رواية اقدار مكبلة الفصل الثامن8بقلم فادية النجار
"اللهم صلِّ على سيدنا محمد وعلى آل سيدنا محمد وعلى أصحاب سيدنا محمد وعلى أتباع سيدنا محمد وسلم تسليماً كثيراً"
آدم وهو حاضن حبيبة قال:
- وبعدين إيه يا حبيبة؟ هنفضل كده يعني؟
خجلت حبيبة وابتعدت عن حضنه بكسوف، وقالت:
- أنا آسفة..
حاول آدم يمازحها وقال:
- إيه یعنی؟ مش هتعشينا؟ أنا ميت من الجوع! العزومة اتكنسلت صح، بس هعوضهالك، المهم ناكل أي حاجة دلوقت، ولا تقومي تلبسي ونخرج؟
ردت حبيبة:
- لا أكيد.. بص، انزل عند خالتو هات البنات وهي، وأنا هجهز أكل سريع.
قال آدم:
- طب ما نطلب أكل من بره؟ أنتِ تعبانة.
قالت:
- لا، أنا هعمل صدقني.
آدم:
- ماشي يا ستي.
نزل آدم وخبط على والدته، فتحت وقالت بلهفة:
- حبيبة كويسة يا آدم؟
آدم:
- كويسة يا ست الكل، يلا فين البنات عشان نطلع نتعشى؟ هي بتجهز الأكل.
سعاد:
- لا يا ابني، أكلتهم وناموا خلاص، بلاش تصحيهم لأنهم عيطوا كتير عشان حبيبة كانت زعلانة. بس عايزة أعرف إيه اللي حصل بينكم يا آدم عشان مرتك تنهار كده يا ابني؟
رد آدم:
- مافيش يا أمي، سوء فهم بس وإن شاء الله مش هيتكرر تاني.
سعاد:
- حبيبة اه بنت خالتك وأخت حنين، بس هي طيبة يا ابني وصدقني تستاهل كل خير. بلاش تكون قاسي عليها، البنت مش مخلية في جهدها جهد للبنات ولیا، حتى لو هقولك أكتر من حنين نفسها وأنت شايف ده كويس. اطلع يا ابني لمرتك، ويا ريت تفتكر إن عندك بنات، يعني اللي هتعمله هيترد ليك، فاهم يا آدم؟
شعر آدم بقساوة ما فعله لحبيبة، وقال بهدوء:
- ماشي يا أمي، تصبحي على جنة.
سعاد:
- وأنت من ناسها يا ابني.
صعد آدم للأعلى وهو بيفكر في كلام والدته.ولكن هو يري من سكن قلبه حنين فقط
وجد حبيبة بتظبط عشاء جميل وتحط أطباق جبنة ولانشون وبيض على السفره.
سألته حبيبة باستغرب:
- فين خالتو والبنات؟
آدم:
- البنات ناموا وأمي عشتهم بالعافية لأنهم فضلو يعيطوا عشان كنتِ بتعيطي، وأمي قالت نخليهم بدام ناموا.
قالت حبيبة بتأثر:
- حبايب قلبي، هصالحهم بكرة. اقعد عشان تاكل.
آدم:
- ماشي يا ستي، بس هغسل إيدي، ولا أقولك؟ هغير البدلة وألبس حاجة بيتية وأجي.
حبيبة:
- تمام، على بال ما أحط كوبايتين شاي.
بعد دقائق خرج آدم وهو لابس بنطلون وتيشيرت بيتي، قعد وقال:
- أنا ميت من الجوع!
حبيبة:
- بعد الشر عليك، يلا بقة خلينا ناكل.
قعد آدم وأكل هو وحبيبة وشربوا الشاي. بعدين قال آدم:
- إيه رأيك نتفرج على فيلم؟
حبيبة بسرعة وحماس :
- أكيد! شغله على بال ما اعمل فشار.
جهّزت حبيبة الفشار وخرجت، وجدت آدم قاعد على الكنبة، فجلست هي على الكرسي.
قال آدم بهدوء:
- مكنتش عارف إنك بخيلة كده يا حبيبة!
ردت حبيبة بزهول وزي الأطفال:
- انت تقصد إيه؟ مش فاهمة! وبعدين أنا مش بخيلة والله!
آدم وهو حاسس بمشاعر جميلة ومبسوط بكلامهم:
- قصدي يعني عشان أنتِ اللي عملتِ الفشار عايزة تأكليه لوحدك وحطاه قدامك؟
مسكت حبيبة الطبق وقالت:
- لا والله، أهو اتفضل كله!
آدم:
- لا، انتِ كده عايزة تقولي عليا مفجوع يعني؟
حبيبة:
- لا مش هقول، طيب إيه الحل؟
آدم:
- بصي، الكنبة كبيرة، تعالي اقعدي جنبي وناكل مع بعض.فهو يريد أن يتقبل الحياه معها
فكرت حبيبة في سرها: (إيه يا بت؟ ما أنتِ كنتِ في حضنه دلوقت، احنا هنستهبل ولا إيه؟)
اقتربت حبيبة برعشة في جسدها وجلست على طرف الكنبة. كان آدم سعيد بخجلها وقال:
- إيه يا بنتي؟ أنا مباكلش بني أدمين صدقيني!
نظرت له حبيبة بعدم فهم ووجدته بيضحك عليها. لكن من التوتر والمجهود حسّت بمغص شديد في بطنها، وضعت يدها على بطنها وتغيرت ملامحها لما افتكرت إن الوجع ده مش غريب عليها؛ "البريويد".
قالت حبيبة في سرها: (مش وقتك خالص!)
كان المغص بيزيد، وآدم لاحظ تغير وجهها ودموعها اللي بدأت تنزل.
قالت حبيبة:
- مافيش، أنا هدخل أنام.
مسك إيديها وقال:
- إيه اللي حصل؟ ووشك اتقلب فجأة كده ليه؟
حبيبة:
- مافيش، عن إذنك.
ودخلت أوضتها تجري.
وقف آدم مش فاهم إيه اللي حصل: هل أنا ضايقتها؟ هل عشان ضغطت عليها تقعد جنبي؟ وقعد يفكر، بس كان صوت عياط حبيبة طالع مكتوم من الاوضة.
قال آدم:
- إيه اللي حصل بس؟ أكيد في حاجة.
خبط على الباب ومجهوش رد، ففتح الباب ولقاها ماسكة فوطة وحطاها في بؤها وبتصرخ من الألم.
قرب منها وقال:
- في إيه؟ قومي!
حبيبة ببكاء:
- بطني بتتقطع!
آدم:
- طب قومي نروح المركز هناك، ولا اتعدلي وأنا هكشف عليكِ.
حبيبة:
- لا شكراً، ده مغص وهيروح.
آدم:
- انتِ هبلة؟ إزاي لا؟ قومي يا حبيبة مش هتفضلي موجوعة كده، يمكن الزايدة ولا حاجة!
قالت حبيبة بخجل:
- أصلي عارفة الوجع من إيه.. مش الزايدة.
آدم باستغراب:
- من إيه؟ أنتِ فيكِ حاجة تعباكي يعني؟ أو بتاخدي علاج؟
حبيبة:
- لا بس دي يعني...
آدم:
- يعني إيه؟ في إيه يا حبيبة ما تفهميني!
حبيبة بعياط زياد:
- دي العادي يا آدم.. العادي!
آدم:
- الوجع ده عادي إزاي؟ مش فاهم!
لحظة نسيت حبيبة وجعها وقالت بذهول:
- آدم، أنت متأكد إنك دكتور؟! العادي بتاع كل شهر يا آدم للبنات! افهم بقى!
اندهش آدم أول ما فهم قصد حبيبة وقال بهدوء:
- طيب اهدي، على بال ما أعملك نعناع دافي ولا قرفة.
حبيبة:
- لا ملوش داعي، هي شوية وهيروح الوجع.
آدم:
- لا، هعملك.
جلست حبيبة على السرير وهي بتبكي من الوجع. وبعد شوية جيه آدم وهو ماسك مج كبير نعناع وقال:
- اشربي يا حبيبة وإن شاء الله يخف الوجع.
شربت حبيبة وبالفعل هدئ المغص. قال آدم:
- حاولي تنامي شوية.
حبيبة:
- ماشي.
وشدت الغطاء عليها ونامت وهي خايفة تتوجع تاني.
خرج آدم ولقى تليفونه بيرن، كان عمه الحج مهدي.
آدم:
- إزيك يا عمي؟ كيفك وكيف أخبار البلد؟
مهدي:
- بخير يا دكتور آدم، اتوحشناك قوي! إيه، مش ناوي تيجي نشوفك أنت والبنات؟
آدم:
- لا إزاي؟ إن شاء الله هحاول وأجي.
مهدي:
- لا مافيش حاجة اسمها هتحاول! أني محتاج أتكلم معاك في موضوع، وبعدين المجمع هنا فيه حالات كتير تعبانة ومستنيين جيتك بفارغ الصبر.
آدم:
- خلاص، إن شاء الله يومين كده وهاجي.
مهدي:
- بص يا دكتور آدم، أني هكون بكرة في انتظارك أنت والحاجة أم آدم.
آدم بعد إصرار عمه:
- تمام يا عمي، بكرة إن شاء الله هكون عندك.
رن آدم على عمر اللي كان رن عليه أكتر من مرة عشان يبلغه بسفره للصعيد بكرة.
عمر:
- إيه يا ابني؟ بطمن عليك.
آدم:
- أنا بخير يا عمر متقلقش.
عمر:
- إزاي يا ابني مقلقش؟ وبعدين مرتك صالحتها والدنيا مشيت ولا فيه حاجة حصلت؟
آدم:
- الحمد لله كل حاجة تمام، بس إن شاء الله يمكن أسافر البلد بكرة. عمي لسه قافل معايا عشان الحالات اللي هناك، وهاخد حبيبة وأمي والبنات معايا.
عمر:
- تمام، يبقى كده هنلغي العمليات في المركز على بال ما تيجي بقى.
آدم:
- انت شوف الدنيا، ولو فيه حالة مستعجلة اتدخل أو بلغني، تمام؟
عمر:
- تمام، وأنت حاول تعوض نفسك ومرتك برحلة حلوة بقى!
آدم:
- ليه؟ حد قالك إني رايح مارينا؟ يلا، أنا رايح الصعيد يعني مافيش فسح! وبعدين أنا رايح عشان الشغل، وعمي أصر إني أخد أمي والبنات، وهما لسه أساساً ميعرفوش إني اتجوزت أنا وحبيبة.
عمر:
- طيب ومقولتيلهمش ليه؟
آدم:
- إن شاء الله لما نوصل هقولهم.
عمر:
- تمام يا صاحبي، تصبح على خير.
آدم:
- وأنت من أهل الخير يا عمر.
جلس آدم يفكر ليه عمه عايزه بالسرعة دي، بس قال صبرًا لما نشوف عايز إيه.
نام آدم، وفقت حبيبة على تخبيط على الباب. فتحت بسرعة لقت لين جاهزة وشعرها متظبط.
حبيبة:
- قلب حبيبة! أومال تيتا فين؟ وأنتِ ليه لابسة اللبس ده؟
لين:
- تيتا فتحتلي الباب ووقفت على السلم على بال ما طلعت، واللبس ده عشان هنمشي مع بابا عند جدو مهدي.
علمت حبيبة إن آدم هيسافر الصعيد، وافترضت في نفسها إنه مش عايز ياخدها معاه.
حبيبة:
- طيب يا حياتي.توصلو بسلامه
خرج آدم وجريت عليه لين:
- بابا حبيبي! هنركب الحصان صح؟
آدم:
- آه يا قلب بابا، هتركبي الحصان وتعملي كل اللي نفسك فيه.
نظر آدم لحبيبة وقال:
- انتِ واقفة ليه كده؟
نظرت حبيبة لنفسها وقالت:
- كده إزاي يعني؟
آدم:
- يعني ملبستيش ولا جهزتِ نفسك هي لين مش قالتلك اننا هنسافر الصعيد ؟
حبيبة باستغراب:
- هو أنا هروح معاك؟
آدم:
- مش عايزة تروحي يعني؟ أنا كنت مستني لما تصحي براحتك عشان أقولك، لو بقيتِ كويسة نمشي على طول، بس لو بطنك لسه بتوجعك وعايزة نأجل مافيش مشكلة وهتصل بعمي أبلغه، مع إنه مستنينا لأنه كلمني امبارح وأصر عليا نسافر النهاردة ومقدرتش أرفض.
لين:
- لا وحياتي يا بيبة تعالي معانا! هتشوفي عندهم حصان جميل وبقرة!
فكرت حبيبة: (يعني هو عايزني أسافر معاه؟)
نظر لها آدم وقال:
- ألغي السفر خلاص؟
حبيبة:
- لا ملوش لازمة، أنا بس هروح أجهز نفسي وألم الشنط الخاصة بيا وبالبنات، وحضرتك جهز شنطتك واجي.
وقف آدم في ذهول، فهو لا يستطيع تجهيز أي شنطة، فأمه وحنين من كانوا يقوموا بتجهيزها.
لاحظت حبيبة حيرته وقالت:
- هو فيه حاجة أنا قولتها غلط؟
آدم:
- لا، بس بصراحة أنا مبعرفش أجهز شنطتي، وكنت محتاج مساعدتك عشان تحضريها.
كانت حبيبة عايزة تضحك على شكله، بس قالت بثبات:
- حاضر يا آدم.
نظر آدم للين وقال:
- ليونة، ممكن تروحي عند ناناه وتشوفيها جهزت هي وحنين كده؟
لين:
- حاضر، بس خلصوا بسرعة!
آدم:
- ماشي يا ستي، روحي بس أنتِ.
وقف آدم بخجل من اللي هيتكلم فيه وقال:
- حبيبة، أنا بس عايز أفهمك حاجة، بس هتبقى حاجة إجباري عني صدقيني.
حبيبة:
- مش فاهمة حضرتك تقصد إيه بكلامك ده؟ لو مش عايزني أروح متأزمش نفسك ومتتحرجش، أنا هبلغ خالتو إني أنا اللي رافضة أسافر معاكوا.
آدم:
- لا أنتِ فهمتيني غلط! أنا أقصد يعني... مش هينفع أقول إنك مراتي وكل واحد في أوضه، يعني لازم نقعد في أوضه واحدة.
لوهلة انصهرت حبيبة من كلامه، بس مثلت الجمود وقالت:
- تمام، مش إحنا اتفقنا نكون صحاب؟ على الأساس ده هنتعامل متقلقش.
آدم:
- بجد شكراً لتفهمك، طيب يلا بقى عشان منتأخرش ونلحق الطريق بدري.
حبيبة:
- ماشي تمام، بس ممكن أطلب منك طلب؟
آدم:
- أكيد.
حبيبة:
- بص، طلع الهدوم اللي هتاخدها معاك والشنطة هنا، وأنا هجهز الشنطة هنا. أنا آسفة مش هقدر أدخل أوضتك أنت وحنين.
وتركتة ومشت.
قالت حبيبة لنفسها: (جدعة يا بت يا حبيبة! أومال هو فاكر إيه؟)
بعد دخول حبيبة غرفتها، تذكر آدم كلامه لها لما قالها زمان متقربش من أوضته هو وحنين.
قال آدم في نفسه: (عندها حق، هو اللي أنا قلته سهل؟)
دخل وأخرج الملابس بنفسه والشنطة، ووضعهم على الكنبة.ولكن وجد ورقه مطويه كاد أن يرميها ولكن فتحها وتستمر مكانه من ما قراء