي.... ✋.
لما رجع لمنزله بعد ما مشيت هي من المستشفى من غير ما تقوله حاجة. صحي في صباح اليوم ده وانتظرها كتير انها تيجي لأوضته في المستشفى زي ما اعتادت تعمل كل يوم، قالت ليه الممرضة انها سابت المستشفى ومشيت مع والدتها في الصبح بدري. خبر مشيها من المستشفى كان صادم ليه. مقدرش يقعد في المستشفى بعد ما مشيت، قرر يرجع لمنزله، اتصل على صاحبه خالد وطلب منه انه ييجي للمستشفى وياخده للمنزل.
وصل المنزل واعتقد ان رجوعه هيكون مفاجأة لعيلته، لكن المفاجأة الكبيرة كانت من نصيبه، دخل المنزل وهو بيسمع صوت مشاجرة بين عيلته، وقف يتطلع ليهم بصدمة، والدته كانت قاعدة على واحد من الكراسي وبتبكي وأخته واقفة جنب والدتها وبتطبطب على ضهرها وبتبكي هي كمان، على الجانب التاني كان واقف والده بوش متهكم وجده قاعد وموطي وشه بصدمة وحزن، قرب منهم بصدمة وقال بقلق: "في ايه! ايه اللي بيحصل هنا؟"
سمعت والدته صوته، رفعت وشها وبصت ليه بعينيها الباكية، وقفت بسرعة وجريت ليه وهي بتبكي وبتصرخ وقالت: "رشيد.. شوفت باباك عمل فيا ايه.. معقول انا استحق ده منه بعد العمر ده كله!"
فتح دراعه وأخد والدته في حضن بحماية، صدح صوت والده وقال بغضب: "انا معملتش حاجة تغضب ربنا، انا اتجوزت على سنة الله ورسوله.. انتوا بتحاسبوني علي ايه، انا راجل والشرع محللي اتجوز اتنين وتلاته واربعه!"
حدق رشيد بوالده بصدمة، خجل والده شوية من نظراته ونظرات بنته اللي متوقفتش عن البكاء، وقف الجد "نور الدين الجبالي" وقال لابنه بصرامة: "بس انت مش ناقصك حاجة يا وجيه عشان تتجوز على مراتك اتنين وتلاته واربعه.. وبعدين مين دي اللي انت اتجوزتها، وازاي واحدة محترمة تقبل انها تتجوز راجل متجوز وعنده عيال علي وش جواز.. انت ازاي مفكرتش في عيالك وانت بتعمل المصيبه دي!"
قالت والدة رشيد ببكاء وهي واقفة جنب ابنها: "كان فاكر اننا مش هنعرف، اتجوز وسافر يقضي شهر عسل ومفهمنا انه كان مسافر في شغل!"
مصدقش رشيد اللي بيسمعه، كان بيبص لوالده بصدمة، قعد الجد مرة تانية ووطى وشه بيفكر شوية، رفع وشه وبص لحفيدته وقال ليها بأمر: "خدي مامتك يا رهف واطلعوا انتوا على فوق."
صدح صوت والدة رشيد بصراخ: "انا مش هطلع على مكان قبل ما يطلقني!"
بص ليها جوزها بصدمة، قال ليها والد جوزها بتأكيد: "التانيه اللي هتطلق مش انتي يا ماجدة.. انتي مراته وام عياله، انما التانيه مش اكتر من نزوه وهو لازم يفوق لنفسه ويصلح غلطته."
ارتفع صوت الجد مرة تانية بصرامة: "يلا يا رهف.. خدي والدتك واطلعوا على فوق."
قربت رهف من والدتها وأخدتها وطلعت معاها للدور اللي فوق من المنزل. وقف رشيد وهو بيحاول يستوعب اللي بيحصل، استنى الجد "نور الدين الجبالي" لحد ما طلعت حفيدته ووالدتها لفوق وبعدين قال لابنه بصرامة: "انت اتجننت! انت ازاي تتجوز على مراتك بعد العمر ده كله بينكم؟!"
وطى وجيه والد رشيد وشه وقال بتلعثم: "يا بابا انا راجل ومن حقي...."
قاطعه والده بصرامة: "انت مش من حقك اي حاجة.. ولادك دول هما اللي من حقهم انهم يرفعوا راسهم وسط الناس.. تقدر تقولي مين اللي انت اتجوزتها دي؟!"
بص رشيد لوالده بترقب، قال وجيه بتوتر: "ست حبتها واتجوزتها.. فين المشكله؟"
حط الجد ملف فيه معلومات عن الزوجة الجديدة قدام عينين والد رشيد وقال بصرامة: "الملف ده فيه المشكله كلها، الملف ده فيه كل المعلومات عن النصابه اللي انت اتجوزتها. انت عارف الهانم اتجوزت قبلك كام مرة.. طب عارف كام واحد اتجوزته واستولت على فلوسه كلها وسابته، ازاي تحط اسمك وسمعتك بين ايدين واحده زي دي!"...