رواية ديون النبض الفصل الخامس والخسون55 بقلم مروة صياح

رواية ديون النبض 
الفصل الخامس والخسون55
بقلم مروة صياح 
كان عندي أمل وهدف واحد مسيطر على تفكيري في الفترة دي، وهو إني أقدر أقف على رجلي تاني.

ما كنتش عايزة مجد يفضل قلقان عليّا بالشكل ده، ولا يفضل شايل همي في كل خطوة بخطوها. كنت نفسي أفاجئه، وأشوف الفرحة في عينيه لما يلاقيني واقفة قدامه وبقدر أتحرك من غير مساعدة.

علشان كده، بقيت مهتمية جدًا بالعلاج الطبيعي والتمارين المنزلية، ومواظبة على متابعتي مع الدكتور باستمرار. ما كانش ورايا في الأيام دي غير إني أستعيد قدرتي على الحركة.

كان المفروض أعمل العلاج الطبيعي تلات أيام في الأسبوع بس، لكن أنا زودت عدد الأيام وكثفت التمارين من نفسي، علشان كنت مستعجلة أشوف نتيجة، وكنت نفسي أحس بتحسن في أسرع وقت.

ورغم انشغالي بعلاجي وبنفسي، ما قطعتش تواصلي مع دكتورة جيهان وسارة. كنت مواظبة إني أكلمهم وأطمن عليهم من وقت للتاني.

لحد ما في مرة اتصلت بسارة، وأول ما ردت عليّا حسيت إن صوتها مختلف تمامًا عن كل مرة.

وعد: إزيك يا سارة؟ عاملة إيه؟

سارة: الحمد لله يا وعد.

كان صوتها مرتجف بشكل واضح، وكلامها متقطع، كأنها بتاخد نفسها بالعافية.

وعد: سارة، إنتِ مالك؟ صوتك تعبان ليه؟

سكتت لحظة، وبعدها ردت:

سارة: أبدًا، أنا كويسة... يمكن الحمل بس.

وعد: إنتِ في الشهر الكام دلوقتي؟

سارة: أنا بدأت خلاص في السابع.

وعد: يعني دخلتي التلت الأخير من الحمل. بس إنتِ مالك؟ متابعة حملك كويس؟ وصحتك أخبارها إيه؟

كانت بتكلمني، وحسيت من ردودها إنها مش مرتاحة، وإنها بتهز راسها كأنها بتجاوبني من غير ما تقول حاجة.

وعد: سارة، ردي عليّا... إنتِ بخير؟ كويسة فعلًا؟

سارة: آه، آه يا وعد، أنا كويسة.

وعد: طب متابعة الحمل منتظمة؟ والدكتور مطمنك؟

سارة: آه، الحمد لله.

وعد: بس أنا حاسّة إنك تعبانة على غير العادة، صوتك مش زي كل مرة بكلمك فيها.

سكتت، وفي اللحظة دي بدأت أحس إن فيه حاجة مخبياها عني. مش مجرد تعب عادي أو إرهاق حمل، كان فيه حاجة أكبر من كده، وطريقة كلامها كانت بتأكد إحساسي.

وعد: طب ماما جيهان عاملة إيه؟

سارة: كويسة الحمد لله.

وعد: هي في المستشفى دلوقتي؟

سارة: لأ، موجودة.

وعد: طب ممكن تديني ماما جيهان أسلّم عليها؟

وفعلًا أخدت منها التليفون، وبعد لحظات سمعت صوت دكتورة جيهان.

د. جيهان: إزيك يا وعد؟ عاملة إيه يا حبيبتي؟

وعد: الحمد لله يا ماما، إنتِ عاملة إيه؟

د. جيهان: الحمد لله. طمنيني، مجد عامل إيه؟

وعد: كويس الحمد لله.

د. جيهان: وإنتِ عاملة إيه؟ مفيش أخبار جديدة؟ رجلك أخبارها إيه؟ فيه تحسن؟

سكتت لحظة، وبعدها قررت أقولها الحقيقة.

وعد: بصراحة يا ماما، أنا متابعة مع الدكتور وبعمل العلاج الطبيعي، وكمان بقيت أعمل تمارين مكثفة في البيت، بس مجد ما يعرفش أي حاجة عن الموضوع ده.

د. جيهان: طب ليه ما بلغتيهوش؟

وعد: بصراحة، نفسي أعمله مفاجأة. نفسي ييجي يوم يلاقيني واقفة قدامه وبمشي وباتحرك بطبيعتي من غير ما يكون متوقع ده.

سكتت شوية، وبعدها سمعتها بتقول بصوت مليان ندم:

د. جيهان: أنا عمري ما هسامح نفسي يا وعد... عمري ما هنسى اللي عملته فيكي.

وعد: عملتي إيه يا ماما؟

د. جيهان: كل اللي حصل، وكل الوجع اللي اتسببّتلك فيه.

وعد: اللي فات مات يا ماما. إحنا ولاد النهارده، وصدقيني أنا نسيت كل ده. في الأول والآخر ده نصيب، وحتى لو حضرتك كنتِ سبب في اللي حصل، فأنا متأكدة إنك ما كنتيش تقصدي تأذيني بالشكل ده. أنا فاهمة إن كان عندك أهداف وتفكير معين، ويمكن وقتها كنتِ شايفة إن ده الصح.

سكتت، وبعدها قالت بتردد:

د. جيهان: وعد، أنا نفسي أكلمك في موضوع، بس مش عارفة أبدأ إزاي. وخايفة تفهميني غلط.

وعد: موضوع إيه يا ماما؟ في حاجة حصلت؟

د. جيهان: استني ثانية.

سمعتها بتتحرك، وبعدها سكتت شوية، كأنها بتبص حواليها وتتأكد إنها لوحدها ومحدش سامعها.

وبعدين نادت:

د. جيهان: سارة...

اتصدمت من الاسم اللي قالته فجأة.

وعد: مالها سارة؟ حصلها حاجة؟

د. جيهان: لأ، اسمعيني يا وعد. بصراحة فيه سر أنا مخبياه عنك، وإنتِ لازم تعرفيه. أنا مش هسامح نفسي لو فضلت ساكتة أكتر من كده. مهما حاولت أخبي، الموضوع في يوم من الأيام هيتعرف، وأنا خايفة من الأيام اللي جاية.

حسيت بقلق شديد، وقلت لها:

وعد: ماما جيهان، إنتِ كده قلقتيني. ممكن تقوليلي فيه إيه بالضبط؟

د. جيهان: هقولك على كل حاجة... سارة مريضة يا وعد.

وعد: سارة مالها؟ تعبانة من إيه؟

سكتت لحظة، وبعدها قالت:

د. جيهان: إنتِ دكتورة وعارفة طبيعة المرض ده. سارة عندها اضطراب خطير في كهرباء القلب... متلازمة QT الطويلة الوراثية.

أول ما سمعت اسم المرض، اتسمرت مكاني.

اتسعت عيني، وما قدرتش أرد للحظات. كنت بحاول أستوعب اللي سمعته، وأربط الكلام ببعضه.

وبعد صمت، سألتها بصوت مشدوه:

وعد: اضطراب في النظام الكهربائي للقلب؟ طب... هي عارفة الكلام ده؟

د. جيهان: لأ، ما كانتش تعرف. أنا اللي كنت متابعة علاجها من زمان، وكنت بديها العلاج من غير ما تعرف طبيعة المرض. هي كانت فاكرة إن الموضوع مجرد مشكلة بسيطة، وإن الأدوية دي علشان تنظم ضربات قلبها.

وعد: من زمان؟ يعني هي عندها المرض ده من إمتى؟

د. جيهان: من سنين يا وعد. كانت بتحصل لها نوبات اضطراب في ضربات القلب، وأحيانًا إغماء مفاجئ. وإنتِ عارفة كويس إن النوع ده من الاضطرابات ممكن يكون خطير جدًا، وفي بعض الحالات ممكن يؤدي لتوقف مفاجئ في القلب والوفاة.

فضلت ساكتة، مش قادرة أستوعب إن سارة عايشة بكل اللي حصل، وفي نفس الوقت شايلة مرض بالشكل ده من غير ما تعرف حقيقته.

وعد: طب ومجد؟ مجد يعرف حاجة عن الموضوع ده؟

د. جيهان: لأ، مجد ما يعرفش أي حاجة عن مرضها. وأنا كمان كنت مخبية عنها الحقيقة لحد ما عرفت بنفسها، وده كان سبب تعبها النفسي في الفترة الأخيرة.

وعد: طب ليه يا ماما؟ ليه خبيتي عنها كل السنين دي؟

د. جيهان: كنت هقولها إيه يا وعد؟ هقولها إن عندها مرض ممكن يعرّض حياتها للخطر في أي وقت؟ هقولها إنها ممكن تعيش حياتها عادي، وفجأة تتعرض لأزمة ما نعرفش نتيجتها إيه؟

هي نفسها تعيش زي أي بنت. تحب وتتجوز، وتحس إن ليها بيت وزوج بيحبها وأسرة تخصها. علشان كده كنت مصممة إن مجد يتجوزها.

كنت عارفة إن حالتها ممكن تتغير في أي وقت، وإن ممكن ييجي يوم ما تبقاش موجودة معانا. طبعًا الأعمار بيد الله، ومحدش يعرف الغيب، لكن إنتِ دكتورة وعارفة خطورة المرض ده.

وعد: طب وحملها؟ الحمل ممكن يأثر عليها؟

د. جيهان: الحمل نفسه مش بالضرورة يأثر على حالتها، وأنا متابعة معاها طبيًا، لكن أنا خايفة عليها من أي مضاعفات. المرض ده محتاج متابعة دقيقة، وخصوصًا في الفترة المحيطة بالولادة وبعدها. أنا قلبي مش مطمن يا وعد.

فضلت ساكتة، ومش عارفة أقولها إيه.

د. جيهان: أنا متابعة حالتها باستمرار، ولحد دلوقتي حالتها مستقرة، لكن اللي مقلقني جدًا هو نفسيتها. من ساعة ما عرفت حقيقة مرضها وهي مش زي الأول. بقيت خايفة، وبقيت حاسة إن مستقبلها مش مضمون.

وسكتت لحظة، وبعدها كملت بصوت مكسور:

د. جيهان: أنا خايفة عليها جدًا... وخايفة من الأيام اللي جاية.

في اللحظة دي بدأت أفهم حاجات كتير.

فهمت ليه كانت دكتورة جيهان مصممة على جواز سارة من مجد، وليه كانت بتضغط في كل مرة، وليه كانت شايفة إن مجد لازم يكون جنبها.

حسيت من كلامها إنها نفسها تشوف مجد قريب من سارة، وإن وجوده جنبها ممكن يطمنها ويخفف عنها خوفها. يمكن هي كمان خايفة تكون الأيام اللي جاية من أصعب أيام حياتها.

ما بقيتش عارفة أرد عليها بإيه.

من ناحية، مجد أخيرًا بدأ يهدى، وبدأ يستعيد توازنه بعد كل اللي حصل، وما كنتش عايزة أرجعه تاني لنفس دائرة الضغط والتعب.

ومن ناحية تانية، ما قدرتش أتجاهل إن سارة إنسانة مريضة، وإنها محتاجة اللي يقف جنبها، خصوصًا بعد ما عرفت حقيقة مرضها.

فضلت ساكتة شوية، لكن جوايا كان فيه قرار بدأ يتكوّن.

مجد لازم يعرف.

وعد: ماما جيهان، أنا هكلم مجد. لازم يعرف طبيعة مرض سارة، وما ينفعش تفضلي مخبية عليه أكتر من كده.

د. جيهان: بس يا وعد...

وعد: اسمعيني يا ماما. إنتِ بتقولي إن سارة عرفت الحقيقة، وإن نفسيتها تعبانة وخايفة. وده في حد ذاته ممكن يزيد من معاناتها. أنا مش بقول إن وجود مجد هيعالج مرضها، لكن وجوده جنبها، وإحساسها إنه مهتم بيها ومش سايبها لوحدها، ممكن يفرق معاها نفسيًا جدًا.

يمكن لما يحسّسها إنه جنبها فعلًا، تقدر تتجاوز جزء من الخوف اللي جواها.

سكتت دكتورة جيهان، وما كانتش قادرة ترد.

كنت حاسة إنها نفسها تطلب مني الكلام ده، لكنها ما كانتش قادرة تطلبه مني بشكل مباشر، خصوصًا بعد كل اللي حصل بيني وبين مجد.

لكن بالنسبة لي، الموضوع بقى أكبر من أي حسابات شخصية.

بقيت حاسة إن لازم مجد يقرب من سارة، خصوصًا وهي في الحالة دي. ما كنتش عايزة في يوم من الأيام أبص لنفسي وأحس إني عرفت الحقيقة وسكتّ، أو إني كان بإمكاني أعمل حاجة وما عملتهاش.

وفي نفس الوقت، ما كنتش عايزة مجد يشيل ذنب تجاه زوجته، وأم ابنه أو بنته اللي لسه مستنياها.

بصرف النظر عن أي حاجة حصلت بيننا، سارة إنسانة، ومن حقها تلاقي اللي يقف جنبها وقت خوفها ومرضها.

عدّت الأيام، وسارة دخلت في الشهور الأخيرة من الحمل.

كانت بتتابع حملها بصورة طبيعية في الظاهر، لكن دكتورة جيهان كانت متابعاها باهتمام شديد، وبتسأل عنها باستمرار، وبتطمن على صحتها وحالتها، من غير ما تكشف السبب الحقيقي وراء قلقها.

أما أنا، فكان موضوع سارة شاغل تفكيري بشكل كبير.

كنت بفكر في كلام دكتورة جيهان، وفي إن مجد لازم يعرف، وفي الطريقة اللي ممكن أفتح بيها معاه الموضوع من غير ما أرجعه تاني لنفس الضغوط اللي بدأ يخرج منها.

لحد ما في يوم، كنت نايمة جنب مجد.

صحيت على حركته وهو بيقوم من السرير، وبيستعد يلبس علشان يروح شغله والمستشفى.

فتحت عيني، ولقيته بيقرب مني بابتسامته العريضة اللي دايمًا كانت بتخليني أبتسم من غير ما أحس.

مال عليّا، وطبع قبلة حنينة على جبيني، وبعدها قبلة على شفايفي.

مجد: أنا ماشي يا حبيبتي... عايزة أي حاجة؟

حاولت أعتدل في نومتي، فمد إيده وساعدني لحد ما قدرت أقعد.

بصيتله وابتسمت، وقلتله بدلال:

وعد: مجد... هتوحشني أوي. ممكن ما تتأخرش؟...
أبتسم وبعدها خرج من الشقه وعيني عليه لحد لما غاب عنها...

بعد ما مجد سابني ونزل علشان يروح شغله والمستشفى، فضلت قاعدة مكاني، سرحانة في قربه مني وحبه ليا، وفي كل التفاصيل الصغيرة اللي بقت جزء من يومي معاه.

لكن وأنا قاعدة، حسيت إني بحرك رجلي بهدوء.

في البداية ما اهتمتش، لحد ما بصيت لتحت، وفجأة عيني اتسعت!

صوابع رجلي كانت بتتحرك!

اتجمدت مكاني للحظة، وبعدها شلت الكوفرتة من على رجلي بسرعة، وفضلت أبص لها وأنا بحاول أحرّكها مرة تانية.

وفعلًا... اتحركت!

يمكن ما قدرتش أحرّك رجلي من مكانها، لكن صوابع رجلي كانت بتتحرك قدامي، ودي كانت أول مرة أحس فيها إن فيه استجابة حقيقية بعد كل الفترة دي.

من فرحتي، مسكت التليفون واتصلت بماما بسرعة.

وعد: ماما، إلحقيني! تعالي بسرعة!

أول ما سمعت صوتي، اتخضت هي وياسين، ودخلوا عليّا بسرعة.

ماما: في إيه يا وعد؟ مالك يا حبيبتي؟ حصل إيه؟

ياسين: إنتِ كويسة يا وعد؟ في حاجة حصلت؟

كنت قاعدة مذهولة، وعيني بتلمع من الفرحة، وابتسامة كبيرة بدأت تظهر على وشي.

بدأت أحرك رجلي بهدوء قدامهم.

فضلوا باصين لي، وبعد لحظات قالوا بذهول:

ماما: وعد... إنتِ فعلًا قادرة تحركي رجلك؟!

بصيت لهم وأنا مش قادرة أخفي فرحتي.

وعد: أيوه يا ماما... بصي!

وحركتها تاني، وتالت.

يمكن وقتها ما كنتش قادرة أقف عليها أو أدوس بوزني، لكن بالنسبة لي كانت بداية أمل كبير جدًا. بداية حسيت معاها إن رجلي ممكن ترجع تستجيب، وإن فيه احتمال حقيقي إني أقف عليها من تاني.

كنت فرحانة بشكل مش قادرة أوصفه، وحاسة إن كل المجهود والتعب اللي بذلته في العلاج الطبيعي بدأ يجيب نتيجة.

ماما قربت مني وساعدتني أحاول أقوم.

كان نفسي أقف، حتى لو لثانية واحدة بس!

وبالفعل، سندت عليها وحاولت أرفع جسمي، ولقيت نفسي قدرت أقف على رجلي للحظات.

لكن من شدة التعب وعدم ثباتي، رجعت قعدت بسرعة على السرير.

ماما وياسين كانوا باصين لي، مش مصدقين اللي حصل.

أما أنا، فكنت حاسة إن قلبي هيخرج من مكانه من الفرحة.

في اللحظة دي، كل اللي فكرت فيه إني لازم أكمل علاجي وألتزم بتماريني، علشان أقدر أقف وأمشي من تاني، وأفاجئ مجد باللحظة اللي مستنياها من زمان.

عدّت الأيام، وكان واضح عليّا إني متوترة ومشغولة بحاجة.

مجد كان ملاحظ ده جدًا، وكل شوية يسألني:

مجد: وعد، إنتِ كويسة؟ مالك؟ حاسس إن بالك شارد، وإنك مشغولة بحاجة. فيه حاجة مضايقاكي؟

وكنت دايمًا أهرب من أسئلته وأرد عليه:

وعد: لا يا مجد، مفيش حاجة. أنا كويسة وبخير.

لكن الحقيقة إن ماما وحازم ورغد وياسين كانوا عارفين كل حاجة، وكانوا كل ما يشوفوني يبتسموا لبعض من تحت لتحت.

وكنت حاسة إن رغد نفسها تقول لمجد وتفرحه بالخبر، لكن كل ما تلمح إنها هتتكلم، أبصلها بنظرة تحذير وأفهمها إني هزعل منها لو قالت له.

فكانت تبتسم وتسكت.

كنت مصممة إن المفاجأة دي تكون مني أنا، وإن مجد يكون أول واحد يشوفني وأنا واقفة على رجلي.

وبعد تلات أيام، وبعد ما مجد نزل شغله، قررت أحاول أقوم لوحدي من على السرير.

سندت على إيدي، وبدأت أرفع جسمي بهدوء، ولحد ما لقيت نفسي واقفة!

المرة دي ما اكتفيتش بالوقوف.

حاولت أتحرك.

خطوة... وبعدها خطوة تانية... وتالتة.

لكن ما قدرتش أكمل أكتر من كده، واضطريت أقف مكاني وأستند علشان أحافظ على توازني.

وفي اللحظة دي دخلت ماما عليّا، وأول ما شافتني اتفاجئت.

ماما: وعد! إنتِ اللي نزّلتي رجلك ووقفتي؟ ما استنيتيش لما أجي أساعدك ليه؟!

بصيت لها، والفرحة مالية وشي، وقلت لها وأنا بضحك:

وعد: يا ماما، أنا اتحركت! مشيت تلات خطوات... تلات خطوات يا ماما! بس ما قدرتش أكمل أكتر من كده. هانت يا ماما، هانت!

قربت مني وأخدتني في حضنها بحذر، وقالتلي وهي متأثرة:

ماما: هانت يا وعد، الحمد لله يا حبيبتي. الحمد لله إنك هتدوسي على رجلك تاني. ربنا يتم شفاكي على خير.

وعد: يا ماما، الأيام بتعدي بسرعة رهيبة، وإحنا قربنا من معاد السفر اللي مجد محدده. أنا مش عايزة أسافر خلاص، أنا شايفة إن السفر ما بقاش ليه لازمة. كل الصعب عدى، ويمكن كمان يومين تلاتة وأقدر أقف على رجلي فترة أطول، وأبدأ أتحرك وأمشي زي الأول.

بصت لي وابتسمت، وقالت:

ماما: إن شاء الله يا حبيبتي، إن شاء الله ربنا يفرح قلبك.

وفعلًا، خلال التلات أيام اللي بعدهم، بدأت أركز أكتر في تماريني، وأكثف جلسات العلاج الطبيعي تحت متابعة الدكتور.

ومع الوقت، بقيت أقدر أقف وأتحرك وأنا مستندة على الحيطة، وأمشي خطوات أكتر من الأول.

ما كنتش رجعت لطبيعتي مية في المية، لكن التحسن كان واضح جدًا، وأكبر بكتير من اللي كنت متخيلاه.

لحد ما في يوم كنت قاعدة وسطهم، وبصيت لهم وقلت:

وعد: أنا الحمد لله حاسة إني بقيت كويسة جدًا دلوقتي. وبفكر أبلغ مجد.

بصوا لبعض وابتسموا.

حازم: مجد هيتصدم لما يشوفك كده! مش هيصدق نفسه من الفرحة.

رغد: ده ممكن يفضل باصصلك ومش مستوعب إنك واقفة قدامه!

ابتسمت وقلت لهم:

وعد: طب إيه رأيكم؟ إني هطلع شقتي لوحدي؟

بصوا لي باستغراب.

ماما: لوحدك؟ إزاي يا وعد؟!

وعد: لا، أنا هقدر إن شاء الله.

وفعلًا بدأت أتحرك بهدوء، وأستند على الحيطة كل شوية، وهما ماشيين جنبي، عينيهم عليّا، ومستعدين يلحقوني لو حسوا إني هقع.

لحد ما وصلت لباب الشقة.

فضلت أتحرك لحد ما وصلت لباب الأسانسير، ولقيت ياسين واقف جنبي.

ياسين: استني طيب، أطلع معاكي وأسندك وأساعدك.

وعد: لا يا ياسين، خليك. أنا عايزة أطلع لوحدي، وأستنى مجد فوق. نفسي أول حاجة يشوفها لما يدخل تكون إني واقفة على رجلي.

بص لي وابتسم، وقال:

ياسين: طيب، هخلي رغد تطلع تستناكي.

هزيت راسي بالرفض.

وعد: لأ يا ياسين، أنا عايزة أعملها لوحدي.

بص لي وقال بنبرة فيها قلق وابتسامة:

ياسين: وبعدين معاكي إنتِ؟ اسمعي الكلام بقى.

لكن أنا أصريت، وفضلت على قراري.

وفعلًا طلعت، وفتحت باب شقتي ودخلت.

كان فاضل حوالي نص ساعة على ميعاد رجوع مجد.

كنت عايزة أول حاجة يشوفها تكون مختلفة تمامًا عن كل يوم.

مش بس يتفاجئ إني واقفة على رجلي، لأ... كنت عايزة يحس بزوجته اللي مستنياه، واللي نفسها تستقبله بنفسها بعد ما كان دايمًا هو اللي بيشيلها ويساعدها في كل حاجة.

كنت حاسة إني قصرت معاه كتير في الفترة اللي فاتت، وإن نفسي أرجع أهتم بنفسي وبحالي، وأستقبله بالشكل اللي يليق بيه وبفرحتي بوجوده.

دخلت الحمام، وأخدت دش دافي بسرعة، وبعدها غيرت هدومي.

اخترت فستان سواريه رقيق، لونه وشكله كانوا هاديين وجميلين. كان بحمالات رفيعة، ونص ضهري بيظهر منه، وقصير من قدام وطويل من ورا.

لبسته، وبدأت أسرح شعري وأسيبه مفرود ورا ضهري، وبعدها حطيت ميكياج هادي وخفيف.

وقفت قدام المراية أبص لنفسي، وابتسمت.

كنت حاسة إن الوقت بيجري بسرعة، وإن مجد خلاص على وصول.

فضلت محتارة...

أقعد على الكنبة وأفاجئه أول ما يدخل؟ ولا أستناه في أوضة النوم، وأخليه يلاقيني واقفة قدامه؟

لكن وأنا لسه بفكر، سمعت صوت مفتاح الباب.

مجد وصل!

اتحركت بهدوء، ووقفت ورا الباب، وفضلت مستنياه.

دخل مجد الشقة، وكعادته أول ما بيدخل، عينه بتدور عليّا وعلى المكان اللي متعود يلاقيني قاعدة فيه.

مجد: وعد... وعد!

كنت واقفة مكاني بابتسامة، ومستنية اللحظة اللي يفتح فيها باب الأوضة.

وفعلًا، بعد لحظات فتح الباب، وأول ما عينه وقعت عليّا، وقف مكانه.

فضل باصص لي بانبهار واضح، وابتسم ابتسامة واسعة.

مجد: وعد! إيه الجمال ده كله؟ أنا مش قادر على كده!

بصيت له وابتسمت.

كان منبهر بشكلي لدرجة إنه ما خدش باله أصلًا إني واقفة على رجلي!

قرب مني بسرعة، وأخدني في حضنه، وطبع قبلة طويلة على شفايفي، وبعدها رجع بص لي وقال:

مجد: كنتِ مخبية الجمال ده كله فين يا حبيبتي؟

فضلت أبص له وأنا مبتسمة، ومش مصدقة إنه لسه ماخدش باله.

مجد: إنتِ بتضحكي على إيه؟

وعد: أبدًا، مفيش حاجة.

وبحكم إنه متعود يشيلني في كل مرة، شالني وقعدني على السرير، من غير ما ياخد باله من أي حاجة.

بصيت له وقلت:

وعد: مجد، ممكن تغمض عينك؟

بص لي باستغراب، وقال:

مجد: أغمض عيني ليه؟ أنا خلاص شوفتك!

ضحكت، وما قدرتش أسيطر على نفسي من الفرحة.

وعد: غمض عينك يا مجد بقى!

مجد: هو فيه مفاجأة تانية ولا إيه؟

ضحكت أكتر، وقربت منه، وحطيت إيديا على عينيه وبدأت أغمضهاله بنفسي.

وبعد ما اتأكدت إنه مش شايف، اتحركت من جنبه بهدوء، وسندت نفسي لحد ما وقفت على رجلي.

وقفت قدامه، وقلبي بيدق بسرعة من كتر الفرحة والترقب.

وعد: خلاص... افتح!

فتح مجد عينيه.

وفي اللحظة دي، ملامحه اتجمدت تمامًا!

فضل باصص لي، وبعدها غمض عينيه وفتحهم كذا مرة، كأنه مش مصدق الصورة اللي قدامه، أو بيحاول يستوعب إذا كان اللي شايفه حقيقة ولا لأ.

وبص لي بذهول:

مجد: وعد... اللي أنا شايفه ده صح؟! إنتِ فعلًا واقفة على رجلك؟!

ضحكت وقلت له:

وعد: أيوه يا مجد... أيوه! إنت ما أخدتش بالك خالص!

فضل باصص لي، وكأنه فجأة رجع بذاكرته للدقايق اللي فاتت.

لف بعينيه ناحية باب الأوضة، وبعدها رجع بص لي بسرعة.

مجد: استني... إنتِ كنتِ واقفة عند الباب؟!

ما قدرتش أمنع نفسي من الضحك.

وعد: أيوه يا دكتور، كنت واقفة عند الباب. إنت بس مش كويس في الملاحظة خالص!

مجد: وعد، ردي عليّا! إنتِ كنتِ واقفة عند الباب فعلًا؟!

وعد: أيوه يا مجد، كنت واقفة.

قرب مني خطوة، وعينيه لسه مش مصدقة اللي بيحصل.

مجد: يعني إنتِ اتحركتي؟! وقفتي على رجلك من تاني؟!

بصيت له وابتسمت، وقلبي مليان فرحة وأنا شايفة رد فعله.

وعد: أيوه يا مجد... أنا وقفت على رجلي من تاني!

مجد ما كانش مصدق إن أنا فعلًا وقفت على رجلي. وبعد ما شالني ولف بيا الاوضة، كانت الضحكة مرسومة على وشه، والسعادة باينة في عينيه، كأنه طاير من الفرحة لمجرد إني بقيت واقفة على رجلي تاني.

بص لي وسألني بلهفة:

مجد: لكن إزاي ده حصل؟

بصيت له وقلت له:
وعد: بصراحة، أنا كنت بتابع مع الدكتور، وحازم كان بيوديني. وكمان كنت بعمل جلسات العلاج الطبيعي والتمارين في البيت، لحد ما ربنا كرمني وقدرت أقف على رجلي فعلًا. طبعًا لسه مش بتحرك زي الأول، لكن الحمد لله إني بقيت قادرة أقف تاني. وكنت عايزة أعملهالك مفاجأة.

بص لي وقال بابتسامة مليانة سعادة:
مجد: وأنا سعيد جدًا إنك بقيتي واقفة على رجلك، لكن أنا كنت عايز أشاركك أنا في الخطوات دي. كل حاجة تخصك أنا عايز أكون مشارك فيها.

بصيت له وقلت: وعد: أنا كان نفسي أشوف نظرة عينيك وفرحتك بيا وأنا بدوس على رجلي تاني، وده كان أهم عندي من أي حاجة. خصوصًا إنك ما بترحمش نفسك في الشغل، ومش عايزة أحملك فوق طاقتك.

بص لي باستغراب وقال:
مجد: وعد، إزاي بتفكري كده؟ إنتِ أهم حاجة عندي من كل حاجة، من شغلي ومن نفسي.

مجد: وعد أنت زعلتيتي ازاي تخبي عني حاجه زي كده...
أنت شايفاني مقصر في حالتك يا وعد...

رديت بسرعه عليه وقلت له
وعد: لاء يا مجد ما تقلش كده... بالعكس كنت عاوزه أعملهالك مفاجأه... وما كنتش عاوزه اتعبك معايا وانت مضغوط في شغلك جدا...
مجد بص لي وقال:
ازاي يا وعد انت عندي اهم من نفسي واهم من اي حاجه..
قربت منه وقلت له بدلال.

وعد: خلاص يا ماجده ما تزعلش مني عشان خاطري انا كان هدفي اني ما اتعبكش معايا واعملها لك مفاجاه...
وبعد كده ضحكت وقلت له..

وعد: خلاص كده نلغي بقى السفر...

ضحك، وبعدها قال:
مجد: يعني أنا كنت مرتب إن إحنا نسافر علشان تتعالجي.

ضحكت، وهو سكت شوية، وبعدها قال: مجد: على العموم، ماشي يا وعد.

بصيت له وسألته: وعد: هو إنت زعلان؟

بص لي بسرعة وقال: مجد: والله أبدًا. إنتِ فعلًا أسعدتي قلبي جدًا، يا وعد. أنا عايز أقولك إني حاسس كأن روحي اتردت لي من جديد لما شوفتك بتقفي على رجلك تاني.

ابتسمت وقلت له: وعد: طيب خلاص، الأيام اللي فاتت عدت. استعد بقى إن إحنا نخرج مع بعض، ومش هنضيع يوم واحد لحد ما أنا أزهق!

بص لي وضحك وقال: مجد: لا، مش دلوقتي خالص.

بصيت له بزعل مليان دلال وقلت: وعد: ليه يا مجد؟ مش عايز تخرج معايا؟

مجد: مش هنا.

وعد: يعني إيه؟

مجد: يعني إحنا هنسافر زي ما إحنا مخططين.

استغربت كلامه وقلت:
وعد: هنسافر ليه؟ ما أنا خلاص بقيت كويسة.

مجد: وده يمنع إني أخد أجازة من الشغل وأرتاح شوية؟ بدل ما نسافر علشان العلاج، هنسافر علشان حاجة تانية.

بصيت له باستغراب وقلت: وعد: يعني إيه يا مجد؟

قرب مني وطبع قبلة على شفايفي، وبعدها قال بابتسامة: مجد: لشهر العسل. أنا كنت مستني لما تقفي على رجلك ونبدأ حياتنا مع بعض بجد.

بصيت له وأنا مكسوفة وقلت: وعد: يعني اللي فات ده كله كان هزار؟

مجد: مش هزار قوي، بس خلاص يا وعد. أنا فعلًا نفسي أسعدك، ونفسي أديكي حقوقك كلها كاملة.

قلت له باستفهام: وعد: يعني إيه؟

مجد: يعني أنا وإنتِ هنعمل فرح كبير، وهنسافر ونخرج في كل مكان مع بعض. أنا عايز أكون موجود معاكي في كل مكان.

بصيت له وقلت: وعد: مجد، وشغلك؟

بص لي بضحكة وقال:
مجد: شغلي! أنا بقولك شهر عسل، وإنتِ تقوليلي شغل!

ضحكت وقلت له: وعد: طب ممكن تأجل الكلام ده دلوقتي؟ نخليها في الأجازة الكبيرة.

هز راسه وقال: مجد: لا، وفي الأجازة الكبيرة كمان هيبقى لينا سفرية تانية. لكن أنا خلاص رتبت كل حاجة، وإحنا هنسافر بعد يومين.

وبص لي وقرب مني وقال:

مجد: واعملي حسابك إن الأسبوعين الأجازة اللي أنا أخدتهم في أول جوازنا ما كانوش كفاية خالص.

بصيت له باستغراب وقلت: وعد: يعني إيه؟

مجد: يعني أنا كده كده مضيت إني هاخد أجازة، ورتبت كل حاجة على كده. إحنا هنسافر بعد يومين، فجهزي نفسك لشهر العسل.

وعد: يا مجد، أنا...

بصيت له وابتسمت، وما قدرتش أخبي فرحتي. كنت حاسة إن ربنا بيعوضنا عن كل الأيام الصعبة اللي عدينا بيها، وإن الأيام الجاية مستنيانا فيها فرحة وسعادة يمكن عمري ما حسيت بيها قبل كده.
تعليقات



<>