رواية اخترت نفسي الفصل السابع7بقلم هايدي احمد
هاجر / ماما ..انا اطلقت
ام هاجر / يالهوى اتطلقتى ازااى و امتى يا هاجر
ساره/ اهدى بس يا طنط ...استنى ادخل البنات جوه واعملى الى انتى عايزاه
اخدت ساره اسيل وابراهيم اخد نغم ونيموهم جوه
ام هاجر/ ردى يا هاجر ايه الى حصل خلى جوزك يطلقك
هاجر/ انا الى طلبت الطلاق يا ماما
ام هاجر/ ليه يا بنتى ..ليه عملتى كده ليه
عاجر/ كنتى عايزانى اعمل ايه قوليلى كنتى عايزانى استنى ايه تانى منه استناه لما يرمينى انا وبناته فى الشارع عشان خاطرها
ام هاجر/ قولتلك يا بنتى مسمعتيش ..قولتلك الاول بلاش قولتى غلبانه يا ماما قولتلك ولادك قولتيلى الواد يتيم يا ماما قولتلك جوزك قولتى بيحبنى يا ماما
هاجر/ واهو لا طلع بيحبنى ولا بيحب ولاده ولا شايفنا افضل عايشه فى الذل ده لامتى ردى عليا
سكتت والدتها وهى مش عارفه ترد عليها وراحتلها واخدتها فى حضنها وقعدت تطبطب عليها وهى غصب عنها عيطت
طلعت ساره وهى مكسوفه ووراها ابراهيم
ساره / طنط اعذرينا احنا هنمشى احنا عشان الوقت اتاخر وهنيجى نشوفكم بكره ان شاء الله
بعدت هاجر ومسحت دموعها
هاجر/ انا اسفه والله تعبتكم معايا النهارده
ساره/ لا متقوليش كده احنا اخوات يا هاجر
ابراهيم/ لو احتجتى اى حاجه كلمينا يا هاجر انا زى اخوكى برضه
هاجر/ ربنا يخليكم لينا
ام هاجر/ ربنا يجبر بخاطركم يا ابنى ومتشوفوش وحش ابدا
ابراهيم/ يلا تصبحوا على خير
ام هاجر/ وانتم من اهله يا حبابيبى خدوا بالكم من الطريق ومتطولوش علينا
ساره/ عينينا يا طنط خدى انتى بالك من هاجر عشان تاخد بالها من بنتها ربنا يكون فى عونك
حضنتها ام هاجر وودعتهم هى وهاجر ومشيوا
قفلت والدتها الباب وبصتلها وهى سابتها ودخلت اوضة بناتها
ام هاجر/ لا حول ولا قوه الا بالله
♥️♥️♥️♥️♥️♥️♥️♥️♥️♥️♥️🙂🙂🙂
فى بيت العيله
وصل ابراهيم وساره البيت وركنوا العربيه ونزلوا
ساره/ اجيب ساجد ولا ماما هتصحى
ابراهيم/ مش عارف بس هى مرنتش عليا اكيد نايمه سيبيه ينام معاها اليله دى
ساره/ خلاص ماشى ابقى انزله بدرى
جم عشان يطلعوا بس سمعوا والدته بتفتح الباب
ابراهيم/ ايه يا ماما لسه صاحيه ليه
ام احمد/ وانا هيجيلى نوم بعد الى سمعته
بص ابراهيم لساره بقلق ورجع بصلها
ابراهيم / سمعتى ايه بس
ام احمد/ ايه الى اخوك عمله ده وانت كنت فين وهاجر هاجر والبنات فين يا ابراهيم
ابراهيم/ والله يا ماما ما عارف اقولك ايه انا زهقت فيه
ام احمد/ يعنى ايه.. طلقها بجد وانت مجبتش مرات اخوك ليه نصالحهم على بعض يا ابنى بناتهم ذنبهم ايه دول لسه صغيرين
ساره/ بصراحه يا طنط الغلط كله عند احمد كفايه بس انه كان هيمد عليها فى المستشفى قدام الناس وساب بنته تعبانه ومشى
ام احمد/ لا حول ولا قوه الا بالله انا مش عارفه الواد ده جراله ايه بس مكنش كده ده كان بيخاف عليهم من الهوا
ابراهيم/ متقلقيش نفسك انتى الى عايزه ربنا هيكون يلا ادخلى نامى والصبح ربنا يحلها ان شاء الله
ام احمد/ يارب يا ابنى انت بس انزلى بدرى عشان تقول لابوك المصيبه دى انا اخاف اقوله
بصت ساره لابراهيم بقلق
ابراهيم/ حاضر يا ماما ادخلى انتى بس عشان الجو برد
ساره/ هاتى ساجد يا ماما عشان ميصحكيش
ام احمد/ حاضر يا حبيبتي بس ابقى نزليه عشان اقعد معاه
ساره/ عينيا ليكى
جابته و طلعت ساره ورا ابراهيم وهو شايل ساجد وكانوا لسه هيطلعوا شقتهم بس طلعت ميار من شقتها
ميار/ ايه ده ساره ازيك يا سلفتى
ساره بصوت واطى / يادى الليله للى مش معديه
جت ساره ترد بس استغربت لما شافتها طالعه بهدوم نومها وبرقت لابراهيم
ميار/ ازيك يا ابراهيم حمد لله على السلامه
ابراهيم/ احم..الله يسلمك
رد ابراهيم ووشه فى الارض وبعدها طلع السلم وفضلت ساره واقفه
ميار/ ماله ابراهيم ايه هنعضه ولا ايه
ساره/ لا يا حبيبتي متقلقيش.. متحصنين
ميار/ ههه لسه دمك خفيف مقولتوش ليه انكم جايين كنت فرشتلكم الارض رمل
ساره / لا متتعبيش نفسك يا قلبى مش ناقصه عفار
ميار / امم امال هى فين سلفتك قصدى... ضرتى
ساره/ اسكووتى مهى مبقتش ضرتك ولا سلفتك بقت طليقة جوزك ولا متعرفيش
ميار / لا اله الا الله ليه كده بس ايه الى حصل
ساره/ نعمل ايه بقى.. شيطان ودخل بينهم وبينى وبينك كويس انه دخل عشان يدى كل حاجه قيمتها
رفعت ميار حاجبها وحطت ايديها فى وسطها
ميار/ بعد اذنك بقى يا حبيبتي اصل ...سايبه جوزى جوه لوحده وانتى كمان اطلعى لجوزك وسبينا من الى ملهمش جوز دول
ساره/ والله ربنا رحمهم .. يلا تصبحى على خير
ميار/ وانتى من اهله يا وش الخير هههى
هزت ساره رأسها بقلة حيله وطلعت لشقتها وقفلت ميار الباب جامد
♥️♥️♥️♥️♥️♥️♥️♥️♥️♥️♥️♥️♥️♥️
عند هاجر
كانت نايمه جمب بنتها وهى سرحانه ومش قادره تنام
جت والدتها وقعدت قصادها وهى مربعه ايديها
هاجر/ فى ايه بس يا ماما
ام هاجر/ مستنياكى تقوليلى ايه الى حصل
هاجر/ هيكون ايه الى حصل ..حصل الى المفروض يحصل من زمان
ام هاجر/ وايه الى جد دلوقتى
هاجر/ الى جد انى خلاص زهقت ومعدتش عندى طاقه وعايزه اربى البنتين دول
ام هاجر/ ازاى بقى قوليلى هتربيهم ازاى بعيد عن ابوهم
هاجر/ برضه هتقوليلي ابوهم ..ابوهم مين الى ميعرفش عنهم حاجه ولا حتى عايشين ازاى وهم فى نفس البيت
ام هاجر/ بس بس وطى صوتك البنات يصحوا ..قومى تعالى الصاله.. قومى
قامت وراها بقلة حيله وراحوا الصاله وقعدوا
ام هاجر/ يا بنتى احنا ملناش حد انا كان كل املى يبقالك ضهر انتى وبناتك الدنيا مبترحمش
هاجر/ وانا كده كان ليا ضهر وانا كل يوم شيفاه بعينى بيكسرنى وبيذلنى .
ام هاجر/ يا بنتى ياما دقت على الراس طبول والله ياما شوفنا وبيتجوزا بالاربعه
هاجر/ زمان.. مش زى دلوقتى زمان كانت الراجل ليه كبير يحكمه لكن ده ليه مين ..كبيره بيقوله اعمل كمان وانا هقفلك عايزانى اتحامى فى مين بس اعيش لمين هناك العيشه مش اكل وشرب بس يا ماما
جت والدتها تتكلم وقفهتها
هاجر/ انتى عايزانى استنى ايه وانا شايفاها كل يوم نازله لابسه وعينها فى عينى وهى بتقول احمد جوزى جابلى ده.. احمد عملى ده وهم يسقفولها وانا..ازاى جوزك حاله يدوب جوزك مش قد المصاريف جوزك فاتح بيتين اصرفى انتى ...لا بتشتغلى اقعدى من الشغل انتى مش راجل وده كله عشان الهانم ترضى طبعا مهى ام الواد ما انا لو ربنا كان كرمنى بعيل كان عاملنى احسن من كده فضل يزرع الفكره فى راسه لعند ما كره بناته وكرهنى
طبطبت والدتها على رجليها
ام هاجر/ عندك الى احسن من العيل وعندك ضهر احسن من كل الرجاله عندك ربنا الى مبيسيبش حق حد
هاجر/ ونعم بالله
ام هاجر/ قومى ..قومى غيرى كده ونامى وبكره ربنا يحلها قومى
قامت هاجر وفضلت والدتها تدعيلها بصلاح الحال
♥️♥️♥️♥️♥️♥️♥️♥️♥️♥️♥️♥️♥️♥️
تانى يوم الصبح
عند احمد
ميار/ احمدد حبيبي اصحى يا روحى
فاق احمد وفتح عينه وابتسملها
احمد/ صباح الخير
ميار/ صباح الخير يا قلبى ..يلا عشان نفطر سوى
احمد/ لا هروح الاول اغير واشوف اسيل
ميار/ اسيل مين.. اسيل مع امها
بصلها احمد بتركيز
احمد/ هى هاجر فين هاجر مجتش
ميار/ اه مجتش ..اخوك ومراته راجعين لوحدهم امبارح
شال احمد الغطا وطلع من الاوضه وهى وراه
ميار/ استنى بس رايح فين الوقت لسه بدرى
سابها احمد وراح شقته ودخل يدور عليهم بس الشقه كانت على حالتها من امبارح
خرج ونزل تحت عند والدته وخبط على الباب
فتحت والدته واستغربت
ام احمد/ فى ايه ياابنى متدخل
احمد/ هاجر جوه
ام احمد/ هاجر..لا يا حبيبي ها..
ابو احمد/ فيه ايه يا ام احمد ...مالك واقف كده ليه وبتسال على مراتك ليه
بص احمد لوالدته وهى خايفه تتكلم
ابو احمد بصرامه/ مالكم فى ايه ...مراتك فين يا احمد
احمد/ شكلها عند اهلها يا حج
ابو احمد/ عند اهلها ازااى ..وراحت امتى ومين الى وداها وانت متعرفش ازاى
احمد/ ابراهيم الى وداها
بصله والده ورجع بص لوالدته ومتكلمش
وراح طلع تليفونه ورن على ابراهيم واستنى لما فتح
ابو احمد/ الو...انزلى تحت دلوقتى عايزك
قفل التليفون وشاور لاحمد عشان يقعد
دخل احمد وهو متردد وقعد على الكنبه
ام احمد/ تعالى يا حبيبي افطر الاو...
شاورلها ابو احمد عشان متتكلمش وقعدوا يستنوا ابراهيم لعند ما نزل كان نازل بسرعه وهو باين عليه القلق وكانت عينه حمرا من قلة النوم
ابراهيم السلام عليكم..
كلهم/ وعليكم السلام
ابراهيم / خير يا بابا في ايه
ابو احمد بص له / مرات اخوك فين
بص ابراهيم ليهم كلهم واتكلم
ابراهيم / عند ..اهلها يا بابا
ابو احمد / وبناته ..بناته فين
ابراهيم/ احم..مع امهم
قام ابوه بعصبيه وقرب منه
ابو احمد / واخوك اخوك يعرف ان مراته هتروح لاهلها هى وولادها
ابراهيم/ بصراحه لا هى مقالتش وانا كمان مقولتش
بص ابوه لاحمد ورجع بص لابراهيم وقال/
الست الى تمشى من طوعها من غير راجل متقعدش معاه لحظه تانى.. تروح دلوقتى تقولها الكلمتين دول وتجيب البنات وهى خليها قاعده عند اهلها لعند ما جوزها يأمر يا تيجى يا تفضل قاعده هناك علطول
ابراهيم/ بس
ابو احمد/ من غير بس متجادلش
ابراهيم/ بس احمد طلقها يا بابا
اتصدم ابوه وبص لاحمد وهو باصص فى الارض
ابو احمد/ طلقها يعنى ايه...