رواية لوحاتي الدموية انقذني منها الفصل السادس6بقلم هاجر نور الدين
- بس إنت قولت إنها دخلت في نوبة ومكنتش مستوعبة اللي بيحصل ومشيت طبيعي هقلق يعني!
فضل حسن باصصلهُ نفس النظرة وهو بيتهرب منهُ،
بعد شوية كنت أنا وصلت للمستشفى وجريت عليه وأنا بسأله بقلق:
- محمد، إنت كويس فيك حاجة تعباك؟
بصلي بإبتسامة واسعة وقال بلا مبالاة:
- دي إصابة سطحية متقلقيش عليا أنا كويس ومتعود على كل دا.
بصيتلهُ بنصف عين وقولت بسخرية:
- الدكتور قال إن الإصابة غويطة، وغير كل دا إنت أكيد لسة تعبان متستهونش بوجعك عشان تبان إنك جامد يعني.
ضحك حسن من جنبي ووقتها بصلهُ محمد بشرار وأنا كتمت ضحكتي، إتكلم حسن وهو موجه كلامهُ ليه وبيقول بتردد:
- طيب إنت بتبصلي أنا كدا ليه أنا مالي،
ما معاها حق إنت فثدت الوعي معاها والدكتور قالها حالتك الصحية هي عارفة كدا كدا!
رد عليه محمد وقال بإبتسامة وهو بيجز على سنانهُ:
- طيب ممكن تسكت عشان متجيش فيك إنت؟
شاورلهُ حسن وهو بيضحك بإيديهُ على شفايفهُ علامة الصمت،
بعدها بصلي محمد وقال بإبتسامة:
- قلقتي عليا؟
بصيتلهُ من صدمة السؤال وأنا مش عارفة أجاوب،
إتهربت من السؤال وقولت وأنا بطلع الأكل:
- أنا عملتلك أكل بيتي عشان صحتك، إعتبر دا إعتذار مني عن اللي حصل بسببي.
رد عليا وقال بإبتسامة سعيدة:
- دا عشاني؟
تسلم إيديكِ بجد تعبتي نفسك.
إبتسمت وقولت وأنا بحضرلهُ الأكل في طبق منفصل:
- بالهنا والشفا، إتفضل يلا وهو سخن قبل ما يبرد.
رد عليا وهو بيشاور على دراعه وقال:
- طيب أنا أكيد هحتاج مساعدة يعني دراعي مسنود بالشاش مش هعرف أحركهُ!
فضلت بصالهُ ثواني وأنا محرجة ومش عارفة أرد،
لحد ما إتكلم حسن وقال وهو بيقعد جنبهُ على السرير وبيقول بإبتسامة بعد ما مسك المعلقة:
- يلا يا حبيبي هأكلك بإيدي اللي بتحبهم.
بصلهُ محمد بقرف وقال بعصبية:
- ياعم غور من وشي.
إتكلم حسن وقال بطريقة سريعة:
- لـ تكون عايز أنسة ورد هي اللي تأكلك؟!
عيوني وسعت من الصدمة ومحمد وشه احمر وقال وهو بيخبط حسن في جنبه وبيقول وهو بيجز على سنانه:
- أكلني، أكلني عشان أقوم أكلك بعد ما الإصابة تخف.
قعد حسن يضحك وبعدها قومت من الإحراج وقولت:
- أنا هطلع أجيبلي قهوة، تشربوا حاجة؟
إتعدل محمد شوية وهو بيتألم وقال:
- طيب إستني حسن اللي يروح متتعبيش نفسك.
بصلهُ حسن بإستنكار وأنا رديت عليه وقولت بإبتسامة:
- لأ لأ أنا عايزة أتمشى شوية، مش هتأخر.
خرجت بعدها وكانت القهوة حجة عشان الإحراج اللي كنت فيه،
بص محند لـ حسن اللي كان لسة باصصلهُ بإستنكار وقال محمد بتهديد وإنفعال:
- إنت عارف أول حاجة هعملها لما أقوم إي؟
جاوبهُ حسن بعد ما حط معلقة الرز بالشوربة في بُقه وقال بإبتسامة عافية:
- هتحضني أكيد يا صاحبي يا حبيبي ياللي عايز توزعني عشان واحدة.
بلع محمد الأكل وهو بيشرق وقال وهو بيخبطهُ في كتفهُ:
- إنت اللي مبتفهمش وتنح قاعد مش راضي تتحرك،
لتكون بتحبني وغيران عليا ولا حاجة؟
غمزلهُ حسن وقال بإبتسامة واسعة:
- أخيرًا جه الوقت اللي هعترفلك فيه يا حبيبي؟
زقهُ محمد بعيد عنهُ وهو بيضحك وبعدين كملوا باقي الأكل وهما بيهزروا مع بعض.
كنت جبت كوباية القهوة وقررت هقعد في الإنتظاز وأنا بفتح الورق اللي معايا، فتحت أول ورقة وكملت قرايتها.
كان مكتوب من فوق إسم والدتي وإسم مصحة نفسية،
تقريبًا الورقة دي طالعة من المستشفى نفسها.
في الورقة كان مكتوب إن والدتي عندها تلف جزئي في الدماغ بيسبب للهلوسة ورؤية أشياء غير موجودة، والتوهم بأشياء داخل عقلها بس.
مسكت الورقة جامد وأنا بقرأ الكلام دا لأن عمري ما سمعت إن والدتي كانت محتجزة في مصحة نفسية قبل كدا؟
رجعت شوية بالذاكرة وكانت ماما بعدت عننا فترة فعلًا بس كانوا مفهمني إن والدتي سافرت عشان تعمل عملية في محافظة تانية كام يوم وترجع.
وغيابها عني طال 3 شهور وشوية ولما عياطي زاد وبقيت مكتئبة بابا قالي إنهُ هيروح يجيبها وفعلًا راح ورجعوا الإتنين مع بعض.
محدش جابلي سيرة عن الموضوع دا خالص من والدي أو والدتي، حطيت إيدي على وشي شوية وبعدين فتحت الورقة التانية واللي كانت فيها المصيبة الأكبر.
رسالة بخط إيد الدكتور اللي كان مسؤول عن والدتي في المصحة وكان كاتبها لعمتي وبيقول:
- أستاذة سعاد، عملنالك كل اللي طلبتيه وطلعنا التقرير الطبي من جهتنا، ولكنك لسة مدفعتيش باقي الفلوس المطلوبة، لو مكانش كدا والفلوس جات خلال 48 ساعة واللي مجملها 40 ألف هنلغي الإتفاق اللي بينا وهعرف الست وجوزها اللي هو أخو حضرتك كل حاجة وإنك بتديها العلاج اللي يخليها تهلوس وتشوف حاجات من عقلها الباطن بالشكل دا.
كانت واضحة رسالة تهديد، تاريخ الرسالة كان من 17 سنة،
طيب وليه عمتي تعمل في ماما كدا ومكسبها إي ورا الموضوع دا؟
ثانية؟
يعني الهلاوس والحاجات اللي بتظهرلي زي الكوابيس دي مش ضغط نفسي زي ما الدكتور اللي ودتني ليه قالي ويمكن العلاج اللي إديتهولي بيعمل نفس الحاجة اللي كان بيعملها مع والدتي!
طيب هل ليها علاقة كمان بالرسم واللي بيحصل معايا؟
دموعي نزلت غصب عني وأنا مش قادرة أفكر ولا قادرة أستوعب!
الفرد الوحيد اللي باقيلي من أهلي بيتآمر ضدي وكان متآمر ضد والدتي؟!
حطيت الورقتين في جيبي من تاني ومسحت دموعي وقومت روحت ناحية أوضة محمد:
- أنا لازم أمشي دلوقتي.
رد عليا محمد بقلق وقال بتساؤل:
- في حاجة ولا إي؟
حاولت أبان عادية وأبتسم وقولت:
- لأ أنا بس لازم أروح لعمتي عايزاها في موضوع.
بصلي محمد بتفحص وتركيز وقال:
- يعني إنتِ مش معيطة؟
رديت عليه وقولت بإبتسامة:
- لأ أنا كويسة بجد، بس لازم أفتح معاها الموضوع دا،
أنا هروح ولو الوقت مكانش إتأخر هرجعلك تاني.
رد عليا بهدوء وعدم إقتناع وقال:
- طيب خلي بالك من نفسك.
هزيت راسب بالموافقة ومشيت فورًا بعد ما خدت شنطتي،
إتكلم محمد وقال لحسن:
- روح وراها يا حسن بعد إذنك من غير ما تاخد بالها عشان أنا متأكد إن في حاجة غلط وخايف يحصلها حاجة.
اتكلم حسن وهو بياخد حاجتهُ:
- حاضر، متقلقش.
***
لازم أواجه عمتي بكل اللي عرفتهُ ولازم آخد منها إجابات!
كنت ركبت تاكسي وطلعت على طول على بيت عمتي.
خبطت وأول ما فتحت قالت بغضب:
- إي اللي جابك عندي يا ملعونة إنتِ؟
رديت عليها بهدوء وقولت بإستنكار ورفعة حاجب:
- أنا بنت أخوكِ قادرة تقولي عليا ملعونة؟
ردت عليا وقالت بإنفعال:
- أيوا ملعونة ورثتي لعنة من أمك وأخويا حبيبي الله يرحمهُ اتظلم وهو عايش في جوازتهُ ووهو ميت في نسلهُ.
إتكلمت بإستغلال لكلامها وقولت بنبرة قوية:
- حلو أوي إنك جبتي سيرة أمي في الشر للمرة اللي مش فاكرة عددها، قوليلي بقى عملتي إي في أمي؟
بصتلي بتوتر للحظة وبعدين قالت بإنفعال:
- هعمل إي في أمك المخبولة دي؟
إتكلمت من تاني بنبرة جامدة وقولت بإنفعال وأنا بطلع الورقة:
- إي الغل والحقد اللي يخليكِ تتفقي مع دكتور وتديها علاج يسببلها هلاوس تعيش فيها مرعوبة وتحجزيها كمان بتقرير مزيف في مصحة نفسية، إي السبب اللي يخليكِ بالغل دا وتدفعي فلوسك في أذيتها؟
سكتت عمتي شوية وكانت بتاخد نفسها بشكل ملحوظ وقالت بغضب وغل أول مرة أشوفهم فيها:
- طيب عايزة إي يعني هتيجي تحاسبيني ولا إي؟
أمك الملاك اللي شيفاها معملتش حاجة الراجل اللي كنت بحبهُ زمان خطفتهُ مني ورفضني قال إي عشان بسحبها وأحرجني ووقتها انتشر بين كل صحابي وزمايلي في الجامعة إنهُ رفضني عشانها وبما إنها كانت مفضلة الجامعة كانوا بيتنمروا عليا بسببها.
بصيتلها وأنا مش قادرة أستوعب السبب اللي هي بتقولهُ بجد وقولت:
- أنا قولت قتلتلك قتيل، لكن واحد رفضك عشان بيحبها هي مالها وذنبها إي، دي حتى إتجوزت أخوكِ يعني مخطفيتهوش منك ولا حاجة؟
ردت عليا بنفس طريقتها وإنفعالها:
- ما هي عملت كدا عشان تقهرني، بينت للجامعة إن هي يا حرام مش بتحبهُ ومش موافقة على اللي بيعملوا معايا وعشان عارفة إني بكرهها قررت تفضل في وشي طول العمر ولفت على أخويا وخليتهُ يتجوزها.
رديت عليها بإستنكار وقولت وعقلي مش راضي يستوعب:
- إي نظرية المؤامرة والحرب اللي عيشتيها لوحدك والعدو كان نفسك دي؟
إي كمية المرض والحقد اللي فيكِ دي، طيب كنتِ بتكرهيها وتغيري منها وممكن يتقال عليها مرض وتعدي، لكن أنا بنت أخوكِ بتديني نفس العلاج وبتوهميني إني على مشارف الخرف برضوا ليه؟
ردت عليا وقالت بغل وتعبيرات وش مفيهاش رحمة ولا حب:
- عشان إنتِ بنتها وشبهها وأخويا كذا مرة قولتلهُ بطفي ناري ويطلقها ومرضيش كان بيحبها.
إتكلمت وقولت بتساؤل وأنا كرهاها:
- والرسم والقتل وكل اللي بيحصلي إنتِ السبب فيه برضوا؟
ضحكت بشماتة وقالت:
- دي بقى ماليش دعوة بيها ولا أعرف بيحصل إزاي معاكِ، بس دا أكيد من أفعال أمك ورثتي منها لعنة حقيقية.
إتكلمت بإنفعال وقولت وأنا بمشي من قدامها عشان أنزل:
- إنتِ بجد مريضة ومش طبيعية، أنا مش عايزة أعرفك تاني أبدًا.
كنت هنزل ولكن فجأة سمعتها بتصرخ وحاجة وقعت على الأرض بصيت ورايا لقيت حسن ماسك إيديها وموقع منها شمعدان معدن على الأرض كانت مسكاه وعايزة تخبطني بيه!
بصيت لـ حسن بإستغراب وقولت بين دموعي:
- إنت جيت منين؟
رد عليا بتوتر وقال:
- كنت بزور واحد صاحبي فوق وسمعت دوشة والحمدلله نزلت في الوقت المناسب كنتِ قوليلي إنك جاية هنا كنت خدتك في طريقي.
بص ناحية عمتي وقال بغضب:
- إنتِ تتيجي معايا القسم دلوقتي.