رواية اقدار مكبلة الفصل السابع7بقلم فادية النجار
اللهم صلِّ على سيدنا محمد وعلى آله وأصحابه وسلم تسليماً كثيراً.
كان آدم واقف جنب حبيبة وهي طايرة من الفرحة، بعد ما حققت جزء من نجاحها اللي طول عمرها بتحلم بيه، والأهم إن آدم واقف جنبها وبيدعمها.
آدم ابتسم وقال:
— طيب يلا بينا بقى ولا هنفضل طول النهار واقفين؟ يلا عشان أنا عازمكم على الغداء برة بمناسبة تفوق حبيبة.
لين بتنطط من الفرحة:
— يعيش بابا.. يعيش!
حبيبة وهي بتلم حاجتها:
— تمام، ألم الورق ونمشي على طول.
سعاد حطت إيدها على رجلها وقالت:
— طيب أنا هنزل أنا والبنات وعايدة نستناكم تحت، خدو راحتكم عشان رجلينّا وجعانا من الوقفة.
آدم:
— تمام يا أمي.
نزلت سعاد وعايدة والبنات، وحبيبة قالت لآدم:
— لحظة بس، ثواني وهكون مخلصة.
رن تليفون آدم في الوقت ده، فقال لها:
— براحتك، على بال ما أرد على عمر.
آدم رد:
— أيوة يا عمر..
عمر:
— السلام عليكم ورحمة الله وبركاته.
آدم:
— وعليكم السلام ورحمة الله وبركاته.
عمر:
— (...)
آدم مش سامع الكلام كويّس:
— ثواني يا عمر مش سامع نص الكلام، استنى هقف في حتة فيها شبكة.
بص لحبيبة وقال لها:
— خلصي، أنا برة.
حبيبة:
— تمام.
لمت حبيبة أوراقها، وفجأة سمعت صوت حد بيصقف.. لفت وشها ولقته معتز! لاتخضت لوهلة، بس تجاهلته تماماً وكأنها مش شايفاه، وكملت لمّ أراضها.
معتز بابتسامة مستفزة:
— مبروك يا حبيبة، ألف مبروك.
حبيبة بجمود:
— شكراً يا دكتور معتز، بس لو سمحت نلتزم بالألقاب.. يعني أنا أقولك دكتور معتز، وانت تقولي دكتورة حبيبة.
معتز بنبرة حاقدة:
— طول عمرك مغرورة يا حبيبة وشايفة نفسك، وبتخدعي كل اللي حواليكي!
حبيبة بغضب:
— دكتور معتز، لو سمحت الزم حدودك معايا!
مسكت حاجتها وجت تمشي من قدامه، بس هو مد إيده ومسك إيدها بقوة.
حبيبة بعصبية:
— سيب إيدي يا معتز أحسنلك!
معتز بتحدي:
— أنا عملتلك إيه بس؟ وبعدين النجاح اللي انتِ حققتيه ده أنا شريك فيه، يعني أنا اللي كان المفروض أكون جنبك النهاردة!
حبيبة وهي بتحاول تشد إيدها منه:
— ابعد إيدك دي أفضلك! وبعدين شريك في إيه؟ انت دكتور تجميل ومجالك غير مجال بحثي تماماً على ما أتذكر!
وهو لسه ماسك إيدها وهي بتحاول تسحبها بكل قوتها، فجأة معتز طار واترمى تحت رجلها بسبب بوكس عنيف نزل على وشه!
آدم مسك وش حبيبة بإيديه الاثنين بلهفة:
— انتِ كويسة؟ عملك حاجة؟!
حبيبة وهي بترتعش بين إيديه، هزت رأسها بنفي وقالت بخوف ورعب:
— عايذة أمشي من هنا..
آدم:
— تمام.
مسك إيدها وبص لمعتز بشرار بيتطاير من عينيه وقال:
— ده آخر تحذير ليك.. أقسم لك بالله لو لقيتك بس بترفع عينك في مراتي، لعميك! فاهم؟!
معتز وهو بيمسح الدم من على بقه بوقاحة:
— مراتك؟ دلوقتي بقت مراتك؟! حبيبة دي بتاعتي أنا! إيه.. ما تقوليله يا حبيبة كنا بنعمل إيه مع بعض؟ ولا هو لسه ميعرفش إنك مدام؟ ولا لسه معملش دخلة؟ ريح بالك يا آدم.. انت بتاخد فضلاتي!
حبيبة اتصدمت وذهلت من قذارة كلامه، صرخت فيه:
— انت بتقول إيه يا قليل الأدب يا وقح؟!
وبصت لآدم بدموع ونهتيد:
— والله يا آدم عمره ما مسك إيدي غير دلوقتي، ومسكها غصب عني!
آدم بنبرة هادية بشكل يخوف:
— انتِ بتبرري ليه؟
وبص لمعتز بقرف وقال:
— عمري ما كنت أتصور إنك سافل ومنحط أوي كده! ومن النهاردة تنسى صحوبيتنا لأنك انت اللي نهيتها بإيدك!
سحب إيد حبيبة وخرج، ورجليه بتدك الأرض من كثرة الغيظ.
حبيبة وهي ماشية جنبه ودموعها نازلة كالمطر:
— كذاب والله يا آدم، صدقني مفيش أي حاجة من اللي قالها الزفت ده!
آدم بجمود وهو ماشي بسرعة:
— اسكتي دلوقتي يا حبيبة!
حبيبة بانهيار:
— والله ما في حاجة حصلت بيننا صدقني، ده بيعد كذب!
آدم وقف فجأة وبصلها، وقرّب منها وقال بصوت حاد وقوي بعد ما اتأكد إن الممر فاضي:
— قلتلك اسكتي دلوقتي يا حبيبة! عشان أقسم بالله مش أرجع أخلص عليه بإيديا.. فاهماني؟ أنا بالعافية كابح غضبي دلوقتي!
مشيت حبيبة جنبه وهي ساكتة ودموعها بتنزل من غير صوت، لحد ما وصلوا للعربية.
عايدة وسعاد شافوا وشوشهم المتغيرة وحبيبة اللي عينيها ورمت من العياط.
عايدة بقلق:
— في إيه؟ إيه اللي حصل مالك يا حبيبة بتعيطي ليه؟!
آدم بتماسك مزيف:
— مفيش، أنا بس هوصلكم عشان ورايا عمليات، وحبيبة زعلت عشان العزومة اتكنسلت.. يلا اركبوا.
عايدة بطيبة:
— معلش يا حبيبتي، ده شغله برضه.
وصلهم آدم وهو طول الطريق مابيبصش لحبيبة ولا بيتكلم معاها ولا مع أي حد.. أول ما وصل قدام البيت قال:
— يلا انزلوا.
حبيبة نزلت تجري على السلم، وسعاد وعايدة بيصوا لبعض بقلق:
— لا.. شكل الموضوع فيه حاجة، يارب استر!
حبيبة دخلت أوضتها وقفلت على نفسها الباب بانهيار، مش مصدقة الكلام القذر اللي قاله معتز، وخايفة جداً يكون آدم صدقه.
في الوقت ده، دخل آدم المركز الطبي وهو بيغلي ومش طايق نفسه، لدرجة إنه زعق في السكرتيرة أول ما شافها:
— دكتور آدم..
آدم بعصبية شديدة:
— مش عايز أسمع حاجة ولا أسمع صوت حد! ومحدش يدخلي خالص.. انتِ فاهمة؟!
السكرتيرة بخوف:
— حاضر يا دكتور!
دخل مكتبه، ومسك كل حاجة على المكتب وحدفها في الأرض بغل وتكسير!
السكرتيرة اتخضت ورنت على دكتور عمر فوراً وشرحتله الوضع.
عمر:
— تمام، متخليش حد يدخل عليه وأنا جاي حالا.
جري عمر -اللي كان بيمر على الحالات- وركب الأسانسير ووصل قدام المكتب وسمع صوت التكسير شغال جوة.
السكرتيرة:
— الحقه يا دكتور، من ساعة ما جه وهو عمال يكسر كده!
عمر:
— تمام، متخليش حد يدخل علينا.
دخل عمر وقال بصلابة:
— آدم!
آدم:
— اطلع برة يا عمر! صدقني مش مستحمل كلمة من حد!
عمر:
— مش هطلع يا آدم! وبعدين إيه اللي جرى؟ انت مش كنت خارج انت وعيلتك؟ إيه اللي استجد عشان تكسر مكتبك كده؟!
بص آدم لصورة "حنين" المكسورة على الأرض، وافتكر دموع حبيبة.. حاس بشتات رهيب، قعد على الأرض وجيه يمسك الصورة، فـ عمر مسك إيده بسرعة:
— هتعور نفسك يا آدم!
آدم بصوت مخنوق:
— سيبني يا عمر.. دي صورة حنين اتكسرت.. هي السبب!
عمر:
— مين هي السبب يا آدم؟ إهدى وفهمني!
آدم:
— كله بسبب الزفتة حبيبة! هي السبب اللي خلتني أكسر الصورة!
مسك عمر إيده وقال بجدية:
— إيه اللي حصل؟ فهمني!
حاول آدم يظبط أعصابه ويتنفس بالراحة وقال:
— مفيش يا عمر.. مفيش.
عمر:
— لا فيه يا صاحبي! انت كنت مكلمني ومبسوط من رسالة حبيبة وفخور بيها.. إيه اللي جرى؟!
آدم بغضب:
— اللي جرى إن الزفت معتز لقيته بيضايق حبيبة وماسك إيدها غصب عنها! لا ومش بس كده.. ده قال...
وسكت ومش قادر يكمل.
عمر:
— قال إيه يا آدم؟ فهمني! الزفت ده أي كائن كان اللي قاله انت عارف حقده عليك، وأنا ياما حذرتك منه لأنه بيغير منك!
آدم بصوت يملؤه القهر:
— الزفت ده طعن في شرفي ورجولتي!
عمر بنفي:
— استحالة! هو اه وسخ، بس متوصلش بيه الوساخة لشرف!
آدم:
— لا وصلت! وقف بكل بجاحة يقولي انت بتاخد فضلاتي، وإن أنا وحبيبة كنا مع بعض قبلك!
عمر بغضب:
— ابن الكلب..!
آدم:
— أنا كنت هقتله! لولا بس وزنت العقل عشان مستقبل بناتي وعشان حبيبة مكنتش رحَمته!
عمر بص لآدم بتركيز وقال:
— أوعى تكون صدقت كلمة.. أو جرحت حبيبة يا آدم؟
آدم بسرعة:
— لا طبعا! أصدق إيه؟! بس أنا حسيت بنار في قلبي عشان مقتلتوش، عشان كده جيت هنا علطول ومرضيتش أروح البيت!
عمر:
— وسبت مراتك؟!
آدم:
— خفت عليها مني..
قرب عمر من آدم وقال بتوبيخ أخوي:
— غبي يا صاحبي.. غبي!
آدم:
— ليه بتقول كده؟!
عمر:
— لأن مراتك دلوقتي أكيد فاكرة إنك صدقت كلام معتز! عشان كده سبتها ومشيت!
آدم:
— لا طبعاً، أنا استحالة أصدق الكلام الوسخ ده! بس أنا خفت تشوفني هي والبنات بالمنظر ده!
عمر:
— صدقني ده مش مبرر قصاد اللي هي بتفكر فيه دلوقتي! روح لمراتك يا صاحبي، وسيب حياتك تمشي.. ونظرة عينك دي مش نظرة راجل بيغير على رجولته بس، دي نظرة راجل عشق وحب! سيب قلبك يسيرك يا آدم، وانسى إنك اتجبرت عليها.. صدقني مراتك تستاهل إنك تنسى كل حاجة، حتى حنين تنساها وتفكر في مستقبلك. قوم يا آدم ارجع بيتك وطمّن حبيبة وعرفها إنك مصدقتش.
آدم اتنفس بعمق وقال:
— تمام يا عمر.
سحب جاكيت بدلتو ومشي على طول.
في الوقت ده كله، كانت حبيبة حابسة نفسها في الأوضة وعمالة تعيط، فاكرة إن آدم صدق كلام معتز.
عايدة وسعاد واقفين ورا الباب:
— يا بنتي طيب افتحي وقولي إيه اللي حصل يا حبيبة!
حبيبة من جوة بصوت مخنوق من العياط:
— لو سمحتوا أنا عايزة أنام.. بعد إذنكم خدو البنات معاكم النهاردة وسيبوني لوحدي.
سعاد بحنان:
— ماشي يا حبيبتي، بس إهدي وما تفكريش كتير.
أخدت سعاد البنات ونزلت، وعايدة مشيت وهي قلقانة جداً.
رجع آدم البيت ولقى أمه قاعدة وفاتحة باب شقتها، دخل على أساس إن حبيبة عندها:
— السلام عليكم ورحمة الله وبركاته.
سعاد بزعل:
— وعليكم السلام يا آدم.. إيه اللي حصل يا بني؟ وليه حبيبة بتعيط كده؟ دي من ساعة ما انت مشيت وهي قافلة على نفسها وبتعيط، وطلبت مني أخد البنات وأمها مشيت وهي قلقانة عليها أوي!
آدم بلهفة:
— هي حبيبة بتعيط لحد دلوقتي؟!
سعاد:
— اه وقافلة على نفسها الباب.
آدم:
— طيب خلي البنات معاكي وأنا هطلع أشوفها.
طلع آدم وشقته كانت هادية تماماً والأنوّار مطفية، بس صوت عياط مكتوم طالع من أوضة حبيبة.
قرب آدم من الباب وقال بهدوء:
— حبيبة.. ممكن تطلعي؟ أنا جيت عشان أتكلم معاكي.
حبيبة كانت خايفة جداً إنه يكون صدق الكلام، بس حسمت أمرها وفتحت الباب وخرجت.. عينينها كانت ورمة ومحمرة من كثرة العياط.
آدم رجع خطوة لورا من شكلها اللي يقطع القلب.
حبيبة بجمود ومحاولة لتصنع القوة:
— أنا مش هبرر أي حاجة من اللي قالها معتز.. بس لو حضرتك عايزني أمشي أنا همشي، متتحرجش.. وورقة طلاقي توصلني على بيت ماما!
آدم اتجنن لما سمع كلمة الطلاق طالعة منها بالسهولة دي، وقال بتحكم في أعصابه:
— طلاق إيه اللي بتتكلمي عنه؟!
حبيبة:
— أنا عارفة إن ده حقك تصدق الكلام اللي اتقال.. بس دي آخر مرة هبرأ فيها نفسي: معتز كذاب!
قرب آدم منها ببطء وقال:
— وهو مين قالك إني مصدقه أساساً؟!
حبيبة بدموع:
— حضرتك صدقته! وعشان كده زعقتلي وسبتني قدام العمارة ومشيت!
آدم بنبرة دافية وصادقة:
— أنا مصدقتوش.. وأنا زعقتلك لأني كنت عايز أرجع أخلص عليه بعد كلامه، بس مسكت نفسي بالعافية عشان وجودك وعشان مستقبلي وبناتي.. أنا بعدت عشان خفت عليكِ تتاذي مني لو اتهورت بالمنظر ده.. بس وحياة دموعك وغيظي، لكون مرجع حقك تالت ومتلت!
أول ما سمعت كلامه، نزلت حبيبة على ركبها في الأرض وهي بتعيط بأعلى صوتها، مش مصدقة إنه مصدقها ومطعنش فيها! حطت إيديها على وشها وغرقت في العياط كأن روحها بتتردلها من جديد.
آدم قلبه وجعه جداً عليها، نزل لرستوا وقعد قدامها وقال بقلق وحنان:
— إهدي يا حبيبة.. والله أنا ما صدقت ولا كلمة! ولما زعقتلك كنت عايز أرجع أقتله.. نظرة الخوف اللي شفتها في عينك دحتني يا حبيبة، متوجعيش قلبي.. قومي بقى ومتعيطيش، لأن زعلك ده بيوجعني أنا كمان!
حبيبة وهي بتبصله وسط دموعها:
— أنا مش بعيط عشان زعلانة.. دي دموع الفرحة إنك مصدقتش كلامه! أنا خفت يا آدم.. خفت أوي!
شدها آدم لشوقه وضمتها بقوة، وقال بصوت حنون:
— طول ما أنا عايش، مش عايز أي خوف يدخل حياتك تاني يا حبيبة...انتي غاليه يا حبيبه ومعزتك زي هنا وانتي عارفه كده كويس
اصرتها حبيبه في نفسها وهزت راسها