رواية لوحاتي الدموية انقذني منها الفصل الرابع4بقلم هاجر نور الدين
- بتعمل معايا كدا عشان صعبانة عليك، بتشفق عليا؟
ضحك بسخرية عليا وقال:
- لو على الشفقة ليها مليون طريقة مساعدة غير دي،
أنا بس شايفك تستاهلي أكتر من كدا بكتير، شايفك خسارة في كل الخوف والحزن دا، وأنا واجبي وظيفتي يعني من واجبها حماية المواطنين وإنتِ أهم مواطنة دلوقتي بالنسبالي.
فضلت بصالهُ شوية وأنا مستنياه يكمل، مستنياه يبرر أو يفهمني، لما شاف نظراتي اللي طولت وسكوتي إتحمحم وقال:
- قصدي يعني واحدة بتعرفلي القضايا من قبل ما تحصل كنز أمني للدولة دي، صح ولا إي؟
فهمت إنهُ بيحاول يخرجني من المود وقولت بهدوء:
- خلاص متقلقش عليا أنا هبقى كويسة إن شاء الله مفيش حاجة تاني، حضرتك بس لازم تروح عشان تلحق ترتاح وأنا أسفة تاني لإزعاجك وكل اللي حصل.
إبتسم وبعد ما ودعتهُ مشي وفضلت باصة للوحة برعب وأنا دموعي بتنزل لوحدها، أنا فعلًا خايفة وفعلًا أتمنى لو اللوحة الجاية تبقى عني عشان أخلص من الكابوس دا.
تاني يوم نزلت الشغل، كنت تعبانة من كل اللي حصل إمبارح،
بس مش هينفع أأجز تاني لأن بقالي يومين فعلًا مش بنزل.
في الشغل مديري كان دايمًا بيرخم عليا، دايمًا بيخصم،
بسبب أو بدون سبب ولكن بيتمني يلاقي غلطة ليا عشان يعاقبني عليها.
وقد كان، بالفعل بقالي يومين غايبة ومن ضمنهم يوم من غير إذن،
جالي عند مكتبي وقال بنبرة غضب:
- أصل هنا الشركة بتقبضكم ورق عشان كل يومين تغيبوا يومين زيهم.
وقفت بإحترام وقولت بهدوء وتوضيح:
- في حاجة ضرورية حصلت معايا إمبارح ومعرفتش آجي أنا أسفة ممكن حضرتك تخصمهُ.
رد عليا وقال بضحكة سخرية:
- إنتِ غلبانة جدًا أنا مش بس هخصمهُ أنا هخصم 3 أيام،
وتاني مرة لو غيبتي من غير إذن فيها الإسبوع كلهُ.
بصيتلهُ بعقدة حاجب وعدم رضا ولكن هديت نفسي وسكتت بدون ولا كلمة، متأكدة إني لو رديت بالرفض دلوقتي هيزود أيام الخصم ودا بالفعل اللي كان مستنيه ولما لقاني سكتت مشي بهدوء من قدامي.
قعدت مرة تانية على مكتبي ووقتها قربت مني زميلتي وهي كويسة وبحبها وقالت بعتاب:
- على فكرة ممكن تشتكيه لصاحب الشركة،
لكن طول ما إنتِ سكتالهُ هيزيد فيها.
رديت عليها وأنا عيني على الجهاز قدامي:
- لو إشتكيت لصاحب الشركة هيستقصدني أكتر ويضايقني،
أنا برتب أموري برا وبدور على شغل أول ما آلاقي همشي بهدوء.
إتكلمت بضيق وقالت بإستنكار:
- تسيبي شغلك وتمشي عشان دا؟
بصيتلها وإبتسمت بهدوء وأنا بنهي الكلام وبقول:
- مش عشانهُ عشاني وعشان صحتي النفسية مش هقدر أشتغل في المكان هنا أكتر من كدا بصراحة.
بعدها كملت شغل وأنا عاصرة على نفسي طن ليمون.
***
في قسم الشرطة كان محمد قاعد وجنبهُ المقدم حسن بيفطروا مع بعض، إتكلم حسن وقال إستكمالًا لحديث دار بينهم:
- وإنت مصدق كل دا لأنك شوفت بعينك، مش يمكن البنت دي بتشتغلك؟
رد عليه محمد وقال برفض:
- لأ لأ، أنا شوفت بعيني للمرة التالتة إن كلامها صح،
قبضت على مجرمين إتنين بسببها، لحقت جريمة كانت هتحصل في بيتها قدام عيني وقدام عيني برضوا كانت دخلت نوبة غريبة فصلتها عن العالم من الخوف، البنت دي محتاجة مساعدة مني بجد وصعبانة عليا.
غمض حسن نص تغميضة وقال بنبرة خبيثة:
- صعبانة عليك بس يعني؟
بصلهُ محمد وقال بتعقيدة حاجب:
- أومال هيكون إي يعني؟
كمل حسن كلامهُ بعد ما خد قضمة من ساندوتش في إيدهُ وقال بإبتسامة:
- أصل عمري ما شوفتك مهتم بقضية وبنت لدرجة تروح بيتها بعد نص الليل وتفضل قاعد معاها تطمنها، وكل كلامك مش في حاجة غير عنها هنا بس!
رد عليه محمد وقال بعد ما ساب الأكل من إيده:
- قصدك إي يعني قول على طول؟
رد عليه حسن وقال وهو بيغمزلهُ:
- قصدي واضح إنك مهتم للبنت مش للقضايا زي ما بتقول.
ضحك محمد بسخرية وقال:
- لأ طبعًا إنت عبيط، دا واجبي وشغلي مش أكتر،
وهي بتحذرني بجرايم قبل وقوعها واللي بيحصل دا مخليها مثيرة لفضولي مش أكتر ومستغرب وعايز أفهم.
رد عليه حسن وقال بتسليك:
- طيب ماشي، هعمل نفسي مصدقك لحد ما تعترف لنفسك،
المهم أنا خلصت وهروح مكتبي أشوفك بعد الشغل بقى.
مشي حسن وساب محمد قاعد سرحان وبيفكر وهو بيضحك وبيقول بينهُ وبين نفسهُ:
- هحب واحدة في يومين إي العبث دا؟
زي ما قولت هي مثيرة لفضولي مش أكتر لأنها بتمر بحاجة مستحيل تتصدق.
***
بالليل كنت خلصت شغل، وقفت قدام شقتي وبحاول أقوي نفسي وأدخل، حطيت مفتاح الشقة وفتحت الباب.
كنت مقررة قرار، هاخد كل اللوح وكل الرسمات وكل حاجة ليها علاقة بالرسم وهرميها، لازم أقفل الباب دا عشان يوقف يطاردني.
ولكن تقريبًا كنت غبية وفاكرة إني فعلًا هقدت أقفلهُ،
للمرة الرابعة قوة غريبة بتتحكم في جسمي واحدة واحدة.
موبايلي رن قبل ما يحصل تحكم كامل في جسمي ومن غير ما أشوف مين فتحت المكالمة بسرعة ووقتها الموبايل وقع من ايدي.
صرخت بس وأنا بحاول أطلب المساعدة من اللي على الموبايل،
بعدها صوتي مطلعش تاني، بدأت دموعي تتكون وهي الوحيدة اللي بتتحرك فيا بإرداتي وبعدها قعدت قدام لوح وبدأت جريمة جديدة.
على الناحية التانية كان محمد واقف قدام القسم وبيتتصل بـ ورد عشان يتطمن عليها ولما سمع صوت صراخها فضل ينادي بقلق:
- ورد إنتِ كويسة؟
ومع تكرار مناديتهُ ليها بدون رد قلق أكتر وقرر يروحلها مع ظهور حسن صاحبهُ وهو جايب قهوة ليهم وسألهُ بقلق:
- في إي يا محمد؟
رد عليه محمد وهو بيتحرك بسرعة ناحية العربية:
- مش عارف، ورد بتصرخ وتقريبًا في حاجة معاها لازم أروح.
رد عليه حسن وقال وهو بيركب معاه:
- إستنى طيب وإهدى أنا جاي معاك هتسوق كدا إزاي؟!
بعد تقريبًا نص ساعة كانوا وصلوا قدام بيتها،
فضل محمد يخبط كتير ولكن كانت لسة القوة الغريبة متحكمة فيها ومش قادرة ترد أو تقوم تفتح.
إتكلم حسن وقال بتخمين:
- مش بترد ،يمكن مش جوا وفي مكان تاني؟
مسك محمد موبايلهُ ورن عليها من تاني،
سمع صوت موبايلها جاي من جوا الشقة،
إتكلم وقال وهو بيبص لـ حسن:
- جوا، ممكن يكون جرالها حاجة، خلينا نكسر الباب.
إتكلم حسن وقال بتفكير:
- يابني ممكن تكون خرجت كسر الباب غير قانوني!
رد عليه محمد وهو بيخبط الباب أول خبطة:
- لو حصل حاجة هتحمل عواقبها، لكن لو حصلها هي حاجة وقتها مش هقدر أتحمل عواقب دي.
ساعدهُ حسن وهو مرضيش يعلق في الوقت دا،
بعد 5 دقايق الباب إتفتح ودخلوا وكانت وقتها في الجزء الأخير من الرسمة.
كان وشها مليان دموع وهي أخيرًا بتقع منها الفرشة مع دخول محمد وحسن، لفت وشها وهي بتعيط وبصت لـ محمد وقالت وهي باصة لإيديها بخوف:
- أنا صنعت جريمة جديدة، أنا مش عارفة أتخلص منها!
قرب منها محمد وقعد قدامها وهو بيحاول يهديها وقال بعد ما مسك إيديها بحنية:
- إهدي متخافيش، أنا جنبك، إنتِ مالكيش ذنب في حاجة.
بصيتلهُ من بين دموعي والكلمتين دول اللي خلوني مدخلش في نوبة من جديد، شعور إن حد يقولك إنك مش يبب في أذى كبير بيحصل الكل شايفك شيطان فيه هو أكتر حاجة ممكن حد يحتاجها.
سمعت صوت حسن من ورايا واللي قال بصدمة:
- هو دا إي، إراي في رسم بالدقة والتفاصيل دي؟
بصيت ناحية اللوحة اللي عملتها إيدي بدون إرادة مِني،
كانت المرة دي جريمة لواحدة معرفهاش، واحدة مقتولة وسط ولادها!!
إي المنظر البشع دا!
اللي قتلها واحد تاني واقف وهو بيزعق وشكلهُ غضبان جدًا مع بكاء ورعب الأطفال الصغيرة.
قربت منها أكتر برعب عشان أدور على ثغرة أعرف بيها مكانها،
مفيش، أنا معرفهاش بجد ولا أعرف البيت اللي هي فيه دا!
إتكلم محمد وهي بيسألني وقال بهدوء عشان ميحسسنيش بالضغط:
- تعرفي الست دي؟
بدأ عياطي يزيد من تاني وقولت بخوف:
- لأ معرفهاش، معقول هتموت بالشكل دا قدام الأطفال!
قبل ما يتكلم محمد إتكلم حسن وقال بتذكر:
- ثانية، أنا عارف الراجل دا.
بصينالهُ أنا ومحمد بأمل وبعدها كمل كلام وقال:
- دا كان متهم في قضية قبل كدا وجالي بلاغات كتير عنهُ من زوجتهُ بإنهُ بعد الطلاق بيهددها كتير بالأطفال عشان ياخد فلوس منها عشان حاجات بيشربها، وأخر مرة من اللي عرفتهُ إتحكم عليه بالسجن سنتين بسبب إنهُ تعدى عليها بالضرب.
إتكلم محمد وقال بتساؤل:
- تعرف مكان بيت طلقيتهُ يعني بيتهُ القديم فين؟
رد عليه حسن وقال بتفكير:
- الحقيقة لأ، بس هتصل بحد دلوقتي يقدر يفيدنا.
كنت قاعدة على أعصابي وأنا مش فاهمة ليه كل دا بيحصلي،
المفروض أروح فين عشان أعالج مرضي دا لو دا مرض مش لعنة!
بعد مكالمات من حسن لحد مسئول عن القضية رجع قال لمحمد بسرعة وقلق:
- المكان في الزمالك.
نزلنا بسرعة لأن خالص باقي تقريبًا ساعة ونص،
بعد تقريبًا ساعة وصلنا أخيرًا بسبب زحمة المواصلات.
طلعنا على العمارة مباشرةً ووقتها كان طليقها سابقنا بخطوة وقدام الباب وهي فتحت باب الشقة وإيديه اللي ماسكة السكينة إتحركت ناحيتها بسرعة ووقتها وقف محمد قدامهُ والخبطة جات فيه.
صرخت وجريت ناحيتهُ وكان الراجل إتصدم وهيهرب بس مسكهُ حسن بعد ما ضربهُ، وقتها محمد مسك الجرح وإتحرك ناحية الست والأطفال وقفل الباب عليهم عشان ميشوفوش المنظر ووالدهم بالشكل دا.
إتكلمت بتساؤل وأنا بعيط وقولت:
- إنت بتنزف، هتصل بالإسعاف.
رد عليا وهو بيمنعني وبيقول بصعوبة:
- نسلم الحيوان دا الأول عشان ميهربش.
صرخت فيه وقولت بغضب:
- إنت بتنزف بقولك!