- الدور عليا، هموت بالطريقة البشعة دي؟
كانت جملتي المرعوبة وأنا ببص لمحمد،
الرسمة المرة دي كانت أنا وأنا مقتولة
ومفصول راسي عن جسمي!
بص محمد للرسمة وقال بغضب وهو بيقرب مني وبيمسك إيدي عشان يهديني:
- متخافيش أنا معاكِ ومش هسمح بآي حاجة تأذيكِ،
أنا هفضل جنبك ومفيش حاجة من دي هتحصل.
بعدها سحبني معاه للمكتب ومسك موبايلهُ وفتح مكالمة كل دا تحت صدمتي وأنا مش قادرة أستوعب ومرعوبة ومبرقة.
إتكلم بعد ما رد الطرف التاني وقال:
- إي يا حسن، عملت زي ما قولتلك وصلت لحاجة؟
رد عليه حسن وقال بتوتر:
- أنا لسة مكملتش ساعتين، في حاجة حصلت ولا إي؟
إتكلم محمد بإنفعال وقال وهو بيحاول يهدى:
- الرسمة الجديدة إترسمت وفيها ورد،
أنا لازم أمنع الموضوع دا وأوقف اللي بيعمل كدا عند حدهُ،
بسرعة يا حسن بالله عليك مبقاش في وقت!
رد عليه حسن وقال بسرعة وتوتر:
- خلاص إقفل دلوقتي وأنا خلاص قربت أعرف صاحب الموقع.
قفل معاه وبعدين فضل يبصلي وهو بياخد نفسهُ بشكل ملحوظ من التوتر والغضب، إتكلمت بهدوء وقولت بإبتسامة رغم خوفي:
- متقلقش يا محمد، أنا واثقة فيك، وغير كدا إن شاء الله مش هيحصل حاجة وهنلحق نتخلص من اللعنة دي قبل ساعتين.
ابتسملي محمد ابتسامة بسيطة، بس كنت شايفة الخوف اللي في عينيه رغم محاولته يخبيه عني، وبعدها سحب كرسي وقعد قدامي وقال:
- أنا مش قلقان من حاجة طول ما إنتِ معايا، بس مش عايز أخسرك يا ورد، ومش عايز أكون السبب في إنك تتأذي بسبب إني معرفتش أحميكي.
بصيتله بحزن وقولت:
- إنت عملت معايا أكتر من اللي أي حد ممكن يعمله، ولو مكنتش موجود مكنتش عارفة كنت هبقى فين دلوقتي، بس أنا مش عايزاك تعرض نفسك للخطر عشاني تاني.
ابتسم بسخرية خفيفة وقال:
- هو إنتِ فاكرة إني هاخد إذنك قبل ما أحميكي؟
ضحكت غصب عني رغم التوتر اللي كنت فيه، وقبل ما أرد عليه موبايله رن، وكان حسن.
رد محمد بسرعة وقال:
- أيوة يا حسن، وصلت لإيه؟
رد حسن بتوتر:
- أنا لسة مكملتش ساعتين، بس قدرت أوصل لحاجة مهمة، إنت فين دلوقتي؟
- أنا في القسم، قول بسرعة.
- بص يا سيدي، قدرت أوصل لبيانات قديمة مرتبطة بالموقع، وفيه حساب كان بيستخدم نفس السيرفر اللي الموقع شغال عليه، الحساب دا متسجل باسم شخص اسمه سامح فؤاد، وعنوانه موجود عندي.
سأله محمد بتركيز:
- وإنت متأكد إنه هو صاحب الموقع؟
رد حسن:
- لأ، ودا اللي مقلقني، لأن الحساب متسجل من فترة طويلة ومفيش أي نشاط ظاهر عليه، بس فيه تحويلات مالية مرتبطة بيه، وكلها جاية من مصادر مختلفة.
إتكلم محمد بجدية وقال:
- تمام، ابعتلي العنوان على الواتساب، وإحنا هنتحرك عليه فورًا.
قفل المكالمة وبصلي للحظة قبل ما يقوم من مكانه، فسألته بقلق:
- هو ممكن يكون الشخص دا فعلًا؟
رد عليا:
- ممكن يكون ليه علاقة بالموضوع، وممكن يكون مجرد طرف من أطرافه، بس في كل الأحوال لازم نبدأ من أي خيط عندنا.
قمت من مكاني وأنا ماسكة الورقة، وفضلت أبص للرسمة اللي فيها جسمي المقتول، مش قادرة أتخيل إن دي ممكن تكون نهايتي فعلًا.
خرجنا من المكتب، وبعد ما وصلنا للعربية ركب محمد وفتح العنوان اللي حسن بعتهوله، وبعدها اتحركنا.
فضلت ساكتة شوية وأنا بحاول أفكر في أي حاجة ممكن تساعدنا، لحد ما عيني وقعت تاني على الرسمة، وافتكرت حاجة خلتني أقرب الورقة مني وأتأملها كويس.
كان فيه جزء مرسوم من حائط، وعليه ساعة عقاربها واقفة عند رقم معين.
قربت أكتر وحاولت أركز في الساعة، لكن قبل ما أقدر أحدد الوقت بصيت لمحمد وقولت:
- محمد، استنى!
بصلي بسرعة وقال:
- في إيه؟
رفعت الورقة قدامه وقولت:
- بص هنا، في الساعة دي، أنا مكنتش واخدة بالي منها غير دلوقتي.
بص للرسمة وهو بيحاول يركز في المكان اللي بشاور عليه، وبعدها قال:
- الساعة واقفة على كام؟
قربت الورقة من عيني وحاولت أحدد العقارب، لكن الرسم كان صغير ومش واضح أوي، فقولت:
- مش عارفة، بس أكيد مش مرسومة كدا من غير سبب.
رد محمد وهو بيبص للطريق:
- عندك حق، ممكن تكون إشارة لمعاد أو مكان، أول ما نوصل هنبص عليها كويس.
فضلت ساكتة وأنا بحاول أفكر، لحد ما موبايل محمد رن تاني، وكان حسن.
فتح مكبر الصوت وقال:
- أيوة يا حسن؟
سمعته بيقول بلهفة:
- محمد، استنى قبل ما تروح العنوان اللي بعتهولك، أنا لقيت حاجة تانية.
محمد عقد حواجبه وقال:
- إيه تاني؟
رد حسن بصوت متوتر:
- الشخص اللي اسمه سامح دا متوفي من تلات سنين!
بصيت لمحمد بصدمة، وهو سكت لحظات قبل ما يسأله:
- متأكد من المعلومة دي؟
رد حسن:
- أيوة، متأكد، ودا معناه إن فيه حد بيستخدم بياناته بعد موته، أو إننا بنتعامل مع شخص عارف كويس إزاي يخفي هويته.
محمد ضغط على الدركسيون بغضب وقال:
- يعني بنلف في دايرة مقفولة!
رد حسن بسرعة:
- مش بالظبط، أنا لقيت حاجة ممكن تفيدنا، التحويلات اللي على الحساب كان آخر واحد فيها من يومين بس، وقدرت أحدد المكان اللي اتعملت منه.
محمد سأله بتركيز:
- فين؟
رد حسن بعنوان المكان، وبعدها قال:
- بس خليك حذر، أنا مش عارف إحنا رايحين نقابل مين بالظبط.
محمد قفل المكالمة وبصلي، وبعدها قال:
- هنغير اتجاهنا.
سألته بقلق:
- هنروح فين؟
رد وهو بيحاول يطمني:
- مكان ممكن يكون فيه أول خيط حقيقي يوصلنا للي بيعمل كدا.
رجعت بصيت للرسمة، وحاولت أبص للساعة مرة تانية، لكن المرة دي لاحظت حاجة تانية خلت قلبي يدق بسرعة.
العقارب مكنتش واقفة على وقت معين زي ما كنت فاكرة، كانت الساعة مكسورة، وعقرب الدقايق واقع على الأرض تحتها، وفوق الساعة كان فيه رقم مكتوب بخط صغير جدًا.
قربت الورقة من وشي وفضلت أقرأ الرقم كذا مرة، لحد ما قدرت أميزه.
كان مكتوب 23:59
إتجمدت مكاني، وبصيت لمحمد وقولت بصوت مهزوز:
- محمد...
بصلي وقال:
- مالك؟
رفعت الورقة قدامه وقولت:
- بص على الرقم دا.
بص للرسمة، وملامحه اتغيرت تدريجيًا، وبعدها قال:
- الساعة 23:59؟!
هزيت راسي وأنا حاسة إن نفسي بدأ يضيق، وقولت:
- يعني فاضل دقيقة واحدة على نص الليل...
فضل محمد ساكت وهو بيبص للرسمة، وبعدها رفع عينه ليا وقال بجدية:
- لأ يا ورد، دا مش شرط يكون معناه إن قدامنا دقيقة واحدة، ممكن يكون مجرد جزء من اللغز.
بصيتله وقلت:
- طب ولو الرقم دا هو الوقت اللي لازم يحصل فيه كل دا؟
محمد مردش، وفضل ساكت وهو بيزود سرعة العربية شوية،
أما أنا ففضلت باصة للرسمة، لحد ما موبايل محمد اللي كان محطوط جنبه نَوّر بإشعار رسالة جديدة.
بص عليها، وبعدها فتحها بسرعة، ووقتها شفت ملامحه بتتغير بشكل مفاجئ، سألته بخوف:
- في إي يا محمد؟
لف الموبايل ناحيتي من غير ما يتكلم،
كانت رسالة من حساب مجهول، ومكتوب فيها جملة واحدة:
"الوقت بيخلص يا ورد، والمرة دي مش هتقدري تنقذي نفسك!"
حسيت ببرودة في أطرافي، وبصيت لمحمد اللي كان بيحاول يتصل بحسن تاني، لكن قبل ما يرد عليه قولتله:
- هو عارف إحنا فين يا محمد؟
بصلي وقال:
- مش عايزك تفكري في كدا دلوقتي، ركزي معايا وخليكي هادية.
رد حسن على المكالمة، فإتكلم محمد بسرعة:
- حسن، فيه رسالة وصلتلي من الحساب المجهول، واضح إنه متابعنا وعارف تحركاتنا.
رد حسن بقلق:
- ابعتلي الرسالة حالًا، ومتتحركوش من غير ما تبقوا واخدين بالكم، أنا هحاول أتتبع مصدرها.
محمد قفل معاه وبعتله الرسالة، وبعدها فضل ساكت وهو مركز في الطريق.
كنت بحاول أهدي نفسي، لكن كل ما أبص للرسمة أحس إن الوقت بيعدي أسرع، وإن فيه حاجة مستنياني في آخر الطريق.
لحد ما وصلنا للمكان اللي حسن بعتهولنا.
كان مبنى قديم في شارع جانبي هادي، ومفيش حواليه حركة تقريبًا، محمد ركن العربية وبص للمبنى شوية قبل ما يلتفتلي ويقول:
- خليكي هنا لحد ما أتأكد إن المكان آمن.
مسكت إيده بسرعة وقولت:
- لأ، مش هسيبك تروح لوحدك.
بصلي بجدية وقال:
- ورد، أنا مش هقدر أركز وأنا قلقان عليكي، استنيني هنا دقايق بس.
نزل من العربية وقفل الباب، وفضلت متابعاه بعيني لحد ما دخل من باب المبنى.
حاولت ألتزم بكلامه، لكن مكنتش قادرة أقعد مكاني، خصوصًا إن المكان كان هادي بشكل مريب، ومفيش أي صوت غير صوت عربية بعيدة بتعدي من وقت للتاني.
بعد دقايق، موبايلي رن، بصيت للشاشة لقيت اسمهُ ظاهر، رديت بسرعة وقلق وقولت:
- محمد؟ إنت كويس؟
سمعت صوته بيقول:
- أيوا يا ورد، متقلقيش، أنا لقيت حاجة هنا.
سألته بلهفة وإنتباه:
- إي هي؟
سكت لحظة، وبعدها قال:
- في أوضة مليانة أجهزة، وشاشة مفتوح عليها نفس الموقع اللي إنتِ دخلتي عليه.
حسيت إن قلبي هيقف، وقولت:
- يعني إحنا وصلنا لصاحب الموقع؟
رد عليا بتردد وصوت حذر:
- مش عارف لسة، بس فيه حاجة غريبة...
وقبل ما يكمل سمعت صوت خبطة قوية، وبعدها المكالمة إتقطعت.
فضلت ماسكة الموبايل وببص للشاشة بصدمة، حاولت أتصل بيه تاني، لكن مفيش رد، نزلت من العربية بسرعة ودخلت المبنى وأنا بنادي عليه:
- محمد، محمد!
طلعت السلم وأنا حاسة إن رجلي مش شايلاني، لحد ما وصلت للأوضة اللي قال عليها.
الباب كان مفتوح، دخلت بحذر وأنا ببص حواليا، لكن ملقتش محمد.
كل اللي شوفته كان شاشات كتير مفتوحة، وعلى واحدة منهم كانت صفحة الموقع، وفي النص إسم الحساب اللي كنت بتعامل معاه.
Black Hill
قربت من الشاشة وأنا مش مصدقة، وفجأة ظهرت رسالة جديدة عليها.
"أخيرًا وصلتي بنفسك يا ورد."
رجعت خطوة لورا وأنا ببص للشاشة برعب، وبعدها سمعت صوت خطوات جاية من ورايا.
لفيت بسرعة، ولقيت محمد واقف عند الباب، ماسك دراعه بإيده التانية، وملامحه متوترة، جريت عليه وقولت بقلق والدموع بدأت تتكون في عيني:
- إنت كويس؟ حصل إي؟ أنا كنت هموت من خوفي عليك!
رد وهو بيحاول يطمني:
- أنا كويس، متقلقيش، بس الشخص اللي كان هنا هرب من باب تاني.
بصيت للشاشة تاني وقولت:
- محمد، بص!
قرب مني وبص للرسالة، وبعدها ظهرت رسالة تانية تحتها.
"باقي خطوة واحدة يا ورد، واللوحة الأخيرة مستنياكي."
حسيت إن جسمي كله اتجمد، وبصيت لمحمد اللي مد إيده وقفَل الشاشة بسرعة وقال بحزم:
- خلاص، مش هنسيبله فرصة يتحكم فيكِ تاني.
وقبل ما أقدر أرد، موبايله رن، وكان حسن،
رد محمد وقال بتنهيدة:
- أيوا يا حسن، إحنا وصلنا للمكان، بس الشخص هرب.
رد حسن بسرعة وتوتر:
- إستنى يا محمد، أنا قدرت أوصل لحاجة مهمة جدًا، الحساب اللي كنت بدور عليه مش مجرد حساب وهمي، فيه شخص تاني كان بيدخل عليه من مكان مختلف، وقدرت أحدد أخر عنوان اتصل منه.
محمد سأله في سرعة:
- فين العنوان دا؟
رد حسن وقاله، وبعدها سكت لحظة قبل ما يكمل:
- بس في حاجة لازم تعرفها، العنوان دا مرتبط بشخص كان شغال في مصحة نفسية من سنين.
بصيت لمحمد أول ما سمعت الجملة دي،
كنت بحاول أفهم وأستوعب إي العلاقة!
محمد لاحظ نظرتي وسأل حسن:
- إسمه إي؟
رد حسن بتردد وقال:
- الدكتور اللي إسمه موجود في الأوراق اللي ورد لقتها، الدكتور اللي كان بيتابع حالة والدتها.
اتسعت عيني وأنا ببص لمحمد، ومقدرتش أنطق بكلمة.
كل اللي جه في بالي وقتها كان أمي، والأوراق القديمة، والرسالة اللي لقيتها عند عمتي، والسنين اللي قضيتها وأنا مش فاهمة إي اللي حصل لها بالظبط.
محمد بصلي بقلق، وبعدها قال لحسن:
- إبعتلي العنوان، وإحنا جايينلك.
قفل المكالمة، وقبل ما نتحرك رجعت بصيت للشاشة اللي محمد كان قفلها، لكن لقيتها نورت لوحدها تاني.
ظهرت عليها رسمة جديدة،
قربت منها ببطء، وأنا حاسة إن نفسي بيتسحب مني.
كانت رسمة لباب أوضة قديمة، وعلى الباب لوحة صغيرة مكتوب عليها اسم المصحة اللي كانت أمي محتجزة فيها.
وتحت الرسمة ظهرت جملة واحدة:
"قبل ما تعرفي الحقيقة، لازم تعرفي مين رسم أول لوحة!"
فضلت باصة للجملة، وبعدها بصيت لمحمد وقلت بصوت مبحوح:
- محمد، هو أنا كنت السبب في اللي حصل لماما؟
محمد قرب مني بسرعة ومسك إيدي وقال:
- متقوليش كدا يا ورد، إنتِ ملكيش ذنب في آي حاجة، ومهما كانت الحقيقة هنواجهها سوا.
لكن قبل ما أقدر أرد عليه، الشاشة نورت مرة أخيرة، وظهر عليها إشعار جديد من الموقع.
"انتهى الوقت المحدد، بدأت المرحلة الأخيرة."
وبعدها اختفت كل الرسائل، وظهرت صورة جديدة.
كانت صورتي...
بس المرة دي مكنتش مرسومة وأنا مقتولة.
كنت واقفة قدام باب أوضة المصحة، وفي إيدي فرشة رسم، وقدامي لوحة كبيرة متغطية بقماشة بيضا.
وتحت الصورة كان مكتوب:
"افتحي اللوحة يا ورد... وشوفي أول جريمة رسمتيها بإيدك!"
لقراءة باقي الفصول اضغط هنا