رواية رشيد وكارمن الفصل السادس6بقلم ملك ابراهيم
"في اللحظة دي كل حاجة اتلخبطت.. هو عرف إن حبيبته بنت الست اللي أبوه اتجوزها.. وهي عرفت إن مامتها هي سبب كل الوجع اللي في حياتها"
في المساء.
دخلت والدة كارمن لأوضة بنتها وقالت ليها انها هتروح للمحامي. هزت كارمن راسها بالموافقة وهي عارفة ان والدتها رايحة عشان تنهي إجراءات الطلاق، مهتمتش كارمن كتير بالموضوع، لقد اتعودت على أفعال والدتها.
راحت والدة كارمن لمكتب محامي عيلة جوزها، كان رشيد ووالده وجده في انتظارها، تم الطلاق مقابل المبلغ المالي (مليون جنيه) اتنازلت والدة كارمن عن كل حقوقها مقابل الفلوس. كان الجد بيحط الفلوس جوه شنطة وقام بتسليمها لطليقة ابنه بعد ما خلص كل حاجة. أخدت والدة كارمن الشنطة بسعادة وسابتهم ومشيت لبيتها. بص الجد لحفيده وهز راسه، كانت دي هي الإشارة عشان يتحرك رشيد ويعمل اللي اتفق عليه مع جده، ابتسم رشيد بثقة ومشي.
كانت كارمن جوه أوضتها، بتفكر في رشيد، مش عارفة راح فين ولا عارفة فين تلاقيه دلوقتي، بتتمنى جواها انه يدور عليها ويلاقيها وييجي ليها.
رجعت والدة كارمن للبيت واتجهت لأوضتها وقفلت الباب عليها وقامت بفتح الشنطة فوق السرير وحطت الفلوس قدام عينيها وابتسمت بسعادة وانتصار.
وصل رشيد ومعاه قوة من رجال الشرطة لبيت سهير سالم طليقة والده، بعد ما قدم جده اللواء نور الدين الجبالي بلاغ بيتهمها فيه بسرقة مبلغ مالي كبير وحدد مواصفات الشنطة والفلوس اللي أخدتها منهم. رتب اللواء نور الدين للقبض عليها ومعاقبتها على وقاحتها معاهم وجرأتها على الجواز من ابنه، ويكون ده درس قاسي ليها عشان تعرف حدودها مع العيلة دي ولم تتجرأ على فعل شوشره بعد الطلاق.
تولى رشيد قيادة مهمة القبض عليها من جوه بيتها بكل ترحاب، عشان يثأر منها بعد وقاحتها معاه هو وجده.
وقف رشيد قدام البيت وخبط بقوة، وقف وراه مجموعة من رجال الشرطة مستنيين إشارته بالقبض على المتهمة.
خرجت كارمن من أوضتها بقلق بعد ما سمعت صوت طرق عالي على باب البيت بطريقة حادة وقوية، اتجهت بسرعة للباب وفتحت الباب بقلق. شهقت بصدمة لما شافته واقف قدامها، ابتسمت تلقائيًا وهمست اسمه بسعادة: "رشيد!"
حدق بيها بصدمة، وقف عقله عن الاستيعاب، رافض تصديق سبب وجودها في البيت ده، اتمنى لو اللي بيفكر فيه دلوقتي ده مش صحيح. ابتسمت بسعادة وقالت ليه بشغف: "انا كنت بفكر فيك دلوقتي.. انا مش مصدقه انك جيت عشاني.. انا روحت المستشفى أسأل عليك وقالولي انك خرجت!"
هز راسه بالرفض وقال ليها بصدمة: "انتي بتعملي ايه هنا؟"
عقدت ما بين حواجبها بدهشة وبعدين ابتسمت بشغف وجاوبت عليه: "انت عرفت عنوان بيتي ازاي؟"
غمض عينيه بصدمة بعد ما سمع تأكيدها ان البيت ده بتاعها وبالطبع لوالدتها! الست دي اللي جه دلوقتي ومعاه قوة من رجال الشرطة للقبض عليها.
استغربت صمته وافتكرت انه جه عشانها وعشان يستمع لردها على اعترافه بمشاعره اتجاهها، منتبهتش لوجود مجموعة من رجال الشرطة واقفين وراه مستنيين إشارته. بس عينيها شايفاه هو بس، ابتسمت بسعادة وقالت ليه بخجل: "على فكرة انا روحت المستشفى اسأل عليك عشان في عندي اعتراف مهم كان لازم اعترفلك بيه زي ما أنت اعترفتلي.."
اتأملها بصدمة، صدح صوت واحد من الضباط وسأله بفضول: "نقتحم البيت يا فندم؟"
لف يبص ليه بصدمة، وقف عقله عن التفكير، مقدرش يجاوب على السؤال، رجع ببصره ليها، كانت بتبص ليه بصدمة وذهول بعد ما سمعت صوت شخص تاني منتبهتش انه واقف قريب منهم.
خرجت والدتها من الأوضة، صدح صوت والدتها بتسأل بفضول: "مين عندك يا كارمن؟"
اتووترت كتير وبعدين جاوبت على والدتها بارتباك: "مفيش حد يا ماما."
وبعدين وطت نبرة صوتها وقالت ليه بهمس: "انت لازم تمشي دلوقتي.. مينفعش ماما تشوفك هنا."
وقف في حيرة من أمره، جه لهنا عشان يعتقل طليقة والده بتهمة السرقة عشان يسترد الفلوس اللي أخدتها منهم مقابل الطلاق من والده، ازاي هيلقي القبض عليها بعد ما اكتشف انها والدة البنت اللي حبها!
قربت والدة كارمن من باب البيت واستغربت من وجود رشيد ابن طليقها، اندفعت للباب وقالت ليه بحدة: "انت ايه اللي جابك هنا! احنا مش خلاص فضناها وباباك طلقني وخلصنا!"
حدقت بيه كارمن بصدمة، بص لوالدة كارمن بغضب وبعدين قال ليها بنبرة حادة: "انا كنت جاي عشان اديكي درس عمرك، يمكن ترجعي عن طريق النصب على الرجاله اللي انتي ماشيه فيه!"
شهقت كارمن بصدمة بعد ما سمعت كلامه مع والدتها، وبعدين بصت لوالدتها وهي بتحاول تستوعب اللي قاله رشيد. هدأت نبرة صوته شوية وهو بيتطلع لكارمن وكمل: "بس للاسف مش هقدر اعمل كده دلوقتي."
رمقته والدة كارمن بدهشة، تابعت نظراته لبنتها بترقب. نزلت دموع كارمن وهي بتتطلع لوالدتها وقالت ليها ببكاء: "الكلام اللي رشيد بيقوله ده صح يا ماما! انتي فعلا بتنصبي على الرجاله؟"
رمقتها والدتها بغضب وجاوبت عليها بحدة: "انا مبنصبش على حد! انا بتجوز على سنة الله ورسوله.. ولما بيحصل الطلاق باخد حقي منهم!"
غمضت كارمن عينيها بصدمة وهي بتبكي بانهيار، اللي قالته والدتها كان عار ليها قدام حبيبها، بصت ليه وقالت ليه بصوتها الباكي وشهقاتها المتقطعة: "انا اسفه.. اسفه على كل حاجة ماما عملتها.. بس ارجوك بلاش تسجنها.. انا مليش غيرها في الدنيا.. انا لوحدي وهي معايا.. مش عارفه لو بعدت عني هقدر اعيش ازاي من غيرها."
متحملش رشيد رؤيتها بتبكي بالحالة دي، عارف انها مش شبه والدتها، بكائها قطع قلبه، هز راسه بالموافقة ولف يبص لرجال الشرطة وقال ليهم بقوة: "ارجعوا انتوا على العربيات وانا جاي وراكم."
مشيوا من وراه ووقف هو لوحده، قرب منها خطوتين ورفع ايديه لوشها وجفف دموعها بصوابعه، تابعت والدتها اللي بيعمله رشيد مع بنتها باستغراب، مش عارفة امتى اتعرفت بنتها عليه وايه هي العلاقة اللي بتربطهم!
اترعش جسم كارمن وبعدت عنه شوية وهي بتوطي وشها في الأرض. ابتسمت والدتها بمكر وقالت ليه ببرود: "خير يا حضرة الظابط! لسه ليك حاجة عندنا؟"
رمقها بغضب وبعدين رجع ببصره لكارمن وجاوب بثقة: "طبعًا ليا.."
رفعت كارمن عينيها وبصت ليه بقلق، ابتسم ليها بحنان وبعدين رمق والدتها بغضب وكمل مؤكد: "واللي ليا هنا هاخده."
رمقته والدة كارمن بغضب، حست ان كلامه المقصود بابنتها. هز راسه بثقة وبعدين مشي من قدامهم، بكت كارمن أكتر وهي بتتابع بعده عنها، افتكرت انه يقصد الفلوس بكلامه ومنتبهتش انه يقصدها هي.
تابعت والدتها بكاءها بترقب وبعدين قربت من باب البيت وقفلته بحدة، وقفت كارمن بتبكي وهي بتبص لباب البيت وبتتمنى رجوع رشيد ليها، وقفت والدتها قدامها وقالت ليها بحدة: "انتي تعرفي رشيد من امتى وازاي؟"
بصت لوالدتها بحزن وارتفعت شهقاتها وهي شايفة والدتها بتتسبب ليها في كل حزن وألم بتحس بيه. اشتدت حدة صوت والدتها وأعادت سؤالها: "ردي يا كارمن.. انتي تعرفيه من امتى وازاي عرفتيه؟!"
انتفض جسم كارمن من صراخ والدتها وجاوبت عليها بصوت متقطع من شدة البكاء: "عرفته في المستشفى.. هو الظابط اللي انقذنا لما الباص اتخـ..طف."
عقدت والدتها ما بين حواجبها بدهشة وهمست جواها "معقول قدر يتعلق بيها في الفترة البسيطة دي!" فكرت شوية وبعدين ابتسمت بثقة وقالت لبنتها بثقة: "براڨو عليكي يا كارمن.. اهو انتي كده اثبتي انك بنتي صحيح."
بصت كارمن لوالدتها بدهشة، طبطبت والدتها على ضهرها وكملت ببرود: "بس انا عايزاكي من اللحظة دي تنسي رشيد ده خالص."
حدقت بوالدتها بصدمة، هزت والدتها راسها بالموافقة وكملت: "احنا مش هينفع ندخل عيليتهم تاني بعد ما انا اطلقت من باباه النهاردة."
غمضت كارمن عينيها وهي بتبكي بحزن، كملت والدتها بنبرة حماسية صدمت كارمن: "بس متقلقيش انا هشوفلك واحد تاني تقدري توقعيه ونطلع منه بمبلغ كويس."
حدقت بوالدتها بصدمة، تراجعت لورا بذهول وقالت: "ايه اللي بتقوليه ده يا ماما! انتي سامعه بتقوليلي ايه؟!"
رمقتها والدتها ببرود وجاوبت عليها بصرامة: "انتي مش هتعملي حاجة عيب ولا حرام.. ده جواز شرعي وبعد فترة تطلقي وتطلعي من الجوازة بمبلغ كويس."
انهارت كارمن في البكاء وبعدت عن والدتها وهي بتترنح بذهول، صرخت وعقلها مش مستوعب كلام والدتها: "انا مش مصدقه اللي بسمعه ده! ازاي تطلبي مني حاجة زي كده.. انتي عايزة تدمري حياتي اكتر ما دمرتيها!"
قربت منها والدتها ومسكتها من دراعاتها بقوة وقالت ليها بقوة وغضب: "مين اللي دمرت حياتك! فوقي.. بصي حواليكي، شوفي المستوى اللي انتي عايشه فيه.. كنتي عايزة تعيشي في المستوى ده ازاي ومنين وباباكي مات واحنا علينا ديون.. انا ضيعت عمري عليكي.. دخلتك احسن مدارس ولبستك من أغلى الماركات.. ضيعت عمري وانا بفكر فيكي وفي مستقبلك."
انهارت أكتر بين ايدين والدتها، هزتها والدتها بقوة بين ايديها وكملت بقوة: "بعد كل اللي عملته ده عشانك وجايه تقوليلي اني دمرت حياتك!"
بعدت عن والدتها وصرخت بانهيار: "انتي معملتيش حاجة عشاني.. كل اللي عملتيه عشانك انتي.. انتي اللي عايزة تعيشي في المستوى ده مش انا! انا عمري ما طلبت منك ادخل احسن المدارس ولا البس أغلى الماركات، انا مكنتش محتاجة منك غير اهتمامك بيا وانك تكوني جنبي.. انتي وفرتيلي كل حاجة بس حرمتيني منك انتي."
تابعت والدتها انهيارها بصدمة، قعدت كارمن على الأرض بضعف وكملت بحزن: "ودلوقتي عايزة تحرميني من الانسان الوحيد اللي حبيته."
اشتد غضب والدتها وقربت منها بتتكلم بصرامة: "مفيش حاجة اسمها حب فوقي لنفسك يا كارمن.. مش لازم تحبي حد غير نفسك."
رفعت عينيها تبص لوالدتها بحزن وجاوبت عليها: "انا لو حبيت نفسي بس يبقى هكرهك انتي يا ماما!"
اترعش جسم والدتها شوية، حاولت تتماسك وتظهر القوة واللا مبالاة، رسمت البرود على ملامحها وقالت لآخر مرة قبل ما تسيبها وتمشي: "كلامي مش هعيده تاني.. رشيد ده تنسيه خالص."
بكت كارمن بانهيار، سابتها والدتها واتجهت لأوضتها، هتفت كارمن بحزن: "اكيد هو اللي هينساني بعد اللي عرفه النهاردة...."
{رجعت كارمن من ذكرياتها}
وقفت قدام محل شغلها، اتجهت لجوه المطعم، جريت ليها واحدة من البنات وقالت ليها بقلق: "كارمن المدير عايزك في مكتبه حالا."
حست بالقلق الشديد وهمست بقلق: "خير ايه اللي حصل! معقول عشان اتأخرت خمس دقايق؟"
هتفت البنت بحيرة: "بصراحة مش عارفه!"
استغربت مودة وقالت بقلق: "وعايزني انا كمان؟"
جاوبتها البنت بثقة: "هو قال كارمن بس!"
غمضت كارمن عينيها بتعب وبعدين هزت بالموافقة واتجهت لأوضة المدير وخبطت على الباب بهدوء.
سمح ليها بالدخول، فتحت الباب واتفاجأت بوجود رشيد قاعد مع صاحب المطعم وبيتبادلوا الكلام، اترعش جسمها وخفق قلبها بشدة لما شافته، شاور ليها صاحب المطعم وطلب منها انها تتقدم لجوه، اتقدمت بخطوات متباطأة وهي بتوطي وشها في الأرض، مقدرتش ترفع عينيها وتبص ليه.
كان بيتابع خطواتها باهتمام، عارف هي حاسة بايه دلوقتي، بيسمع صوت خفقات قلبها بوضوح.
قربت منهم وقعدت قدامه، بدأ صاحب المطعم بالكلام موضح سبب استدعائها لأوضة مكتبه: "الاستاذ رشيد يا كارمن كان هو والمدام في حفلة امبارح وعجبهم جدا شغلك والتزامك بخدمة الضيوف، وجاي النهاردة يتفق على حفلة عيد ميلاد ابنه وعايزك تكوني المسؤولة عن ضيافة المدعوين."
شهقت بصدمة وصدح صوتها عالي من غير ما تحس: "نعم.. مدام مين وابن مين؟!"
استغرب المدير من رد فعلها الغريب وبص لرشيد بحرج واعتذر منه باحترام، وبعدين رمق كارمن بغضب وقال ليها بصرامة: "في ايه يا كارمن انتي اتجننتي! ازاي تتكلمي بالاسلوب ده!"
حست بتجاوزها ووطت وشها بصمت، مش مصدقة انه اتجوز وأنجب ولد! رفعت عينيها وبصت ليه بلوم، تلألأت عينيها بالدموع، ازاي يتجوز غيرها! ازاي ينجب ابن من ست تانية! كانت على وشك الانفجار بالبكاء والصراخ، ازاي يعمل فيها كده!
كان بيتابع صدمتها وغضبها بصمت، عارف هي حاسة بايه دلوقتي، اللي عمله فيها دلوقتي ده كان جزء من خطته في الانتقام منها، لكنها مشافتش حاجة، الانتقام الأكبر هيكون من نصيبها في الحفلة.
وقف بهدوء وقال لمدير المطعم: "اظن احنا كده اتفقنا على كل حاجة والعنوان مع حضرتك."
وقف مدير المطعم وابتسم ليه وجاوبه باحترام: "تمام يا فندم كل شئ هيكون جاهز زي ما اتفقنا."
هز رشيد راسه بالموافقة وبعدين بص ليها بقسوة وخرج من الأوضة. ميعرفش اللي عمله في قلبها بالنظرة دي، حست وكأن نظرته القاسية سهم مسموم اخترق قلبها وأراد القضاء على حياتها. وقفت بصمت شاردة بتسمع توبيخ مديرها على اسلوبها الفظ مع العميل، خلص المدير من كلامه وهو بيديها العنوان وبيأكد عليها سرعة الذهاب لعنوان بيته في الصبح بدري وبدء العمل. أخدت منه العنوان وخرجت من أوضة المكتب وهي جوه دوامة من الأفكار والذكريات.
{رجعت ب ذكرياتها تفتكر اللي حصل معاها بعد ما رشيد عرف انها بنت سهير سالم طليقة ابوه}
كان عدا شهر كامل وكارمن مخرجتش من البيت ومتكلمتش مع حد، لحد ما خلصت الاجازة الصيفية وبدأ العام الدراسي. وكان عليها الذهاب للجامعة.
صحيت النهاردة بدري في يومها الأول وسنتها الأولى الدراسية في الجامعة.
راحت للجامعة بوش شاحب حزين، كانت فاقدة للشغف والحياة، كانت لابسة هدوم غامقة ورافعة شعرها بطريقة عشوائية، مش مهتمة بحاجة، قربت منها سما صاحبتها وهي بتجري ليها بحماس، وقفت قدامها وقالت ليها باشتياق: "كارمن وحشتيني اوي.. انا اسفه يا كارمن مقدرتش اتواصل معاكي طول الفترة اللي فاتت لاني كنت مسافره."
حضنتها كارمن وقالت ليها بهدوء: "متعتذريش يا سما.. انا اصلا مش زعلانه."
حدقت بيها سما بدهشة وقالت ليها بقلق: "كارمن انتي كويسه؟!"
بصت قدامها للفراغ واكتفت بهزة بسيطة. سمعت صوت مميز جاي من وراها: "لو سمحتي عايز اسأل عن زميله لكم في الجامعه."
صوته كان مألوف ليها، عرفته بسهولة من غير ما تشوفه، خفق قلبها بقوة، لفت تبص ليه عشان تتأكد من وجوده بجد وراها، ابتسمت بسعادة لما لقيته واقف وراها وبيبص ليها، ميعرفش قد ايه اشتاقت ليه. حدقت بيه سما صاحبتها، حست وكأنها شافت الشاب ده من قبل! لكن فين وامتى مش فاكرة!
نجح في رسم الجدية على ملامحه وأعاد سؤاله بنبرة جادة: "ممكن تساعدوني اوصلها؟"
حدقت بيه كارمن بصدمة وقالت ليه بذهول: "رشيد انت بتسأل عن مين؟!"
ابتسم جواه وحاول الثبات على رسم الجدية، بصت ليهم سما بدهشة وهي بتحاول انها تفتكر فين شافته من قبل! بص رشيد لكارمن راسم الدهشة على ملامحه وقال ليها: "حضرتك تعرفيني؟!"
بهتت ملامحها بحزن بعد ما حست انه بيتجاهلها ومش عايز يفتكرها، تلألأت عينيها بالدموع بسرعة وجاوبته بحزن: "لا معرفكش.. انا اسفه."
كادت انها تمشي من قدامه لكنه مسك بايديها بسرعة وقال ليها بشغف: "خلاص انا بهزر معاكي والله عشان وحشتيني اوي."....