رواية لوحاتي الدموية انقذني منها الفصل الخامس5بقلم هاجر نور الدين
- إنت بتنزف، هتصل بالإسعاف.
رد عليا وهو بيمنعني وبيقول بصعوبة:
- نسلم الحيوان دا الأول عشان ميهربش.
صرخت فيه وقولت بغضب:
- إنت بتنزف بقولك!
رد عليا وقال بهدوء وهو بيطمني:
- متقلقيش هكون كويس، خلينا ننزل بس الأول.
نزل فعلًا وهو ماسك الراجل المختل دا مع حسن وبإيدهُ التانية ماسك الجرح بتاعهُ.
بعد ما وصلوا للعربية كان فيها كلبشات،
طلعها وكلبش إيدين الراجل بعد ما إحتفظ بالسلاح اللي معاه.
قعد ورا معاه وحسن اللي كان سايق وأنا قاعدة جنبهُ،
كنت قلقانة عليه وقلقانة أكتر المجرم دا يستغل جرحهُ ويعمل حاجة.
كل شوية كنت ببص عليه وشيفاه وهو بيكتم الألم بتاعهُ،
كل اللي حصلهُ بسببي، كل اللي بيحصل بسببي!
كنت بعيط بهدوء ومش قادرة أستوعب اللي بيحصل معايا واللي بجرّ الناس معايا ليه!
بعد حوالي نص ساعة وصلنا للقسم وقرب منهم عساكر وساعدوا حسن يسلموا المجرم دا.
بصيت أنا لـ محمد وقولت وأنا بمنعه يتحرك:
- إنت جرجك بينزف بقالهُ أكتر من ساعة إلا ربع،
لازم تروح المستشفى حالًا.
رد عليا بإبتسامة بيداري بيها الوجع وقال:
- حاضر، ثواني بس ييجي حسن عشان يسوق.
رديت عليه وقولت بتردد:
- هسوق أنا، بس يعني...
بصلي بتساؤل وقال:
- بس إي؟
إتكلمت وقولت بسرعة وأنا بساعدهُ يركب:
- إركب بس الأول متخليناش نضيع وقت عشان جرحك،
أنا بعرف أسوق بس مش معايا رخصة واعتقد إنت مش هتحبسني.
ضحك وهو بيتألم وبعدها كتم الضحكة بتعب ودا خلاني سرعت من سواقتي وجريت بيه لأقرب مستشفى.
كان بيفقد الوعيّ تدريجي، صرخت فيه وقولت:
- فوق متستسلمش لفقدان الوعيّ، خلاص وصلنا أهو.
كان بيحاول ولكنهُ مكانش قادر فعليًا،
ققد الوعي وأنا كنت بعيط ومش عارفة أعمل إي دلوقتي،
بحاول أركز عشان ألحقهُ وكل اللي بيتردد في دماغي أنا السبب.
وصلنا ونزلت طلبت من ممرض ترولي وييجي يلحقهُ،
شالوه وكان فاقد الوعي ولسة النزيف شغال بشكل مُهلك للعين.
دخلوه أوضة العمليات وأنا فضلت واقفة برا على أعصابي،
موبايلهُ رن في إيدي وكان حسن، رديت وهو قال:
- إنت فين يابني عمال بدور عليك عشان جرحك!
ردبت عليه بصوت مخنوق من العياط وقولت:
- إحنا في المستشفى، هو دلوقتي في أوضة العمليات.
إتصدم وسألني بإنفعال عن مكان المستشفى،
بعد ما بلغتهُ قفل ومفيش تِلت ساعة كان وصل.
قرب مني بقلق وقال بتساؤل:
- لسة مطلعش؟
هزيت راسي برفض وقولت:
- نزف كتير جدًا والدكتور بلغني إن الجرح كمان غويط وخطير،
فقد وعيهُ أثناء ما احنا جايين هنا.
وقف حين بتوتر وغضب وهو ماسك شعرهُ وبيحاول يهدي نفسهُ،
إتكلم وقال بإنفعال:
- عيل غبي، بيقف قدام السلاح ليه؟
أنا هفضل ورا الحيوان دا لحد ما ياخد مؤبد.
بصيتلهُ ومردتش عليه، سندت راسي على الحيطة،
فضلنا واقفين مستنيين وبعد 10 دقايق طلع الدكتور.
قربنا منهُ في سرعة وقلق وسألهُ حسن:
- خير يا دكتور؟
رد الدكتور بتعب وقال:
- الحمدلله هو كويس دلوقتي، الجرح جاي جنب القلب بالظبط لو كانت الخبطة أبعد شوية كان بعيد الشر حصل حاجة وحشة، هو حاليًا بس عندهُ جروح داخلية أكبر من الخارجية وهتلتئم مع الوقت وعوضنا الدم اللي نزل منهُ، بس أنا محتاج أفهم الحالة لأن دي فيها بلاغ؟
رد عليه حسن وهو بيطلع بطاقتهُ وكارنيه الشغل:
- أنا المقدم حسن عبدالرحمن واللي جوا وكيل النيابة محمد أيمن، الإصابة كانت وإحنا بنقبض على مجرم، وعايزك تكتب كل دا في تقرير عشان هيتقدم برضوا.
وافقوا الدكتور وراح بعدها حسن معاه عشان يخلص شوية إجراءات، روحت ناحية الباب بتاع الأوضة وقبل ما أبص الباب إتفتح وخرج الممرضين وهما شايلينهُ على ترولي.
سألت ممرض منهم وقولت بتساؤل وقلق:
- رايحين بيه فين؟
رد عليا وهو بيطمني وقال:
- متقلقيش يا فندم، هننقلهُ لغرفة عادية.
مشيت معاهم وسألت من تاني:
- طيب هو كدا هيفوق إمتى؟
رد عليا وقال بعملية:
- ممكن كمان ساعتين يافندم.
بعدين وصلنا للأوضة العادية ورفضوا إني أدخل دلوقتي غير لما يفوق، فضلت قاعدة قدام الأوضة برضوا مستنياه يفوق.
قررت إني هقوم أروح أعمله أكل صحي وبيتي في الساعتين دول عشان لما يفوق أنا حاسة بالذنب بشكل فظيع ولو مكانش قابلني مكانش قابل كل المخاطر دي.
قومت وبصيت حواليا ولكن الممر بتاع المستشفى إتغير!
الممر بقى ضلمة وفي إضاءة حمرا بسيطة جدًا، مفيش حد!
واحدة واحدة والإضاءة بقت أفتح شوية،
حطيت إيدي على قلبي وأنا باخد نفسي.
مشيت وأنا بحاول أنادي على حد ولكن مفيش رد،
خوفت ومقدرتش أمشي بصراحة ورجعت للأوضة بتاعت محمد،
دخلت وأنا ببص عليه عشان أتطمن بوجودهُ لكن مفيش أثر ليه!
فضلت أجري وأدور في الأوضة زي المجنونة عليه مفيش،
إضاءة المستشفى مرة واحدة بقت باللون الأحمر،
وأنا بدورسمعت صوت حد بيضحك بشكل مرعب من تحت السرير لفيت وشي وأنل خلاص هعيط من الرعب.
واحدة واحدة ولقيت حد بيخرج، كان حد لابس أحمر وفي ألوان تانية كتير في لبسهُ وبعد ما خرج ووقف وسط نظراتي المرعوبة كان مهرج، كان المهرج اللي بترعب منهُ اللي دايمًا عايش جوا دماغي من فيلم رعب شوفتهُ زمان.
كان بيضحك بشكل مرعب ومستفز،
خرجت وجريت وأنا بهرب منهُ، كنت بصرخ وبحاول أهرب ولكنهُ كان ماشي ورايا بهدوء وبيدندن أغنية ودا اللي رعبني أكتر.
في ثانية إلا ثانية وبرغم هروبي منهُ وجريي لقيتهُ في وشي،
وقعت في الأرض من قوة الصدمة والأدرينالين اللي بقى في جسمي وكان في إيديه فاس، مرة واحدة رفع الفاس وهو لسة بيضحك، غمضت عيني بقوة وأنا بصرخ ووقتها سمعت صوت حسن.
كان بيتكلم وبيقول بتساؤل:
- يا أنسة ورد فيكِ إي؟
فتحت عيني بسرعة وأنا باخد نفسي بشكل ملحوظ من الرعب ولكن كل شيء طبيعي، المستشفى بإضائتها زي ما هي، الممرضين والدكاترة والمرضى كلهم في الطرقات.
أنا واقفة مكاني زي التمثال متحركتش،
جريت بصيت على الأوضة وكان محمد نايم على السرير.
بصيت لـ حسن اللي كان بيبصلي وكأني مجنونة ودا حقهُ وقولت مع دمعة نزلت من عيني بهدوء:
- أنا، أنا أسفة سرحت شوية غصب عني.
رد عليا وقال بتساؤل وهو بيتفحصني:
- إنتِ كويسة طيب؟
رديت عليه وقولت بموافقة وأنا بتحرك:
- أيوا، أنا هروح البيت أعمل لـ محمد أكل بيتي عشان يعوض الدم اللي خسرهُ وتعبير عن إعتذاري وهرجع على طول.
مشيت بعدها من غير ما اسمع منهُ حاجة وسط عدم فهمهُ وإستغرابهُ ليا، وصلت البيت وكنت خايفة منهُ.
بقيت خايفة من كل حاجة ولكن لازم أواجه زي ما علمتني ماما،
روحت أول حاجة للعلاج بتاعي وخدت منهُ.
بعدها طلعت فراخ وبدأت أعمل لـ محمد أكل،
بعد حوالي ساعة ونص كنت مخلصة ودخلت خدت شاور وغيرت وقبل ما أنزل لقيت في الأوضة اللي كانت نايمة فيها عمتي ورقتين في قلب بعض مش بتوعي.
فتحت واحدة ولقيت من فوق، المصحة النفسية وإسم والدي ومن الواضح إنها ورقة قديمة، قبل ما أكمل قراءة موبايلي رن.
إتخضيت وكان محمد، قفلت الورقتين حطيتهم في جيبي اقرأهم مرة تانية ورديت عليه بسرعة ولهفة:
- محمد إنت فوقت؟
سألني هو كمان وقال بقلق:
- إنتِ روحتي فين، إنتِ كويسة؟
رديت عليه وأنا باخد الأكل ونازلة وبقفل الباب:
- أيوا كويسة أنا جيالك حالًا، الحمدلله إنك فوقت وبخير.
بعدها جريت مرة تانية للمستشفى،
في المستشفى كان حسن قاعد جنب محمد بعد ما قفل المكالمة وباصص ليه بنصف عين وقال بنبرة خبيثة:
- أول مرة أشوف حد يفوق من إصابة خطيرة يسأل عن واحدة لسة عارفها من 3 أيام على رأيك؟
بصلهُ محمد بتوتر وبعدين بص للناحية التانية وقال بتعب:
- ريح شوية مش وقتك، بس إنت قولت إنها دخلت في نوبة ومكنتش مستوعبة اللي بيحصل ومشيت طبيعي هقلق يعني!
فضل حسن باصصلهُ نفس النظرة وهو بيتهرب منهُ،
بعد شوية كنت أنا وصلت للمستشفى.