رواية رشيد وكارمن الفصل الخامس5بقلم ملك ابراهيم
"فيه حكايات بتبدأ بصدفة.. وحكايات بتبدأ بوجع.. لكن حكاية رشيد وكارمن بدأت بالاتنين مع بعض.
هو راجل اتعود يحمي الكل، إلا قلبه.
وهي بنت اتعودت تشيل وجعها لوحدها، ومحدش حس بيها.
اتقابلوا في وقت كان كل واحد فيهم محتاج التاني من غير ما يعرف"
الملف ده فيه المشكله كلها، الملف ده فيه كل المعلومات عن النصابه اللي انت اتجوزتها. انت عارف الهانم اتجوزت قبلك كام مرة.. طب عارف كام واحد اتجوزته واستولت على فلوسه كلها وسابته، ازاي تحط اسمك وسمعتك بين ايدين واحده زي دي!
قرب وجيه من والده وأخد الملف وفتحه، بدأ يقرأ المعلومات عن مراته التانية وكام راجل اتجوزته وأسماءهم وكلهم رجال أعمال واستولت على فلوسهم بجد. بص لوالده وقال بتوتر: "انا مكنتش اعرف المعلومات دي عنها!"
قال اللواء نور الدين الجبالي بصرامة: "لازم تطلقها ومن غير شوشره والاهم ان مفيش مخلوق يعرف ان الجوازة دي حصلت.. متنساش ان شغل ابنك حساس وبنتك على وش جواز واي حاجة زي دي هتسوء سمعة العيلة!"
كان رشيد واقف وبيتابع الكلام بصدمة، مش مصدق ان والده يعمل كده فيهم. قال الجد لرشيد بتأكيد: "بكره الصبح هنروحلها انا ورشيد ولازم ننهي الموضوع ده معاها بهدوء."
اتووتر وجيه كتير وكمل بقلق: "وانا هاجي معاكم؟"
رفض والده بإصرار: "لاء.. انت مش مطلوب منك غير تطلقها بس، والباقي انا هحله."
وبعدين بص لرشيد وكمل: "وانت يا رشيد.. جهز نفسك عشان هتيجي معايا نقابل الست دي بكره."
هز رشيد راسه بالموافقة وهو بيبص لوالده بلوم على اللي عمله في حقهم، وطى وجيه راسه بحزن بعد ما شاف النظرة دي في عين ابنه، استأذن رشيد من جده وبعدين طلع لوالدته في الدور اللي فوق عشان يطمن عليها.
رمق اللواء نور الدين ابنه بغضب وسابه ومشي هو كمان.
رواية رشيد وكارمن بقلمي ملك إبراهيم.
صباح اليوم التالي.
قعدت كارمن جوه أوضتها، مغمضتش عينيها طول الليل؛ بتفكر في رشيد وكلامه معاها في المستشفى، حاسة بالندم بعد ما سابت المستشفى قبل ما تقوله انها بتبادله نفس المشاعر، هيفتكر دلوقتي انها رافضة حبه، قامت من فوق السرير وقررت تروح للمستشفى عشان تتكلم معاه وتقوله بمشاعرها اتجاهه.
لبست هدومها وخرجت من البيت قبل ما تصحى والدتها، عارفة ان والدتها مش هتصحى في الوقت البدري ده في الصباح. شاورت لعربية أجرة وركبت جواها في طريقها للمستشفى.
رواية رشيد وكارمن بقلمي ملك إبراهيم.
بعد شوية..
وصل رشيد بعربيته قدام بيت مرات والده التانية، نزل من العربية مع جده. بص للبيت بغضب وقال: "ده العنوان اللي في الملف."
بص ليه جده وقال بتأكيد: "حاول تمسك اعصابك يا رشيد.. احنا عايزين ننهي الموضوع من غير مشاكل."
ضغط على شفايفه بغضب، وبعدين هز راسه وقال بغضب مكتوم: "هحاول يا جدي.. خلينا نطلع نتكلم معها ونشوف الموضوع هينتهي على ايه!"
طبطب جده على ضهره ومشي معاه للبيت، ضغط رشيد على زرار الجرس واستنى..
كانت والدة كارمن نايمة براحة فوق سريرها، صوت الجرس المزعج متوقفش عن ازعاجها، صحيت بصعوبة، بتلعن في سرها المتطفل ده اللي جه في الوقت البدري ده، قامت من فوق السرير وأخدت الروب الحريري ولبسته فوق قميص نومها، خرجت من أوضتها بغضب وهي بتتوعد جواها للي جالها في الوقت البدري ده وصحاها من نومها، فتحت الباب بعصبية ورمقت الطارق بغضب.
وطى رشيد وشه وغض بصره بسرعة لما شافها بملابس النوم، اتطلعت ليهم بغضب وقالت بنبرة فظة: "خير؟ مين حضراتكم؟"
وطى الجد وشه وقال ليها بغضب مكتوم: "انا اللوا نور الدين الجبالي.. والد وجيه الجبالي اللي انتي اتجوزتيه."
وبعدين شاور لرشيد وكمل: "وده النقيب رشيد.. ابن وجيه الكبير."
رسمت ابتسامة مزيفة على وشها ورحبت بيهم بنبرة باردة: "اهلا.. اتفضلوا."
قال الجد قبل ما يتقدم لجوه: "اتفضلي انتي الاول ادخلي غيري هدومك عشان نعرف نتكلم."
بصت لهدومها وبعدين رجعت ببصرها تبص ليهم باستخفاف وقالت ببرود: "ماله لبسي! عموما مفيش مشكله.. هدخل اغير لو مضايقكم! واتفضلوا ادخلوا لما اغير لبسي وارجعلكم."
سابتهم على الباب واقفين واتجهت لأوضتها مش مهتمة بحاجة، زفر رشيد بغضب وقال لجده بصدمة: "معقول بابا اتجوز الست دي!"
طبطب الجد على ضهره وجاوبه بقلة حيلة: "شكلها ست مش سهلة وشكل الاتفاق معاها هيكون اصعب ما كنت اتخيل."
هز رشيد راسه بالموافقة واتقدم مع جده لجوه البيت وهو بيرمق كل ركن في البيت بنظرات غاضبة، قعد جده وطلب منه القعاد جنبه في انتظارها.
دخلت والدة كارمن "سهير سالم" جوه أوضتها وحاولت تتصل على جوزها "وجيه" عشان تقوله ان والده وابنه في بيتها دلوقتي. مردش وجيه على اتصالاتها المتكررة، بصت للتليفون بتفكير وبعدين ابتسمت بسخرية بعد ما فهمت سبب عدم رد وجيه عليها ومجيئ والده وابنه في الوقت البدري ده! ابتسمت بمكر وهي بترتب أفكارها، وبعدين اتجهت لدولاب الهدوم عشان تاخد هدوم تانية تلبسها.
استناها رشيد وجده بره أكتر من نص ساعة. كانت واقفة قدام المراية بتحط مساحيق التجميل فوق وشها بتمهل وهي بترتب أفكارها مش مهتمة بانتظارهم ليها كل الوقت ده.
زفر رشيد بغضب وهو قاعد جنب جده في انتظارها، وبعدين وقف بعصبية وقال: "اللي الست دي بتعمله قلة ذوق.. احنا بقالنا اكتر من نص ساعه مستنينها!"
مسك جده ايديه وقال ليه بهدوء: "اهدا يا رشيد.. احنا لازم ننهي الموضوع ده النهارده وبهدوء."
قعد رشيد جنب جده مرة تانية وقال بنبرة غاضبة: "انا مش قادر أصدق ان بابا يتجوز ست زي دي!"
وطى جده راسه بقلة حيلة وطبطب على ايديه بصمت.
خرجت سهير من أوضتها وقربت منهم وهي بترسم ابتسامة باردة فوق وشها وقالت بتعالي: "تحبوا تشربوا حاجة؟"
وبعدين قعدت باسترخاء فوق كرسيها قبل ما تسمع ردهم، حطت رجل فوق التانية بطريقة وقحة متكبرة وهي بترمقهم بنظرات باردة.
زفر رشيد بغضب وهو بيتطلع ليها بنظرات غاضبة، انتفض من مكانه واقف عشان يمشي، بتستفزه كتير ببرودها ووقاحتها، بص ليه جده وقال ليه بهدوء: "اقعد يا رشيد وخلينا نتكلم ونمشي على طول."
بص لجده وبعدين قعد وهو بيرمقها بنظرات غاضبة، حركت رجليها بتعالي وقالت بملل: "ياريت نتكلم على طول لاني لسه مكملتش نومي."
غضب رشيد بشدة من اسلوبها الوقح معاهم، حط الجد ايديه فوق كتف حفيده عشان يهديه شوية، وبعدين اتكلم معاها بصرامة: "احنا مش هنقول كلام كتير لانك اكيد عارفه احنا جاين ليه النهارده.. من الاخر كده تاخدي كام وتطلقي بهدوء ومن غير شوشره؟"
ابتسمت بسخرية ومتفاجأتش بجد من كلامه، اتطلعت ليهم ببرود وجاوبت عليه بثقة: "ومين قال اني عايزة اتطلق!"
متحملش رشيد برودها ووقاحتها معاهم، قال ليها بنبرة غاضبة قاسية: "ميهمناش انتي عايزة ايه.. اللي يهمنا ان اسم عيلتنا متشلوش واحدة زيك!"
رمقته بغضب وارتفعت حدة صوتها: "واحدة زيي يعني ايه! هو باباك قالكم عني ايه بالظبط! انت متعرفش انه عمل المستحيل عشان اوافق اتجوزه!"
خرج الجد عن صمته وقال ليها بصرامة: "لو كان عرف تاريخك وعدد الرجالة اللي اتجوزتيهم واستوليتي على فلوسهم، اكيد مكنش اتجوزك وشيلك اسم عيلة متحلميش انك تكوني واحدة منهم!"
اتوترت كتير بعد مواجهته ليها بعدد زواجها وعلمه انها بتستولى على أموالهم قبل ما يتم الطلاق، جف حلقها من شدة التوتر، حاولت تسترخي شوية وتظهر قوتها، بلت ريقها وقالت ليه وهي بتحاول ترسم البرود على ملامحها: "والمطلوب ايه دلوقتي؟"
جاوبها رشيد بنبرة حادة: "تطلقي ونخلص بالمعروف."
ضحكت بطريقة خليعة وقالت ليه بسخرية: "وماله.. انا معنديش مانع، بس اخد المؤخر بتاعي الاول."
بص ليها الجد بغموض، قال رشيد بنفاذ صبر: "هو المؤخر كام يعني؟!"
استرخت في قعدتها وجاوبته ببرود: "مليون جنيه."
حدق بيها رشيد بصدمة، وطى الجد وشه في الأرض؛ ده اللي توقعه لما طالبت بأخد المؤخر، بص رشيد لجده بذهول، عقله رافض يستوعب ان والده وقع على المبلغ الكبير ده كمؤخر لست زيها، بص ليه جده بقلة حيلة، وبعدين بص ليها وقال بغضب مكتوم: "اتفقنا.. الطلاق يتم النهاردة وانا هديكي المليون جنيه، بس بشرط.."
بصت ليه بلا مبالاة، كمل بقوة وتأكيد: "مفيش مخلوق يعرف بالجوازة دي، وابني تنسيه خالص ومتفكريش تظهري في حياته مرة تانيه."
ابتسمت بسخرية من الكلام وقالت ببرود: "اعتبرني نسيته من دلوقتي، وياريت ولا انتم ولا هو تظهروا في حياتي مرة تانيه."
خلص صبر رشيد، انتفض واقف بغضب، وقف جده بسرعة جنبه ومسك بايديه عشان ميفقدش اعصابه، قال ليها الجد بصرامة: "النهاردة بالليل هنتقابل عند المحامي وهيتم الطلاق وهتاخدي الفلوس اللي طلبتيها."
هزت راسها ببرود، رمقها رشيد بغضب، مبقاش يتحمل القعاد في البيت ده أكتر من كده، أخد جده وخرج من البيت، زفر بغضب وهو متجه لعربيته، وقف قدام العربية وانفجر غضبه وقال بانفعال: "انا مش مصدق ازاي بابا يعمل عمله زي دي ويتجوز واحده زي دي! عقله كان فين وهو بيوقع علي ورق جوازه منها!"
قال جده بقلة حيلة: "خلاص يا رشيد اهدى، باباك غلط ولازم ندفع تمن غلطته."
زفر رشيد بغضب ورمى نظرة أخيرة على بيتها قبل ما يمشي بعربيته، أراد لو قدر يحرق البيت ده وهي جواه، قد ايه كره غرورها وبرودها ووقاحتها، ركب العربية وجده جنبه، انطلق بعربيته في طريقهم للبيت...✋.
ذكريات كتيرة جمعتهم، بتتخبط في مشاعره بين الحب والكراهية. مشاعره الصادقة بالحب اتجاهها، مقابل مشاعر الكراهية اتجاه والدتها. محسش قد ايه من الوقت عدى وهو كان شارد في الماضي، مازال جوه عربيته قدام بيت عيلته. قرب جده من العربية وقال ليه بقلق: "رشيد... انت كويس؟!"
التقط أنفاسه وبعدين نزل من العربية وقرب من جده وجاوب عليه بإرهاق: "انا كويس يا جدي متقلقش."
اتأمله جده بترقب وقال بفضول: "انت قاعد جوه عربيتك بقالك اكتر من ساعة، شكلك كنت بتفكر في حاجة مهمة؟!"
بص لجده واتعمق في النظر ليه شوية وبعدين خد نفس عميق وجاوب: "انا شوفت كارمن النهاردة."
حدق بيه جده بصدمة، وطى رشيد وشه بحزن وكمل: "من وقت ما شوفتها وانا متلخبط."
اتأمله جده بحزن، رفع وشه يبص لجده مرة تانية وكمل بغضب: "ليه قلبي دق لما شوفتها! ليه خوفت عليها لما ايديها اتجرحت؟!"
اشتد غضبه أكتر وكمل بصوت مرتفع: "معقول لسه بتآثر فيا! معقول انا مقدرتش انساها بعد كل اللي عملته فيا!"
طبطب جده على ضهره وقال ليه بهدوء: "اهدى يا رشيد.. هي برضه كانت في يوم من الايام مراتك.. يعني مش معقول هتنساها بالسهوله دي!"
صدح صوته الغاضب مرتفع: "لا انا لازم انساها.. لازم امحيها من ذاكرتي.. مش عايز افتكرها ابدا.. مش عايز افتكر اي لحظة عشتها معاها."
ضمه جده بقوة عشان يهدى شوية، حس وكأن جواه بركان من نار، همس ليه جده بندم: "يارتني ما كنت طلبت منك ترجع هنا تاني، ياريت فضلت مسافر وبعيد عنها."
بعد عن جده وقال بصراخ: "انا مقدرتش انساها لحظة واحدة وانا بعيد عنها، انا كنت بخدع نفسي وبقول نسيت، وهي جت وبكل سهولة فكرتني بكل الوجع اللي عشته بسببها."
طبطب جده على كتفه بحزن وقال ليه بقوة: "انساها يا رشيد.. متسمحلهاش تدمر حياتك زي ما عملت زمان.. البنت دي زي مامتها ومستحيل هتتغير."
اشتعلت عيناه بالغضب، محسش حد بالنيران المشتعلة جواه وقلبه اللي بيتألم من خيانتها، بص قدامه للفراغ وهمس جواه بإصرار: "مش قبل ما اعرف هي عملت فيا كده ليه! ووقتها انا مش بس هنساها.. انا هدمر حياتها زي ما دمرت حياتي.. انا لازم انتقم منها وادفعها التمن غالي اوي."
رواية رشيد وكارمن بقلمي ملك إبراهيم.
صباح اليوم التالي.
راحت كارمن لشغلها، بتشتغل في الصباح مدرسة في روضة خاصة للأطفال، وفي المساء بتشتغل نادلة في واحد من المطاعم الشهيرة.
بتقضي يومها بالشغل عشان توفر الفلوس لدفع إيجار السكن وتوفير احتياجات والدتها اللي متنازلتش عن طلباتها الكتيرة رغم افتقادهم للفلوس بعد ما خسرت والدتها كل اللي تملكه.
خلصت شغلها في الروضة وراحت لواحد من المطاعم واشترت الأكل الجاهز وأخدته لوالدتها عشان متغضبش منها زي ما عملت ليلة امبارح.
رجعت للبيت عشان تدي والدتها الأكل وتستعد للذهاب لشغلها التاني في المطعم. أخدت منها والدتها الأكل ببرود وفضلت تنتقد الأكل وكل اللي بتعمله كارمن عشانها. لبست كارمن هدومها وهي بتسمع كلمات والدتها القاسية بصمت، خرجت من البيت وراحت لشغلها مع صاحبتها مودة، متوقفتش مودة عن الكلام طول الطريق لحد ما وقفتها كارمن وقالت ليها بفضول: "انتي برضه مش هتقوليلي كان مالك امبارح؟"
بصت ليها كارمن بإرهاق وجاوبتها: "مفيش حاجة يا مودة انا تعبانه بس شويه."
اتنهدت بتعب وبعدين تابعت مشيها، وقفت مودة قدامها وقالت مرة تانية بفضول: "نفسي اعرف في ايه انتي مخبياه عليا؟"
بصت ليها بتوتر وجاوبتها بارتباك: "مفيش حاجة.. انا كويسه."
اتأملتها مودة بترقب، حاسة ان كارمن بتخبي عنها حاجة في ماضيها، كل حاجة بتعملها كارمن بتدل على انها بتهرب من حاجة ، كارمن جت مع والدتها من أربع سنين للسكن في الحي اللي ساكنة فيه مودة، متكلمتش عن ماضيها ولا مرة، دايما بتفضل الصمت. مستسلمتش كارمن لفضول مودة وجاوبتها بنبرة حادة شوية: "ياريت بلاش تسأليني تاني يا مودة.. لو في حاجة من حقك تعرفيها انا هاجي لوحدي احكيهالك!"
حدقت بيها مودة بصدمة. زاد فضولها اكتر، حست ان في قصة طويلة ورا صمت كارمن وهروبها المستمر من الإجابة على أسئلتها.
سابتها كارمن ومشيت في طريقها لشغلها، كانت ماشية بخطوات سريعة، هاربة من ذكرياتها اللي بتجري وراها بعد ما شافت رشيد امبارح واحيا جواها آلام الماضي من جديد.. ميعرفش قد ايه بتشتاق ليه وبتحتاج ليه كتير، رجعت بذاكرتها لليوم اللي راحت فيه للمستشفى بعد ما خرجت من بيتها الصبح بدري عشان تروح ليه وتقوله انها بتبادله نفس المشاعر... ✋.
راحت للمستشفى عشان تتكلم معاه وتعترف ليه بمشاعرها المتبادلة اتجاهه. قربت من باب الأوضة وخبطت بهدوء، اتفاجأت بصوت لشخص تاني بيدعوها للدخول، دخلت وبصت للراجل المسن اللي متمدد فوق السرير، رجعت ببصرها تتأكد من رقم الأوضة، وقفتها الممرضة اللي كانت في الأوضة وقربت منها بتتكلم بابتسامة: "كارمن.. اهلا وسهلا.. اخبارك ايه دلوقتي؟"
بصت ليها كارمن بارتباك وهزت راسها بهدوء وجاوبت بتوتر: "الحمدلله.. انا كنت عايزة رشيد.. هو اتنقل من الغرفة دي؟!"
ابتسمت الممرضة وجاوبت عليها بهدوء: "لا يا كارمن.. حضرة الظابط خرج امبارح من المستشفى."
حدقت بيها بصدمة، خفق قلبها بقوة وهمست بذهول "خرج!!" عقلها فكر في كتير من الأسئلة؛ ليه مشي؟ ازاي يمشي قبل ما يسمع ردها عليه! ياترى تراجع عن كلامه معاها؟ ياترى خسرته بعد ما سابت المستشفى قبل ما تقوله انها بتبادله نفس المشاعر! هتعمل ايه دلوقتي؟ فين هتلاقيه وازاي هتقوله انها بتبادله مشاعر الحب، ازاي تقوله انها محتاجة ليه انه يكون جنبها وميسيبهاش لوحدها. حست بالإحباط ووطت راسها في الأرض ومشيت وهي بتلوم نفسها وحاسة بالندم، قد ايه اتمنت لو يرجع بيها الزمن وتعترف ليه بمشاعرها زي ما عمل. مشيت من المستشفى وهي حزينة، بتفكر ازاي ممكن تشوفه تاني وهي متعرفش عنه حاجة غير اسمه بس.
رجعت للبيت واتفاجأت ان والدتها صاحية بدري، كانت والدتها في أشد حالات الغضب، قربت منها كارمن وقالت ليها بقلق: "ماما في ايه؟"
زفرت والدتها وصدح صوتها الغاضب مرتفع: "مفيش حاجة.. ابعدي عن وشي دلوقتي انا مش طايقه حد."
بعدت كارمن عن والدتها وجسمها بيرتعش بشدة، أخدت والدتها التليفون واتكلمت مع واحدة من صحباتها وقالت ليها ان جوزها الجديد بعت والده وابنه واتفقوا معاها على الطلاق مقابل اعطائها مبلغ مليون جنيه. سمعت كارمن كلام والدتها بحزن وهي مكسوفه من تصرفات والدتها....