رواية لوحاتي الدموية انقذني منها الفصل السابع7بقلم هاجر نور الدين
- إنتِ بجد مريضة ومش طبيعية،
أنا مش عايزة أعرفك تاني أبدًا.
كنت هنزل ولكن فجأة سمعتها بتصرخ وحاجة وقعت على الأرض بصيت ورايا لقيت حسن ماسك إيديها وموقع منها شمعدان معدن على الأرض كانت مسكاه وعايزة تخبطني بيه!
بصيت لـ حسن بإستغراب وقولت بين دموعي:
- إنت جيت منين؟
رد عليا بتوتر وقال:
- كنت بزور واحد صاحبي فوق وسمعت دوشة والحمدلله نزلت في الوقت المناسب كنتِ قوليلي إنك جاية هنا كنت خدتك في طريقي.
بص ناحية عمتي وقال بغضب:
- إنتِ تيجي معايا القسم دلوقتي.
بقيت بصالهُ ومش قادرة أحدد لو هو فعلًا مراقبني؟
نزل بعدها وهو ماسك عمتي ورايح بيها للقسم زي ما قال.
مكنتش عايزة أدافع عنها ولا حابة فـ سيبته براحتهُ،
نزلت بعدها وقررت هروح الشقة بتاعتي الأول عشان آخد الحبوب دي أفصحها وأقدم فيها محضر رسمي هي والدكتور اللي عمل كدا في والدتي وخلاها عايشة كل دا في الحزن والحيرة والخوف.
بعد ما وصلت الشقة وخدت العلاج حطيتهُ في جيبي جاتلي دوخة قوية جدًا، حاولت أتماسك وأنزل من الشقة بس رجعت التحكمات من تاني واللي بيتحكم فيا رجع من تاني.
إتجريت بالمعنى الحرفي على الأرض لحد ما وصلت ناحية لوحة وقعدت غصب عني وبدأت أرسم وأنا مغمضة عيني.
كان الوقت بيمر عليا بصعوبة وأنا متقيدة بالشكل دا،
إيدي بتتحرك غصب عني وصوتي مكتوم ومفيش حد معايا يلحقني.
بعد ما خلصت ورجعلي تحكمي في نفسي من تاني لفيت وشي وفتحت عيني وأنا مفزوعة ومش عايزة أشوف، مش عايزة!
بعد شوية وقت وأنا قاعدة كدا وخايفة أبص عيطت وقررت إني لازم أشوف عشان لو في أمل ألحق الشخص اللي في الصورة عشان معيشش بذنبهُ وإني كنت سبب في موتهُ وإستسلمت من غير ما أساعد.
لفيت وشي وشوفت والمرة دي مكانتش جريمة!
المرة دي كانت رسمة فيما معناها الحل للي أنا فيه وتحتيه مكتوب سؤال؟
الرسمة كان فيها أنا ومحمد وشخص تاني مش عرفاه أو مش واضح ملامحهُ وبنت معرفهاش، وكلهم بيحاوطهم قلب فيما معناه إن دول جوا مربع الحب.
السؤال اللي كان مكتوب بالرسم كان:
- تفتكري الشخص اللي ممكن يكون بيحبك يقدر ينقذك من اللعنة دي ولا مش بيحبك كفاية؟
مكنتش فاهمة السؤال، كانت دموعي بتنزل بصمت وحاسة إن هيجرالي حاجة من قلة الفهم لأن لو الجرايم بتاخد ساعتين من الرسم وبعدها بتحصل يبقى في كارثة هتحصل برضوا أنا معرفهاش!
صورت اللوحة وقررت إني أدخل على موقع كنت سبق ودخلت ليه قبل ما أعمل الحادثة، كان موقع من ضمن المواقع الديب ويب، كان بيوفر سهولة لبيع اللوح ولكن العميل كان بيطلب رسم لوح معينة وتتنفذ بطريقة معينة، بمجرد ما قبلت طلب لعميل عملت بعدها الحادثة وكنت نسيتهُ ومرسمتش حاجة للعميل.
نزلت اللوحك الأخيرة على الموقع وأنا بسأل:
- حد يعرف إي معنى الكارثة اللي جاية من اللوحة دي؟
قبلها كان في حاجة بتجبرني أرسم لوح جرائم ومن ضمنهم هو اللي رسم اللوحة دي مش أنا، لو حد عندهُ نفسير ياريت يبلغني قبل ما أتجنن!
فضلت قاعدة على أعصابي مستنية رد، عدا نص ساعة غير النص ساعة اللي قبلها يعني عدا ساعة، بعدها رد عليا أكونت مجهول مميز بإسم بلاك هيل وقال بسخرية:
- إزاي مشاركة في الموقع ومش عارفة إن مجرد قبولك لمهمة شغل هنا فـ إنتِ إيديكِ مبقتش ملكك ولا رسمك بمزاجك، مقرأتيش التعليمات وبنود العقد في بداية الموقع ولا شوفتي صندوق الأرباح بتاعك من اللوح اللي إترسمت؟
برقت وأنا مش فاهمة إي اللي حصل دا،
وهتبقى كارثة لو اللي بيتكلم عليه حقيقي وصح!
جريت على صندوق الأرباح داخل الموقع ولقيت فعلًا مكتوب ربح اللوحة الأولى 1000$ تم الدفع، ربح اللوحة التانية تخريب وتحذير التالتة هكذا والرابعة هكذا الخامسة اللي هي الحالية مكتوب حل التحرر هو حل اللوحة.
أنا مكنتش فاهمة آي حاجة، كان عندي موبايل قديم فتحتهُ ودخلت على الموقع من البداية كأني لسة هسجل فيه وظهرلي لوحة البنود اللي كنت زي العبيطة قبلت من غير ما اقرأ لأنها بالأسباني ولأني مكنتش مدية الموضوع أهمية في البداية.
فتحت ترجمة جوجل وبدأت اقرأ التعليمات،
فعلًا موجود إن بداية قبول عميل العميل هو اللي هيتحكم في إيدك ورسمك، لا يمكنك التراجع، فشل أكثر من ثلاث لوح بيدي بعدها العميل حل للهرب من القيد، لو معرفتش تحل اللغز خلال الوقت المحدد هتكون إنت اللوحة الأخيرة.
مكنتش فاهمة إي اللي المفروض يحصل دلوقتي؟
يعني فاضل ساعة واحدة وبعدها هكون أنا الضحية الجديدة؟
والعميل دا بيتحكم في إيدي ورسمي إزاي،
هو أنا دخلت نفسي في إي بالظبط؟!
رجعت تاني للتعليقات وسألت اللي علقلي وقولت بسرعة وتوتر:
- طيب تعرف معنى اللغز اللي في اللوحة دي؟
رد عليا من تاني بسخرية وقال:
- دي لوحة لغز خاصة بيكِ محدش يعرف معناها غيرك،
المفروض إنك تحليها في حياتك الشخصية دي مش لعبة هتلاقي كل عنصر في اللوحة في حياتك إنتِ!
بصيت من تاني للوحة وأنا مش فاهمة حاجة،
العناصر أنا ومحمد دا اللي اعرفهم، مين الشخصين التانيين دول وإي علاقتهم بمربع الحب؟
فضلت أدقق جدًل ولكن مش فاهمة،
روحت بعدها لـ محمد المستشفى وأنا بأخر رجل وبقدم التانية،
مش عارفة أزيدهُ هم وهو مش قادر يحرك دراعهُ دلوقتي ولا أعمل إي بالظبط؟!
وصلت لحد باب الأوضة بتاعتهُ وقبل ما أدخل طلع منها حسن وقال بتساؤل:
- اتأخرتي كدا ليه عقبال ما جيتي محمد قلقان عليكِ؟
إتنهدت وقولت بتوتر:
- حسن أنا محتاجة مساعدتك في حاجة، باقيلي نص ساعة بس وهكون ضحية اللوحة الجديدة، أنا مش عارفة المفروض أعمل إي دلوقتي.
بصلي بصدمة وعيون واسعة وقال بتساؤل:
- يعني إي دا مش فاهم حاجة؟
فتحت اللوحة ووريتهالهُ وأنا بقول:
- دلوقتي المفروض أحل اللغز دا خلال نص ساعة بس وإلا هكون أنا اللوحة الجديدة، أنا معرفش إي اللي إشتركت فيه دا بالظبط ولكنهُ دارك ويب بشكل خطير.
بصلي حسن بصدمة وبدأت أوريلهُ الصورة اللي فيها التعليمات والبنود وكلام الشخص المجهول اللي في الموقع.
بعدها إتكلم وهو حاطط إيديه على راسهُ بـ توهان:
- المفروض نقول لـ محمد؟
بصيتلهُ وقولت برفض:
- لأ أنا مش عايزاه يقلق ولا عايزة أشغلهُ بحاجة زي كدا،
كفاية أوي اللي حصلهُ بسببي.
رد عليا وقال بتوضيح:
- محمد جوا اللوحة دي، الأكيد إنهُ عارف حاجة لو هو عنصر فيها،
نجرب نقولهُ يمكن يدينا حل وخلاص أصلًا مفيش وقت.
بصيتلهُ بتردد وهو سبقني ودخل الأوضة وشاورلي أدخل،
دخلت وأنا لسة مش عايزة أقولهُ، خدت نفسي وحسن هو اللي خد ستيب إنهُ يحكي وحكى كا حاجة قولتهالهُ.
وسط كل دا كان محمد عيونهُ مليانة قلق عليا وشوية غضب وشوية إنفعال وفي الأخر قال وهو بيشوف اللوحة:
- أنا مش عارف مين دا ولا دي برضوا،
بس ثانية لو في حاجة غير آدمية بتلعب معاكِ اللعبة دي فـ الأكيد إنها مش هتحطلك حل سهل عشان تتخلصي منها!
بصيتلهُ بإهتمام وقولت بتساؤل:
- قصدك إي بالظبط؟
رد عليا وقال بتوضيح أكتر وهو باصص للصورة:
- قصدي إنها بتشوشك عن الحل في إنك تركزي مغ الشخصين دول وتعرفي مين هما لأن مالهومش وجود من الأساس وتسيبي اللغز الحقيقي عشان يوقعك.
لضلت مركزة معاه على الرسمة اللي في الموبايل وأنا لسة مش لاقية ثغرة تانية أقدر من خلالها أحل اللغز.
لحد ما هو قال بتساؤل وتوتر:
- إي معنى العلامة دي؟
بصيت ناحية ما شاور وكبرت الصورة إزاي مخدتش بالي منها،
دي علامة معناها في الرسم الخاص بيا تكرار.
جاوبتهُ وقولت بعدم فهم:
- معناها تكرار، بس إي علاقتها بالرسمة وإي الرابط اللي بيكرر صورتي أنا وإنت بالشخصين دول؟
بصيت للساعة وقولت بخوف:
- فاضل 10 دقايق بس؟!
إتوتر محمد هو كمان وقال بعد تركيز وتدقيق في اللوحة خد خمس دقايق:
- دا معناه إن الإتنين اللي تحت هما إحنا برضوا وإحنا متكررين، مفيش شخصيات جديدة هي شخصياتنا متكررة!
وقتها الصورة اللي وخداها للوحة بدأت تتغير واحدة وحدة والشخصيم اللي تحت وضحوا وظهر إنهم إحنا برضوا ولكن بوضعيات مختلفة للرسم.
بصيتلهُ بإبتسامة وقولت:
- كدا حلينا اللغر، كدا خلاص إتحررت؟!
إبتسم محمد بإرتياح وحسن كمان ولكن فرحتنا مدامتش لما جالي تحذير من الموقع لجمجمة مبتسمة ومكتوب تحتها بالإنجليزي:
- Game over, the drawings are finished and the puzzle is solved. Verbally without referring to the board, then the solution is incorrect.
- إنتهت اللعبة، إنتهت الرسمات وإنتهى حل اللغز، شفوي دون الرجوع للوحة إذًا الحل غير صحيح.
بصيت لـ محمد والدموع بتتكون في عيني والخوف دب في قلبي وقولت:
- يعني إي؟
إتكلم حسن وهو قلقان وقال بعد ما بص للموبايل:
- يعني كان لازم تروحي ترسمي حل اللغز من تاني!
الموبايل وقع من إيدي من الصدمة ووقتها إتكلم محمد وقال بهدوء:
- متقلقيش يا ورد أنا معاكِ ومحدش هيقدر يلمسك،
أنا مش هسيبك لوحدك وهتباتي معايا في القسم النهاردا.
خلص كلامهُ وهو بيقوم من مكانهُ وقولت بتحذير:
- لأ إنت لازم ترتاح!
رد عليا بغضب وقال:
- أنا كويس متقلقيش بس لازم تفضلي قصاد عيني.
بعدها مشينا فعلًا وروحنا للقسم،
فضل مقعدني قدامهُ على المكتب بيخلص شغلهُ بـ عين وبيراقبني بالعين التانية.
كان إي هيبقى شعوري لو كنت لوحدي بدون محمد يطمني ويحسسني إن في حد خايف عليا ومهتم بيا؟!
يمكن دلوقتي خوفي النُص بسبب وجود محمد بس،
بعد شوية وقت كنت زهقت وقولتلهُ إني هخرج أجيب قهوة، رد عليا بإنفعال وقال:
- إقعدي وأنا هبعت حد يروح مش هتروحي في حتة.
قعدت فعلًا تاني بزهق وهو كلم حد في الموبايل،أثناء ما كان بيكلم حد الورقة والقلم اللي قدامي كانوا بيتحركوا لوحدهم بشكل فزعني وخلاني أقوم أقف مرة واحدة بخضة.
محمد خد بالهُ وقرب مني وشاورلتهُ على الورقة،
محمد حاول ياخد الورقة ويقطعها ولكن الورقة مكملة رسم بدون القلم حتى ومش راضية تتقطع وكأنها ضد التمزيق!
لحد ما خلصت الرسمة وزي ما الموقع قال،
أنا اللي في الرسمة المرة دي!